1 Ke mbee oŋɔ̃, Pool ombal Atɛn, bu ayɛn Kolinte. 2 Okɔ, ndɛ omwɛɛn y'Ɔ̃yuda ngɔmɔ̃ wu abeta m'Akilas, ɔ̃fi-etswi e nsie ki Ponte. Ndɛ áyi alili oŋɔ̃ k'áfi Itali y'ɔ̃kal a ndɛ Pilisile, ke ngwel wɛ ɔ̃kwɛn Kolode átam Ayuda bueel k'ambal ke Lom. Pool onam ye bɔ. 3 Ɔ̃sal a kuɔɔl a Pool áli wuwu ye wa bɔ, wu abetuu ãnzɔ mã m'ebaan bvi anyam. Obɔ otsɛn bɛn ndɛ oyekal ola bɔ, bɔ bu asal mboo mɔ̃. 4 Tsoo bwɛn a tsoo li saba, Pool ákewal oyɛɛn ke nzɔ a ãbuɛɛn, bvool ákesa mpɛn yi aswɛɛl Ayuda y'Agelek ãtsam.

5 Me lio li eyi Silas ye Timote k'afi Maseduaan, Pool owel lio e ndɛ lueel m'otee o Nsia a Nziã. Ndɛ ákesuo ke nkwel Ayuda wɛn Yeso oli Mãsia. 6 Kɛn Ayuda k'ákekiool ndɛ wɛ, bvool áketoo ndɛ. Obobɔ, ndɛ okweel ɔ̃fel wu ekɔ e ndɛ, bvool olieel bɔ bubu: «Yɔɔl etsob okyɛ ebva nkal ɛ̃tswɛ ɛ̃ byam! Mbyel k'ebekal yi mɛ̃ wɛ. Bɛɛn meba ŋã, mɛ̃ èyi ola baal bɛn k'Ayuda wɛ.» 7 Ndɛ ombal ke mboo oyɔ, bu ayɛn ola mbuul ngɔmɔ̃ wɛn nkuũ Titihus Yusitus. Mbuul ondɛ k'áli Ɔ̃yuda wɛ, kɛn a ndɛ ákelweel Nziã, bvool nzɔ a ndɛ éli tsotsoo a nzɔ a ãbuɛɛn. 8 Kilisipus wu mfam a nzɔ a ãbuɛɛn okiool Mfam, ndɛ ye yam e ndɛ lueel. Afi-Kolinte bibi b'ákeyoo Pool akiool bvool awel opongo.

9 Tsia ngɔmɔ̃, Mfam olieel Pool onse emwɛn bubu: «Bee ye buɔ okal! Yɛɛn kɛn oyɛɛn, bee pi okal. 10 Ke ngwel wɛ, mɛ̃ ndyam ndi ye yɛ. Mbuul wu andɔɔl kuɔɔl nkal a yɛ m'osa o yɛ obi k'ali wɛ, nzal-a-ŋɛn bibi onse bviil li ali ba mɛ̃.» 11 Pool okal ke Kolinte mvel ngɔmɔ̃ y'etswel m'otee b'Endɔɔ e Nziã.

12 Me lio li éli Ngaliɔ̃ mfam a etswi e nsie ki Akayi ki ke nsɛn a okwɛn o Lom, Ayuda ayɛn Pool mfoo, bu abiri ndɛ ke mbal. 13 Bɔ afɛn ndɛ bubu: «Ngaburu wu abetam baal k'alweel Nziã m'emfa kyɛn ãngel k'ãtam wɛ.» 14 Ŋ'eyii ebii Pool k'ayɛɛn, Ngaliɔ̃ olieel Ayuda bubu: «Okɛɛn al'eli etsob wuo ndɔɔ yi enɛn, mɛ̃ ekeewal lio li ekeeyoo byɛ, byɛ b'Ayuda. 15 Kɛn onge bɛn eli ɛ̃tsuun me ndɔɔ ãyɛɛn, y'ãnkuũ, ye ngel a byam, ndɔɔ oyɔ etal byam. Mɛ̃ ke nzii k'ekal ntwel a ãndɔɔ omɔ̃ wɛ!» 16 Ndɛ bu atswɛɛl bɔ ke mbal. 17 Obobɔ, bɔ bueel ayiool me Sositɛn wu mfam a nzɔ a ãbuɛɛn, bu abvi obɛɛl ke nkwel a baal a mbal. Kɛn a Ngaliɔ̃ k'asiɔɔl ndɔɔ wɛ.

