निर्गमन 38

होमबोलीन वेदी बाणावणो

1 पुशो तो बाबल्यान लाकड़ान होमबोलीन केरता वेदी बी बाणायो; तान लांबाय पाच आथ एने चोवड़ाय पाच आथ एती; तिह केरीन ती वेदी चोवकोट बाणायो, एने उचाय तीन आथ एती। 2 तो तान चार चोमखेर तान चार हिंगे बाणायो, ता ता हेऱ्या बिगेर जोड़पान बोणना; एने तो ताह पितलान बाणायो। 3 एने तो वेदी हेऱ्यो वापराय जाणेन आखी वोस्तु, तोपल्यो, पावड़ा, वाटका, काटा, एने मुंद्यु ता सोब ठामला पितलान बोणना। 4 एने वेदीन केरता तान कावदेन पोड़दान बुंदे तो पितलान एक जारो बाणायो, वेदीन बुंदे रेन ते उपेर वोर लागाड़ेल इतो। 5 एने तो पितलान जारान कावदेन चार केड़ा बाणावीन लागाड्यो, एने ता डांड्युह लागाड़ सिके। 6 पुशो बाबल्यान लाकड़ान डेंगा बाणावीन ता पोर पितेल लागाड़ दिनो। 7 तेवी तो डांडीह वेदीन उगेन केड़ा माय वेदी विसणेन केरता बोहाड़ दिनो। वेदीह तो चोवकट केरीन पोकेल्ली बाणायो।

पितलान तोपल्यो बाणावणो

8 तो तोपल्यो एने तान पाया दुयू पितलीन बाणायो, ज्य मिलापवाला तोम्बुन बायणा पोर सेवा केरनार बायकुन आरसा केरीन पितलीन बाणवाय गीया।

चोखाला जागान खोली

9 पुशो तो खोली बाणायो; एने खोली देक्षिण बागा माय वाटायेल बारीक होणीन फाड़कान पुड़दो इतो, जान लांबाय एक होव आथ एतो। 10 विह खाम एने पितलीन विह पाया बाणवाड्यु, खांबान केड्यु एने चांदीन पोट्टयु एत्यु। 11 खोलीन उत्तर दिशान केरता विह खांमे, एने तान पितलीन विह पाया बोणना, एने खांबान केड्यु एने जोड़नेन पोट्टयु चांदीन एत्यु। 12 पक्षिम दिशान पोड़दा सोब जोड़ीन पाचाह आथान एता; तान केरता दोह खांमे, एने दोहूच तान पाया एता, एने खांबान केड्यु एने जोड़नेन पोट्टयु चांदीन एत्यु। 13 पुर्व दिशान पोड़दा बी पाचाह आथान एता। 14 खोलीन बायणान एक उगेन केरता पोन्दरा आथान पोड़दा बोणना; एने तान केरता तीन खाम्ब एने तीन पाया बाणावाय गीयो। 15 खोलीन बायणान दिहरी उगेन पोड़दा बी पोन्दरा आथान बुणेल एता; एने तान केरता बी तीनुच खाम्ब, एने तीनुच पाया बी एता। 16 खोलीन चारो उगे आखा पोड़दा वाटेल होणीन फाड़कान बुणेल एता। 17 एने खांबान पाया पितलीन एने आकड़ा एने पोट्टयु चांदीन बुणेल एत्यु, एने तान उपेरल्यो ईसो चांदीन इतो, एने खोलीन आखा खांब चांदीन पोट्टयुन बुणेल एता। 18 खोलीन बायणान पोड़दा पोर बेलबुटान काम केराय जाईल एतो, एने तो निल्ला, जामण्या एने रातला रेंगान फाड़कान; एने वाटेल होणीन फाड़का बुणेल एता; तान लाम्बाय विह आथ एती, एने तान उचाय मतलब तान चोवड़ाय पाच आथ एती। 19 एने तान केरता चार खांमे एने तान चार पाया पितलीन बुणेल एता, एने तान केड्यु चांदीन बुणेल एत्यु, एने तान उपेरल्यो ईसो एने तान पोट्टयु चांदीन बुणेल एत्यु। 20 एने रेणेन जागो एने आस पास ने खोलीन आखा पाटड्या पितलीन एता।

रेणेन जागाम वापेर किरेल वोस्तुन वर्णन

21 पुरावो पोत्रो मेलनेन जागान सोमान जा लेवीन सेवान केरता बोणनो; एने तान गेणती हारून चाकऱ्यान सोरा ईतामारान उगे रेन मुसान केणे माय इयेल एती, तो इह केरीन हे।

22 जो उकुम बोगवान मुसाह आपेल इतो, तान गेत यहुदान गेराणान बसलेल जो ऊरीन सुरो एने हूर ने नातेणह्योक इतो, तो सोब तियार किऱ्यो। 23 ता हिऱ्यो दान गेराणान अहीसामाक ने बिटोख ओहोलीआब इतो, जो नक्‍काशीकार एने गेड़णार एने निल्ला, जामण्या एने रातला रेंगान बारीक होणीन फाड़का माय कढ़ाय केरनार पुरो कारागिर इतो।

24 चोखालो जागो बाणावणेन जोलो होनो बेट चिड़ेल एतो, तो होनो चोखाला जागान वोजान गेत आखोच एक एजार दुय किलो एतो। 25 एने मोंडली माय गेणाय जायेल माणहान बेटी माय चेड़ायेल चांदी, चोखाला जागान वोजान गेत कोमीत कोमी तीन एजार चार होव तीस किलो एतो। 26 ✝38:26 मत्ती 17:24; निर्गमन 30:11-16जा इस्राएली विह वोरह्यान वोयी रेन वोदार एता, ता गेणती माय आखाच सोव लाख तीन एजार पाच होव पाचाह माणहे एता, ता चोखाला जागान वोजान गेत सोव ग्राम जुड़नो। 27 चोखालो जागो एने पोड़दान केरता कोमीत कोमी साड़े तीन एजार*38:27 तीन एजार शेकेल किलो चांदी वापेर केराय जाईल एती, एक पायो साड़े तीन एजार किलो चांदी केरीन बोणनी, एक पायान केरता कोमीत कोमी चोवतीस होव किलो चांदी लागनी। 28 जी तीस किलो चांदी वोस गियी, तीन ता खांबान सेल्यु बाणाया, एने तान उपेरल्या ईसान पोट्टयु बी बाणाव देनी। 29 जी पितेल बेट चेड़ायेल एती, ती कोमीत कोमी दुय एजार चार होव किलो एती। 30 ता केरीन मिलापवाला तोम्बुन बायणान केरता पाया, पितलान वेदी, एने तान जारो, एने वेदीन आखो सोमान, 31 खोलीन चारो उगेन पाया एने तान बायणान पाया, रेणेन जागो एने खोलीन चार उगेन खुटा बी बाणावाय गियी।