1 ଦାଉଦ୍‌ତି ମାଜ଼଼ି ଇସ୍ରାଏଲ୍‌ନି ରାଜା ସଲମନ୍‌ତି ହାର୍ଦିହିକ୍ୟା; 2 ଗିୟାନ୍ ଆରି ହାର୍‌ଦି ହିକ୍ୟା ବୁଜାଦେଂ; ଗିଆନ୍‌ନିକା ବଚନ୍ ବାବି କିଦେଂ; 3 ହାର୍‌ବେବାର୍, ଦାର୍ମି ଆରି ହାର୍‌ବାବିକିନାକା ଆରି ନ୍ୟାୟ୍ ବିସ୍ରେ ହାର୍‌ଦି ହିକ୍ୟା ମାନି କିଦେଂ; 4 ହୁଦାର୍‌ ମାନାୟ୍‌ତିଂ ଜାଗ୍ରତ୍ ଆରି ବେଣ୍ଡ୍‌ଆ ଲଗାଂ ବିଦ୍ୟା ଆରି ପ୍ୟାସ୍ ହିଦେଂ; 5 ଇନେସ୍ ଗିଆନି ମାନାୟ୍ ହେଦାଂ ୱେନ୍‌ଜି ଆଦିକ୍ ଗିଆନ୍ ପାୟାନାନ୍ ଆରି ବୁଦିକାରିୟା ହାର୍‌ଦି ହିକ୍ୟାନି ହିକ୍ୟା ପାୟାନାନ୍; 6 ଆରେ, ର ହାର୍ଦିହିକ୍ୟା କାତା ଆରି ର ବାନି କାତା ଆରି ପଣ୍ଡିତାର୍ ବଚନ୍ ଆରି ହେୱାର୍‌ତି ଡ଼଼ୁକ୍ତି ବଚନ୍ ବୁଜା ଆନାନ୍ ।

7 ନିତ୍ରେମାପ୍ରୁତି ବିସ୍ରେନି ପାଣ୍ଡ୍ରାନି ଗିଆନ୍‌ନି ଆରମ୍; ମତର୍ ବୁଦିହିଲି ମାନାୟାର୍ ଗିଆନ୍ ଆରି ହାର୍‌ଦି ହିକ୍ୟାତିଂ ବେକାର୍ କିନାର୍ । 8 ଏ ନା ମାଜ଼଼ି, ନି ଆବାତି ହାର୍‌ଦି ହିକ୍ୟା ୱେନା ଆରି ନି ଆୟାତି ଆଦେସ୍ ପିହ୍‌ମା । 9 ଇନେକିଦେଂକି ହେଦାଂ ମି କାପ୍‌ଡ଼଼ାନି ଦୟାନିକା ମୁକୁଟ୍ ଆରି ଗାଡେଲ୍‌ନି କାଜିଂ ହାସ୍‌କୁ ଆନାତ୍ । 10 ଏ ନା ମାଜ଼଼ି, ପାପିର୍‌ ନିଙ୍ଗେଙ୍ଗ୍ ପୁସ୍‌ରାଇକିଦ୍‌ନାର୍, ଏନେଙ୍ଗ୍ ରାଜି ଆମା । 11 ହେୱାର୍ ଜଦି ଇଞ୍ଜ୍‌ନାର୍, ମା ଲାହାଂ ୱାଡ, ଆସେଙ୍ଗ୍ ନେତେର୍‌ହନି ୱେଡ଼ାଲିଂ ପାଟ୍‌ପଡ଼ିକିଜ଼଼ି କୁଚ୍‌ନାସ୍, ଦସ୍‌ହିଲ୍‌ୱାକାରିଂ ଅକାରଣ୍ ଆସ୍ତେଙ୍ଗ୍ ଡ଼ୁଗ୍‌ଜି ମାନାସ୍; 12 ପାତାଲ୍‌ନି ନ୍ୟାୟ୍ ଆସେଙ୍ଗ୍ ହେୱାରିଂ ଜିବୁନ୍ତାଂ ୱିହ୍‌ନାସ୍ ଆରି କ୍ଡଇଦରାତ୍‌ତି ମାନାୟ୍ ଲାକେ ହେୱାରିଂ ୱିଜ଼଼ାରିଂ ୱିହ୍‌ନାସ୍; 13 ହେବେ ଆସେଙ୍ଗ୍ ସବୁବାନି ବେସିମଲ୍‌ ଦାନ୍‌ ପାୟାନାସ୍‌ ଚରିକିତି ଜିନିସ୍‌ ଜାର୍ ଜାର୍ ଇଞ୍ଜ ବାର୍ତି କିନାସ୍, 14 ଏପେଙ୍ଗ୍ ମା ବିତ୍ରେ ମେହା ଆଦାଟ୍‌; ମା ୱିଜ଼଼ାକାସ୍‌ ର ମଣା ଲାକେ ଆନାସ୍ । 