निर्गमन 40

मिलापवालो तोम्बु बाणावणे एने तान समर्पण

1 पुशो यहोवा मुसाह केयो, 2 पेल्ला मोयनान पिल्ले दिह तु मिलापवाला तोम्बुन रेणेन जागाह उबो केर दिज्ये। 3 एने ता माय गोवायीन पेटी मिलज्ये एने पेटीह पोड़दा केरीन डाप दिज्ये। 4 एने टेबल माय ली जाएन जो काय ता पोर मिलन्यो हे, तो मिल दिज्ये; तेवी दिवो माय ली जाएन तान दिवा पेटाड़ दिज्ये। 5 एने गोवायी पेटीन ओंगाण होनान वेदीह जी दुणी देणेन केरता हे, तो मिलज्ये एने रेणेन जागान बायणान पोरदाह लागाड़ दिज्ये। 6 एने मिलापवाला तोम्बुन रेणेन जागान बायणान ओंगाण आक्‍ठान बोली वेदी मिलज्ये। 7 एने मिलापवालो तोम्बु एने वेदीन विच माय तोपल्यो मेलीन ताम पाणी बुरज्ये। 8 एने खोलीन कावदेन पोड़दान वाड़ बाणावज्ये, एने ती खोलीन बायणा पोर पोड़दाह टांग दिज्ये।

9 अबिषेक ने तेल लेन रेणेन जागान एने जो काय ताम रेय आखो काय अर्पण किरज्ये, एने आखा सामाना हेऱ्यो ताह चोखो किरज्ये; तेवी तो चोखालो एय जाय। 10 आखा सामाना हेऱ्यी आक्‍ठान बोली वेदीह अबिषेक केरीन अर्पण किरज्ये; तेवी ती मोटली चोखाली ठेराय। 11 पाया हेऱ्यो तोपल्याह बी अर्पण केरीन ताह चोखालो किरज्ये।

12 "तेवी हारून एने तान बेटाख मिलापवाला तोम्बुन बायणा पोर ली जाएन पाण्या केरीन उंगलावज्ये, 13 हारूनाह चोखाला फाड़का पेरावज्ये, एने ताह अबिषेक केरीन अर्पण किरज्ये काय तो मार केरता चाकऱ्यान काम केरी। 14 एने तान बेटाख आहने लावीन डेगला पेरावजी, 15 एने जीह केरीन तु तान आबाख अबिषेक किरेल, तिहेस केरीन ताह बी अबिषेक किरज्ये, काय ता मार केरता चाकऱ्यान काम केरती; एने तान अबिषेक तान पिढीन पिढ़ी केरता जेलेमक्योस चाकऱ्यो बाणावीन मेली।"

16 एने मुसा जो जो उकुम यहोवा ताह आपेल इतो, तिहेस केरीन किऱ्यो। 17 एने दिहरा वोरह्यान पिल्ले मोयनान पिल्ले दिह रेणेन जागो उबो केराय गीयो। 18 एने मुसा रेणेन जागाह उबो केरायो एने तान पाया एकेक खाचा लागाड़ीन ता माय बेड़ा टाक्या, एने तान खांबा उबा केऱ्या; 19 एने तो रेणेन जागान उपेर तोम्बुह फेहलायो, एने तोम्बुन उपेर तो ढापुण लागाड्यो; जीह केरीन यहोवा मुसाह उकुम आपेल इतो। 20 एने तो गोवायी पाट्यु लेन पेटी माय मिल्यो, एने पेटीम डेंगा लागाड़ीन तान उपेर पासतावान ढापण्यो मेल दिनो; 21 एने तो पेटी रेणेन जागे पोचाड़ दिनो, एने विच माय वालो पुड़दो टांगीन गोवायीन पाट्युह पेटी माय मेल दिनो; जीह केरीन यहोवा मुसाह उकुम आपेल इतो।

22 एने तु मिलापवाला तोम्बु माय रेणेन जागे उत्तरान उगे विच माय वाला पोरदान बाहेर टेबल लागाड्यो, 23 ✝40:23 निर्गमन 30:36-38; लेव्यवस्था 24:5-9 एने ता पोर रेन तो यहोवान ओंगाण रूटो हिचीन मिल्यो; जीह केरीन यहोवा मुसाह उकुम आपेल इतो। 24 एने तु मिलापवाला तोम्बु माय टेबल ने ओंगाण रेणेन जागान देक्षिण ने उगे दिवो मेल्यो, 25 एने तो दिवाह यहोवान ओंगाण पेटाड्यो; जीह केरीन यहोवा मुसाह उकुम आपेल इतो। 26 एने तो मिलापवाला तोम्बुन विच माय वाला पोरदान ओंगाण होनान वेदीह मिल्यो, 27 एने तो ती पोर गेंदाण्यी दुणी पेटाड्यो; जीह केरीन यहोवा मुसाह उकुम आपेल इतो। 28 एने तो रेणेन जागान बायणा पोर पुड़दो लागाड्यो। 29 एने मिलापवाला तोम्बुन रेणेन जागेन बायणा पोर आक्‍ठान बोली वेदी मेलीन ता पोर होमबोली एने अन्नबोली चेड़ायो; जीह केरीन यहोवा मुसाह उकुम आपेल इतो। 30 एने तो मिलापवाला तोम्बु एने वेदीन विच माय तोपल्यो मेलीन ता माय दोवणेन केरता पाणी बोर दिनो, 31 एने मुसा एने हारून एने तान बिटेख ता माय रेन जान तान आथ पाय दोवती; 32 ✝40:32 निर्गमन 30:18-21 जुलबूखे बी ता मिलापवाला तोम्बु माय एने वेदीन जागे जाताला, तुलबूखे ता आथ पाय दोवताला; जीह केरीन यहोवा मुसाह उकुम आपेल इतो। 33 एने तो तोम्बुन कावदेन एने वेदीन आस पास खोलीन वाड़ पोड़दान उबो केरायो, एने खोलीन बायणान पोड़दाह टांग दिनो। इह केरीन मुसा आखो काम पुरो किऱ्यो।

बोगवानान उपस्तितीन तोम्बुन वादेल

34 ✝ 40:34 1 राजा 8:10-11; यशाया 6:4; यहेजकेल 43:4-5; प्रकाशितवाक्य 15:8 तेवी वादलो मिलापवाला तोम्बु पोर सावाय गीयो, एने यहोवान उजोड़ रेणेन जागा माय बोराय गीयो। 35 एने वादलो मिलापवाला तोम्बु पोर थोब गीयो, एने यहोवान उजोड़ रेणेन जागा माय बोराय गीयो, केरीन मुसा ता माय रिग नाह सिकनो। 36 एने इस्राएली माणहान आखी फिरेस्ती माय ओहलो एतालो, काय जुलबूखे बी तो वादलो रेणेन जागा पोर रेन उठ नाह जातालो, ताह वोर ता ता रेन नाह सेटा एताला। 37 एने केदी तो नाह उठणे, ताहार जे दिह वोर नाह उठतालो, ते दिह वोर ता ओंगाण नाह जाताला। 38 इस्राएली माणहान आखी फिरेस्ती माय, दिह्या ते यहोवान वादेल तोम्बु पोर, एने राती ताच वादला माय आक्‍ठो ता माणहाह देखातालो।