ଏଜ୍ରା 10

ଲକୁତି ପାପ୍‌ ମାନିକିନାକା

1 ଏଜ୍ରା ପର୍‌ମେସ୍ୱର୍‌ତି ଇଲ୍‌ ଲାଗାଂ ପାର୍ତାନା ଆରି ମାନିକିନାକା, ଆଡ଼୍‌ବାନାକା ଆରି ଜୁୱାର୍‌ କିନି ସମୁତ ଇସ୍ରାଏଲ୍‌ ବିତ୍ରେତାଂ ଆଣ୍ଡ୍ରାଙ୍ଗ୍‌ ଆରି କଗ୍‌ଲେକ୍‌ ଆରି କାଡ଼୍‌ଦେର୍‌ ଆରି ଗାଡ଼୍‌ଚେକ୍‌ତି ର ହାନିୱାନି ତା ଲାଗାଂ ରୁଣ୍ଡାଜ଼ି ମାଚାର୍‌; ଇନେକିଦେଂକି ମାନାୟାର୍‌ ବେସି ଆଡ଼୍‌ବାତାର୍‌ । 2 ଇବେ ଏଲମର୍‌ ମାଜ଼ିର୍‌ ବିତ୍ରେତାଂ ଜିହିୟେଲନି ମାଜ଼ି ସକନିୟ ଏଜ୍ରାଙ୍ଗ୍‌ ଉତର୍‌ କିଜ଼ି ଇଚାନ୍‌, "ଆପେଙ୍ଗ୍‌ ଜାର୍‌ତି ପର୍‌ମେସ୍ୱର୍‌ତି ବିରୁଦ୍‌ତ ସତ୍‌ମାନିକିୱାଦାଂ କିଜ଼ି ବିନ୍‌ ଦେସ୍‌ନିକାର୍‌ କୁଟୁମ୍‌ନି କଗ୍‌ଲେକାଂ ବିବା କିତାପ୍‌ନା; ଆତିସ୍ପା ଇ ବିସ୍ରେ ନଙ୍ଗ୍‌ ପା ଇସ୍ରାଏଲ୍‌ ପାକ୍ୟାତ ବାର୍ସି ମାନାତ୍‌ । 3 ଇଦାଂକାଜିଂ ଆସେଙ୍ଗ୍‌ ନଙ୍ଗ୍‌ ମା ମାପ୍ରୁତି ଆରି ମା ପର୍‌ମେସ୍ୱର୍‌ତି ବଲ୍‌ତ ପାଣ୍ଡ୍ରାତି ମାନାୟାର୍‌ତି ଗାଣ୍‌ଜୁ ଇସାବ୍ରେ ଇ ସବୁ ଟଣ୍ଡେନ୍‌ ଆରି ଇୱାର୍‌ତାଂ ଉବ୍‌ଜାତି ୱିଜ଼ାରିଂ ପେସ୍‌ନି କାଜିଂ ମା ପର୍‌ମେସ୍ୱର୍‌ ଲାହାଂ ନିୟମ୍‌ କିନାସ୍‌; ଆରେ, ଇଦାଂ ବିଦି ଇସାବ୍ରେ କିୟାନାତ୍‌ । 4 ନିଙ୍ଗାଟ୍‌, ଇନେକିଦେଂକି ନି ଜପି ଇ କାମାୟ୍‌ନି ବଜ୍‌ ମାନାତ୍‌ ଆରି ଆସେଙ୍ଗ୍‌ ନି ହାଙ୍ଗ୍‌ଦାକାର୍‌ ମାନାପ୍‌; ସାସ୍‌ ଆଜ଼ି ଇ କାମାୟ୍‌ କିୟାଟ୍‌ ।" 5 ଇବେ ଏଜ୍ରା ନିଙ୍ଗ୍‌ଜି ଇ ବଚନ୍‌ ଇସାବ୍ରେ କାମାୟ୍‌ କିନି କାଜିଂ ମାପ୍ରୁହେବାକିନାକାର୍‌ତି, ଲେବିୟର୍‌ତି ଆରି ପୁର୍ତିନି ଇସ୍ରାଏଲ୍‌ନି ମୁଡ଼୍‌ଦାକାରିଂ ପାର୍ମାଣ୍‌ ଆହିକିତାର୍‌ । ହେବେ ହେୱାର୍‌ ପାର୍ମାଣ୍‌ କିତାର୍‌ । 