सोरो पायदा एणेन बाद आईख ने चोखो एणेन नेम
1 ओवतो यहोवा मुसाह केयो, 2 इस्राएल ने माणहाह किवो, केदी एगदी बायकु सोराह पायदा किरेह, ताहार ती बायकु हात दिह वोर एठी रेय; ज्य तीन फाड़को आवणेन टेम एठी एणेन गेत रेय। 3 एने आठवे दिह सोरान खेतना एणे जुवे। 4 ओवती ती बायकु चोखो केरन्या खुना माय तेहतीस दिह रेय; एने जाह वोर तीन चोखो एणेन दिह पुरा नाय एती ताह वोर ती नाहते एगदी चोखाली चिजीह सापले, एने नाह चोखाला जागाम रिगे। 5 केदी बायकु सोरीह पायदा किरेह, ताहार बायकु फाड़को आवणेन गेत दुय एपता वोर एठी रेय; एने ओवती साहासाठ दिह वोर तीन चोखो केरन्या खुना माय रेय।
6 जी एवी सोरी नाहते सोराह पायदा किरेल हे, ओहली बायकुन चोखो एणेन खास टेम पुरो एणेन बाद तीह मिलापवाला तोम्बु माय खास बेट लावणे जुवे, तीह ती बेटीह मिलापवाला तोम्बुन बायणा पोर चाकऱ्याह आपणे जुवे; तीह एक वोरह्यान मेंड्रान पिलो होमबोलीन केरता एने पापबोलीन केरता एक पेरवान एक पिलो नाहते ओलो लावणे जुवे। 7 तेवी चाकर्यो ताह यहोवान सामने तीन केरता पासतावो किरे; एने ती तीन खुन वोयणेन एठोपोणा रेन सुटीन चोखी ठेराय, जी बायकुन सोरो नाहते सोरी पायदा एय तान केरता ज्योस नेम हे। 8 एने केदी ती फाय मेंड्रो आपणेन ताकेत नाय रेय, ताहार दुय ओला नाहते पेरवान दुय पिला, एक ते होमबोली एने दिहरो पापबोलीन केरता आपी; एने चाकर्यो तीन केरता बोली केरी एने पाप डापे, तेवी ती चोखी ठेराय।