1 ହେ ନାଜିଂ ହେୱାର୍‌ ମାନାୟାର୍‌ କିତୁଲ୍‌ ୱେଚିଲେ ମସାତି ପତିତାଂ ପଡ଼ି କିତାର୍‌; ଆରେ, ହେ ବିତ୍ରେ ଲେକାତି ଇ କାତା ଗାଟାତାତ୍‌ ଜେ, ଅମ୍ମେନିୟ ଆରି ମୟାବିୟ ମାନାୟ୍‌ ୱିଜ଼୍‌ୱି କାଡ଼୍‌ ପର୍‌ମେସ୍ୱର୍‌ତି କୁଟୁମ୍‌ତ ହଣୁର୍‌, 2 ଇନେକିଦେଂକି ହେୱାର୍‌ ଆରାଣ୍‌ ଆରି ଏଜ଼ୁଙ୍ଗ୍‌ ଅଜ଼ି ଇସ୍ରାଏଲ୍‌ ମାଜ଼ିରିଂ ବେଟ୍‌ୱାତାର୍‌, ମତର୍‌ ହେୱାରିଂ ସାଇପ୍‌ ହିନି କାଜିଂ ହେୱାର୍‌ ବିରୁଦ୍‌ତ ବିଲିୟମ୍‌ତିଂ ବୁତି ହିତାର୍‌; ଆତିସ୍ପା ମା ପର୍‌ମେସ୍ୱର୍‌ ହେ ସାଇପ୍‌ତିଂ ଆର୍ସିବାଦ୍‌ତ ମେହାୟ୍‌ କିତାନ୍‌ । 3 ହେପାଦ୍‌ନା ହେୱାର୍‌ ଇ ବିଦି ୱେନ୍‌ଜି ଇସ୍ରାଏଲ୍‌ ବିତ୍ରେତାଂ ପୁର୍ତିନି ମେହାତି ମାନାୟାରିଂ ବିନେ କିତାନ୍‌ ।

4 ଇଦାଂ ଆଗେ ଇଲିୟାସିବ୍‌ ମାପ୍ରୁହେବାକିନାକାନ୍‌ ମା ପର୍‌ମେସ୍ୱର୍‌ତି ଇଲ୍‌ନି ବାକ୍ରାନି ମୁଣିକା ବାବ୍ରେ ବାଚିକିୟା ଆତାନ୍‌ ଆରି ହେୱାନ୍‌ ଟବିୟନି କୁଟୁମ୍‌ ମାଚାନ୍‌, 5 ଇଲିୟାସିବ୍‌ ଟବିୟ କାଜିଂ ର ଗାଜା ବାକ୍ରା ରଚ୍‌ଚି ମାଚାନ୍‌, ମତର୍‌ ଆଗେ ମାନାୟାର୍‌ ହେ ବାହାତ ନେଞ୍ଜାଡାକି-ଆକାତ୍‌, କୁନ୍ଦୁରୁ* ଆରି ଜିନିସ୍‌ ଆରି ବଲ୍‌ ପାର୍‌ମାଣ୍‌ ଲେବିୟ ଆରି କେର୍‌ନାକାର୍‌ ଆରି ଦୁୱେର୍‌କାନାକାର୍‌ କାଜିଂ ହିତି ତାସ୍‌, ଅଙ୍ଗୁର୍‌ରାସ୍‌ ଆରି ଚିକାଣ୍‌ନି ଦସ୍‌ମାସ୍‌; ଆରେ, ମାପ୍ରୁହେବାକିନାକାର୍‌ତି କାଜିଂ ହାର୍ଦି ଇନାମ୍‌ ଇଡ଼୍‌ଜି ମାଚାନ୍‌ । 6 ମତର୍‌ ଆନ୍‌ ଇସବୁ ସମୁତ ଜିରୁସାଲମ୍‌ତ ମାନ୍‌ୱାତାଙ୍ଗ୍‌, ଇନେକିଦେଂକି ବାବିଲ୍‌ନି ଅର୍ତକ୍ଷସ୍ତ ରାଜାତି ଆଦିକାର୍‌ତ ତିରିସ୍‌ ଦୁଇ ବାର୍ହୁତ ଆନ୍‌ ରାଜା ଲାଗାଂ ହାଚାଙ୍ଗ୍‌ ଆରି କେତେକ୍‌ ଦିନ୍‌ ପାଚେ ରାଜାଙ୍ଗ୍‌ ହେଲ କାଜିଂ ଆଦିକାର୍‌ ଏନ୍ତାଙ୍ଗ୍‌; 7 ଇଦାଂପାଚେ ଆନ୍‌ ଜିରୁସାଲମ୍‌ତ ୱାଜ଼ି ଇଲିୟାସିବ୍‌, ଟବିୟ କାଜିଂ ପର୍‌ମେସ୍ୱର୍‌ତି ଇଲ୍‌ନି ହାକ୍‌ଡ଼ିତ ର ଇଲ୍‌ ରଚ୍‌ଚି କିଜ଼ି ଇମ୍‌ଣି ବୁଲ୍‌ କିଜ଼ିମାଚାନ୍‌, ହେଦାଂ ବୁଜାତାଂ । 