6 ପାଚେ ଏଜ୍ରା ପର୍‌ମେସ୍ୱର୍‌ତି ଇଲ୍‌ ଲାଗାଂ ନିଙ୍ଗ୍‌ଜି ଇଲିୟାସିବନି ମାଜ଼ି ଜିହହାନନନି ବାକ୍ରାତ ହାଚାନ୍‌; ଆରେ, ହେବେ ଏକିତିଲେ, ରୁଟି ତିନ୍‌ୱାତାର୍‌ କି ଏଜ଼ୁଙ୍ଗ୍‌ ଉଣ୍‌ୱାତାନ୍‌; ଇନେକିଦେଂକି ହେୱାନ୍‌ ବନ୍ଦିଆତି ମାନାୟାର୍‌ତି ସତ୍‌ମାନିକିୱାଦାଂ କାଜିଂ ଦୁକ୍‌ କିଜ଼ି ମାଚାର୍‌ । 7 ଇଦାଂପାଚେ ମାନାୟାର୍‌ ଜିହୁଦା ଆରି ଜିରୁସାଲମ୍‌ନି ସବୁ ବନ୍ଦିଆତି ମାଜ଼ିର୍‌ ୱିଜ଼ାର୍‌ ଲାଗାଂ ସୁଣାୟ୍‌ କିଜ଼ି ଇଚାର୍‌ ଜେ, "ହେୱାର୍‌ ଜିରୁସାଲମ୍‌ତ ରୁଣ୍ଡା ଆଏର୍‌; 8 ଆରେ, ଆଦିକାରିର୍‌ତି ଆରି ପାର୍‌ଚିନାର୍‌ତି ଗାଣ୍‌ଜୁ ଇସାବ୍ରେ ଇନେର୍‌କି ତିନ୍‌ ଦିନ୍‌ ବିତ୍ରେ ଏକୁର୍‌, ତା ସବୁ ଅୟାନାତ୍‌ ଆରି ବୁଡ଼ାଲୁ ନିଜେ ବନ୍ଦିଆତି କୁଟୁମ୍‌ତାଂ ବିନେ କିୟାଆନାର୍‌ ।" 9 ପାଚେ ଜିହୁଦା ଆରି ବିନ୍ୟାମିନ୍‌ନି ପୁର୍ତିନି ଲକୁ ତିନ୍‌ ଦିନ୍‌ ବିତ୍ରେ ଜିରୁସାଲମ୍‌ତ ରୁଣ୍ଡା ଆତାର୍‌, ହେ ନଅ ମାସ୍‌ନି କୁଡ଼େ ଦିନ୍‌ ମାଚାତ୍‌; ଆରେ, ପୁର୍ତିନି ଲକୁ ପର୍‌ମେସ୍ୱର୍‌ତି ଇଲ୍‌ନି ଲାଗାଂ ଚକ୍‌ତ କୁଚ୍‌ଚି ସବୁ ବିସ୍ରେ ଆରି ଗାଜାବାର୍‌ହା କାଜିଂ ପାଣ୍ଡ୍ରା ଆଜ଼ି ମାଚାର୍‌ । 10 ହେବେ ଏଜ୍ରା ମାପ୍ରୁହେବାକିନାକାନ୍‌ ନିଲ୍‌ଚି ହେୱାରିଂ ଇଚାନ୍‌, "ଏପେଙ୍ଗ୍‌ ସତ୍‌ମାନିକିୱାଦାଂ ଆରି ଇସ୍ରାଏଲ୍‌ନି ଦସ୍‌ ବାଡାୟ୍‌ କିନି କାଜିଂ ବିନ୍‌ ଦେସ୍‌ନି କଗ୍‌ଲେକାଂ ବିବା କିତାଦେର୍ଣ୍ଣା । 11 ଇଦାଂ କାଜିଂ ନଙ୍ଗ୍‌ ମି ଆକର୍‌ଦାଦିର୍‌ନି ପର୍‌ମେସ୍ୱର୍‌ ନିତ୍ରେମାପ୍ରୁତି ଲାଗାଂ ମାନିକିୟାଟ୍‌ ଆରି ହେୱାନ୍ତି ସାରିନି କାମାୟ୍‌ କିୟାଟ୍‌; ଆରେ, ଦେସ୍‌ନି ବିନ୍‌ କୁଟୁମ୍‌ତାଂ ଆରି ବିନ୍‌ ଦେସ୍‌ନିକା କଗ୍‌ଲେହିମ୍‌ଣାଂତାଂ ଜାର୍‌ତିଂ ବିନେ କିୟାଟ୍‌ ।" 