1 Ŋ'etɔ bee kɛɛ-kɛɛ, alieel bee ndiri nkuũ a esanga okyɛ Malate. 2 B'ákekal k'esanga okyɛ ayɔɔ bee bam ngesɛ. Bɔ ayɔɔ bee tsotsoo a mbaa yi nɛn yi éndɛɛl bɔ me ndɔɔ yɛn mvel wa bibi ákendwɔɔ, bvool mfyɛ ékesa. 3 Pool otwel pfoo e nkwii yi nkɛɛ, m'olɔ o yɔ onse mbaa. Mpel ngɔmɔ̃ ayeyɔɔ mbaa, opal onse yɔ, bu andɛɛl ndɛ me kuɔɔl. 4 Ŋ'emwɛn baal b'esanga okyɛ ntaal atsuu lyal-a-lyal me kuɔɔl e ndɛ, bɔ alieel bam-a-bam ndiri: «Taa-taa bam, mbuul wu ɔ̃bam a baal ali, nzal-a-ŋɛn onkyam ŋɛn ndɛ obvuul m'ãdza, nziã wa dzu k'awa ndɛ nkuul yi akal mwiĩ wɛ.» 5 Kɛn a Pool okweel ntaal ondɛ onse mbaa, eluɔ si ngemɔ̃ k'esi ndɛ mpuru wɛ. 6 Baal áketsam ndiri ndɛ nzuru ol'ebiin, wuo ol'okwi bam alili oŋɔ̃. Kɛn a bɔ akieel lio bibi, amwɛn kwɛn ndɔɔ yi mbi si ngamɔ̃ yi etɔ me ndɛ pyɛ. Bɔ bu aswɛɛl ãtsam, abvi oyɛɛn ndiri Pool nziã ali.

7 M'opal obɔ, éli y'ekɔɔ ngemɔ̃ ki mfam a esanga okyɛ wɛn nkuũ Pubilihus. Ndɛ wu áyɔɔ bee, bvool áwi bee lɔɔ y'ondoo bueel ãtsoo ãtyel. 8 Tal a ndɛ áli bɔ me ndɔɔ a bal ye tsob li ãdza-ãdza. Pool osam onse nzɔ a ndɛ, obuɛɛn me ndɛ, ondɔɔl ndɛ mviɔɔl, bvool oboo ndɛ. 9 Obobɔ, anga-ãluu bakyɛ b'esanga okyɛ ayi hɛ̃ ola Pool, bɔ bu abvuul. 10 Awi bee dzuun lam bibi. Ŋ'eyii eyi bee, bɔ abuun bee bvi éli bee ye kɔɔ e bvɛ.

11 Bee al'émbal oŋɔ̃ ke mbee a nswii tyel, bu eyɛn m'ãsua m'Alekesandele, mɛn nkuũ Diosikules. Lio li mfyɛ ébwel ãsua omɔ̃ ke buu ngelemɔ̃ li esanga okyɛ. 12 Bee esiɛɛn ke bviil li Silakuse, bu elaal ãtsoo ãtyel oŋɔ̃. 13 Bee embal oŋɔ̃, eyɛn me nzal-a-nzal, bu etɔ bviil li Lengio. Ela esiool, mfel wa nsɛn obvi opob, m'ãtsoo mbuaal bee etɔ bviil li Pudzoles. 14 Oŋɔ̃, bee emwɛn andoo, b'aluɔɔn ola bee kwɛn bee ekal ãtsoo nsiaan ye bɔ. Okyɛ emfa ki éyɛn bee Lom. 15 Andoo a bviil olɔ ábɔɔ ãnsia ã bee. Bɔ bu ayemwɛɛn ye bee tiil ke Yu li Apihus bvool tiil ke mboo yi ata m'«Ãnzɔ-m'anzii-ãtyel». Ŋ'emwɛn Pool bɔ, ndɛ otuɛɛn Nziã, bvool obɔɔ mpɛn.

