1 ଇମ୍‌ଣି ମାନାୟ୍ ସାସନ୍ ୱାରିୟା ମାନ୍ କିନାନ୍, ହେୱାନ୍ ଗିୟାନ୍ ମାନ୍ କିନାନ୍; ମତର୍ ଇନେନ୍ କେତ୍‌ନାକା ଗିଣ୍ କିନାନ୍, ହେୱାନ୍ ପସୁ ଲାକେ । 2 ୱାରିନି ଲକୁ ନିତ୍ରେମାପ୍ରୁତିତାଂ ଦୟା ପାୟାନାନ୍, ମତର୍ ବାନ୍ୟା ଚିନ୍ତା କିନାକାନ୍‌ ମାନାୟ୍ ଦସି କିନାନ୍ । 3 ଦୁସ୍ଟ ହୁକେ ଇମ୍‌ଣି ମାନାୟ୍ ହାର୍‌ତିର୍ ଆଉନ୍‌, ମାତର୍ ଦାର୍ମିର୍‌ତି ମୁଡ଼୍‌ ଇନାୱାଡ଼଼ାଙ୍ଗ୍ ଗୁଚା ଆଉତ୍ । 4 ଗୁଣ୍‌ନି କଗ୍‌ଲେ ଜାର୍ ଆଣ୍ଡ୍ରେନ୍‌ତି ମୁକୁଟ୍ ଲାକେ; ମତର୍ ଲାଜ୍‌କୁଇକିନି କଗ୍‌ଲେ ତା ପ୍ଡେକୁସବୁ ଜିରାନି ଲାକେ । 5 ଦାର୍ମିର୍‌ତି ହାନ୍ଦାୟ୍ ନ୍ୟାୟ୍‌ନିକା; ମତର୍ ଦୁସ୍ଟର୍‌ତି ଚଚ୍‌ନାକା ଚକ୍‌ଲି କିନାକା । 6 ଦୁସ୍ଟର୍‌ ଅହ୍‌ନାକାନ୍‌ କାଜିଂ କୁଚ୍‌ନି କାତା ଇନାର୍, ମତର୍ ହୁଦାର୍‌ ମାନାୟାର୍‌ତି ୱେଇ ହେୱାରିଂ ରାକ୍ୟା କିନାତ୍ । 7 ଦୁସ୍ଟରିଂ ଉନ୍‌ନ୍ଦି ତୁଇନାର୍‌ ଆରେ ମାନ୍‌ଗୁର୍, ମତର୍ ଦାର୍ମିର୍‌ତି ଇଲ୍ ଜାୟିଜୁଗ୍ ଆନାତ୍ । 8 ମାନାୟ୍ ଜାର୍ ହାର୍‌ ବୁଦି ଇସାବ୍ରେ ଦୟା ପାୟାନାନ୍, ମତର୍ ଇନେର୍‌ତି କୁଟ୍ ୱାସ୍କି, ହେୱାନ୍ ବେକାର୍ ଆନାନ୍ । 9 ଇମ୍‌ଣି ମାନାୟ୍ ତାକେ କାଦି ହିଲୁତ୍‌ ଆରି ହେୱାନ୍‌ ଜାର୍‌ତିଂ ବାଡ଼୍‌ପାଣ୍‌ ଆନାନ୍‌ ହେ ମାନାୟ୍‌ ବାଦୁଲ୍‌, ଇମ୍‌ଣି ମାନାୟ୍‌ ତାକେ ହଲ୍ୟା ମାନାନ୍‌ ହେୱାନ୍‌ ଦନ୍ୟ । 10 ଦାର୍ମି ମାନାୟ୍ ଜାର୍ ପସୁନି ପାରାଣ୍‌ତିଂ ଲବାୟ୍‌ କିନାନ୍, ମତର୍ ଦୁସ୍ଟର୍‌ ଲବାୟ୍‌ କିଉର୍‌ । 11 ଇନେନ୍ ଜାର୍ ବୁଇଁତ କାମାୟ୍‌ କିନାନ୍, ହେୱାନ୍ ବେସି କାଦି ପାୟା ଆନାର୍; ମତର୍ ଇନେନ୍ ବେକାର୍‌ ବିସ୍ରେ ବାର୍ସି କିନାନ୍, ହେୱାନ୍ ବୁଦିହିଲାକାନ୍ । 12 ଦୁସ୍ଟ ମାନାୟ୍ ବାନ୍ୟା କାମାୟ୍‌ କିନାକାର୍‌ ଜାଲ୍‌ତିଂ ହାର୍‌ ଇନାର୍‌; ମତର୍ ଦାର୍ମିର୍‌ତି ମୁଡ଼୍‌ ପାଡ଼୍‌ନିକା । 13 ୱେଇନି ଅଦାର୍ମିତ ଦୁସ୍ଟତି ଡ଼ୁକା ମାନ୍‌ଗାନାତ୍, ମତର୍ ଦାର୍ମି ଦୁକ୍‌ତାଂ ଉଦାର୍ ପାୟାନାନ୍ । 