1 ହକଲିୟତି ମାଜ଼ି ନିହିମିୟାତି ବଚନ୍‌ । କୁଡ଼େ ବାର୍ହୁନି କିସ୍‌ଲେବ୍‌* ମାସ୍ତ ଆନ୍‌ ସୁସନ୍‌ ରାଜାର୍‌ଗାଡ଼୍‌ଦ ମାଚାଙ୍ଗ୍‌ । 2 ହେବେ ହନାନି ତର୍‌ଦ ଟଣ୍ଡାର୍‌ ବିତ୍ରେତାଂ ରୱାନ୍‌ ଆରି ଜିହୁଦାତାଂ କେତେକ୍‌ ଲକୁ ୱାତାର୍‌; ପାଚେ ଆନ୍‌ ହେୱାରିଂ ବନ୍ଦିତାଂ ରାକ୍ୟାପାୟାତି ବାକି ଜିହୁଦିୟାର୍‌ତି ବିସ୍ରେ ଆରି ଜିରୁସାଲମ୍‌ ବିସ୍ରେ ୱେନ୍‌ବାତାଂ । 3 ହେପାଦ୍‌ନା ହେୱାର୍‌ ନାଙ୍ଗ୍‌ ଇଞ୍ଚାର୍‌, "ବନ୍ଦିତାଂ ରାକ୍ୟାପାୟାତି ହେ ରାଜିନି ବାକି ଲକୁ ବେସି ଦୁକ୍‌ ଆରି ଅପ୍‌ମାନ୍‌ତ ମାନାର୍‌; ଇନେକିଦେଂକି ଜିରୁସାଲମ୍‌ନି କୁଆଡ଼୍‌ ଡ୍ରିଙ୍ଗ୍‌ତାତ୍‌ନା ଆରି ହେବେନି ଦୁୱେର୍‌ ସବୁ ନାଣିତ କାଡ଼୍‌ତିକ୍‌ନା ।"

4 ପାଚେ ଆନ୍‌ ଇ କାତା ୱେନି ଦାପ୍ରେ, କୁଚ୍‌ଚି ଆଡ଼୍‌ବାତାଙ୍ଗ୍‌ ଆରି କେତେକ୍‌ ଦିନ୍‌ ପାତେକ୍‌ ଦୁକ୍‌ କିତାଙ୍ଗ୍‌; ଆରେ, ଆନ୍‌ ସାର୍ଗେନି ପର୍‌ମେସ୍ୱର୍‌ତି ମୁମ୍‌ଦ ଉପାସ୍‌ ଆରି ପାର୍ତାନା କିଜ଼ି ଇଚାଙ୍ଗ୍‌, 5 ଏ ମାପ୍ରୁ, ସାର୍ଗେନି ପର୍‌ମେସ୍ୱର୍‌, ଆନ୍‌ ଗୱାରି କିଦ୍‌ନାଙ୍ଗା, ଏନେଙ୍ଗ୍‌ ଗାଜାକାୟ୍‌ ଆରି ବୟଙ୍କାର୍‌ ପର୍‌ମେସ୍ୱର୍‌ ନିକାୟ୍‌, ଇମ୍‌ଣାକାର୍‌ ନିଙ୍ଗ୍‌ ଜିଉନଦ୍‌ନାର୍‌ ଆରି ନି ସବୁ ବଲ୍‌ ପାଲି କିଦ୍‌ନାର୍‌, ହେୱାର୍‌ତି ପାକ୍ୟାତ ନି ନିୟମ୍‌ ଆରି ଦୟା ପାଲି କିଜ଼ିମାନାୟ୍‌; 6 ଆନ୍‌ ନି ବିରୁଦ୍‌ତ ମା କିତି ଇସ୍ରାଏଲ୍‌ ମାଜ଼ିର୍‌ ପାପ୍‌ ମାନି କିଜ଼ି ନି ଆଡ଼ିଏନ୍‌ ଇସ୍ରାଏଲ୍‌ନି ମାଜ଼ିର୍‌ ପାକ୍ୟାତ ୱେଡ଼ାନାଣା ଇ ସମୁତ ନି ମୁମ୍‌ଦ ଇମ୍‌ଣି ପାର୍ତାନା କିନାଙ୍ଗା, ଜାର୍‌ ଆଡ଼ିୟାନି ହେ ପାର୍ତାନା ୱେନି କାଜିଂ ନଙ୍ଗ୍‌ ନି କିତୁଲ୍‌ ଜେୟା ଆଏତ୍‌ ଆରି ନି କାଣ୍‌କୁ ମେଲା ଆଏକ୍‌; ଆନ୍‌ ଆରି ନା ଆକର୍‌ଦାଦିର୍‌ ନେ ପାପ୍‌ କିତାପ୍‌ନ୍ନା । 