12 ହେପାଦ୍‌ନା ପୁର୍ତିନି କୁଟୁମ୍‌ ଉତର୍‌ କିଜ଼ି ଗାଜା କାଟ୍‌ତାଂ ଇଚାର୍‌, "ଏନେଙ୍ଗ୍‌ ମା ବିସ୍ରେ ଇନେସ୍‌ ଇଚାନ୍‌, ମାଙ୍ଗେଙ୍ଗ୍‌ ହେ ଲାକେ କିଦେଂ ଲାଗ୍‌ଦାନାତ୍‌ । 13 ମତର୍‌ ମାନାୟ୍‌ ଗାଦା ଆରି ନଙ୍ଗ୍‌ ବେସି ବାର୍‌ହା ସମୁ, ଆରେ ଆସେଙ୍ଗ୍‌ ବାର୍ତ ନିଲ୍‌ତେଙ୍ଗ୍‌ ଆଡ୍‌ୱାକା, ନଲେ ଇଦାଂ ଏକ୍‌ କି ରି ଦିନ୍‌ନି କାମାୟ୍‌ ଆକାୟ୍‌; ଲାଗିଂ ଇ ବିସ୍ରେ ଆସେଙ୍ଗ୍‌ ଗାଜା ପାପ୍‌ କିତାସ୍‌ନା । 14 ଇଦାଂ କାଜିଂ ପୁର୍ତିନି ମାନାୟାର୍‌ କାଜିଂ ମା ଆଦିକାରିର୍‌ ବାଚିକିୟା ଆଏର୍‌, ଆରେ ମା ପର୍‌ମେସ୍ୱର୍‌ତି ବେସି ରିସା ମାଙ୍ଗ୍‌ତାଂ ତିର୍‌ ଆନି ପାତେକ୍‌ ଆରି ଇ ବିସ୍ରେନି ଦାୟିତ୍‌ ଆନି ପାତେକ୍‌ ମା ଗାଡ଼୍‌ନି ଇମ୍‌ଣି ମାନାୟାର୍‌ ବିନ୍‌ ଦେସ୍‌ନି କଗ୍‌ଲେକାଂ ବିବା କିତାର୍ଣ୍ଣା, ହେ ୱିଜ଼ାର୍‌ ସମାନ୍‌ ସମୁତ ୱାଏର୍‌ ଆରି ବୁଡ଼ାଲୁ ଲାହାଂ ୱିଜ଼ୁ ଗାଡ଼୍‌ନି ପାର୍‌ଚିନ୍‌ନାର୍‌ ଆରି ବିଚାର୍‌କାରିୟାର୍‌ ୱାଏର୍‌ ।" 15 ଇ କାତା ବିରୁଦ୍‌ତ କେବଲ୍‌ ଅସାହେଲନି ମାଜ଼ି ଜନାତନ୍‌ ଆରି ତିକ୍‌ବନି ମାଜ଼ି ଜହସିୟ ନିଙ୍ଗ୍‌ତାର୍‌, ଆଉ ମସୁଲ୍ଲମ୍‌ ଆରି ଲେବିୟ ସବତୟ ହେୱାର୍‌ତି ଉପ୍‌କାର୍‌ କିତାର୍‌ ।

16 ମତର୍‌ ବନ୍ଦିଆତାକାର୍‌ ମାଜ଼ିର୍‌ ହେ ଲାକେ କାମାୟ୍‌ କିତାର୍‌ । ଆରେ, ଏଜ୍ରା ମାପ୍ରୁହେବାକିନାକାନ୍‌ ଆରି ଜାର୍‌ ଜାର୍‌ ଆକର୍‌ଦାଦିର୍‌ ଲାତ୍ରା ଇସାବ୍ରେ ଆରି ତର୍‌ଇସାବ୍ରେ ସମାନ୍‌ ଆକର୍‌ଲାତ୍ରା ମୁଡ଼୍‌ଦାକାର୍‌ କେତ୍‌ଜାଣ୍‌ ବିନେ କିୟାତାର୍‌; ଆରେ, ହେୱାର୍‌ ଦସ୍‌ ମାସ୍‌ନି ପର୍‌ତୁମ୍‌ ଦିନ୍‌ ହେ ବିସ୍ରେ ଦାସ୍ତେଙ୍ଗ୍‌ ଲାଗାତାର୍‌ । 17 ଆରେ, ହେୱାର୍‌ ପର୍‌ତୁମ୍‌ ମାସ୍‌ନି ପର୍‌ତୁମ୍‌ ଦିନ୍‌ତ ବିନ୍‌ ଦେସ୍‌ନି କଗ୍‌ଲେଙ୍ଗ୍‌ ବିବାକିତି ଆଣ୍ଡ୍ରେନ୍‌ ୱିଜ଼ାର୍‌ତି ବିଚାର୍‌ ୱିସ୍ତାନ୍‌ ।

