1 ✝ पुशो यहोवा मुसाह केयो, "तु ता माणहाह जाह तु मिस्र देसाम रेन काड़ लायेल हे आरही लेन ता देसाम जा, जान बाराम मी अब्राहाम, इसहाक एने याकुबाह सुगोण खाएन कियेल इतो, ‘मी तो तुमरा वोसाह आपुह।’ 2 एने मी तार ओंगाण ओंगाण एक हेरोगदुताह मोकलुह एने कनानी, एमोरी, हित्ती, परिज्जी, हिब्बी, एने यबूसी माणहाह काड़ देह। 3 एने तुमू ता देसाम जाहो जाहरी दुद एने मोवालान खुदोर वोयणे; पुण तुमू एकएठ्या हेते, केरीन मी तुमरी विच माय रेन नाय चालु, ओहलो नाय काय मी आरदी वाटी तुमूह खेतेम केर देह।"

4 ज्यी खाराब खुबेर होमलीन ता माणहे रेड़ने बाज गीया; एने तान पासाण कुण बी तान गेयणो नाह पेर्‍या। 5 काहाकाय बोगवान मुसाह केय मिलेल इतो, "इस्राएली माणहाह मारो ज्यो वचन होमलाव, तुमू ते एकएठ्या माणहे हेते; केरीन मी जारीक वार बी तुमरी हिऱ्यो चालुह, ताहार तुमूह खेतेम केर देह। केरीन एवी जान तान गेयणो पिरेल हेते तो काड़ दिवो, तेवी माहु सोमजाय काय तुमूह काय केरनु हे।" 6 तेवी इस्राएली माणहे होरेब* बोयड़ान जागे रेन ते ओंगाण तान गेयणो नाह पेऱ्या।

7 एने मुसा तोम्बुह पाड़ावाह रेन बाहेर सिटोच बाणाया केरतालो, एने ताह मिलापवालो तोम्बु केतालो। जो कुण बी यहोवाह होदतालो, तो ता तोम्बुन जागे जातालो, जो पाड़ावाह रेन बाहेर एतो। 8 जुलबूखे बी मुसा तोम्बुन जागी जातालो, तुलबूखे आखा माणहे उठीन जान तान पाड़ावान बायणा पोर उबरेय जाताला, एने जाह वोर मुसा ता तोम्बु माय रिग नाह जातालो, ताह वोर तान उगे देखते रेताला। 9 जुलबूखे मुसा ता तोम्बुम रिगतालो, तुलबूखी वादलान खांब उतरीन तोम्बुन बायणा पोर थोब जातालो, एने यहोवा मुसा हिऱ्यो वातु केरतालो। 10 जुलबूखे आखा माणहे वादलान खांबाह तोम्बुन बायणा पोर थोबतालो देखताला, तेवी उठीन जान तान पाड़ावान बायणा पोर रेन मांड्या पोड़ीन वोंदताला। 11 ✝ एने यहोवा मुसा हिऱ्यो इह केरीन आमने सामने वातु केरतालो, जीह केरीन इखेह तान बायाख हिऱ्यो वातु केरतेय। एने मुसा पुशो पाड़ावा पोर फिरीन आव लागतालो, पुण यहोशु नावान एक जुवान, जो नुन ने बिटोख एने मुसान हाती इतो, तो तोम्बु माय रेन नाह निकेलतालो।

12 एने मुसा यहोवाह केयो, "हुमेल तु माहु काय किथे, ‘न्या माणहाह लेन जा;’ पुण ज्यो नाह केयो काय मार हिऱ्यो कुणीह मुकेल हे। तीबी तु कियेल हे, मी तार नाव जाणथु एने तार पोर मार गीण ने नेजेर हे। 13 एने एवी केदी मार पोर तारी गीणान नेजेर एय, ताहार माहु तार वात सोमजाड़, ता से जुलबूखे मी तारी इकेल लेव, तुलबूखे तार गीणीन नेजेर मार पोर रेय। पुशो ज्य बी एर केर काय ज्या तारा माणहे हेते।"

14 यहोवा केयो, "मी सोता आवुह एने तुवाह आराम आपुह।"

15 मुसा ताह केयो, "केदी सोता नाय आवहे, ताहार आमुह न्या रेन ओंगाण मा मोकली। 16 ज्य किहीक सोमजाय काय तार गीणीन नेजेर मार पोर एने ज्या माणहा पोर हे? काय ज्‍याकेरीन नाह काय तु आमरी आरही चालेह, जिहकेरीन मी एने तारा माणहे देरती पोर वाला आखा माणहाह रेन आंगे ठेराती?"

17 तेवी यहोवा मुसाह केयो, "मी ज्य काम बी जान बाराम तु कियेल हे केरूह; काहाकाय मार गीणीन नेजेर तार पोर हे, मी तुवाह नाव से जाणथु।"

18 ओवतो मुसा केयो, "माहु तारी बोड़ायीन उजालो देखाड़।"

19 ✝ओवतो बोगवान मुसाह केयो, "मी तार हिऱ्यो रेह, तुलबूखी तुवाह मारा आखा हाजाला कामे देखाडुह, एने तार ओंगाण मी यहोवा नावान पारचार केरूह, एने जा पोर मी गीण केरने होदुह ताच पोर मी गिण केरूह, एने जा पोर किव केरने होदुह ताच पोर किव केरूह।" 20 पुशो बोगवान मुसाह केयो, "तु मारो मुयाह देख नाय सिकहे; काहाकाय माणुह मार मुय देखीन जीवतालो नाह रेय सिकेत।" 21 पुशो बोगवान केयो, "हुमेल, मार फाय एक जागु हे, पोला सापरा पोर उबरी; 22 एने जाह वोर मार उजोड़ तार ओंगाण चालते रेय, ताह वोर मी तुवाह सापरान बिचकेड़ा माय मेलुह, एने जाह वोर मी तार ओंगाण चालीन नाय निकेल जाव, ताह वोर मारा आथा केरीन तुवाह डापीन मेलुह। 23 ओवतो मी मार आथ विस लेह, तेवी तु मार सेरीराह दिखहे, पुण मारा मुयाह नाय दिखहे।"