7 ଆପେଙ୍ଗ୍‌ ନି ବିରୁଦ୍‌ତ ବେସି ପାପ୍‌ କିତାପ୍‌ନ୍ନା ଆରି ଏନେଙ୍ଗ୍‌ ଜାର୍‌ ଆଡ଼ିୟା ମସାଂ ଇମ୍‌ଣି ବଲ୍‌ ଆରି ବିଦି ଆରି ସାସନ୍‌ ଆଦେସ୍‌ କିଜ଼ି ମାଚାୟ୍‌, ହେଦାଂ ସବୁ ଆପେଙ୍ଗ୍‌ ପାଲି କିୱାତାପ୍‌ନ୍ନା । 8 ଏନେଙ୍ଗ୍‌ ଜାର୍‌ ଆଡ଼ିୟା ମସାଂ ବଲ୍‌ ହିଜ଼ି ଇଞ୍ଜିମାଚାୟ୍‌, "ଏପେଙ୍ଗ୍‌ ସତ୍‌ମାନିକିୱିତିସ୍‌, ଆପ୍‌ ମିଙ୍ଗେଙ୍ଗ୍‌ ବାରବିନି କୁଟୁମ୍‌ ବିତ୍ରେ ଚିର୍‌ବିର୍‌ କିଦ୍‌ନାଙ୍ଗ୍‌; 9 ମତର୍‌ ଏଚେକାଡ଼୍‌ଦ ଏପେଙ୍ଗ୍‌ ମା କାଜିଂ ମାସ୍‌ଦି ୱାନାଦେର୍‌ ଆରି ମା ବଲ୍‌ ପାଲି କିଜ଼ି ହେଲାକେ କାମାୟ୍‌ କିନାଦେର୍‌, ଲାଗିଂ ମିଦାଂ ବାନ୍ୟା ମାନାୟାର୍‌ ଆକାସ୍‌ନି କନା ହାନ୍ଦିତ ମାଚିସ୍‌ ପା ଆପେଙ୍ଗ୍‌ ହେବେତାଂ ହେୱାରିଂ ରୁଣ୍ଡାୟ୍‌ କିନାପ୍‌ ଆରି ଆପ୍‌ ଜାର୍‌ ତର୍‌ କୁଚ୍‌ନିକାଜିଂ ଇମ୍‌ଣି ବାହା ବାଚିକିତାପ୍‌ନ୍ନା, ହେ ବାହାତ ହେୱାରିଂ ତାଇୱାନାପ୍‌; ଗୱାରି କିଦ୍‌ନାଙ୍ଗା, ଜାର୍‌ତି ଇ କାତା ଏତୁ କିୟାଟ୍‌ ।"

10 "ଇୱାର୍‌ ନି ଆଡ଼ିୟାର୍‌ ଆରି ନି ଲକୁ, ଏପ୍‌ ଇୱାରିଂ ଜାର୍‌ତି ବେସି ସାକ୍ତିତାଂ ଆରି ଜାର୍‌ତି ବପୁ କେଇ ହୁକେ ମୁକ୍‌ଡ଼ାୟ୍‌ କିତାୟ୍‌ନା । 11 ଏ ମାପ୍ରୁ, ଗୱାରି କିଦ୍‌ନାଙ୍ଗା, ଇମ୍‌ଣାକାର୍‌ ନି ତର୍‌ଦିଂ ପାଣ୍ଡ୍ରା ଆଦେଂ ୱାରି କିନାର୍‌, ଏଲେଙ୍ଗ୍‌ ନି ଆଡ଼ିୟାନି ପାର୍ତାନା ଆରି ନି ଆଡ଼ିୟାର୍‌ତି ପାର୍ତାନା କାଜିଂ ନଙ୍ଗ୍‌ ନି କିତୁଲ୍‌ ଜେୟା ଆଏତ୍‌; ଆରେ, ପାର୍ତାନା କିନାଙ୍ଗା, ନେଜେଙ୍ଗ୍‌ ଆଡ଼ିୟାତି କାମାୟ୍‌ ବାର୍ତି କିୟା, ଆରେ ଇ ମାନାୟ୍‌ତି କାଣ୍‌କୁକାଂ ହେଦେଲିଂ ଦୟା ପାୟା ଆଦେଂ ହିୟା ।" ଇ ସମୁତ ଆନ୍‌ ରାଜାତି ୱେଣ୍ଡ୍‌ନାକାଂ ମାଚାଙ୍ଗ୍‌ ।