1 Ŋ'esiil bee akuul-kuul b'Efedze obɔ, bee esam m'ãsua, bu eyɛn dzuu-tɛ k'esanga ki Kos. Ela esiool, bee etɔ esanga ki Lodes. Oŋɔ̃, bee eyɛn Patala. 2 Okɔ, bee emwɛn ãsua m'ã́keyi Fenisi. Bee bu esam eyɛn. 3 Ŋ'eyii bee tsotsoo y'esanga ki Swipele, bee esiil kyɛ me kuɔɔl ki ekal, eluɛɛn nkuul a bee mpyal a Sili, eyesiɛɛn ke Tiil, oyɔ mboo yi ákepaal eluɔ onse ãsua. 4 Bee emwɛn ayio oŋɔ̃, bee bu esi ãtsoo nsiaan ye bɔ. Ɔ̃fel wu Ɔ̃nsensal osuo bɔ ãndɔɔ m'ã̀ya me Pool ke Yelusalem. Bɔ bu alieel ndɛ ndiri abee okɔ oyi. 5 Kɛn a ŋ'ekoo ãtsoo nsiaan, bee eyɛn. Bɔ bueel, y'akaal ye baan b'atsi-atsi, ayesuul bee. Bee epal onse bviil, bvool ebvi ãbuo nku-a-nku a nzal, me ndɔɔ yi ebuɛɛn. 6 Ŋ'elɛɛl bee bakyɛ, bee esam onse ãsua, bɔ bu abvool. 7 Bee esɛɛl odzuu o bee m'ãsua ŋ'embal bee Tiil eyɛn Petolemayis. Oŋɔ̃, bee ebio andoo, bu esi tsoo ngelemɔ̃ ye bɔ.

8 Ŋ'etsi bviil, bee eyɛn, bu etɔ Sedzale. Okɔ, bee esam onse nzɔ a Filipe wu ɔ̃liaal-Nsia, bu ebuo lɔɔ ola ndɛ. Ndɛ áli ngɔmɔ̃ onse baal ange-nsiaan b'ásueel me ndɔɔ yi awuaal antam. 9 Ndɛ áli ye baan b'akaal anã bɛn ale kɛn ayɛɛ abɔɔl wɛ. Bɔ áli aliaal-ɛ̃kiɛɛn a Nziã.

10 Onge bɛn, bee ébɔɔ ãtsoo bibi oŋɔ̃, ɔ̃liaal-ɛ̃kiɛɛn a Nziã ngɔmɔ̃ wɛn nkuũ Agabus ofi nsie yi Yude oyi oŋɔ̃. 11 Ndɛ oyi ola bee. Ndɛ owel ɔ̃sii a Pool wu abelaal me luu, okuru mviil ye mviɔɔl ɛ̃ ndyam, bu ayɛɛn bubu: «Ɔ̃fel wu Ɔ̃nsensal olieel ndiri: "Nga-ɔ̃sii wu, Ayuda akieel akuru ndɛ m'emfa ki ke Yelusalem, me ndɔɔ yi atiɔ ndɛ me mviɔɔl ɛ̃ baal bɛn k'Ayuda wɛ."» 12 Ŋ'eyoo bee obobɔ, bee y'akiool ba Sedzale elɛɛn Pool kwɛn ndɛ abee Yelusalem oyi. 13 Kɛn a ndɛ obveel ndiri: «Ki elel byɛ bvool esa kwɛn mɛ̃ nzuru esool emã? Mɛ̃ ndyam emeewal ɔ̃yɛɛl wɛn me nkuũ a Mfam Yeso, akuru mɛ̃ ɛ̃si bvool abam mɛ̃ ke Yelusalem.» 14 Onge bɛn bee ale k'ekoo k'eswɛɛl ãtsam ã ndɛ wɛ, bee k'ebelɛɛn ndɛ wɛ, bu eyɛɛn wɛn: «Yɔɔl kwɛn Mfam asa b'edzii ndyam!»