ବିଦେସ୍‌ନି କଗ୍‌ଲେ ମାନି ମାନାୟାର୍‌

18 ମାପ୍ରୁହେବାକିନାକାର୍‌ତି ମାଜ଼ିର୍‌ ବିତ୍ରେତାଂ ଇମ୍‌ଣାକାର୍‌ ବିନ୍‌ ଦେସ୍‌ନି କଗ୍‌ଲେକାଂ ବିବାକିଜ଼ି ମାଚିସ୍‌, ହେୱାର୍‌ ଇୱାର୍‌, ଇଚିସ୍‌, ଜସାଦକନି ମାଜ଼ି ଜେସୁୟନି ମାଜ଼ିର୍‌ ଆରି ତା ଟଣ୍ଡାର୍‌ ବିତ୍ରେତାଂ ମାସେୟ, ଇଲିୟେସର, ଜାରିବ ଆରି ଗଦଲିୟ । 19 ଇୱାର୍‌ ଜାର୍‌ ଜାର୍‌ ଡକ୍ରିକାଂ ପେସ୍‌ନାର୍‌ ଇଞ୍ଜି କାତା ହିତାର୍‌; ଆରେ, ଗର ଆତିଲେ ହେୱାର୍‌ ଜାର୍‌ ଜାର୍‌ ଦସ୍‌ କାଜିଂ ମାନ୍ଦାତାଂ ରଞ୍ଜାଙ୍ଗ୍‌ ରଞ୍ଜାଙ୍ଗ୍‌ ମେଣ୍ଡା ଆକାତ୍‌ କିତାର୍‌ । 20 ଆରେ, ଇମ୍ମେରନି ମାଜ଼ିର୍‌ ବିତ୍ରେତାଂ ହନାନି ଆରି ସବଦିୟ 21 ଆରି ହାରିମନି ମାଜ଼ିର୍‌ତି ବିତ୍ରେତାଂ ମାସେୟ, ଏଲିୟ, ସମୟିୟ, ଜିହିୟେଲ ଆରି ଉସିୟ; 22 ଆରେ, ପସୁହୁରନି ମାଜ଼ିର୍‌ତି ବିତ୍ରେତାଂ ଇଲିୟାକିମ୍‌, ମାସେୟ, ଇସ୍ମାୟେଲ୍‌, ନତନେଲ୍‌, ଜସାବଦ୍‌ ଆରି ଇଲିସାୟ । 23 ଆରେ, ଲେବିୟର୍‌ତି ବିତ୍ରେତାଂ ଜସାବଦ୍‌ ଆରି ସିମିୟି ଆରି କଲାୟ, ଇଦିଲିଂ କଲିଟ୍‌ ଇନାର୍‌, ପତାହିୟ, ଜିହୁଦା ଆରି ଇଲିୟେସରନି; 24 ଆରେ, କେର୍‌ନାକାର୍‌ତି ବିତ୍ରେତାଂ ଇଲିୟାସିବ; ଦୁୱେର୍‌କାନାକାର୍‌ତି ବିତ୍ରେତାଂ ସଲ୍ଲୁମ ଆରି ଟେଲମ୍‌ ଆରି ଉରି । 25 ଇସ୍ରାଏଲ୍‌ ବିତ୍ରେତାଂ ପରିୟସନି ମାଜ଼ିର୍‌ ବିତ୍ରେତାଂ ରମିୟ, ଜିସିୟ, ମଲ୍‌କିୟ, ମିୟାମିନ୍‌, ଇଲିୟାସର୍‌, ମଲ୍‌କିୟ ଆରି ବନାୟ । 