लेव्य 1

होम बोलीन वेदी

1 तेवी यहोवा मुसाह हादिन मिलापवाला तोम्बु माय रेन मुसाह केयो, 2 "इस्राएल ने माणहाह के काय तुमरे माय रेन केदी एगदो माणुह यहोवान केरता बोली लावे, ताहार तो मेंड्रा बोकड्या नाहते पालन्या जेनवेरा माय रेंच लावीन चेड़ावे।"

3 "केदी एगदो माणुह पालन्या जेनवेरा माय रेन बोली केरी, ताहार बिगेर दोसावालो जेनवार मिलापवाला तोम्बुन बायणा पोर चेड़ावे काय यहोवा ताह स्वीकार किरे। 4 तो तान आथ बोली चेड़ावण्या जेनवारान मुंडी पोर मेली, एने तो तानकेरता बोली केरनेन स्वीकार केराय जाय। 5 तेवी तो ता वासड़ाह यहोवान सामने बोली केरी; एने हारूनान बिटोख जो चाकर्‍यो हे, तो लुयीह आहने ली जाएन ती वेदीन कावदेन सिड़के जो मिलापवाला तोम्बुन बायणा पोर हे। 6 उवतो तो बोली चेड़ावण्या जेनवारान चामड़ो काड़ीन ता जेनवेराह टुकड़ा टुकड़ा किरे; 7 तेवी हारून चाकर्‍यान बिटोख वेदी पोर आक्‍ठो पेटाड़ी, एने आक्‍ठा पोर लाकड़े हिसाड़ेन मेली। 8 एने हारूनान बिटोख जो चाकर्‍यो हे, मुंड एने चेरबा बेल जेनवारान टुकड़ा ता लाकड़ा पोर जा वेदीन आक्‍ठा पोर रेय हिसाड़ेन मेली; 9 एने तो तान आतड्या एने पायाह पाण्या केरीन दोवी। तेवी चाकर्‍यो आखा ईसाह वेदी पोर हेलगाड़े ज्‍यीस होमबोली हे, काहाकाय ज्यी होमबोली आक्‍ठान द्वारा यहोवाह खुस केरनी गेंदाणी बोली ठेराय।"

10 केदी एगदो माणुह मेंड्रा नाहते बोकड़ान होमबोली चेड़ावी, ताहार पुरो निर्दोस नर जेनवार चेड़ावे। 11 एने तो जेनवाराह यहोवान ओंगाण वेदीन उत्तर ने उगे बोली किरे; एने हारूनान बिटोख जो चाकर्‍यो हे, तो तान लुयीह वेदीन कावदेन सिड़के। 12 एने चाकर्‍यो जेनवारान टुकड़ा टुकड़ा किरे, मुंड एने चेरबीह आलेग किरे, एने चाकर्‍यो ज्या आखाह ता लाकड़ा पोर हिसाड़ेन मेली जी वेदीन आक्‍ठा पोर रेय; 13 एने चाकर्‍यो जेनवारान आतड्या एने पायाह पाण्या केरीन दोवे। एने आखा ईसाह आहने ली जाएन वेदी पोर हेलगाड़े, काहाकाय ज्यी होमबोली आक्‍ठान द्वारा यहोवाह खुस केरनी गेंदाणी बोली ठेराय।

14 केदी एगदो माणुह यहोवाह चिड़ान होमबोली चेड़ावी ताहार ओलो नाहते पेरवान चेड़ावो चेड़ावे। 15 चाकर्‍यो ताह वेदीन आहने ली जाएन तान गिलो पेंदलीन मुड़ीन देड़ाह रेन आलेग किरे एने वेदी पोर हेलगाड़े; एने चिड़ान आखी लुय ती वेदीन एक उगे वोयाड़ देय। 16 ताह चिड़ान गोहाह एने तान फाकाह वेदीन पुर्व उगे टाक देणे जुवे, ज्‍यो तोस जागो हे जाहरी ता वेदी माय रेन निकालीन रोखड़ो टाकतेह। 17 तेवी तो ताह फाकड़ा हेर्‍य रेन चिरने जुवे, पुण ताह दुय ईसाम नाय वाटणे जुवे, चाकऱ्याह वेदीन उपेर आक्‍ठा पोर मिलेल लाकड़ान उपेर चिड़ाह हेलगाड़ने जुवे; काहाकाय ज्यी होमबोली आक्‍ठान द्वारा यहोवाह खुस केरनी गेंदाणी बोली ठेराय।