15 Ke mbee ãtsoo omɔ̃, bee ewel ɔ̃yɛɛl, bu eyɛn Yelusalem. 16 Ayio ke kwɛ ba Sedzale ayesuul bee. Bɔ abiri bee ke nzɔ a mbuul ngɔmɔ̃ wa Swipele wɛn nkuũ Menasɔ̃, wu ébuo bee lɔɔ ola ndɛ. Ndɛ ál'amayiil onse okiool.

17 Ŋ'etɔ bee Yelusalem, andoo ayɔɔ bee y'esɛ. 18 Ela esiool, Pool oyɛn ye bee ola Dzak. Akuul-kuul b'Ebvɔɔn bueel ábvɔɔn okɔ. 19 Pool obio bɔ, bu abvi bɔ ɔ̃sal ngɔmɔ̃-ngɔmɔ̃ osuo wu esi Nziã ola baal bɛn k'Ayuda wɛ, me nkuul a ndɛ.

20 Ŋ'eyoo akuul-kuul ãndɔɔ omɔ̃, bɔ alweel Nziã, bu alieel Pool ndiri: «Ndoo, yɛ amwɛn, Ayuda amiil bibi ayii akiool. Bɔ bueel ali y'ebal me ndɔɔ ãngel ã Moyize. 21 Kɛn a bɔ ayoo ɔ̃nyiin ndiri yɛ abetee Ayuda b'ali ke nsie y'onzii ndiri atiɔ ãngel ã Moyize eboo, abee baan a bɔ b'abɔɔl otsiil, bvool abee onkɔɔ b'Ayuda obenɔɔn. 22 Oŋɔ̃ eyii bwɛn esa? Enkyam pyɛ, bɔ al'ayoo ndiri yɛ amaaya. 23 Obobɔ, sa b'eyɛɛn bee yɛ. Onse bee eli ye baal anã b'alab ɔ̃kyel ke nkwel a Nziã. 24 Wal bɔ bvool sa ɔ̃kiri wu akal tsɛtsɛ ye bɔ, bvool furu nzi yi etsal bɔ me ndɔɔ ãkab, kwɛn bɔ akie ɛ̃tswɛ. Obobɔ, baal bueel ayɛɛ kwɛn ãndɔɔ m'eyoo bɔ me ndɔɔ a yɛ k'ãli mã taa-taa wɛ, bvool kwɛn yɛ hɛ̃ abenɔɔn a ãngel. 25 Me b'otal baal bɛn k'Ayuda wɛ b'ayii akiool, bee emeekel bɔ wɛn abee anyam b'awi anziã b'etiɔ ãkab odza, abee hɛ̃ anyam b'akwa etsɔɔn odza, abee ãkel hɛ̃ odza. Bɔ abee ntal obvool ye mbuul wɛn bɔ kɛn abaal bakyɛ wɛ.»

26 Ela esiool, Pool owel baal obɔ, osi ɔ̃kiri wu akal tsɛtsɛ ye bɔ, bvool osam onse Nzɔ a Nziã, me ndɔɔ yi ayeyɛɛn tsoo li efa ɔ̃kil ondɛ ye lio li awa kab me ndɔɔ a mbuul ngɔmɔ̃-ngɔmɔ̃ onse bɔ.

