1 Pool ye Silas abwel li Ãmfipolis ye li Apoloni, bu atɔ Tesalonik. Oŋɔ̃, Ayuda áli ye nzɔ a ãbuɛɛn. 2 Pool oyɛn okɔ, onge b'ékesa ndɛ onse bviil bwɛn a bviil. Onse asaba atyel, ndɛ áketsuun y'Ayuda b'áli oŋɔ̃ me m'ákel onse Ɔ̃nkaan wu Ɔ̃nsensal. 3 Ndɛ ákeyɛɛl bɔ mɔ̃ bvool ákesuo kwɛn, Mãsia ákeya fool omwɛn bvool ásiool onse b'ákwi-ákwi. Ndɛ ákeliaal bɔ ndiri: «Yeso wu ebetsal mɛ̃ byɛ nsia wu, ndɛ ondɛ Mãsia ali.» 4 Ayuda ke kwɛ akiool, bɔ bu abvɔɔn ye Pool bwɛn a Silas. Agelek bibi b'abelweel Nziã ayi hɛ̃ ola bɔ, y'akaal ba bvɛɛ bibi.

5 Kɛn Ayuda bakyɛ aluul me nsɔɔ. Bɔ abvool baal ba ngwel-a-ngwel b'ákekɛɛn onse abal-bal, alɔ ɛ̃tsab onse embuul ye tsungaa onse bviil. Bɔ aloo ke nzɔ a Dzason m'oyebii o Pool ye Silas, kwɛn abiri bɔ ke nkwel a baal. 6 Kɛn a bɔ k'amwɛn bɔ wɛ. Obobɔ, bɔ abiri Dzason y'akiool ke kwɛ ke nkwel a mfam a bviil, bu abvi obiool ndiri: «Angaburu obɔ amaalɔ tsungaa onse ɔ̃kiri wueel, meba ŋã bɔ amaaya ŋã! 7 Dzason oyɔɔ bɔ ola ndɛ. Bɔ bueel k'abekiaal ãngel ã Sedzaal wɛ, ke ngwel wɛ bɔ abeyɛɛn ndiri eli y'ɔ̃kwɛn ɔ̃kyam wɛn nkuũ Yeso.» 8 Ŋ'eyoo embuul y'amfam a bviil ãyɛɛn omɔ̃, bɔ ɛ̃kwal ɛ̃bii. 9 Obobɔ, Dzason y'akiool bakyɛ afuru yaã, ke mbee oŋɔ̃ bɔ ayɔɔl bɔ.

10 Ŋ'ebvi tsia, andoo a dzii asuul Pool ye Silas ayɛn Bele. Ŋ'etɔ bɔ okɔ, bɔ ayɛn onse nzɔ a ãbuɛɛn a Ayuda. 11 Ayuda b'oŋɔ̃ áli y'ãtsam mã ngesɛ, m'ãnduru mã ba Tesalonik. Bɔ ayɔɔ Endɔɔ e Nziã y'efua bibi. Tsoo bwɛn a tsoo, bɔ ákesɔɔl Ɔ̃nkaan a Nziã me ndɔɔ yi atal okɛɛn m'ã́keyɛɛn bɔ ãli mã taa-taa. 12 Baal bibi onse bɔ ayii akiool. Onse Afi-ngelek, akaal ba bvɛɛ y'abɔɔl bibi ayii akiool hɛ̃.

13 Kɛn Ayuda ba Tesalonik ayeyoo ndiri Pool abetee Endɔɔ e Nziã hɛ̃ ke Bele, bɔ ayi oŋɔ̃, kwɛn ke mboo oyɔ hɛ̃, bɔ asa nsiɔɔl bvool alɔ tsungaa onse baal. 14 Tswa-a-tswa oŋɔ̃, andoo a dzii asuul Pool oyɛn me li nzal, kɛn a Silas ye Timote asiil ke Bele. 15 Baal b'ákedzoo Pool abiri ndɛ tiil Atɛn. Bɔ bu akɔɔl Bele y'ɔ̃kiɛɛn wu éyuɔɔl Pool Silas bwɛn a Timote ndiri anɔɔn a ndɛ bam tswa-a-tswa.