16 Ŋ'etɔ bee Lom, awi Pool nkuul yi akal me pyɛ ye mbwel-mbwel wu ákekiaal ndɛ. 17 Ke mbee ãtsoo ãtyel, Pool oti amfam b'Ayuda mbel k'abvɔɔn. Ŋ'ebvɔɔn bɔ, ndɛ obvi bɔ oliaal bubu: «Baan-ngoo, mɛ̃ ki nsi yam e bia-byɛ wuo onkɔɔ b'ankiɔɔn a bia-byɛ pyɛ. Kɛn a asiin mɛ̃ ke Yelusalem, bu awi me mviɔɔl ɛ̃ baal a Lom. 18 Ŋ'efuul bɔ obɔ mɛ̃ ɛ̃mfuul, bɔ amwɛn kwɛn mɛ̃ yi mbi yi nsi yi awa mɛ̃ etumbu ki epfu pyɛ. Bɔ bu akuru k'ayɔɔl mɛ̃. 19 Kɛn Ayuda abee. Mɛ̃ bu mwɛn kwɛn ebvaan mɛ̃ nsɔɔ kwɛn Sedzaal atsiil ndɔɔ oyɔ. Ke yam, mɛ̃ k'eli y'ãtsam m'efɛn baal a myam wɛ. 20 Obɔ otsɛn b'esɔɔ mɛ̃ nkuul yi emwɛn byɛ bvool eyɛɛn ye byɛ, ke ngwel wɛ okɛɛn akuru mɛ̃ ãmpaa mã, me ndɔɔ a mbuul wu eta Isalayel kaã me ndɛ.»

21 Bɔ abveel ndɛ ndiri: «Bee k'eyɔɔ ɔ̃nkaan si ngɔmɔ̃ wu ofi Yude me ndɔɔ a yɛ wɛ. Muaan-ngoo si ngɔmɔ̃ hɛ̃ k'ayewa bee nsia wuo ayeyɛɛn ndɔɔ yi mbi me ndɔɔ a yɛ wɛ. 22 Kɛn a bee edzii k'eyoo k'eyɛɛn yɛ m'etsam yɛ m'ɔ̃nywã a yam. Ke ngwel wɛ bee eyɛɛ wɛn ãmboo mbueel baal abeyɛɛn obi me nkel yi ekuru yɛ nzuru me yɔ oyɔ.»

23 Bɔ akuru lɔɔ ye ndɛ. Me tsoo li esɛɛn bɔ, bɔ ayemwɛɛn ye ndɛ bam bibi ke lɔɔ e ndɛ. Onse ãyɛɛn ã ndɛ, ndɛ ákeyɛɛn me ndɔɔ Okwɛn o Nziã. M'ɛ̃nkaan mi ãngel ã Moyize y'ɛ̃nkaan mi aliaal-ɛ̃kiɛɛn a Nziã, ndɛ ákesa mpɛn kwɛn ãtsam ã bɔ ãswɛɛl emfa me b'otal Yeso. Ndɛ osi obobɔ fa epal tiil ãnkunkwal. 24 Bakyɛ akiool m'ékeyɛɛn ndɛ, bakyɛ k'akiool wɛ. 25 Ŋ'eyii eyi bɔ, bɔ k'áli ɔ̃nywã ngɔmɔ̃ wɛ, Pool olweel kɛn a bubu: «Ɔ̃fel wu Ɔ̃nsensal áli y'ɔ̃dzoo ŋ'élieel ndɛ ankiɔɔn a byɛ m'ɔ̃nywã wu ɔ̃liaal-ɛ̃kiɛɛn a Nziã Edzayi bubu:

26 "Yi ola yam li, liaal lɔ bubu:

Byɛ èyoo bam ngesɛ, kɛn a byɛ otsɛn okwaal wɛ,

byɛ ètal, kɛn a byɛ ki èmwɛn pyɛ.

27 Ke ngwel wɛ, ɔ̃kwal a yam li oyii y'olyam,

ãtswi ã bɔ ãyii embi.

Bɔ akuru mviil,

kwɛn bɔ abee omwɛn me mviil ã bɔ,

abee oyoo m'ãtswi ã bɔ,

abee otsɛn okwaal m'ɛ̃kwal ɛ̃ bɔ,

abee ɛ̃kwal okaal, kwɛn mɛ̃ hɛ̃ mbee bɔ oboo."✝»

28 Pool bu ayesɛɛl ndiri: «Oŋɔ̃ eyɛɛ wɛn Nziã oyuɔɔl Endɔɔ e ndɛ li obvuul ola baal bɛn k'Ayuda wɛ: Bɔ bam akieel ayoo lɔ.»

[ 29 Ndɛ ayɛɛn obobɔ, Ayuda ayɛn, ayi atsuun bam kokɔ bam-a-bam.*]

30 Pool okal mvel yuaal ke nzɔ yi ékefuru ndɛ. Ndɛ ákeyɔɔ bueel b'ákeya ndɛ otal. 31 Ndɛ áketee Okwɛn o Nziã, bvool ákeyiool baal ãndɔɔ m'ãtal Mfam Yeso Mãsia k'ákebveel kuul mbee wɛ, wu ákeluo ndɛ nkuul pyɛ.