27 Ŋ'eyii efa ãtsoo ãnge-nsiaan m'ɔ̃kiri, Ayuda bakyɛ ba nsie y'Adzi b'ámwɛn Pool onse Nzɔ a Nziã, alɔ tsungaa onse baal bueel, bvool asiin ndɛ. 28 Bɔ abvi obiool bubu: «Baal b'Isalayel, ewuaal a bee! Etal mbuul wɛn ãmboo mbueel, abewa baal bueel ãtee m'ãbi-ãbi, me ndɔɔ a yam e bia-byɛ, y'ãngel ã Moyize, ye Nzɔ a Nziã. Meba ŋã, ndɛ olɔ onkyam baal bɛn k'Ayuda wɛ onse Nzɔ a Nziã, m'emfa okyɛ, ndɛ ŋ'abiil mboo yi ngel.» 29 Ke ngwel wɛ, bɔ tsɔɔn ámwɛn Telofime wu Ɔ̃fi-Efedze onse bviil ye ndɛ, bwɛn bɔ b'áketsam ndiri ndɛ áswɛɛl ndɛ onse Nzɔ a Nziã.

30 Ekiin ebvi onse bviil lueel, baal ayii aya m'ãntiin m'etswi bvieel. Bɔ asiin Pool bvool apaal ndɛ onse Nzɔ a Nziã, akuru ɛ̃nywã ɛ̃ yɔ myam mvieel alili oŋɔ̃. 31 Ŋ'eyii ebii bɔ k'abam ndɛ, nsia etɔ ola kapiri a ambwel-mbwel a Lom ndiri tsungaa obvi me Yelusalem wueel. 32 Tswa-a-tswa oŋɔ̃, ndɛ owel ambwel-mbwel y'ambiri a bɔ, bu ayɛn me ntiin ke mboo yi éluul baal. Ŋ'emwɛn baal kapiri y'ambwel-mbwel, bɔ k'abebɛɛl Pool wɛ. 33 Obobɔ, kapiri osyel tsotsoo, osiin Pool, bvool otam ndɛ okuru m'ãmpaa mbuaal. Ke mbee oŋɔ̃, ndɛ ofuul ndiri: «Mbuul wu nã? Ndɛ emã asi?» 34 Onse embuul, bɛn abiool emfa ekyam, bɛn hɛ̃ abiool emfa ekyam. Onge bɛn kapiri a ambwel-mbwel k'ákoo k'ayɛɛ otsɛn o tsungaa ngesɛ-ngesɛ wɛ, ndɛ otam k'abiri Pool onse ekɔɔ ki ambwel-mbwel. 35 Ŋ'etɔ ndɛ ke mboo yi awuaal me ndɔɔ yi asam nzɔ, ambwel-mbwel andɛɛl ndɛ me ndɔɔ a kɔɔ-kɔɔ a baal, 36 ke ngwel wɛ baal bueel ákenɔɔn a ndɛ, abiool ndiri: «Bam ndɛ!»

37 Me lio li ayii abii k'aswɛɛl Pool onse ekɔɔ ki ambwel-mbwel, ndɛ olieel kapiri ndiri: «Yɛ koo k'awa mɛ̃ nkuul yi eyɛɛn yɛ ndɔɔ?» Kapiri obveel ndɛ ndiri: «Onkyel yɛ yɛɛ k'ayɛɛn ɔ̃nywã wa Ngelek! 38 Yɛ ŋɛn ke li ɔ̃fi-Edzipito wɛn lyal álɔ tsungaa onse baal, bvool ábiri baal amiil anã b'áli y'ãta me mviɔɔl k'ɔ̃baan wɛ?» 39 Ndɛ obveel ndiri: «Hɛɛ̃-hɛ̃ mfam, mɛ̃ ndi Ɔ̃yuda, ɔ̃fi-bviil li ye nsia li Taase, li nsie yi Silisi. Mɛ̃ mbuɛɛn yɛ, wa mɛ̃ nkuul yi eyɛɛn ye baal.» 40 Kapiri owi ndɛ nkuul yi ayɛɛn. Ndɛ otɛɛn ke mboo yi awuaal me ndɔɔ yi asam nzɔ, oyɛɛn ye bɔ m'ɔ̃liɛɛn kwɛn bɔ akal pi. Ɔ̃lii wa bibi bu abvi. Obobɔ, ndɛ oyɛɛn ye bɔ m'ɔ̃nywã wu Ebele bubu: