निर्गमन 19

इस्राएली सिनाय बोयड़ान आहने

1 केरीन इस्राएली माणहाह मिस्र माय रेन निकलीन तीन मोयना एय गीया, तेदिस ता सिनाय बोयड़ान जेंगलाम पोचना।✝19:1 गिनती 33:15 2 जेवी ता रपीदीम माय रेन चालीन सिनाय ने उजाड़ जेंगलाम आवा, एने ता ताहरी पाड़ावो केऱ्या; एने तास बोयड़ान ओंगाण रेणे बाज गीया, 3 तेवी मुसा बोगवानाह मिलनेन केरता बोयड़ा पोर चेड़ गीयो, एने बोगवान ताह बोयड़ा पोर रेन आयड़ीन केयो, याकुबान गेराणाह इहकेरीन कि, एने इस्राएलीह मारो ज्य वचन होमलाव, 4 "तुमू दिखेल हेते काय मी यहोवा मिस्री हिऱ्यो काय काय किरेल, एने तुमूह सुमजो मोराग्या चिड़ान फाका पोर बोहाड़ीन मार हिऱ्यो ली आयेल हे।✝19:4 व्यवस्था 32:11; यशाया 63:9 5 केरीन एवी तुमू हास केरीन मार उकुमाह मानहो, एने मार वायदान पालेन किरहो, ताहार आखा माणहाम रेन तुमूच मारा खाज माणहे केवाहो; आखी देरती ते मारीच हे, पुण तुमू मारा निवाड़ेल माणहे हेते।✝19:5 व्यवस्था 4:20; 10:14; तीतुस 2:14 6 एने तुमू मार नेजरीम चाकऱ्यान राज एने चोखाला माणहे ठेराहो। जी वातु तुवाह इस्राएली माणहाह केणु हे त्यु ज्युस हेत्यु।" 7 तेवी मुसा आवीन डायलाह हाद्यो, एने त्यु सोब वातु, ज्युह केणेन केरता बोगवान ताह उकुम आपेल इतो, ताह सोमजाड़ दिनो।✝19:7 1 पतरस 2:9; प्रकाशितवाक्य 1:6; 5:10 8 तेवी आखा माणहे मिलीन जापाप आप्या, "जो काय यहोवा कियेल हे तो सोब आपु दाड़ीन दिह किरहो।" एने माणहान ज्यी वात मुसा यहोवाह केय होमलायो।

9 तेवी यहोवा मुसाह केयो, "हुमेल, मी काल्ला वादलान आंदारा माय तार फाय आवथु, ज्यानकेरता काय जुलबुखे मी तार हिऱ्यो वातु केरूह, तेवी ता माणहे होमेलती, एने कायेम तार पोर बुरहो मेलती।" एने मुसा यहोवाह माणहान वात केय होमलायो। 10 तेवी यहोवा मुसाह केयो, "तु माणहा फाय जा एने ताह आज एने काल चोखो किरजे, एने ता तान फाड़का दोव लेय, 11 एने ता तीसरे दिह तियार एय; काहाकाय तीसरे दिह यहोवा सिनाय बोयड़ा पोर आखा माणहान देखता उतरी। 12 एने तु माणहान केरता कावदेन वाड़ बाणाव दिज्ये, एने ताह किज्ये, ‘जोगवीन रिज्यो एने बोयड़ा पोर मा चिड़हो, एने तान हेड़ाह बी मा सापेलहो; एने जो कुण बी बोयड़ाह सापली तो खेरीस मोर जाय।✝19:12 इब्रानियो 12:20 13 ताह कुण बी आथ मा लागाड़हो, जो बी सापली ताह देगड़ान मारो जुड़ी, नाहते तो बिलखा केरीन विंदाय जाय; तो माणुह रेय नाहते जेनवार, तो जिवतालो नाय वोची।’ पुण जेवी बिरान सोब्दो जुलूम वार वोर होमलाय, तेवी माणहे बोयड़ा पोर चेड़ती।"

14 जेवी मुसा बोयड़ा पोर रेन उतरीन माणहाह फाय आवीन ताह चोखाला बाणायो; एने ता जान तान फाड़का दोव लेदा। 15 एने मुसा माणहाह केयो, "तिसरे दिह वोर तियार एय जावो; एने बायकुन आहनी मा जाहो।"

16 जेवी तिसरो दिह आवो, तेवी उजालो एतास वादेल गाजणे बाज गीयो एने विजेलने बाज गीयो, एने बोयड़ा पोर काल्लोह सावाय गीयो, ओवतो बिरान सोब्दो मोठेस होमलानो एने पाड़ावे जोला बी माणहे एता ता आखा कापणे बाज गीया। 17 तेवी मुसा ता माणहाह बोगवाना हेऱ्यो मिलनेन केरता पाड़ावा माय रेन लियावो; एने ता आखा बोयड़ान बुंदे उबरेय गीया।✝19:17 व्यवस्था 4:10 18 एने यहोवा आक्‍ठो बोणीन सिनाय बोयड़ा पोर उतरील इतो, एने केरीन आखो बुयड़ो दुवाड़ा माय बोराय गीयो; एने तान दुवाड़ो बाठान गेत दुवातालो, एने आखो बुयड़ो जुलूम कापतालो।✝19:18 बजन 68:8 19 जुलबुखे बिरान आवाज वुड़ती गीयो एने मोठो इतो गीयो, तेवी मुसा केयो, एने बोगवान ताह केय होमलायो एने ताह जापाप आप्यो। 20 तेवी बोगवान सिनाय बोयड़ान चुटा पोर उतेरनो; एने मुसाह बोयड़ान चुटा पोर हाद्यो एने मुसा उपेर चेड़ गीयो। 21 एने यहोवा मुसाह केयो, "बुंदे उतरीन माणहाह चेकचेल्या केर, केदी ओहलो नाय एय काय ता माणहे वाड़ तोड़ीन यहोवाह देखणेन केरता रिग आवती, एने तीह केरीन मोकतास खेतेम एय जाती। 22 एने चाकऱ्या जा मार आहने आवतेह ता बी सोताह चोखाला बाणावी, ओहलो नाय एय काय मी यहोवा ताह देन्ड आपुह।"

23 मुसा यहोवाह केयो, "ता माणहे सिनाय बोयड़ा पोर नाह चेड़ सेकते; तु ते सोतास आमुह इही किन सोमजाड़ील काय बोयड़ान कावदेन वाड़ बांदिन ताह चोखालो मिलो।"

24 तेवी यहोवा ताह केयो, "उतरी जा, एने हारूनाह लेन उपेर आव; पुण चाकऱ्या एने दिहरा माणहे यहोवा फाय वाड़ तोड़ीन नाय चेड़ आवी। केदी ओहलो नाय एय काय मी यहोवा ताह देन्ड आपुह।" 25 एने ज्यी वात मुसा माणहान जागे बोयड़ा पोर रेन उतरीन केय होमलायो।