15 ଏ ନା ମାଜ଼଼ି, ଏପେଙ୍ଗ୍ ହେୱାର୍ ଲାହାଂ ହେ ହାଜ଼଼ିତ ଚାଲା ଆମାଟ୍, ହେୱାର୍ ହାଜ଼଼ିତାଂ ଜାର୍ ପାନା ଅଟ୍‌କାୟ୍‌କିନାସ୍‌; 16 ଇନେକିଦେଂକି ହେୱାର୍‌ତି କାଲକୁ ବାନ୍ୟା କିଦେଂ ହନ୍‌ନାର୍ ଆରି ନେତେର୍ ହପ୍‌ତେଂ ଦାପ୍ରେ ହନ୍‌ନାର୍ । 17 ଇମ୍‌ଣାକା ପଟି କାଣ୍‌କୁ ଆଗେ ଜାଲ୍‌ ଉଚ୍‌ନାକା ବେକାର୍ ଆନାତ୍ । 18 ହେୱାର୍ ନିଜ୍ ନିଜ୍‌ତ ନେତେର୍ ହପ୍‌ନାକା ପାଗ୍‌ଜି କୁଚ୍‌ନାର୍ ଆରି ଜାର୍‌ତି ପାରାଣ୍‌ତିଂ ଆହ୍‌ନି କାଜିଂ ବିନେ ଡ଼଼ୁଗ୍‌ଜି ମାନାର୍ । 19 ୱିଜ଼଼ାର୍ ଦନ୍‌ଲବ୍ରା ହାନାକା ଇଦାଂ; ହେଦାଂ ଦନ୍‌ନି ଆଦିକାରିର୍‌ତି ପାରାଣ୍ ନାସ୍‌ କିନାର୍ ।

20 ଗିଆନ୍ ହାଜ଼଼ିତ ଗାଜାକାଟ୍‌ତ କୁକ୍‌ନାର୍; ହେୱାନ୍ ଡେଡ଼଼ା ବାହାକାଂ ଜାର୍ କାଟ୍ ୱେନ୍ୟାନାତ୍; 21 ହେ ମାନାୟାରିଂ ରୁଣ୍ଡାନି ବାହାତ କୁକ୍‌ନାର୍; ଗାଡ଼୍‌ ଦୁୱେର୍‌ନି ହଣି ବାହାତ ଆରି ଗାଡ଼ ବିତ୍ରେ ଜାର୍ ବଚନ୍ ଇଞ୍ଜି ଇନାର୍: 22 ଏ ନିର୍‌ବୁଦିଆର୍ ମାନାୟାର୍, ଏଚେକ୍ କାଡ଼ ମୁର୍କିୟାତିଂ ୱାରିୟା ଆନାଦେର୍? ଏ ହୁଞ୍ଜ୍‌ନାକାଦେର୍, ଆରେ ଏଚେକ୍ କାଡ଼ ନିନ୍ଦାତ ସାରି ମାନାଦେର୍? ଏ ମୁର୍କିୟାର୍, ଆରେ ଏଚେକ୍ କାଡ଼ ବିଦ୍ୟାତିଂ ଗିଣ୍ କିନାଦେର୍ ? 23 ନା ଲେତ୍‌ନିତ ମାନ୍ ବାଦ୍‌ଲାୟ୍ କିୟାଟ୍; ହୁଡ଼଼ାଟ୍, ଆନ୍ ମି ଜପି ଜାର୍ ଜିବୁନ୍ ୱାକ୍ତାନାଙ୍ଗ୍, ଆନ୍ ଜାର୍ ବଚନ୍ ସବୁ ମିଙ୍ଗେଙ୍ଗ୍ ୱେଚ୍‌ଚାନାଂ । 