निर्गमन 22

नियम एने डेंड

1 केदी इखेह माणुह बुयेल, मेंड्रो एने बोकड्यो चोरीन ताह मार देय, नाहते वेच देय, ताहार तो बोयलान बोदले पाच बुयेल, एने मेंड्रा बोकड्यान बोदले चार मेंड्रा बोकड्या बोर देय। 2 एने केदी चोर चोरी केरतालोन सापड़ी जाय, एने ताह उहलो मारो जुड़ी काय तो मोर जाय, ताहार तान खुनान दोस कुणी पोर नाय लागी; 3 केदी दिह उगणेन बाद तो चोरी किऱ्यो एय, ताहार देणारा पोर गुनो लागी; एने तान गुनो बोर देणे जुवी, एने केदी ता फाय बोरनेन केरता काईच निही एय ताहार ता चोराह वेच देणे जुवी। 4 केदी चुरेल बुयेल, गेदड़ो, मेंड्रो नाहते बोकड्यो तान आथाम जिवतालो सापड़ी जाय, ताहार तो दुय गुणा वादार बोर देणे जुवी।

5 एने केदी इखेह माणुह तान डोरे सोतान खेताम नाहते अंगुरान वाड़ीम चारेह, एने ता बुलवायीन एगदा दिहरान खेताम नाहते अंगुरान वाड़ीम रिगीन खाय जाय, ताहार तो माणुह तान खेताम रेन नाहते अंगुरान वाड़ीम रेन हाजाम रेन हाजी कामाय रेन तो तान नुकसान बोर देय।

6 केदी इखेह माणुह तान खेताम आक्‍ठो पेटाड़ेह, एने तो आक्‍ठो जुरखील्या माय लाग जाय एने फुलान डिगाम नाहते दाणाम नाहते उबालो खेत हेलगी जाय, ताहार जो कुण आक्‍ठो पेटाड़ेल हे, तो नुकसान खेरीस बोर देणे जुवे।

7 केदी इखेह तान पोयशा नाहते काह मोंगाली वोस्तु दिहराह मेलनेन आप देय, एने ता फाय रेन आखो चोराय जाय, एने केदी तो चोर देराय जाय, ताहार डोबल्यो बोरने पोड़ी। 8 एने केदी चोर नाय सापड़ी, ताहार ता माणहाह बोगवानान ओंगाण लावणे जुवे काय खेरो एय जाय काय तो आपणा बाय बोणहान मालाह आथ लागाड़ेल हे काय नाह।

9 मालान बारा माय एकेक वातुम बुयेल, गेदड़ो, मेंड्रो, बोकड्यो, फाड़का नाहते ओहली काल्ली बी बातीन टाकायेल वोस्तुन बाराम गुनो काहा नाय लागील रेय, जी बी वोस्तु जो मारी हे मारी हे किथे, ता दुयू बी जाणान वात लेन बोगवाना फाय आवो; एने जाह बोगवान दोसी ठेरावी तो दिहराह डोबल्यो बोर देय।

10 केदी इखीह तान आहेंल्याह गेदड़ो, बुयेल, मेंड्रो बोकड्यो नाहते काल्लो बी जेनवार होमालनेन केरता होपी, एने कुणीह बी देख्या बिगेर तो जेनवार मोर जाय, नाहते गायलो एय जाय, नाहते चोराय जाय, 11 ताहार ता दुय जाणान विच माय यहोवान सुगोण खावाड़ने जुवी, मी ज्यान मालाह आथ नाह लागाड्यो; तेवी मालान मालीक ज्यो खेरो मान लेणे जुवी, एने दिहराह ताह कायच नुकसान बोरने नाय पोड़ी। 12 एने केदी तो खेरिस ता फाय रेन चोरानो एय, ताहार तो तान मालीकाह नुकसान बोर देय।✝22:12 उत्पत्ती 31:39 13 केदी ताह जेंगली जेनवार मार देनो एय, ताहार तो माणुह मालीकान ओंगाण पुरावान केरता तोहलोच लेन आवी, तेवी ताह तो नुकसान नाय बोर देय तीबी चाली।