16 Ŋ'ékekiaal Pool Silas bwɛn a Timote k'Atɛn, ndɛ oyoo nkyee bibi ŋ'emwɛn ndɛ kwɛn bviil olɔ eluul m'etiɔ. 17 Onse nzɔ a ãbuɛɛn, ndɛ áketsuun y'Ayuda ye baal bɛn k'Ayuda wɛ b'ákelweel Nziã, bvool tsoo bwɛn a tsoo, ndɛ áketsuun hɛ̃ ye b'ékemwɛɛn a ndɛ ye bɔ ke taan. 18 Anga-ãyal ba nkel yi Epikwiil ye yi Sitoyisiɛ̃ hɛ̃ abvi otsuun ye ndɛ. Bɛn ákefuul ndiri: «Nswɛ-nga-oliaal wu ãmã abeliaal?» Bakyɛ ndiri: «Ndɛ onge wu abetee anziã b'ɛ̃kiri ɛ̃kyam.» Ke ngwel wɛ, Pool áketsal Nsia a Yeso ye yi osiool o b'ákwi-ákwi. 19 Bɔ awel ndɛ, bu abiri ndɛ ke mbal a bviil. Bɔ afuul ndɛ bubu: «Bee ekoo m'oyɛɛ ãtee m'alili m'ebeyɛɛn yɛ? 20 Yɛ abeyɛɛn bee ãndɔɔ m'ɛ̃kam, obobɔ bee edzii k'eyɛɛ otsɛn o mɔ̃ ngesɛ.» 21 Ke yam, Afi-Atɛn bueel y'anzii b'ákekal oŋɔ̃ ákesuul lio e bɔ ékebwel kɛn a m'obeyɛɛn wuo m'obeyoo ãtee m'alili.

22 Pool ayetɛɛn nkal a mbal a bviil, olieel bubu: «Afi-atɛn, mɛ̃ emwɛn kwɛn byɛ ebelweel anziã m'ãndɔɔ mbueel. 23 Ke ngwel wɛ, ŋ'ekedziɔɔn mɛ̃ bviil e byɛ bvool eketal etiɔ e byɛ bvi ngel, mɛ̃ bam emwɛn nkiin ngamɔ̃ yi awa ãkab aswɛn ãmpiri mã: "Ola nziã wɛn baal k'ayɛɛ wɛ." Taa-taa bam, ki ebelweel byɛ oyɛɛ wɛ okyɛ, ki ngyi mɛ̃ byɛ otee. 24 Nziã wu ábuo ɔ̃kiri ye bvieel bvi eli onse ndɛ, oli Mfam a ywel ye nsie. Ndɛ k'abekal onse ãnzɔ m'etuu mviɔɔl ɛ̃ baal wɛ. 25 Ndɛ hɛ̃ k'ali ye kɔɔ lɛn mviɔɔl ɛ̃ baal ɛ̃sa ndɛ onkyam ɔ̃sal k'ɔ̃mã wɛ. Ke ngwel wɛ, ndɛ wu abewa eluɔ bvieel elaã y'ɔ̃fiaal, ye bvieel bvi esiil. 26 Bɛɛn me mbuul ngɔmɔ̃, ndɛ obuo ãyam ã baal mbueel, bvool osuul mɔ̃ me nsie yueel. Ndɛ oyɛɛl mɔ̃ ɛ̃bvu, bvool otsiil ɛ̃ndel m'ãmboo m'ekal mɔ̃. 27 Nziã ási obobɔ me ndɔɔ yɛn baal abii ndɛ, bvool abɔɔ ndɛ ŋ'afaan afaan. Ke yam, Nziã k'ali lela ye mbuul bwɛn a mbuul onse bia-byɛ wɛ. 28 Ke ngwel wɛ, áyɛɛn ndiri:

"Eli me ndɔɔ a ndɛ kwɛn bia-byɛ eli y'elaã,

kwɛn bia-byɛ ebedzuu

bvool kwɛn bia-byɛ eli."

Bakyɛ onse ãyam a byɛ áyɛɛn yɔ hɛ̃ ndiri:

"Bia-byɛ hɛ̃ eli baan a ndɛ."

29 Obobɔ, ŋɛn bia-byɛ baan a ndɛ eli, bia-byɛ k'ekoo m'otsam wɛn Nziã oli emfa ngemɔ̃ y'etiɔ ki ɔɔl, ki nzi wuo ki nkɔɔn, ki abuo m'ãyal y'ãtsam ã baal wɛ. 30 Ke yam, Nziã k'abesiɔɔl ãlio m'éli baal onse odzɛɛn wɛ. Kɛn a meba, ndɛ abeta baal bueel b'ãmboo mbueel mbel m'okaal b'ɛ̃kwal. 31 Ke ngwel wɛ, ndɛ ál'amaayɛɛl tsoo li ètsiil ndɛ ãndɔɔ ã baal b'ɔ̃kiri wueel m'emfa ki dzu. Ndɛ ál'amaasuaal mbuul me ndɔɔ oyɔ. Ndɛ ásuo baal bueel kwɛn ndɛ ásueel ndɛ, ŋ'éseel ndɛ ndɛ onse b'ákwi-ákwi!»

32 Ŋ'eyoo bɔ Pool oyɛɛn me ndɔɔ osiool o b'ákwi-ákwi, bakyɛ abvi ndɛ osɔɔl, bakyɛ ayɛɛn ndɛ ndiri: «Bee èyoo yɛ me ndɔɔ oyɔ lio ekyam!» 33 Pool bu asiil bɔ. 34 Kɛn a baal ke kwɛ anɔɔn a ndɛ, bu ayii akiool. Onse bɔ, éli ye wu ata me Denis, ngɔmɔ̃ onse baal a mbal a bviil, y'ɔ̃kaal wɛn nkuũ Damalis, ye bakyɛ bvool.