निर्गमन 34

देगड़ान दुय नोवाल्यु पाट्यु

1 पुशो यहोवा मुसाह केयो, "पेल्ला पाट्युन गेत देगड़ान दुय उंजु पाट्यु बाणावली; एने तो वचन जो पेल पाट्यु पोर लेखायेल एतो, जाह तु तोड़ दियेल इतो, तोच वचन मी ज्यु पाट्यु पोर लेखुह। 2 एने उठ्यान तियार रिज्ये, एने विगोच सिनाय बोयड़ान टोका पोर चेड़ीन मार सामने उब रिज्ये। 3 एने तार हिऱ्यो कुणीह मा लावहे, एने बोयड़ा पोर काहरीक बी एक बी माणुह नाय देखाणे जुवी; डोरे, मेंड्रा बोकड्या बोयड़ा पोर चेरने नाय जुवी।" 4 तेवी मुसा पेल वाली पाट्युन गेत उंजु दुय पाट्यु गीड्यो; एने उठ्यान विगोच उठीन तान आथाम देगड़ान ता दुय पाट्यु लेन यहोवा कियेल तीह केरीन बोयड़ा पोर चेड़ गीयो।

5 तेवी यहोवा वादला माय रेन उतरीन ता हिऱ्यो ताहरी उबरीन यहोवा तान नावान पारचार किऱ्यो। 6 ✝34:6 निर्गमन 20:5-6; गिनती 14:18; व्यवस्था 5:9-10; 7:9-10एने यहोवा तान ओंगाण रेन ज्यो पारचार केरतालो, "यहोवा, यहोवा, बोगवान किव केरनार एने गीणातो, ताह राग दिर रेन लागणे, एने जुलूम किव वालो एने खिरलो हे, 7 एने तो एजार पिढ़ी वोर जेलेम किव केरनार, बिगेर देरेम एने गुनो एने पापान माफी आपणार हे, पुण गुनेगाराह तो किहीक बी केरीन निर्दोस नाय ठेरावी, तो डायलान पापान देन्ड तान सोरा, नात्या पोणत्या पोर बी आपण्यो हे।"

8 तुलेचबुखे मुसा चालुच देरतीन उगे बुंदे देख्यो एने डोंगो पोड़ीन वुंद्यो। 9 एने तो केयो, "एय मालीक, केदी तार गीणीन नेजेर मार पोर एय, ताहार मार हिऱ्यो ता माणहान विच माय चाल, ज्या माणहा एकएठ्या ते हेते, तीबी आमरा गुनाह एने पापाह माफ केर, एने आमुह तारा माणहे केरीन आहने केर।"

वायदो पुशो केणे

10 पुशो बोगवान केयो, "हुमेल, मी एक वायदो केरथु, तारा आखा माणहान ओंगाण मी ओहला मोटला कामे केरूह, जोहला देरती पोर आखा देसा माय केदीच निही एना एती। एने ता आखा माणहे जान विच माय तु रेणे बाज रिनोह, यहोवान काम देखती; काहाकाय जो मी तुमू फाय रेन केरावण्यो हे, तो बिय आवी ओहलो काम हे। 11 जो उकुम मी आज तुवाह आपथु तो तुमू माणहे मानज्यो। दिखो, मी तुमरी ओंगाण रेन एमोरी, कनानी, हित्ती, परिज्जी, हिब्बी, एने यबूसी माणहाह काड़थु। 12 केरीन चेकचेल्या रिज्यो काय जा देसाम तु जाण्यो हे, ता रेणारा माणहा हिऱ्यो वायदो मा किरहे; ओहलो नाय एय काय तो तार केरता फासो बोण जाय।" 13 ✝34:13 व्यवस्था 16:21 एने तान वेदीह तु पाड़ दिज्ये, तान खांम तोड़ दिज्ये, एने तान अशेरा नावान मुरतीह तोड़ दिज्ये;

14 काहाकाय तुमूह काल्ला दिहराह बोगवान केरीन वोंदणेन उकुम नाह सोती, काहाकाय यहोवा जान नाव एथखाणार हे, एने तो रागा माय बोराय जाणार बोगवान हे, 15 ओहलो नाय एणे जुवी काय तु ता देसावाला माणहा हिऱ्यो वायदो किरहे, एने ता तान देवान पासाण रेतेह, केरीन खाराब काम केरती, एने तान केरता बोली बी चेड़ावती, एने इखीह तुवाह नेवता आपी एने तु तान बोली किरेल वोस्तु खाहे, 16 एने तु तान सोऱ्युह तारा सोरान केरता लावहे, जो मारा सोरान प्रती बुरहो तोड़ने एने तान मुरती पुजा देवतान पुजा केरनेन केरता प्रेरीत केरी।

17 ✝ 34:17 निर्गमन 20:4; लेव्यवस्था 19:4; व्यवस्था 5:8; 27:15 तुमू देवान मुरती गेड़ीन मा बाणावहो।

18 ✝ 34:18 निर्गमन 12:14-20; लेव्यवस्था 23:6-8; गिनती 28:16-25 एने बिगेर खमीर चोपड़ेल रोटान तिवार वालज्यो। ता माय मी कियेल तीह केरीन अबीब मोयनाम ठिक टेम पोर सात दिह वोर बिगेर खमीर चोपड़ेल रूटो खाज्यो; काहाकाय तु मिस्र माय रेन अबीब मोयनाम आयेल इतो।

