ଦାରିୟାବସତି ଆଦେସ୍
1 ହେପାଦ୍ନା ଦାରିୟାବସ ରାଜା ବଲ୍ କିତିଲେ, ବାବିଲ୍ନି ଇମ୍ଣି ପତି ଇଟ୍ନି ଇଞ୍ଜ ଲେକାତି ଦାନ୍ ରୁଣ୍ଡା ଆତାତ୍, ହେଦାଂ ଦାସ୍ତାନ୍ । 2 ଆରେ, ମାଦିୟ ରାଜିନି ଅକ୍ଷ୍ମତା ତର୍ନି ରାଜାଇଞ୍ଜ ର ହୁର୍ୟାତି ପତି ହତାତ୍, ହେ ବିତ୍ରେ ଏତୁତ ଇ ଲାକେ ଲେକା ଆଜ଼ି ମାଚାତ୍ ।
3 କରସ୍ ରାଜାତି ଆଦିକାର୍ନି ପର୍ତୁମ୍ ବାର୍ହୁତ କରସ୍ ରାଜା ଜିରୁସାଲମ୍ନି ପର୍ମେସ୍ୱର୍ତି ଇଲ୍ ବିସ୍ରେ ଇ ବଲ୍ କିତାନ୍, "ମାନାୟାର୍ତି ପୁଜା ବାହା ହେ ଗାର୍ଣି ରଚ୍ଚେର୍ ଆରି ହେବେନି କୁନାଦି ଡାଟ୍ ଲାକେ ରଚ୍ୟା ଆଏତ୍; ହେବେନି ଉଚା ସାଟେ ଆତ୍ ଆରି ହେବେନି ଅହାର୍ ସାଟେ ଆତ୍ ଆଏତ୍; 4 ହେଦାଂ ତିନ୍ ଦାଡ଼ି ଗାଜା ଗାଜା କାଲ୍କୁତାଂ ଆରି ର ଦାଡ଼ି ପୁନି ୱେଜ଼୍ଗୁ ପାଟା ହୁର୍ପାଆଏତ୍; ଆରେ, ରାଜାଇଞ୍ଜାଙ୍ଗ୍ ହେବେନି କର୍ଚ ହିଏର୍; 5 ଆରେ, ପର୍ମେସ୍ୱର୍ତି ଇଲ୍ନି ଜେ ସବୁ ହନା ଆରି ରୁପାନି ବାହା ନବୁକଦ୍ନିତ୍ସର ଜିରୁସାଲମ୍ନି ମନ୍ଦିର୍ତାଂ ଅଜ଼ି ବାବିଲ୍ତ ତାସି ମାଚାନ୍, ହେଦାଂ ସବୁ ମାସ୍ତି ହିୟା, ଆରେ ୱିଜ଼ୁ ବାହା ଆରେରଗ ଜିରୁସାଲମ୍ ମନ୍ଦିର୍ନି ସହେ ସହେ ବାହାତ ତାସି ୱାଏର୍, ଆରେ ଏପେଙ୍ଗ୍ ପର୍ମେସ୍ୱର୍ ଇଞ୍ଜ ହେଦାଂ ସବୁ ଇଟାଟ୍ ।"
6 ଇଦାଂ କାଜିଂ ଏ ତତନୟ, ନାଗୁଡ଼୍ ଆଣ୍ଟିପାଡ଼୍କା ଆଦିକାରି, ଏ ସତର-ବସଣୟ, ଏପେଙ୍ଗ୍ ଆରି ମି ହାଙ୍ଗ୍ଦାକାର୍ ନାଗୁଡ଼୍ ଆଣ୍ଟିପାଡ଼୍କା ଅପର୍ସକିୟର୍, ହେବେତାଂ ଦେହା ମାନାଟ୍; 7 ପର୍ମେସ୍ୱର୍ତି ଇ ଇଲ୍ କାମାୟ୍ତ କେଇ ହିମାଟ୍; ଜିହୁଦିୟର୍ତି ମୁଣିକାର୍ ଆରି ଜିହୁଦିୟର୍ତି ପାର୍ଚିନାର୍ ପର୍ମେସ୍ୱର୍ତି ଇ ପାର୍ତାନା ଇଲ୍ ଜାର୍ ବାହାତ ରଚେର୍ । 8 ଆରେ, ପର୍ମେସ୍ୱର୍ତି ଇ ଇଲ୍ ରଚ୍ନି କାଜିଂ ମିଦାଂ ଇ ଜିହୁଦିୟ ପାର୍ଚିନାର୍ କାଜିଂ ଇନାକା କିନାକା, ହେଦାଂ ଆପ୍ ବଲ୍ କିନାପା; ହେୱାର୍ତି ବାଦା ଇନେସ୍ ଆମେତ୍, ଇଦାଂ କାଜିଂ ହେ ମାନାୟାରିଂ ରାଜା ଦାନ୍ତାଂ, ଇଚିସ୍, ନାଗୁଡ଼୍ ଆଣ୍ଟିପାଡ଼୍କା ରାଜା ଦାନ୍ତାଂ ବେସି ଜାତୁନ୍ ଲାହାଂ କର୍ଚ ହିୟା ଆଏତ୍ । 