14 ମାନାୟ୍ ଜାର୍ ୱେଇନି ପାଡ଼୍‌ ହୁକେ ହାର୍‌ ପାଞ୍ଜ୍‌ନାନ୍, ଆରେ, ମାନାୟ୍‌ତି କେଇଦାଂକିତି ପାଡ଼୍‌ ହେୱାନିଙ୍ଗ୍ ହିୟାନାତ୍ । 15 ଅଗିଆନି ହାଜ଼଼ି ତା ନିଜ୍ କାଣ୍‌କୁତ ଟିକ୍‌; ମତର୍ ଇନେନ୍ ଗିୟାନ୍‌ ନିକାନ୍, ହେୱାନ୍ ଗାଣ୍‌ଜୁ ୱେନାନ୍ । 16 ଅଗିୟାନ୍‌ତି ରିସା ତ୍ରିପ୍‌କୁ ହନାତ୍; ମତର୍ ଚାତୁର୍‌ ମାନାୟ୍‌ ଲାଜୁ ଡାବାୟ୍‌କିନାତ୍ । 17 ସତ୍‌ଇନାକାନ୍‌ ଦାର୍ମିକାତା ହପ୍‌ନାନ୍; ମତର୍ ଚକ୍‌ଲି ବୁଲ୍‌କାୟ୍‌କିନାକା ହପ୍‌ନାନ୍ । 18 ଏଲେଙ୍ଗ୍‌ ବାନି ମାନାୟ୍‌ ମାନାର୍‌ ଇନେର୍‌ କାତା ବାବିକିୱାଦାଂ କାତା ଇନାର୍‌ କାଣ୍ଡାଲାହାଂ ଟୁଣି ଲାକେ ଆନାତ୍‌; ମତର୍ ଗିଆନିତି ୱେନ୍ଦୁଲ୍ ଉଜ୍‌ଆନାକା । 19 ସତ୍‌ନିକାନ୍ ଅଟି ନିତ୍ରେତିର୍ ଆନାତ୍; ମତର୍ ମିଚ୍‌ଇନାକାନ୍ ୱେନ୍ଦୁଲ୍ ଅଲପ୍‌ ଲାକେ । 20 ବାନ୍ୟା ଚିନ୍ତା କିନାକାନ୍ ମାନ୍ତ ଟକାୟ୍‌ ମାନାତ୍; ମତର୍ ସୁସ୍ତା ହାର୍‌ ହିକ୍ୟା ୱେଚ୍‌ନାକାନ୍‌ ୱାରି ଆନାତ୍ । 21 ଦାର୍ମିର୍ କାଜିଂ ଇମ୍‌ଣି ସନି ଗିଟା ଆଉତ୍; ମତର୍ ଦୁସ୍ଟ ମାନାୟ୍ ବାନ୍ୟାତ ବାର୍ତି ଆନାର୍ । 22 ମିଚ୍‌ଇନାକାନ୍ ୱେଇ ନିତ୍ରେମାପ୍ରୁତି ଗିଣ୍‌ ବିସ୍ରେ; ମତର୍ ଇମ୍‌ଣାକାର୍‌ ସତ୍ ବେବାର୍ କିନାର୍, ହେୱାର୍ ହେୱାନ୍ତି ୱାରିନିକାର୍‌ । 23 ଚାତୁର୍‌ ମାନାୟ୍ ଗିୟାନ୍ ଡାବାୟ୍‌ କିନାତ୍‌; ମତର୍ ମୁର୍କିୟାର୍‌ତି ମାନ୍ ଅଗିଆନ୍ତ ହନାତ୍ । 24 ଟକ୍‌ୱା କାମାୟ୍‌କିନି କେଇ ରାଜ୍ କିନାତ୍; ମତର୍ ନିସ୍ତାୟ୍ ମାନାୟ୍ ୱେଟି କାମାୟ୍‌ କିନାନ୍‌ । 25 ମାନାୟ୍‌ତି ବେସି ଚିନ୍ତା ମାନ୍‌ତିଂ ତାରେନ୍‌ କିନାତ୍‌; ମତର୍ ହାର୍‌ଦି ବଚନ୍ ୱାରି କିଇକିନାତ୍‌ । 26 ଦାର୍ମି ମାନାୟ୍ ଜାର୍ ପାଡ଼୍‌ହାନିକାର୍ ହାଜ଼ିଚଚ୍‌ନାକାର୍‌; ମତର୍ ଦୁସ୍ଟର୍‌ତି ହାଜ଼଼ି ହେୱାରିଂ ବାଣାୟ୍‌ କିନାତ୍‌ । 27 ଟକ୍‌ୱା ବାଣ୍‌ୱେନ୍‌ କଟ୍ରାତିଂ ଆସ୍ତି ପସୁତି ଜେଇ ୱାଞ୍ଜୁନ୍‌; ମତର୍ କସ୍ଟକିନି ମାନାୟ୍‌ତି ବେସିମଲ୍‌ ସଂପତି ଆନାତ୍‌। 28 ଦାର୍ମିକାତାନି ହାଜ଼଼ିତ ଜିବୁନ୍ ମାନ୍‌ଗାନାତ୍; ଆରେ, ତାପାଚେ ହାନି ହାଜ଼଼ିତ ହାକି ମାନ୍‌ଗୁତ୍ ।