26 ଆରେ, ଏଲମନି ମାଜ଼ିର୍‌ ବିତ୍ରେତାଂ ମତନିୟ, ଜିକରିୟ ଆରି ଜିହିୟେଲ୍‌ ଆରି ଅବ୍‌ଦି ଆରି ଜିରେମତ୍‌ ଆରି ଏଲିୟ । 27 ଆରେ, ସତୁର ମାଜ଼ିର୍‌ ବିତ୍ରେତାଂ ଇଲିୟ-ଐନୟ, ଇଲିୟାସିବ ଆରି ମତନିୟ ଆରି ଜିରେମତ୍‌ ଆରି ସାବଦ୍‌ ଆରି ଅସିସା 28 ଆରି ବେବୟନି ମାଜ଼ିର୍‌ ବିତ୍ରେତାଂ ଜିହହାନନ, ହନାନିୟ, ସବେୟ, ଅତଲୟ; 29 ଆରେ, ବାନିନି ମାଜ଼ିର୍‌ ବିତ୍ରେତାଂ ମସୁଲ୍ଲମ୍‌, ମଲ୍ଲକ ଆରି ଅଦାୟା, ଜାସୁବ୍‌ ଆରି ସାଲ, ଜିରେମତ୍‌ ।

30 ଆରେ, ପହତ୍‌ ମୟାବନି ମାଜ଼ିର୍‌ ବିତ୍ରେତାଂ ଅଦନ୍‌ ଆରି କଲାଲ୍‌, ବନାୟ, ମାସେୟ, ମତନିୟ, ବତ୍ସଲେଲ୍‌ ଆରି ବିନ୍ନୁୟି ଆରି ମନଃସି; 31 ଆରେ, ହାରିମର ମାଜ଼ିର୍‌ ବିତ୍ରେତାଂ ଇଲିୟେସର୍‌, ଜିସିୟ, ମଲ୍‌କିୟ, ସମୟିୟ, ସିମିୟନ୍‌; 32 ବିନ୍ୟାମିନ୍‌ ମଲ୍ଲକ, ସମରିୟ; 33 ହସୁମନି ମାଜ଼ିର୍‌ ବିତ୍ରେତାଂ ମତନୟ, ମତତ, ସାବଦ୍‌, ଇଲିପେଲଟ୍‌, ଜିରେମୟ, ମନଃସି, ସିମିୟି; 34 ବାନିନି ମାଜ଼ିର୍‌ ବିତ୍ରେତାଂ ମାଦୟ, ଅମ୍ରାମ୍‌ ଆରି ଉୟେଲ୍‌; 35 ବନାୟ, ବେଦିୟା, କଲୁହୁ; 36 ବନିୟ, ମରେମତ୍‌, ଇଲିୟାସିବ; 37 ମତନିୟ, ମତନୟ ଆରି ଜାସୟ; 38 ଆରେ, ବାନି ଆରି ବିନ୍ନୁୟି, ସିମିୟି; 39 ସେଲିମିୟ ଆରି ନାତନ୍‌ ଆରି ଅଦାୟା; 40 ମଗ୍ନଦ୍‌ବୟ, ସାସୟ, ସାରୟ; 41 ଅସରେଲ୍‌ ଆରି ସେଲିମିୟ, ସମରିୟ; 42 ସଲ୍ଲୁମ, ଅମରିୟ, ଜସେପ୍‌ । 43 ନବନି ମାଜ଼ିର୍‌ ବିତ୍ରେତାଂ ଜିୟୟେଲ, ମତତିୟ, ସାବଦ୍‌, ସବିନଃ, ଇଦ ଆରି ଜୟେଲ୍‌, ବନାୟ; 44 ଇ ୱିଜ଼ାର୍‌ ବିନ୍‌ ଦେସ୍‌ନି ଡକ୍ରି ଇଡ଼୍‌ଜି ମାଚାର୍‌; ଆରେ, ହେ ଡକ୍ରିକ୍‌ତାଂ ଇନେର୍‌ ଇନେର୍‌ତି ହିମ୍‌ଣାୱାକ୍‌ଡ଼ା ଜଲମ୍‌ ଆଜ଼ି ମାଚାର୍‌ ।