8 ଇଦାଂପାଚେ ଆନ୍‌ ବେସି ରିସା ଆଜ଼ି ହେ ବାକ୍ରାତାଂ ଟବିୟନି ୱିଜ଼ୁ ଇଲ୍‌ ଆଡ଼୍‌ମାଡ଼୍‌ ହପ୍‌ଚି ତୁହିତାଙ୍ଗ୍‌ । 9 ପାଚେ ଆନ୍‌ ବଲ୍‌ କିତିଲେ, ହେୱାର୍‌ ଇଲ୍‌ ସବୁ ସକଟ୍‌ କିତାର୍‌; ଲାଗିଂ ଆନ୍‌ ହେବେ ଆରେରଗ ପର୍‌ମେସ୍ୱର୍‌ତି ବାକ୍ରାନି ଜିନିସ୍‌ ଆରି ନେଞ୍ଜାଡାକି-ଆକାତ୍‌ ଆରି ଦୁପ୍‌ନି ତାତାଙ୍ଗ୍‌ ।

10 ଆରେ, ଆନ୍‌ ହୁଡ଼୍‌ତାଂ ଜେ, ଲେବିୟର୍‌ତି ବାଗ୍‌ ହେୱାରିଂ ହିୱାଦାଂ ମାଚାର୍‌; ଲାଗିଂ ୱିଜ଼ାର୍‌ କାମ୍‌ଲିୟାର୍‌ ଲେବିୟର୍‌ ଆରି କେର୍‌ନାକାର୍‌ ମନ୍ଦିର୍‌ ପିସ୍ତି ଜାର୍‌ ଜାର୍‌ ଜମିତ ହାଚାର୍‌ । 11 ହେବେ ଇନେକିଦେଂ ପର୍‌ମେସ୍ୱର୍‌ତି ଇଲ୍‌ ପିସ୍ତାଦେର୍ଣ୍ଣା ? ଇଦାଂ ଇଞ୍ଜି ଆନ୍‌ ମୁଣିକାର୍‌ ଲାହାଂ ବେଣ୍‌ବାଟ୍‌ କିତାଙ୍ଗ୍‌, ଆରେ, ଆନ୍‌ ହେୱାରିଂ ରବେ କିଜ଼ି ସହେ ସହେ ପାଦ୍‌ତ ହେୱାରିଂ ବାଚି କିତାଙ୍ଗ୍‌ । 12 ପାଚେ ସବୁ ଜିହୁଦା ତାସ୍‌ ଆରି ଅଙ୍ଗୁର୍‌ରାସ୍‌ ଆରି ଚିକାଣ୍‌ନି ଦସ୍‌ବାଗ୍‌ତାଂ ର ବାଗ୍‌ ଗୁଦାମ୍‌ତ ତାଇୱାତାର୍‌ । 13 ପାଚେ ଆନ୍‌ ସେଲିମିୟ ମାପ୍ରୁହେବାକିନାକାନିଂ ଆରି ସାଦକ୍‌ ମାସ୍ଟର୍‌ତିଂ ଆରି ଲେବିୟର୍‌ ବିତ୍ରେତାଂ ପଦାୟତିଂ ଗୁଦାମ୍‌ଲାଗେନି ମୁଣିକା କିତାଙ୍ଗ୍‌; ହେୱାର୍‌ ତାରେନ୍‌ ମତନିୟତି ମାଜ଼ି ସକ୍‌କୁରତି ନାତି ହାନନ୍‌ ମାଚାନ୍‌; ଇନେକିଦେଂକି ହେୱାର୍‌ ପାର୍ତିନିକାର୍‌ ମାଚାର୍‌, ଲାଗିଂ ଜାର୍‌ ଟଣ୍ଡାରିଂ ବାଟାକିନି କାମାୟ୍‌ ହେୱାର୍‌ତି ଆତାତ୍‌ । 14 ଏ ନା ପର୍‌ମେସ୍ୱର୍‌, ଇ ବିସ୍ରେ ନାଂ ଏତୁକିଦା, ଆରେ ଆନ୍‌ ନା ପର୍‌ମେସ୍ୱର୍‌ତି ଇଲ୍‌ ଆରି ହେବେନି ପାଲି କିନି ବିସ୍ରେ କାଜିଂ ଇନାକା କିତାଙ୍ଗ୍‌ନା, ନା କିତାକା ହେ ସୁକ୍‌କାମାୟ୍‌ ସବୁ ବାଣାମା ।

