निर्गमन 5

फिरोन ने ओंगाण मुसा एने हारून

1 तेवी मुसा एने हारून जाएन फिरोनाह केया, "इस्राएल ने बोगवान यहोवा इह केरीन किथे, मारा माणहाह जाणे दे, काय ता जेंगला माय जाएन मार केरता तिवार मोणावे।"

2 फिरोन केयो, "यहोवा कुण हे काय मी तान वात मानीन इस्राएलीह जाणे देव? मी यहोवाह नाह जाणेत, एने मी इस्राएलीह जाणे नाह दिण्यो।"

3 ता केया, "इब्री माणहान बोगवान आमुह सोता मिलनेन आयेल हे; केरीन आमुह जेंगला माय तीन दिह्यान जाणेन वाटे पारवांगी आप, काय आपणा बोगवान यहोवान केरता बोलीदान केरी, ओहलो नाय एय काय तो आपु माय बेमारी फेहलावी नाहते तालवार चालाड़ी एने खेतेम केरी।"

4 मिस्र ने राजा ताह केयो, "एय मुसा, एय हारून, तुमू काहा माणहाह काम सोड़ावणे होदतेह? तुमू जाएन जान तान काम किरो।" 5 एने फिरोन केयो, "हुमलो, ज्या देसा माय ता माणहे जुलूम एय जायेल हेते, ओवता तुमू ताह तान कामा माय रेन आराम आपणे होदतेह!"

6 फिरोन ते दिहच ता काम केरावणाराह जा ता माणहान उपेर एता, एने तान आदिकारी इहकेरीन उकुम आप्यो, 7 "तुमू जा एवी वोर ईटड़ा बाणावणेन केरता माणहाह कुटारो आपताला, तो ओंगाण मा आपहो; ता सोतास जाएन तान केरता कुटारो टुलो केरती। 8 तीबी जोलाक ईटड़ा एवी वोर ताह बाणावणे पोड़ताला, तोलास ओंगाण बी ताह बाणावणे लागाड़ज्यो, ईटड़ा कोम मा पोड़ने दिहो; काहाकाय ता आलह्या हेते; तान केरीन ता इही किन आयेड़तेह, ‘आमु जाईन आमरा बोगवानान केरता बोलीदान केरन्या हेते।’ 9 ता माणहाह उंजु बी केठीण सेवा केरावज्यो काय ता ताच माय काम किरते रेती, एने जुठी वातु होमेलनेन ताह टेम नाय जुड़ने जुवे।"

10 तेवी माणहाह काम केरावणारे एने ठेकेदार बाहेर जाएन ताह केया, "फिरोन इह केरीन किथे, मी तुमूह एवी रेन कुटारो नाय आपु। 11 एवी तुमूच जाएन जा बी कुटारो जुड़ी ता रेन तो टुलो केरीन लेन आवो; पुण तुमरो काम कोमी नाय एय।" 12 केरीन ता माणहे आखा मिस्र देसा माय चारो होदणेन केरता वेराय गीया। 13 काम केरावणारे इही केन केन ताह तावणी केरावते रेना; जीह केरीन तुमू कुटारो लेन केरताला, तिहेच केरीन तुमरो दाड़ीन दिह वालो काम एवी बी पुरो किरो। 14 एने इस्राएली माय रेन जा आदिकारीह फिरोन काम केरावणारे तान आदिकारी ठेरायेल एता, ता मार खादा, एने ताह फुशा, "काय कारेण हे काय तुमू जिहकेरीन पेल ठेरायेल एता, ती ईसाबे ईटड़ा काल एने आज पुरा नाह केराया?"

15 तेवी इस्राएलीन आदिकारी फिरोन फाय जाएन विन्ता केऱ्या, "तु तार पावरा हिऱ्यो ओहलो वेवारो काहा किरेह? 16 तारा पावराह कुटारो ते आपात नाह, एने ता आमुह किते रेतेह, ‘ईटड़ा बाणावो, एने तारा पावोर बी मार खायेल हेते; पुण गेलती ताराच माणहान हे।’ "

17 फिरोन ताह जापाप आप्यो, "तुमू आलह्या हेते आलह्या, केरीन केतेह काय आमुह बोगवानान केरता बोलीदान केरने जाणे दे। 18 एवी जाएन तुमरो काम किरो; एने कुटारो तुमूह नाय आपु, तीबी ईटड़ान इसाब पुरो केरने पोड़ी।" 19 जेवी इस्राएलीन आदिकारी ज्यी वात होमल्या काय तान ईटड़ान इसाब कोम नाय एणे जुवे, एने दाड़ीन दिह तोलोच काम पुरो केरने पोड़ी, तेवी ता जाण गीया काय तान वेलान दिह आव गीयाह।

20 जेवी ता फिरोन ने ओंगाण रेन बाहेर निकेल आवा, तेवी मुसा एने हारून, जा ता हेऱ्या बेट केरनेन केरता उबरियेल एता, ताह मिलना। 21 एने ता मुसा एने हारूनाह केया, "बोगवान तुमूह देखीन नियाव केरी, काहाकाय तुमू आमुह फिरोन एने तान काम केरावणारान नेजेर माय खाराब ठेरावीन आमुह मारनेन केरता तान आथा माय तालवार आप दियेल हे।"

मुसान बोगवानाह चाड़ी

22 तेवी मुसा यहोवा फाय जाएन केयो, "एय मालीक, तु न्या माणहाह ओहली वेला काहा केरावेह? एने तु माहु न्या काहा मुकलेल? 23 जेवी रेन मी तार नाव माय फिरोन फाय वातु केरनेन केरता जायेल, तेवी रेन तो न्या माणहा हिऱ्यो खाराबुच वेवारो किरेल हे, एने तु तार माणहान कायच सुटकारो नाह किऱ्यो।"