1 Ke mbee ãtsoo ãtaan, ngaa-a-Nziã wu ɔ̃nɛn Ananias otɔ Sedzale y'akuul-kuul ke kwɛ bwɛn ɔ̃yɛɛn ngɔmɔ̃ wɛn nkuũ Tɛɛtulus. Bɔ ayi ola mfam Felikese me ndɔɔ yi abva Pool mbal. 2 Ndɛ bu ayuɔɔl Pool ɔ̃sia-mpɔɔl. Tɛɛtulus obvi buu li ndɛ oliaal bubu: «Mfam, bee eli bam onse opi me ndɔɔ a yɛ. Yɛ faal ɔ̃kiri a bia-byɛ kwɛn mbueel ãyi ngesɛ, ke ngwel wɛ yɛ li y'ɔ̃nyiã. 3 Mfam Felikese, bee ekiool obvɛ obɔ ãlio mbueel y'ãmboo mbueel, bee etuɛɛn yɛ ɔ̃kwal ngɔmɔ̃. 4 Me ndɔɔ yɛn mɛ̃ mbee yɛ lio bibi owal, mɛ̃ mbuɛɛn yɛ k'ayoo bee me lio etsi-tsiri, ke ngwel wɛ yɛ li mbuul wa ngesɛ wu abesio baal nyiĩ. 5 Ngwanyã, bee emwɛn kwɛn ngaburu wu ndyam ɔ̃bi ali. Ndɛ abelɔ tsungaa onse Ayuda b'ɔ̃kiri a nsie wueel. Ndɛ oli mfam a nkel yi Afi-Nadzalet. 6 Ndɛ akekie k'asiaan Nzɔ a Nziã. Bee bu esiin ndɛ. [Bee ekedzii k'etsiil ndɔɔ a ndɛ m'emfa ki etam ãngel ã bee, 7 kɛn a kapiri Lisias osam ongwel a ndɛ, bu awɛɛl ndɛ onse mviɔɔl ɛ̃ bee m'ãnkɔɔl. 8 Ndɛ wu Lisias otam bee ndiri eyebva ndɛ mbal ola yɛ.*] Yɛ afuul ndɛ me yam, yɛ olɔ mwɛn otaa-taa b'ãndɔɔ m'ebvi bee ndɛ mbal.» 9 Ayuda atsweel m'ékeyɛɛn Tɛɛtulus, ndiri: «Eli taa-taa!»

10 Mfam Felikese opyel Pool me ndɔɔ yi ayɛɛn. Pool ayebvuru oyɛɛn, olieel bubu: «Mɛ̃ ngyɛɛ kwɛn yɛ abesa ontwel onse ɔ̃kiri a bia-byɛ fa mvel bibi. Obobɔ, mɛ̃ ndi ye kaã li eliaal buu li mɛ̃. 11 Yam koo k'abwɛɛl ngesɛ, ãtsoo kɛn anduru kuun ye mbuaal wɛ me ntɔ mɛ̃ Yelusalem me ndɔɔ yi elweel Nziã. 12 K'eli ye mboo yi ayebɔɔ mɛ̃ etsuun ye mbuul wuo elɔ tsungaa onse baal wɛ, ekal onse Nzɔ a Nziã, ekal onse ãnzɔ m'ãbuɛɛn, ekal onse bviil. 13 Baal ba k'ali y'eliĩ ki esuo otaa-taa b'ãndɔɔ m'ebvi bɔ mɛ̃ mbal meba wɛ. 14 Kɛn a mɛ̃ ekiool ndɔɔ ngamɔ̃ ke nkwel a yɛ: Mɛ̃ ebesal me ndɔɔ a Nziã a ankiɔɔn a mɛ̃, m'onɔɔn o nkuul yi nyiɔɔn, yi eyɛɛn bɔ ndiri yi mbi. Mɛ̃ ebekiool mbueel m'ákel onse ɛ̃nkaan mi ãngel ye mi aliaal-ɛ̃kiɛɛn a Nziã. 15 Mɛ̃ ndi ye kaã li ebeta mɛ̃ me Nziã, kaã lɛn bam b'abvi mɛ̃ mbal abeta lɔ hɛ̃ ndiri Nziã akieel aseel b'ákwi-ákwi, abi y'abvɛ. 16 Obɔ otsɛn bɛn mɛ̃ hɛ̃ ebesa mpɛn yi ekal y'epfuũ bvi ngesɛ ke nkwel a Nziã bvool ke nkwel a baal.

