Levítico 19

चोखोपोणा एने सोबावान नेम

1 ओवतो यहोवा मुसाह केयो, 2 इस्राएल ने आखी मोंडलीह के काय तुमू चोखाला बोणीन रिवो; काहाकाय मी तुमरो बोगवान यहोवा चोखालो हे। 3 तुमरे माय एक एक माणुह तुमरा आईख आबाख ने आदार किरे, एने मारो विहेवणेन दिह्याह मानज्‍यो, मी तुमरो बोगवान यहोवा हे। 4 तुमू मुरतीन बोक्ती मा किरहो, एने देवतान मुरती मा बाणावहो; मी तुमरो बोगवान यहोवा हे।

5 ✝ 19:5 लेव्यवस्था 26:1; निर्गमन 20:23; 34:17; व्यवस्था 17:1-5 जेवी तुमू यहोवान केरता मेल मिलाप बोली चेड़ावहो, ताहार तुमू इह केरीन बोली चेड़ावज्यो काय जा केरीन मी तुमू हिऱ्यो खुस एय जाय। 6 तुमू तान माह बोलीन दिह एने दिहरे दिह खाय सेकतेह, पुण तीसरे दिह वोर जो रेय जाय तो आक्‍ठाम हेलगाड़ाय जाय। 7 केदी ताम रेन कायच बी तीसरे दिह खावाय जाय, ताहार ज्‍य एठो ठेराय, एने स्वीकार नाय केराय। 8 केदी एगदो माणुह इह केरीन किरेह, ताहार तो खाराब काम केरनार ठेराय; काहाकाय तो यहोवान चोखाली चिजीन आदार नाह किऱ्यो, तो माणुह तान माणहाम रेन खेतेम केराय जाय।

9 ✝ 19:9 लेव्यवस्था 27:15; व्यवस्था 24:19-22 जेवी तुमू काटणेन टेम तुमरी कामाय काटहो, ताहार तुमू आखी उगे रेन खेतान कावदेन वोर मा काटहो, एने केदी उंब्‍या बुय पोर पोड़ जातेह, ताहार तुमू ताह टुलो मा किरहो। 10 एने तुमरा अंगुरान वाड़ीन आखा अंगुर मा तुड़हो, एने जा बुय पोर पोड़ जाती ताह मा विसहो, काहाकाय तुमूह ती चिज गेरीब एने पाराया माणहान केरता रेणे दिज्यो; मी तुमरो बोगवान यहोवा हे।

11 तुमू चोरी मा किरहो, एने एका दिहरा हेऱ्या कोपेट मा किरहो, एने जुठ मा बुलहो। 12 तुमू मारा नावान जुठो सुगोण मा खाहो, बोगवानान नाव खाराब केरतेह; मी यहोवा हे।

13 तुमू तुमरा आहेंल्‍याह दुको मा दिहो, ताह मा लुटहो, एने मोंजऱ्यान मोंजरी तार फाय आखी रात वेगोस वोर नाय रेणे जुवे। 14 तुमू एगदा बेयराह हाराप मा दिहो, एने एगदा आंदलाह पाड़नेन केरता तान ओंगाण एगदी चिज मा मेलहो; पुण तुमू तुमरा बोगवानान बिय मिलज्यो; मी यहोवा हे।

15 नियाव केरने बुखेत अन्याय मा किरहो, एने नाह ते गेरब्यान पक्ष लिजे एने नाह मोटला माणहान मुय देखीन विचार किरजे; एक दिहरान नियाव ईमानदारी से किरजे। 16 तुमू दिहरा माणहान विरूद कावदेन चिहटा किरतेन मा फिरहो, एने एक दिहराह मारनेन केरता योजना मा बाणावहो, मी यहोवा हे।

17 तुमरा मोनाम एका दिहरान केरता राग मा मेलहो; केदी तुमरो आहेंल्‍यो काह बाकतो किरेह, ताहार ज्यान बाराम ताह सोमजाड़, नाह ते तान पापान बार तुवाह विसणे पोड़ी। 18 बुदलो मा लिहो, एने नाह तुमरा आहेंल्या एने नाह गेरल्या हिऱ्यो दुसमोनाय किरज्‍यो, पुण एक दिहरा हेऱ्यो तुमरी गेतुच मोंग किरज्‍यो। मी यहोवा हे।