9 ଆରେ, ସାର୍ଗେନି ପର୍ମେସ୍ୱର୍ତି କାଟ୍ପୁଜା କାଜିଂ ଜିରୁସାଲମ୍ନି ମାପ୍ରୁହେବାକିନାକାର୍ତି ହିସାବ୍ ଇସାବ୍ରେ ବେଣ୍ଡ୍ୟା ସଣ୍ଡ୍ ଆରି ମେଣ୍ଡା ମେଣ୍ଡାହିମ୍ଣା, ଗଁ, ହର୍, ଅଙ୍ଗୁର୍ ରାସ୍ ଆରି ଚିକାଣ୍, ଇନା ଇନାକା ହେୱାର୍ତି ଲଡ଼ା, ହେଦାଂ ସବୁ ଦିନ୍ତିଂ ଦିନ୍ ମୁଲେ କସ୍ଟ ଆୱାଦାଂ ହେୱାରିଂ ହିୟାଟ୍; 10 ହେବେ ହେୱାର୍ ସାର୍ଗେନି ପର୍ମେସ୍ୱର୍ତି ଉଦେସ୍ତ ହାର୍ଦି ବାସ୍ନା ଆକାତ୍ କିନାର୍, ଆରେ ରାଜାତି ଆରି ତା ମାଜ଼ିର୍ତି ଜିବୁନ୍ କାଜିଂ ପାର୍ତାନା କିନାର୍ । 11 ଆରେ ଆନ୍ ବଲ୍ କିନାଙ୍ଗା ଜେ, "ଇନେର୍କି ଇ ବଚନ୍ ମାନ୍ କିଉନ୍, ତା ଇଞ୍ଜାଙ୍ଗ୍ ର ଦୁଲାମ୍ ହପ୍ଚି ହେ ୱେଜ଼୍ଗୁତ ହେୱାନ୍ ଗାଚ୍ୟାଜ଼ି ଡ଼ଇକିୟାଆଏନ୍; ଆରେ, ହେଦାଂ କାଜିଂ ତା ଇଲ୍ ଗାତ୍ରାସି କିୟାନାତ୍ । 12 ଆରେ, ଇମ୍ଣି ଇମ୍ଣି ରାଜା ଆରି କୁଟୁମ୍ନିକାର୍ ପର୍ମେସ୍ୱର୍ତି ଜିରୁସାଲମ୍ନି ଇ ଇଲ୍ ନାସ୍ କିନି ବିସ୍ରେ ସମାନ୍ ବଚନ୍ ବିନ୍ କିଦେଂ କେଇ କିନାର୍, ହେୱାନ୍ ୱିଜ଼ାରିଂ ଜିରୁସାଲମ୍ତ ହାର୍ତର୍ ରଚ୍ନାକାର୍ ପର୍ମେସ୍ୱର୍ ବିନେ କିୟାଟ୍ । ଆନ୍ ଦାରିୟାବସ ଇ ବଲ୍ ହିଦ୍ନାଙ୍ଗା; ଇଦାଂ ବେସି ଜାତୁନ୍ରେ କିୟାନାତ୍ ।"
ମନ୍ଦିର୍ତ ପର୍ତୁମ୍ ବାହାକିନାକା
13 ହେବେ ଦାରିୟାବସ ରାଜା ଇ ବଲ୍ ପକ୍ତିଲେ ନାଗୁଡ଼୍ ଆଣ୍ଟିପାଡ଼୍କା ଆଦିକାରି ତତନୟ ଆରି ସତର-ବସଣୟ ଆରି ହେୱାର୍ତି ହାଙ୍ଗ୍ଦାକାର୍ ବେସି ଜାତୁନ୍ତାଂ ହେ ଇସାବ୍ରେ କାମାୟ୍ କିତାର୍ । 14 ଇବେ ହାଗୟ ବେଣ୍ବାକ୍ଣାୟ୍କିନାକାନ୍ତି ଆରି ଇଦର ମାଜ଼ି ଜିକରିୟତି ବେଣ୍ବାକ୍ଣାୟ୍କିନି ବଚନ୍ ଇସାବ୍ରେ ଜିହୁଦିୟ ପାର୍ଚିନାର୍ ମନ୍ଦିର୍ତିଂ ରଚ୍ଚାର୍ ଆରି କିତିକାମାