1 आठवे दिह मुसो हारून एने तान सोराह एने इस्राएली डायडायाह हाद्यो, 2 एने हारूनाह केयो, "पापबोलीन केरता एक हाजो वासड़ो, एने होमबोलीन केरता एक हाजो मेंडो लेन यहोवान सामने बेट चेड़ाव। 3 एने इस्राएल ने माणहाह ज्‍य के, तुमू पापबोलीन केरता एक बुकोड़, एने होमबोलीन केरता एक वासड़ो एने एक मेंड्रान पिलो लिवो, जा एक वोरह्यान एय एने हाजो एय, 4 एने मेल मिलाप बोलीन केरता यहोवान सामने चेड़ावणेन केरता एक बुयेल एने एक मेंडो एने तेला केरीन कुहणायेल मोयदान एक एन बेट बी लेय लिवो; काहाकाय आज यहोवा तुमूह देरसेन आपी।"

5 एने जी जी चिजीन उकुम मुसो आपेल, त्यु आख्युह ता मिलापवाला तोम्बुन ओंगाण लीयावा; एने आखी मोंडली आहने जाएन यहोवान सामने उबरी गियी। 6 तेवी मुसो केयो, "ज्‍य तो काम हे जाह केरनेन केरता यहोवा उकुम आपेल हे काय तुमू ताह किरो; एने यहोवान बोड़ाय तुमूह देखाय।" 7 तेवी मुसो हारूनाह केयो, "यहोवान उकुमान गेत वेदीन आहने जाएन तान पापबोली एने होमबोलीह चेड़ावीन तान एने आखा माणहान पापाह डाप; एने माणहान केरता बोलीह चेड़ावीन तान पाप डाप।"

8 तानकेरता हारून वेदीन आहने जाएन तान पापबोलीन वासड़ान बोली किऱ्यो। 9 एने हारूनान सोरा लुयीह ता फाय ली गीया, तेवी तो तान आंगलीह लुयीम बुड़ावीन वेदीन हिंगा पोर लागाड्यो, एने वुचेल लुयीह वेदीन पाया पोर रोचीव दिनो; 10 एने पापबोली मायवाली चेरबी एने बुका एने कालजा पोर ने चेरबी वाली कातली तो वेदी पोर हेलगाड्यो, जीहे यहोवा मुसाह उकुम आपेल इतो। 11 तेवी हारून पाड़ावान बाहेर माह एने चामड़ाह हेलगाड्यो।

12 तेवी होमबोलीन जेनवेराह बोली केऱ्या; एने हारूनान सोरा लुयीह तान आथाम आप्या, एने तो तीह वेदी पोर कावदेन सिड़ेक दिनो। 13 तेवी ता होमबोलीन जेनवेराह टुकड़ा टुकड़ा केरीन मुंडा बेल तान आथाम आप देना, एने तो ताह वेदी पोर हेलगाड़ दिनो। 14 एने तो आते एने पायाह दोवीन वेदी पोर होमबोलीन उपेर हेलगाड्यो।

15 तेवी तो माणहान चेड़ावाह ओंगाण ली जाएन एने ता पापबोलीन बोकड़ाह जो तानकेरता इतो लेन बोली किऱ्यो, एने पेल ने गेत ताह बी पापबोली केरीन चेड़ायो। 16 एने तो होमबोलीह बी आहने ली जाएन रितीन गेत चेड़ायो। 17 एने एन बेटीह बी आहने ली जाएन तीम रेन मुठबोर वेदी पोर हेलगाड्यो, ज्‍य वेगोस ने होमबोलीन बिगेर चेड़ावाय गीयो।

18 बुयेल एने मेंडो, मतलब जा मेल मिलाप बोली जेनवार, माणहान केरता एता ता बी बोली केराय गीया; एने हारूनान सोरा लुयीह तान आथाम आप्या, एने तो ताह वेदी पोर कावदेन सिड़ेक दिनो। 19 एने तो बोयलान चेरबीह, एने मेंडा माय रेन चेरबीदार सेमटिह, एने जी चेरबी केरीन आते डापेल रेतेह तीह, एने बुका बेल कालजा पोर ने चेरबी वाली कातली बी तान आथाम आप्या। 20 एने ता चेरबीह साती पोर मेल्या; एने तो ती चेरबी वेदी पोर हेलगाड्यो, 21 पुण साती एने जिवड़ी जांगीह हारून मुसान उकुमान गेत आलाड़नेन बेटीन केरता यहोवान सामने आलाड्यो।

22 तेवी हारून माणहा निही आथ ओंगाण केरीन ताह बोरकेत आप्यो; एने पापबोली, होमबोली, एने मेल मिलाप बोलीह चेड़ावीन तो नेचो उतेर आवो। 23 तेवी मुसो एने हारून मिलापवाला तोम्बुम गीया, एने निकलीन माणहाह बोरकेत आप्या; तेवी यहोवान बोड़ाय आखा माणहाह देखानी। 24 एने यहोवान सामने रेन आक्‍ठो निकेलनो एने चेरबी बेल होमबोलीह वेदी पोर हेलगाड़ दिनो; आखा माणहे ज्‍य देखीन जय जयकार केऱ्या एने ता बुय पोर पोड़ीन वोंद्या।