19 तुमू मारा नेमान पालेन किरज्‍यो, तुमरा पालन्या जेनवाराह दिहरा जातीन पालन्या जेनवारा हेऱ्या बेचकाणे मा दिहो; तुमरा खेताम दुय बातीन बियारो एकठास मा पेरहो; एने होण एने रोचकान बेचकीन बुणेल फाड़को मा पेरहो।

20 केदी एगदी बायकु पावेरनी एय, एने तीन हेगाय एगदा एदम्या हेऱ्यी इयेल हे, पुण ती पावेरनी नाहते वेचायेल हे एने नाह आजाद केरायेल हे, ती हिऱ्यो केदी इखेह खाराब काम केरी, ताहार ता दुयूह देन्ड ते जुड़ी, पुण ती बायकुन ताबाम नाह एणेन वोजेसे ता दुयू माराय नाय जाय। 21 पुण ता माणहाह तान गुनान केरता मिलापवाला तोम्बुन बायणा पोर यहोवाह एक मेंडाह दोसबोलीन केरता लियावो। 22 एने चाकर्‍यो ता माणहान किरेल पापान कारेण दोसबोलीन मेंडान द्वारा यहोवान सामने पाप डापे; तेवी तान किरेल पाप माफ केराय जाय।

23 ओवता जेवी तुमू कनान देसाम पोचहो, तुमू बात बातीन फोलावाला जाड़े लागाड़हो, ताहार तान फोल तुमरी केरता तीन वोरह्या वोर बिगेर खेतनान गेत ठेराय; केरीन ताम रेन कायच नाय खावाय जाय। 24 एने चोवथा वोरह्याम ता जाड़ान आखा फोल यहोवान बोड़ाय ने बेटीन रूप माय चोखा ठेराय। 25 तेवी पाचवा वोरह्याम तुमू तान फोल खाज्यो, ज्यानकेरता काय ताम रेन तुमूह वोदार फोल जुड़ी; मी तुमरो बोगवान यहोवा हे।

26 तुमू लुय लागेल माह मा खाहो। एने जादु मा किरहो, एने नाह हाजी बाकती मुरतीह मानज्‍यो। 27 तुमूह तुमरी मुंडीन दिड़ेवाला लेट्याह काटणे नाय जुवे, एने तुमरी दाड़ी काटणे नाय जुवे। 28 एगदा मुरेल माणहाह एर केरनेन केरता तुमू तुमरा सेरीराह मा काटहो, एने तुमरी उपेर एगदी निसाणी गुंदाड़हो मा; मी यहोवा हे।

29 तुमू तुमरी बेटह्युक वेश्‍या बाणावीन खाराब मा किरहो, ओहलो नाय एय काय देस वेश्‍यान वोजेसे खाराब काम से बोराय जाय। 30 तुमू मारा विहेवणेन दिह्याह पालेन किरज्‍यो, तुमू मारा चोखाला जागान आदार किरज्‍यो; मी यहोवा हे।

31 बोड़वा एने बुत निकालनारा फाय राय लेणेन केरता मा जावो, एने ओहलाह होदीन तान वोजेसे एठा मा एय जाहो; मी तुमरो बोगवान यहोवा हे।

32 डावाला माणहान आदार किरो, जेवी ता गेराम आवी, ताहार उठ बोहज्यो; तुमरा बोगवानान आदार किरो, मी यहोवा हे।

33 केदी इखेह पारायो तुमरा देसाम तुमरी हिऱ्यो रेय, ताहार ताह तारास मा दिहो। 34 जा पाराया तुमरी हेऱ्या रेती, ता तुमरी केरता देसावालान गेत रेती, एने ता हेऱ्या तुमरे गेतुस मोंग किरज्‍यो; काहाकाय तुमू बी मिस्र देसाम पाराया एता; मी तुमरो बोगवान यहोवा हे।

35 "तुमू नियाव, पाप, तोल एने परिणाम माय अन्याय मा किरहो। 36 एने खेरायीन ताकड़ो, नियावान वोजेन, खेरलो माप एने खेरलो एपा*19:36 एपा मोजणेन ठामलो, दोह किलोन माप हे। तुमरी फाय रेय। मी तुमरो बोगवान यहोवा हे जो तुमूह मिस्र देसाम रेन निकाल लायेल। 37 तुमू मारा आखा नियाव ने नेमाह एने नियाव विदीह एर मीलो, एने तुमू तान पालेन किरज्‍यो। मी यहोवा हे।"