1 Pool otal baal a mbal pii, bu ayɛɛn bubu: «Baan-ngoo a mɛ̃, mɛ̃ ngyɛɛ kwɛn mɛ̃ nkal y'epfuũ bvi ngesɛ ke nkwel a Nziã tiil nonɔ̃ ŋã.» 2 Ngaa-a-Nziã wu ɔ̃nɛn Ananias otam b'áli tsotsoo ye Pool ndiri abɛɛl ndɛ k'ɔ̃nywã. 3 Obobɔ, Pool olieel ndɛ bubu: «Wu àbɛɛl yɛ Nziã, yɛ wɛn onge ebɔɔ ki akel eyuɛ̃ li fuu*. Ki ebvi yɛ nsɛn oŋɔ̃, me ndɔɔ yi atsiil ndɔɔ a mɛ̃ m'emfa ki etam ngel. Kɛn a yam fel ngel, ŋ'etam yɛ mɛ̃ obɛɛl!» 4 B'áli oŋɔ̃ ayɛɛn ndɛ ndiri: «Yɛ too ngaa-a-Nziã wu ɔ̃nɛn ɛ̃tswɛ!» 5 Ndɛ obveel bubu: «Baan-ngoo, mɛ̃ k'eyɛɛ wɛn ndɛ oli ngaa-a-Nziã wu ɔ̃nɛn wɛ. Ke ngwel wɛ, ákel onse ɔ̃nkaan a Nziã bubu: "Oyɛɛ ke yɛɛn obi-obi me mfam a yam e yɛ wɛ."✝»

6 Onge bɛn ndɛ áyɛɛ kwɛn baal bibi onse mbal áli Asaduseyɛ̃, bakyɛ Afalisaye, ndɛ obiool ke nkwel a bɔ bubu: «Baan-ngoo, mɛ̃ ndi Ɔ̃falisaye, wu eburu Afalisaye! Okɛɛn abiri mɛ̃ nonɔ̃ ke mbal, me ndɔɔ yɛn mɛ̃ ebeta kaã wɛn baal b'ákwi-ákwi akieel asiool!» 7 Ŋ'eyɛɛn ndɛ obobɔ, ɛ̃tsuun ɛ̃bvi mpɛ̃-a-mpɛ̃ Afalisaye y'Asaduseyɛ̃. Mbal bu ekab nzuru ebaal bviaal. 8 Ke ngwel wɛ, Asaduseyɛ̃ abeyɛɛn ndiri b'ákwi-ákwi kieel k'asiool wɛ, ãnzwel k'ãli wɛ, ɔ̃fel hɛ̃ k'ali wɛ. Kɛn Afalisaye abekiool ãndɔɔ omɔ̃ mbueel. 9 Nkyal yi kokɔ ebvi. Ayiool b'ãngel b'áli onse nkel a Afalisaye atɛɛn abvi obee bam kiningi ndiri: «Bee k'emwɛn obi si ngɔmɔ̃ b'esi mbuul wu wɛ. Owɛɛl ɔ̃fel ngɔmɔ̃ wuo ãnzwel ngãmɔ̃ ãyɛɛn ye ndɛ.»

10 Onge bɛn, nkyal ékewɛɛn kɛn owɛɛn, kapiri obal owɛɛl bɔ ayetsɔɔ Pool m'etswel etswel. Ndɛ bu atam ambwel-mbwel k'asool, me ndɔɔ yi ambaal Pool onse bɔ, bvool abveel ndɛ onse ekɔɔ.

11 Me tsia wu onɔɔn, Mfam opal ola Pool, bu ayɛɛn ndɛ ndiri: «Kal ye mpɛn. Emfa ngemɔ̃ ki eyɛɛn yɛ me ndɔɔ a mɛ̃ ke Yelusalem, emfa kiki hɛ̃ ebvaan yɛ àyeyɛɛn me ndɔɔ a mɛ̃ ke Lom.»

12 Ŋ'etsi bviil, Ayuda bakyɛ akuru mfoo. Bɔ alab ɔ̃kyel wɛn bɔ k'akoo k'adza wɛ, k'akoo k'anywã hɛ̃ wɛ, tiil ye k'ebam bɔ Pool. 13 Baal b'ákuru mfoo oyɔ áli ãku-ãnã (40) y'esiɔ. 14 Bɔ ayebɔɔ amfam b'angaa-a-Nziã y'akuul-kuul, alieel bɔ ndiri: «Bee elab ɔ̃kyel ke nkwel a Nziã wɛn bee k'eliin eluɔ wɛ, tiil ye k'ebam bee Pool. 15 Obobɔ, me b'otal byɛ, ekuru mfoo ye baal a mbal, eyɛɛn kapiri a ambwel-mbwel wɛn aya byɛ ye Pool, onge bɛn byɛ edzii k'etal ndɔɔ a ndɛ ngesɛ-ngesɛ. Me b'otal bee, bee emeewal ɔ̃yɛɛl wu ebam ndɛ ye k'etɔ ndɛ ŋã.»