17 Ke mbee a mvel bibi yɛn mɛ̃ k'éli ke Yelusalem wɛ, mɛ̃ yemvool okɔ, me ndɔɔ yi eyewa wuaal li nzi ola aywal b'onse yam e mɛ̃, bvool me ndɔɔ yi ewa Nziã ãkab. 18 Omɔ̃ ãndɔɔ m'ekesoo mɛ̃ ŋ'eyebɔɔ bɔ mɛ̃ onse Nzɔ a Nziã. Oŋɔ̃ ke mbee a ŋ'eman mɛ̃ ɛ̃kiri mi akal tsɛtsɛ osa, embuul pyɛ, tsungaa hɛ̃ pyɛ. 19 Kɛn Ayuda ke kwɛ ba nsie yi Adzi baal b'áli oŋɔ̃. Okɛɛn bɔ abɔɔ mɛ̃ y'elyal, bɔ baal b'akaaya mɛ̃ mbal obva ola yɛ. 20 Okɛɛn baal obɔ k'ali ŋã wɛ, oŋɔ̃ yɔɔl kwɛn bɔ ba, ameyɛɛn ndɔɔ yi enɛn yi nsi mɛ̃ ŋ'etsuun mɛ̃ ke mbal yi nɛn. 21 Eli kɛn a ndɔɔ ngamɔ̃ yi ebiool mɛ̃ tɛ ke nkwel a bɔ wɛn: "Mɛ̃ ebekiool wɛn b'ákwi-ákwi akieel asiool." Oyɔ ndɔɔ yi abvi mɛ̃ mbal ola yɛ nonɔ̃.»

22 Felikese wu áyɛɛ otsɛn o nkuul a Mfam ngesɛ, oswɛɛl esal lɔɔ. Ndɛ olieel b'ábvi Pool mbal bubu: «Kapiri Lisias àya, mɛ̃ ètsiil esal e byɛ.» 23 Ndɛ otam mbiri a ambwel-mbwel ndiri asuul Pool onse bwal, kɛn a ndɛ àkal ndii, bvool awa andoo a ndɛ nkuul yi awuaal a ndɛ.

24 Ke mbee ãtsoo ke kwɛ, Felikese oyi y'ɔ̃kal a ndɛ Dolusile wu áli Ɔ̃yuda. Ndɛ wu Felikese otam Pool mbel ota, bvool oyoo k'eyɛɛn ndɛ me ndɔɔ yi etal okiool me Yeso Mãsia. 25 Kɛn a me lio li ebvi Pool oyɛɛn me ndɔɔ emfa ki akal dzu, ki akal y'osɛ-mwiĩ, bvool y'otsiil b'ãndɔɔ b'òyeya, Felikese buɔ obɔɔ, bu alieel Pool bubu: «Yɛ koo k'ayi. Ŋ'èbɔɔ mɛ̃ lio, mɛ̃ èta yɛ mbel bvool.» 26 Felikese áketa kaã hɛ̃ ndiri Pool ále ol'owi ndɛ nzi. Obɔ otsɛn bɛn ndɛ áketa ndɛ mbel ɛ̃nswɛɛl-ɛ̃nswɛɛl me ndɔɔ yi ata ɔ̃sam ye ndɛ. 27 Mvel yuaal bu ekoo m'emfa okyɛ, Pookius Fesitus bu akiri mboo a Felikese. Onge bɛn ndɛ ákedzii k'asa Ayuda esɛ, ndɛ okwee Pool onse bwal.