18 Pool okal kɛn ke Kolinte lio li ela, ke mbee oŋɔ̃ ndɛ olɛɛl andoo a dzii, bu awel ãsua m'oyi o Sili, ndɛ bwɛn a Pilisile y'Akilas. Ndɛ ál'akie mfu ke Sankele, ke ngwel wɛ ndɛ ál'alab ɔ̃kyel ke nkwel a Nziã. 19 Ŋ'etɔ bɔ k'Efedze, ndɛ osiil Pilisile y'Akilas, oyɛn nzɔ a ãbuɛɛn, bu ayii atsuun y'Ayuda okɔ. 20 Bɔ aluɔɔn ndɛ k'akal oŋɔ̃ ãtsoo bibi, kɛn a ndɛ k'adzii wɛ. 21 Ndɛ olɛɛl bɔ y'ãyɛɛn m'ɔ̃nywã bubu: «Okɛɛn Nziã odzii, mɛ̃ ekieel eyebvool ola byɛ.» Ndɛ ombal Efedze m'ãsua, 22 obwel ke Sedzale, bu ayɛn Yelusalem m'oyebio b'Ebvɔɔn, ke mbee oŋɔ̃ ndɛ oyɛn Antioswe mã Sili. 23 Ndɛ okal muaan-lio onse bviil olɔ, bu abvool. Ndɛ obwel ke Ngalati ye Filidzi m'owɛɛl b'ayio bueel.

24 Ɔ̃yuda ngɔmɔ̃ wɛn nkuũ Apolos wu Ɔ̃fi-alekesandele, áyi Efedze. Ndɛ áli ɔ̃yɛɛn wu ɔ̃nɛn, wu áli y'oyɛɛ b'Ɔ̃nkaan a Nziã ngesɛ. 25 Áyiool ndɛ k'anɔɔn nkuul a Mfam. Y'ãŋã mbueel, ndɛ ákeyɛɛn bvool ákeyiool ãndɔɔ m'ãtal Yeso ye nzyal yueel, oŋɔ̃ ŋɛn opongo b'éyɛɛ ndɛ kɛn a bo Dzaã. 26 Ndɛ obvi oyɛɛn y'onzɔɔ̃ onse nzɔ a ãbuɛɛn. Ŋ'eyoo Pilisile y'Akilas ndɛ, bɔ awel ndɛ, bu abiri ndɛ ola bɔ, me ndɔɔ yi asuo ndɛ nkuul a Nziã ngesɛ-ngesɛ. 27 Ke mbee oŋɔ̃, onge bɛn ndɛ ákedzii k'ayi Akayi, andoo a dzii awi ndɛ mpɛn yi ayi okɔ, bɔ akel ayio b'etswi e nsie okyɛ ɔ̃nkaan kwɛn bɔ ayɔɔ ndɛ ngesɛ. Ŋ'etɔ ndɛ okɔ, ndɛ osi obvɛ bibi me baal b'ayii akiool me nyiĩ a Nziã yi nɛn. 28 Ke ngwel wɛ, ke nkwel a baal bueel, y'onzɔɔ̃ bueel, ndɛ ákebee m'ékeyɛɛn Ayuda. Ndɛ ákesuo bɔ onse Ɔ̃nkaan a Nziã ndiri Yeso oli Mãsia.