14 एने पोशो इखेह दिहरा माणहा फाय रेन जेनवार मांगीन ली आवी एने तान मालीक नाय रेय, तुलबूखी ता जेनवेराह जेखेम एय जाय नाहते तो मोर जाय, ताहार तो खेरीस तान नुकसान बोर देय। 15 पुण तो मालीक बी जागेस रेय, ताहार ता माणहाह नुकसान बोरने नाय पोड़ी; एने केदी तो जेनवार बाड़े पोर मांग्‍यो एय, ताहार तान नुकसान तान बाड़ास माय एय जाय।

नेती एने देरमान कायदो

16 केदी इखेह एदमी एगदी कुवारली सोरीह पोटाड़ीन ती हिऱ्यो गेलेत केरतेय, ताहार तो खेरीस तीन किमोत आपीन ती हिऱ्यो वाराड़ केर लेय। 17 पुण तीन आबोख तिह नाय आपणे हुदे, ताहार गेलेत केरनार सोरीन किमोत लेणेन रितीन गेत पोयशा आप देय।

18 एने तु काल्ली बी जादु केरनार बायकुह जिवताली रेणे मा दिहे।✝22:18 व्यवस्था 18:10-11

19 एने जो कुण जेनवारा हेऱ्यो गेलेत काम केरी, तो खेरीस माराय जाय।✝22:19 लेव्यवस्था 18:23; 20:15-16; व्यवस्था 27:21

20 एने जो कुण बोगवानाह सोड़ीन दिहराह एगदा देवान केरता बोली चेड़ावी, तो खेतेम एय जाय।✝22:20 व्यवस्था 17:2-7

21 तुमू पाराया माणहाह विताड़हो मा, एने अन्याय मा किरहो, काहाकाय एर किरो मिस्र देसाम तुमू बी पाराया एता।✝22:21 निर्गमन 23:9; लेव्यवस्था 19:33-34; व्यवस्था 24:17-18; 27:19 22 एने काल्ली रांडायेल बायकुह नाहते विखावाला सोराह वेला मा केरावहो। 23 केदी तुमू ओहलाह वेला केरावहो, एने तान रेड़नो जारीक बी माहु होमलानो, ताहार खेरीस मी तान मोदेक केरूह; 24 तेवी मारो राग बोड़की, एने मी तुमूह तालवारी केरीन माराव देह, एने तुमऱ्यु बायकु रांडाय जाती एने तुमरा सोरा विखावाला एय जाती।

25 केदी तु मार माणहाम रेन एगदा गेरीब माणुह जो तार फाय रेतेय, एने तु ताह पोयशा आपहे, ताहार होवकारान गेत वियाज मा लिहे।✝22:25 लेव्यवस्था 25:35-38; व्यवस्था 15:7-11; 23:19-23 26 एने केदी तु तार बायाख ने फाड़का गिरवी मेल लिदो एय, ताहार दिह बुड़नेन पेल ताह पुशो फिराव दिज्ये;✝22:26 व्यवस्था 24:10-13

27 काहाकाय ता फाय डिल डापणेन केरता एकुस सादेन हे, ता फाय नाय रेय ते तो काय पांगरीन हुवी? एने जुलबूखे तो मार फाय मोदेक मांगी तेवी मी तान होमलुह, काहाकाय मी ते गीणातो हे।

28 बोगवानाह दोस मा दिहो, एने आपणा माणहान मुखीह बी हाराप मा दिहो।✝22:28 प्रेरितान काम 23:5

29 तुमरा खेतान कामाय एने फोलान रूहा माय रेन माहु आपणेन केरता ओग्या पोस्या मा इहो,

तार सोराम रेन जो पेल एनोय तो माहु आपज्यो। 30 एने तिहेच केरीन तार गाय एने मेंड्रा बोकड्याम रेन जो पेल वियानो एय तो माहु आपज्यो; सात दिह वोर पिलो तान आईख हेऱ्यो रेय, एने आठ दिह्या पोर तु ताह माहु आप दिज्‍ये।

31 तुमू मारा चोखाला माणहे हेते; केरीन जो जेंगली जेनवेरान द्वारा मारेल तुवाह सापड़ी, तान माह मा खाहे, पुण ताह चितान ओंगाण जुगार दिज्‍ये।✝22:31 लेव्यवस्था 17:15