15 ହେ ସମୁତ ଆନ୍‌ ଜିହୁଦା ବିତ୍ରେ କେତେକ୍‌ ମାନାୟାରିଂ ଜମ୍‌ନିବାର୍‌ନାଜିଂ ଅଙ୍ଗୁର୍‌ ତଗନାକା ଆରି ମୁଟା ବିତ୍ରେ ତାଇୱାନାକା ଆରି ଗଦ ଜପି ଲାଦିକିନାକା, ପା ଜମ୍‌ନିବାର୍‌ନାଜିଂ ଅଙ୍ଗୁର୍‌ରାସ୍‌, ତଗା ମାର୍‌ ଅଙ୍ଗୁର୍‌ପାଡ଼୍‌ ଆରି ତଗାପାଡ଼୍‌ ଆରି ସବୁବାନି ବଜ୍‌ ଜିରୁସାଲମ୍‌ତ ତାନାକା ହୁଡ଼୍‌ତାଂ; ଆରେ, ଇମ୍‌ଣି ନାଜିଂ ହେୱାର୍‌ ଜେଇ ଜିନିସ୍‌ ପ୍ରତାର୍‌, ହେ ନାଜିଂ ଆନ୍‌ ହେୱାରିଂ ଚେତ୍‌ନା ହିତାଙ୍ଗ୍‌ । 16 ହେଦାଂ ପା ଗାଡ଼୍‌ଦ ସରିୟ ଲକୁ ବାହା କିଜ଼ିମାଚାର୍‌, ହେୱାର୍‌ ମିନ୍‌କୁ ଆରି ସବୁବାନି ପ୍ରନି ଜିନିସ୍‌ ତାସି ଜମ୍‌ନିବାର୍‌ନାଜିଂ ଜିହୁଦାନି ହିମ୍‌ଣାଂ ଲାଗାଂ ଆରି ଜିରୁସାଲମ୍‌ତ ପ୍ରତାର୍‌ । 17 ହେବେ ଆନ୍‌ ଜିହୁଦାନି ମୁଣିକା ଲାହାଂ ବେଣ୍‌ବାଟ୍‌ କିଜ଼ି ହେୱାରିଂ ଇଚାଙ୍ଗ୍‌, "ଏପେଙ୍ଗ୍‌ ଜମ୍‌ନିବାର୍‌ନାଜିଂ ବିଟାଡ଼୍‌ କିଜ଼ି ଇଦାଂ କି ବାନ୍ୟା କିନାଦେରା ?"

18 ମି ଆକର୍‌ଦାଦିର୍‌ ଇନାକା ଏଲେଙ୍ଗ୍‌ବାର୍ତି କାମାୟ୍‌ କିୱାତାର୍‌ ? ଆରେ, ହେଦାଂ କାଜିଂ ମା ପର୍‌ମେସ୍ୱର୍‌ କି ମା ଜପି ଆରି ଇ ଗାଡ଼୍‌ ଜପି ଇସବୁ ହାର୍‌ ଗିଟାୟ୍‌ କିୱାତାର୍ଣ୍ଣା ? ଆତିସ୍ପା ଏପେଙ୍ଗ୍‌ ଜମ୍‌ନିବାର୍‌ନାଜିଂ ବିଟାଡ଼୍‌ କିଜ଼ି ଇସ୍ରାଏଲ୍‌ ଜପିତିଂ ଆରେ ରିସା ତାଇୱାନାଦେରା । 19 ଇଦାଂପାଚେ ଜମ୍‌ନିବାର୍‌ ଆଗେ ଜିରୁସାଲମ୍‌ନି ଦୁୱେର୍‌ ସବୁ ମାଜ୍‌ଗା ଆନି ୱାଡ଼ାଲିଂ ଆନ୍‌ କାପାଟିଂସବୁ ବନ୍ଦ୍‌ କିଦେଂ ବଲ୍‌ ହିତାଙ୍ଗ୍‌, ଆରେ ଜମ୍‌ନିବାର୍‌ ୱିଜ଼୍‌ୱି ପାତେକ୍‌ ମେଲା କିୱେଦେଂ ବଲ୍‌ ହିତାଙ୍ଗ୍‌; ଆରେ, ଜମ୍‌ନିବାର୍‌ନାଜିଂ ଇମ୍‌ଣି ବଜ୍‌ ବିତ୍ରେ ତାଇୱାୱି କାଜିଂ ଆନ୍‌ ଜାର୍‌ ଆଡ଼ିୟାର୍‌ ବିତ୍ରେତାଂ କେତେଜାଣ୍‌ତିଂ ଦୁୱେର୍‌ଲାଗେ ବାଚି କିତାଙ୍ଗ୍‌ । 