19 एकेक जो पेल पायदा इयेल हे मारो हे; काय वासड़ो, काय गिदल्यो, तारा जेनवारा माय रेन जो एदमी जात पेल्ला हेते, ता सोब माराच हेते। 20 ✝34:20 निर्गमन 13:13 एने गेदड़ान बोदले गिदल्यो आपीन ताह सोड़वीज्यो, केदी तु ताह सोड़ेवणे निही होदतेय, ताहार तान बोच तोड़ दिज्ये।

पुण तारा सोब जा पेल पायदा इयेल हेते ता बेटाख ने बोदले काह आपीन सोड़ेवज्यी। माहु कुण बी ठाल्लो आथ मुय मा देखाड़हो।

21 ✝ 34:21 निर्गमन 20:9-10; लेव्यवस्था 23:3; व्यवस्था 5:13-14 एने सोव दिह वोर काम किरज्‍यो, पुण सातवे दिह आराम किरज्‍यो; एने एल जुपणे बुखीत एने काटणे बुखीत बी आराम किरज्‍यो।

22 ✝ 34:22 लेव्यवस्था 23:15-21; 23:39-43; गिनती 28:26-31 जेवी तु तारा गोवान पेल्‍ली कामाय काटणे सुरवात किरहे ताहार एप्तान तिवार वालज्ये, एने वोरह्यान आखरी तु तारी कामाय टुलो किरहे ते टुलो केरनेन तिवार वालज्ये।

23 वोरह्या माय रेन तीन वार तारा सोब एदमी इस्राएलान बोगवान मालीक यहोवाह तुमरा मुये देखाड़ज्यो। 24 मी ते दिहरा देसान माणहाह तार ओंगाण रेन काड़ीन तारा हेड़ाह वोदाडुह; जेवी तु तार बोगवान यहोवाह तार मुय देखाड़नेन केरता वोरह्याम रेन तीन वार आवहे, तेवी कुण बी तारा जागान लालेच नाय केरी।

25 ✝ 34:25 निर्गमन 12:10 मार बोलीन लुय खमीर हिऱ्यो मा चेड़ावहे, एने फसहान तिवारान बोली माय रेन जारीक बी वुचील एय तो उठ्यान वोर मा मिलहे।

26 ✝ 34:26 व्यवस्था 26:2; 14:21 तार खेतान पेल्‍ली कामायीन पेल्लो ईसो तार बोगवान यहोवान गेरा माय लेन आवज्यी।

"बोकड्यान पिलाह तान आईख ने दुदाम मा चुड़ावहे।"

27 पुशो यहोवा मुसाह केयो, "ज्य वचन लिख ली; काहाकाय ज्योच वचन लेन मी तार हिऱ्यो एने इस्राएली माणहा हिऱ्यो वायदो केरूह।" 28 एने मुसा ता यहोवा हिऱ्यो चालीह दिह एने चालीह रात रियेल इतो; एने ताह वोर रूटो नाह खायेल इतो, एने पाणी बी नाह पियेल इतो। तो त्यु पाट्यु पोर वायदान वचन मतलब दोह उकुम लेख लिदो।

मुसा सिनाय बोयड़ा पोर रेन उतेरने

29 ✝ 34:29 2 कुरिंथीयो 2:7-13 जेवी मुसा गोवाय ने दुय पाट्यु आथाम लेन सिनाय बोयड़ा पोर रेन बुंदे उतरीन आयेल इतो, तुलबूखी यहोवा हिऱ्यो वातु केरनेन कारेण तान मुया पोर उजोड़ चोमेकतालो। पुण ज्यो ताह नाह सोमजाय रियेल एतो काय तान मुया पोर उजोड़ चोमेकणे बाज रेनीह। 30 जेवी हारून एने आखा इस्राएली माणहे मुसाह देख्या, तेवी तान मुया पोर उजोड़ चोमेकणे बाज रेनीह, तेवी ता मुसान आहनी जाणेन बिताला। 31 तेवी मुसा ताह हाद्यो; एने हारून मोंडलीन आखा मुखी डायला हिऱ्यो ता फाय आवो, एने मुसा ता हिऱ्यो वातु केरने बाज गीयो। 32 तेवी इस्राएली माणहे बी तान आहनी आवा, एने जोला बी उकुम यहोवा सिनाय बोयड़ा पोर ता हिऱ्यो वातु केरने बुखीत कियेल इतो, तो सोब ताह केय होमलायो। 33 एने जाह वोर मुसा ता माणहा हिऱ्यो वातु नाह केर लिदो, ताह वोर तो साली केरीन मुय ढाप रियेल इतो। 34 जुलबूखे बी मुसा तोम्बु माय यहोवा हिऱ्यो वातु केरनेन केरता जातालो, तुलबूखे मुसा मुय नाह डापतालो; एने पुशो बाहेर जाईन जो जो उकुम ताह जुड़तालो तो इस्राएली माणहाह जाईन केय देतालो। 35 एने इस्राएली माणहे मुसान मुय देखताला काय तान मुया पोर उजोड़ चुमकेह काय नाह; एने जाह वोर यहोवा हिऱ्यो वातु केरनेन केरता तोम्बु माय नाह जात, ताह वोर तो मुय डापेल रेतालो।