16 Ŋ'esa oŋɔ̃, muaan-nkyel a Pool oyoo nsia a mfoo oyɔ. Ndɛ oyɛn k'ekɔɔ ki ambwel-mbwel, osam, bu awi Pool nsia oyɔ. 17 Obobɔ, Pool oti ngɔmɔ̃ onse ambiri b'ambwel-mbwel mbel, bvool olieel ndɛ bubu: «Biri nsam a bɔɔl yi ola kapiri, ke ngwel wɛ ndɛ oli ye ndɔɔ yi aliaal ndɛ.» 18 Mbiri a ambwel-mbwel oyɛn ye nsam a bɔɔl ola kapiri, bu alieel ndɛ bubu: «Pool wu mbuul a bwal oti mɛ̃ mbel, olieel mɛ̃ ndiri mbiri nsam a bɔɔl yi ola yɛ, ke ngwel wɛ ndɛ oli ye ndɔɔ yi aliaal yɛ.» 19 Kapiri osiin nsam a bɔɔl me kuɔɔl, oyɛn ye ndɛ me pyɛ, bu afuul ndɛ ndiri: «Ndɔɔ yi eyɛɛn yɛ mɛ̃ mã?» 20 Ndɛ obveel ndiri: «Ayuda amaakuru mfoo yi aluɔɔn yɛ kwɛn ɔ̃suu, yɛ ya bɔ ye Pool ke mbal. Bɔ asa onge bɛn, bɔ adzii k'atal ndɔɔ a ndɛ ngesɛ-ngesɛ. 21 Kɛn oyɛɛ ke kiool bɔ wɛ, ke ngwel wɛ baal ãku-ãnã (40) y'esiɔ ayebva ndɛ edzel. Bɔ alab ɔ̃kyel wɛn bɔ k'akoo k'adza wɛ, k'akoo k'anywã hɛ̃ wɛ, tiil ye k'ebam bɔ ndɛ. Meba ŋã, bɔ amaawal ɔ̃yɛɛl, ayii ebekiaal kɛn ãtsam ã yɛ.» 22 Obobɔ, kapiri olieel ndɛ ndiri abee ndɔɔ oyɔ mbuul oliaal. Ke mbee oŋɔ̃, ndɛ oyɔɔl ndɛ oyɛn.

23 Kapiri oti baal buaal onse ambiri b'ambwel-mbwel mbel. Ndɛ olieel bɔ bubu: «Ebvool ambwel-mbwel ɛ̃nkam mviaal (200), ye baal ɛ̃kuun-nsiaan (70) b'anɔɔn ke ywel aswebval, ye baal ɛ̃nkam mviaal (200) b'atyal ãyuo. Bɔ àwal ɔ̃yɛɛl wu ayi bviil li Sedzale me lio li bva wa tsia. 24 Eyɛɛl aswebval hɛ̃ me ndɔɔ a Pool, kwɛn byɛ ebiri ndɛ nzuru kɛɛ-kɛɛ ola mfam Felikese.» 25 Ke mbee oŋɔ̃, kapiri oswɛn ɔ̃nkaan ndiri:

26 «Mfam Felikese, mɛ̃ wu Kolode Lisias mbio yɛ! 27 Mbuul wu èyuɔɔl mɛ̃ yɛ wu, Ayuda asiin ndɛ, bvool ákebii k'abam ndɛ. Ŋe ngyoo mɛ̃ kwɛn ndɛ oli mbuul a Lom, mɛ̃ nsam ongwel a ndɛ y'ambwel-mbwel a mɛ̃, bvool mvuul ndɛ me mviɔɔl ɛ̃ bɔ. 28 Onge bɛn mɛ̃ ekedzii k'eyɛɛ ngesɛ-ngesɛ elyal ki éfɛn bɔ ndɛ, mɛ̃ mbiri ndɛ ke mbal a bɔ yi nɛn. 29 Mɛ̃ mwɛn kwɛn bɔ áfɛn ndɛ m'ãndɔɔ m'ãtal ãngel ã bɔ. Kɛn elyal k'éli wɛ ki abam ndɛ wuo alɔ ndɛ bwal. 30 Alieel mɛ̃ ndiri bɔ amaakuru mfoo yi abam ndɛ. Obɔ otsɛn bɛn kɛn alili ŋã, mɛ̃ ngyuɔɔl yɛ ndɛ. Mɛ̃ ntam b'afɛn ndɛ wɛn ayebva ndɛ mbal ola yɛ.»

31 Ambwel-mbwel asi m'átam bɔ osa: Bɔ awel Pool bvool abiri ndɛ tsatsa tiil bviil li Ãntipatilis. 32 Ela esiool, ambwel-mbwel abvool ekɔɔ e bɔ, ayɔɔl b'áli ke ywel a aswebval ayɛn ye Pool. 33 Ŋ'etɔ baal obɔ Sedzale, bɔ awi mfam Felikese ɔ̃nkaan, bvool asiil Pool me mviɔɔl ɛ̃ ndɛ. 34 Ke mbee a ŋ'etsiɔ mfam Felikese ɔ̃nkaan, ndɛ ofuul Pool etswi e nsie ki efi ndɛ. Ŋ'eyoo ndɛ kwɛn ndɛ oli Ɔ̃fi-Silisi, 35 ndɛ olieel ndɛ ndiri: «Mɛ̃ èyoo yɛ ŋ'ètɔ baal b'afɛn yɛ.» Ndɛ bu atam k'akwɛɛ Pool onse nzɔ a Elode*.