20 ହେବେ ବେପାର୍‌କିନାକାର୍‌ ଆରି ସବୁବାନି ଜିନିସ୍‌ ପ୍ରନାକାର୍‌ ରଗ ରିହା ଜିରୁସାଲମ୍‌ ବାର୍ତ ନାଣା ବିତାୟ୍‌ କିତାର୍‌ । 21 ହେବେ ଆନେଙ୍ଗ୍‌ ହେୱାରିଂ ଚେତ୍‌ନା ହିଜ଼ି ହେୱାରିଂ ଇଚାଙ୍ଗ୍‌, "ଏପେଙ୍ଗ୍‌ ଇନେକିଦେଂ କୁୱାଡ଼୍‌ ଲାଗାଂ ନାଣା ବିତାୟ୍‌ କିନାଦେରା ? ଏପେଙ୍ଗ୍‌ ଆରେ ରଗ ଏଲେଙ୍ଗ୍‌ କିତିସ୍‌ ଆନ୍‌ ମିଙ୍ଗେଙ୍ଗ୍‌ ଆସ୍ତାନାଂ ।" ହେ ସମୁତାଂ ହେୱାର୍‌ ଆରେ ଜମ୍‌ନିବାର୍‌ନାଜିଂ ୱାୱାତାର୍‌ । 22 ଇଦାଂପାଚେ ଆନ୍‌ ଲେବିୟରିଂ ଜମ୍‌ନିବାର୍‌ନାଜିଂ ପୁଇପୁୟା କିନି କାଜିଂ ଜାର୍‌ ଜାର୍‌ତିଂ ସକଟ୍‌ କିଦେଂ ଆରି ୱାଜ଼ି ଦୁୱେର୍‌ସବୁ ରାକ୍ୟା କିଦେଂ ବଲ୍‌ ହିତାଂ । ଏ ନା ପର୍‌ମେସ୍ୱର୍‌, ନା ପାକ୍ୟାତ ଇଦାଂ ପା ଏତୁକିୟାଟ୍‌ ଆରି ଜାର୍‌ ଦୟାନି ହାର୍‌ ଇସାବ୍ରେ ନାଂ ରାକ୍ୟା କିଦା । 23 ହେ ସମୁତ ପା ଇମ୍‌ଣି ଜିହୁଦିର୍‌ ଅସ୍‌ଦଦିୟ, ଅମ୍ମେନିୟ ଆରି ମୟାବିୟ ଦେସିୟା କଗ୍‌ଲେକାଂ ବିବା କିଜ଼ି ମାଚାର୍‌, ହେୱାରିଂ ଆନ୍‌ ହୁଡ଼୍‌ତାଂ; 24 ଆରେ, ହେୱାର୍‌ ହିମ୍‌ଣାଂ ଆଦେକ୍‌ ଅସ୍‌ଦଦିୟ ବେରଣ୍‌ତ କାତାବାର୍ତା କିତାର୍‌ ଆରି ଜିହୁଦିୟ ବାସାତ କାତାବାର୍ତା କିଦେଂ ଆଡ୍‌ୱାତାର୍‌, ମତର୍‌ ସବୁ କୁଟୁମ୍‌ନି ବାସାଇସାବ୍ରେ କାତା ଇଚାର୍‌ । 25 ପାଚେ ଆନ୍‌ ହେୱାର୍‌ ଲାହାଂ କାତାବାର୍ତା କିତାଙ୍ଗ୍‌ ଆରି ହେୱାରିଂ ସାଇପ୍‌ ହିତାଙ୍ଗ୍‌ ଆରି ହେୱାରିଂ ଇନେ ଇନେରିଂ ଟ୍ରାକ୍‌ତାଂ ଆରି ହେୱାର୍‌ତି ତେମୁଲ୍‌ ଜେଲ୍‌ତାଂ, ଆରେ ପର୍‌ମେସ୍ୱର୍‌ ତର୍‌ଦ ପାର୍ମାଣ୍‌ କିୟ୍‌କିତାଙ୍ଗ୍‌, "ଏପେଙ୍ଗ୍‌ ହେୱାର୍‌ ମାଜ଼ିରିଂ ଜାର୍‌ ଜାର୍‌ ଗାଚ୍‌କୁ ହିମାଟ୍‌, କି ଜାର୍‌ ଜାର୍‌ ମାଜ଼ିର୍‌ କାଜିଂ କି ଜାର୍‌ କାଜିଂ ହେୱାର୍‌ତି ଗାଚ୍‌କୁ ତାଇୱାମାଟ୍‌ ।" 