1 ओवतो यहोवा मुसाह केयो,

2 "इस्राएल ने माणहाह के काय, यहोवान तिवार जान तुमूह चोखाली सोबा एकठी केरनेन केरता ठिक टेमा पोर पारचार केरने पोड़ी, मारा ता तिवार ज्या हेते। 3 सोव दिह काम किरज्‍यो, पुण सातवो दिह, विहेवणेन खास दिह एने चोखाली सोबान दिह हे; तेदिह, तुमू काय काम मा किरहो; ज्‍यो तुमरे आखा गेराम यहोवान विहेवणेन दिह ठेराय।

4 "ओवता यहोवान तिवार जा माय रेन एक एकान ठेरायेल टेमाम तुमूह चोखाली सोबा केरनेन केरता पारचार केरने पोड़ी, ता ज्या हेते। 5 यहोवान फसह तिवार पेल्ला मोयनान चोवदावे दिह हांज पोर एया किरे। 6 एने तास मोयनान पोंदरावे दिह्या यहोवान केरता अखमीरी रोटान तिवार एया किरे; ता माय तुमू हात दिह वोर अखमीरी रूटो खाया किरज्‍यो। 7 ज्या तिवारान पेल्ले दिह तुमू एक चोखाली सोबा किरज्‍यो, तेदिह तुमू काय काम मा किरहो। 8 पुण सातु दिह तुमू यहोवाह होमबोली चेड़ाया किरज्‍यो; एने सातवे दिह एक चोखाली सोबा किरज्‍यो; तेदिह तुमू काय काम मा किरहो।"

9 ओवतो यहोवा मुसाह केयो, 10 इस्राएल ने माणहाह के काय तुमू ता देसाम जाहो, जाह यहोवा तुमूह आपेह एने ता माय कामाय काटहो, तेवी तुमू तुमरी कामायीन पेल्लो पुलो चाकऱ्या फाय लाया किरज्‍यो; 11 एने चाकर्‍यो ता पुलाह यहोवान सामने आलाड़ी काय तो तुमरी केरता स्वीकार केराय जाय; चाकर्‍यो पुलाह विहेवणेन दिह्यान दिहरे दिह आलाड़े। 12 एने जे दिह तुमू पुलो आलाड़हो ते दिहस एक वोरह्यान हाजो मेंडान पिलो यहोवान केरता होमबोली चेड़ावज्यो। 13 एने तुमू ता हेऱ्यो एन बेट तेल एने दोह किलो मोयदो बेचकीन बोगवानान केरता हाजी गेंदीन केरता आक्‍ठान बोलीन रूप माय चेड़ावाय जाय, एने ता हेऱ्यो पिणी बोलीन केरता आदली बोर अंगुरान रूह बी चेड़ावाय जाय। 14 जाह वोर तुमू तुमरा बोगवानाह बेट नाह चेड़ावते, ताह वोर तुमू एगदो नोवालो दाणा, फोल नाहते नोवाला दाणान रोटा मा खाहो, ज्‍यो नेम तुमरी पिढीन पिढ़ी तुमरा आखा गेराणा माय कायेम चालते रेय।

15 ओवता ता विहेवणेन दिह्यान दिहरे दिह रेन, मतलब जे दिह तुमू आलाड़ाय जाणार बेटीन पुलाह लावहो, तेदिह रेन पुरा सात आरामान दिह गेण लिज्यो; 16 सातवा एपतान दिहरे विहेवणे दिह वोर पाचाह दिह गेणज्‍यो, एने पाचाहवे दिहे यहोवान केरता नोवालो एन बेट चेड़ावज्यो। 17 तुमू तुमरा गेराम रेन एपान दुय दोहवा ईसा मोयदान दुय रोटा आलाड़नेन बेटीन केरता लियावज्यो; तो खमीर हेऱ्यो रांदे, एने यहोवान केरता पेल्‍ली मेर ठेराय। 18 एने ता रोटा हेर्‍य एक एक वोरह्यान सात हाजा मेंड्रान पिला, एने एक वासड़ो एने दुय मेंडा चेड़ावज्यो; ता हेऱ्या ता एन बेट एने पिणी बोली यहोवान केरता होमबोलीन गेत चेड़ावाय जाय, तो यहोवान केरता हाजो गेंदाणार बोली ठेराय। 19 ओवता पापबोलीन केरता एक बुकोड़, एने मेल मिलाप बोलीन केरता एक एक वोरह्यान दुय मेंड्रान पिला चेड़ावज्यो। 20 तेवी चाकर्‍यो पेल्‍ली कामायीन रोटा बेल यहोवान सामने आलाड़नेन बेटीन केरता आलाड़े, एने न्या रोटा हेऱ्यो ता दुय मेंड्रान पिला बी आलाड़ाय जाय; ता यहोवान केरता चोखाला, हेते, ता चाकर्‍यान ठेराती। 21 एने तुमू ते दिहस ज्‍यो पारचार किरज्‍यो काय आज आमरी एक चोखाली सोबा एय; एने मेहनेत ने काय काम मा किरहो; ज्‍यो नेम तुमरा आखा गेराणाम तुमरी पिढीन पिढ़ी माय कायेम चाले।