24 ଇନେକିଦେଂକି ଆନ୍ କୁକ୍ତାତାଂ, ଆରେ ଏପେଙ୍ଗ୍ ମୁନା କିତ୍‌ତାଦେର୍; ଆନ୍ କେଇ ଲାମାୟ୍ କିତ୍‌ତାଂ, ଇନେର୍ ମାନିକିୱାତାଦେର୍‌; 25 ମତର୍ ଏପେଙ୍ଗ୍ ନା ୱିଜ଼଼ୁ ହିକ୍ୟା ବେକାର୍ ଇଚାଦେର୍, ଆରେ ନା ଇମ୍‌ଣାକାପା ଲେତ୍‌ନାକା ଇଚା କିୱାତାଦେର୍; 26 ଲାଗିଂ ଆନ୍ ପା ମିଙ୍ଗେଙ୍ଗ୍ ବିପଦ୍ ୱାଡ଼଼ାଲିଂ ଗାଇନାଙ୍ଗ୍, ମିଦାଂ ପାଣ୍ଡ୍ରୁ ଏକାୱାନିହିଂ ଆନ୍ କିଜାୟ୍ କିଦ୍‌ନାଙ୍ଗ୍ । 27 ଏଚେକାଡ଼ଦ ବେସି ବାର୍ହା ଲାକେ ମିଦାଂ ପାଣ୍ଡ୍ରୁ ଏକା ୱାନାତ୍ ଆରି ହୁଜ଼଼ାୱାଣି ଲାକେ ମିଦାଂ ବିପଦ୍ ୱାନାତ୍; ଏଚେକାଡ଼ଦ କସ୍ଟ ଆରି ନନାକା ମି କାଜିଂ ଗିଟାଆନାତ୍‌ 28 ହେପାଦ୍‌ନା ହେୱାର୍ ନାଙ୍ଗ୍ ହିର୍‌ବାଆଦ୍‌ନାର୍‌, ମତର୍ ଆନ୍ ଉତର୍ ହିଉଙ୍ଗ୍; ହେୱାର୍ ବେସି ଜାତୁନ୍‌ରେ ନାଂ ଦାସ୍ତାନାର୍, ମତର୍ ନାଂ ଉଦେସ୍ ପାୟା ଆଉର୍ । 29 ଇନେକିଦେଂକି ହେୱାର୍ ଗିୟାନ୍ତ ଗିଣ୍ କିତାର୍ ଆରି ନିତ୍ରେମାପ୍ରୁତି ବିସ୍ରେ ପାଣ୍ଡ୍ରୁ ମାନ୍‌ କିୱାତାର୍; 30 ହେୱାର୍ ନା ଇମ୍‌ଣି ହିକ୍ୟା ମାନି କିୱାତାର୍ ଆରି ନା ୱିଜ଼଼ୁ କେତ୍‌ନାକା ଏଲା ଗିଆନ୍ କିତାର୍ । 31 ହେଦାଂକାଜିଂ ହେୱାର୍ ଜାର୍ ଜାର୍ କାମାୟ୍‌ନି ପାତିପାଡ଼୍‌ ବଗିକିନାର୍ ଆରି ଜାର୍ ଜାର୍ ବାନ୍ୟା ୱେଚ୍‌ନାକା ପୁରା ପାଡ଼୍‌ ବଗି କିନାର୍ । 32 ଆଁ ନିର୍‌ବୁଦିୟାର୍ ବିନେ ହାନାର୍ ହେୱାରିଂ ନାସ୍‌ କିନାତ୍ ଆରି ଅଗିୟାନିର୍ ଜିବୁନ୍‌ନି ସାରି ହେୱାରିଂ ବୁଡାୟ୍‌ କିନାତ୍ । 33 ମାତର୍ ଇମ୍‌ଣି ମାନାୟ୍ ନା କାତା ୱେନାନ୍, ହେୱାନ୍ ପାଣ୍ଡ୍ରାୱାଦାଂ ବାହା କିନାନ୍ ଆରି ଅମଙ୍ଗଲ୍ ୱେଡ଼଼ାଙ୍ଗ୍‌ ପାଣ୍ଡ୍ରାୱାଦାଂ ଜମ୍‌ନାକା ପାୟାନାନ୍‌ ।