26 ଇସ୍ରାଏଲ୍‌ନି ରାଜା ସଲମନ କି ଇସବୁ କାମାୟ୍‌ କାଜିଂ ପାପ୍‌ କିୱାଦାଂ ମାଚାନ୍‌ ? ହେନି କୁଟୁମ୍‌ ବିତ୍ରେ ତା ଲାକେ ରାଜା ଇନେର୍‌ ହିଲାତାର୍‌ ଆରି ହେୱାନ୍‌ ଜାର୍‌ ପର୍‌ମେସ୍ୱର୍‌ତି ୱାରିନିକାନ୍‌ ମାଚାନ୍‌, ଆରେ ପରମେସ୍ୱର୍‌ତି ତାଙ୍ଗେଙ୍ଗ୍‌ ପୁର୍ତିନି ଇସ୍ରାଏଲ୍‌ ଜପି ରାଜା କିତାନ୍‌; ଆତିସ୍ପା ବିଦେସ୍‌ନି କଗ୍‌ଲେକ୍‌ ତାଙ୍ଗେଙ୍ଗ୍‌ ନେ ପାପ୍‌ କିୟ୍‌କିତିକ୍‌ । 27 ଲାଗିଂ ବିଦେସ୍‌ନି କଗ୍‌ଲେକାଂ ବିବା କିନି କାଜିଂ ମା ପର୍‌ମେସ୍ୱର୍‌ ବିରୁଦ୍‌ତ ହାତ୍‌ପାଉଡ଼ାଜ଼ି ଇସବୁ ଗାଜାପାପ୍‌ କିଦେଂ କି ଆପେଙ୍ଗ୍‌ ମି କାତା ୱେନାପ୍‌ ? 28 ପାଚେ ଇଲିୟାସିବ ମୁଡ଼୍‌ ମାପ୍ରୁହେବାକିନାକାନ୍ତି ନାତି ଜୟାଦ୍‌ନି ମାଜ଼ି ହରଣିୟ ସନ୍‌ବଲ୍ଲଟ୍‌ନି ଜଆଁୟ୍‌ ମାଚାନ୍‌; ଲାଗିଂ ଆନ୍‌ ତାଙ୍ଗ୍‌ ଜାର୍‌ ଲାଗାଂତାଂ ପେସ୍ତାତାଂ ।

29 ଏ ନା ପର୍‌ମେସ୍ୱର୍‌, ହେୱାରିଂ ଏତୁ କିୟାଟ୍‌, ଇନାକାକି ହେୱାର୍‌ ମାପ୍ରୁହେବାକିନାକାନ୍‌-ପାଦ୍‌ତିଂ, ଆରେ ମାପ୍ରୁହେବାକିନାକାନ୍‌-ପାଦ୍‌ନି ଲେବିୟର୍‌ତି ନିୟମ୍‌ତିଂ ପ୍ରାଲ୍‌ କିୟ୍‌କିତାର୍ଣ୍ଣା ।

30 ଇଲାକେ ଆନ୍‌ ହେୱାରିଂ ବିଦେସ୍‌ନି ୱିଜ଼ାର୍‌ତାଂ ନିର୍ମଲ୍‌ କିତାଂ ଆରି ୱିଜ଼ାର୍‌ତି କାମାୟ୍‌ ଇସାବ୍ରେ ମାପ୍ରୁହେବାକିନାକାର୍‌ତି ଆରି ଲେବିୟର୍‌ତି କାମାୟ୍‌ ରଚ୍‌ଚାଙ୍ଗ୍‌; 31 ଆରେ, ସମାନ୍‌ ସମୁତ ମାର୍‌ ଆରି ପର୍‌ତୁମ୍‌ ଉବ୍‌ଜାତି ପାଡ଼୍‌ନି ଇନାମ୍‌ କାଜିଂ ଲକୁ ବାଚି କିତାଂ । ଏ ନା ପର୍‌ମେସ୍ୱର୍‌, ହାର୍‌ କାଜିଂ ନାଂ ଏତୁ କିଦା ।