22 "जेवी तुमू तुमरा खेतान कामाय काटहो ताहार खेतान कोपरावाली आखी कामाय मा काटहो एने खेताम पुड़ेल उंब्‍युह एकठा मा किरहो; ताह तुमू गेरीब माणहे एने तुमरा देसाम आवणारे पाराया माणहान केरता रेणे दिज्यो; मी तुमरो बोगवान यहोवा हे।"

23 ओवतो यहोवा मुसाह केयो, 24 "इस्राएल ने माणहाह के काय सातवा मोयनान पेल्ले दिह्याह तुमू विहेवणेन खास दिह मानज्‍यो; तुमू न्याह माणावणेन केरता बिरा फुकज्‍यो, एने एक चोखाली सोबा एकठी एय। 25 तेदिह तुमू मेहनेत ने काय काम मा किरहो, तुमू यहोवाह होमबोली चेड़ावज्यो।"

26 ओवतो यहोवा मुसाह केयो, 27 "तास सातवा मोयनान दोहवो दिह पाप डापणेन दिह मानाय जाय; तो तुमरी चोखाली सोबान दिह रेय, एने ता माय तुमू उपास देरीन सोताह दुख दिज्यो, एने तुमू यहोवान केरता होमबोली चेड़ावज्यो। 28 तेदिह तुमू काल्ली बातीन काम मा किरहो; काहाकाय तो पाप डापणेन दिह निवड़ाय जायेल हे, जा माय तुमरे बोगवान यहोवान सामने तुमरी केरता पाप डापाय जाय। 29 केदी इखेह माणुह ते दिह दुख नाय विठे, तो तान माणहाम रेन खेतेम केराय जाय। 30 केदी इखेह माणुह तेदिह काम केरी, ताहार मी बोगवान तान माणहान विचीम रेन खेतेम केर देह। 31 तुमू काल्लीस बातीन काम मा किरहो; ज्‍यो तुमरी पिढीन पिढ़ी माय तुमरा गेराणाम कायेम ने नेम ठेराय। 32 तो दिह तुमरी केरता विहेवणेन खास दिह रेय, तेदिह तुमू उपास देरीन सोताह दुख दिज्यो, तुमू विहेवणेन ज्या खास दिह्याह मोयनान नोव्वे दिह्याह हांज पोर रेन ते दिहरे दिह हांज पोर वोर तुमरो विहेवणेन दिह मान्या किरज्‍यो।"

33 ओवतो यहोवा मुसाह केयो, 34 "इस्राएल ने माणहाह के काय, सातवा मोयनान पोंदरावे दिह खोपड़ीन तिवार मानाय जाय, यहोवान केरता ज्‍यो चोखालो तिवार सात दिह वोर चाले। 35 पेल्ले दिह चोखाली सोबा रेय, तेवी तुमू ताम मेहनेत ने काय काम मा किरहो। 36 तुमू सात दिह वोर यहोवान केरता आक्‍ठान द्वारा बोली चेड़ावज्यो। ओवता आठवे दिह तुमरी चोखाली सोबा रेय, एने यहोवान केरता तुमू होमबोली चेड़ावज्यो; ज्‍यो एक मोटला पोंचान दिह हे, एने ताम तुमू मेहनेत ने काय काम मा किरहो।"

37 यहोवान खास दिह ज्या हेते, ता दिह्याम तुमू यहोवाह बोली चेड़ावज्यो, मतलब होमबोली, एन बेट, मेल मिलाप बोली एने पिणी बोली बी चेड़ावाय जाय, एने चोखाली सोबान पारचार किरज्‍यो। 38 न्या आखाह रेन जादा यहोवान विहेवणेन दिह्याह मानज्‍यो, एने तुमरी बेट्यु, एने आख्यु मानता एने तुमरी मोरजी केरीन चेड़ायेल बोल्युह, ज्‍यु यहोवाह अर्पण केरीन चेड़ावज्यो।

39 "ओवता सातवा मोयनान पोंदरावे दिह, जेवी तुमू तुमरा खेताम रेन कामायीह टुलो केर लिहो, तेवी सात दिह वोर यहोवान तिवार मानज्‍यो; तुमू पेल्ले दिह खास विहेवणेन एने आठवे दिह विहेवज्‍यो। 40 एने पेल्ले दिह तुमू हाजा हाजा जाड़ान फोले, एने खजुरान डालख्यु, एने पालावाला जाड़ान डालख्‍यु, एने खोदरान मीरे रेन वाहण्यो लेन तुमरा बोगवान यहोवान सामने सात दिह वोर खुसी माणावज्यो। 41 देर वोरीह सात दिह वोर यहोवान केरता ज्यो तिवार मान्या किरज्‍यो, ज्‍यो तुमरी पिढीन पिढ़ी माय कायेम ने विदी ठेराय काय सातवा मोयना माय ज्यो तिवार मानाय जाय। 42 तुमू सात दिह वोर खोपड्युम रेया किरज्‍यो, इस्राएल माय पायदा इयेल आखा माणहे त्यु खोपड्युम रेती, 43 ज्यानकेरता काय तुमरा पिढीन पिढ़ीवाला माणहे ज्‍य जाण रेय, काय जेवी यहोवा आपु इस्राएलीह मिस्र देसा माय रेन निकालेन लावणे बाजरियेल इतो, तेवी तो ताह खोपड्यु माय रेणे देनो, मी तुमरो बोगवान यहोवा हे।"

44 इह केरीन मुसो इस्राएल ने माणहाह यहोवान तिवारान बाराम केय होमलायो।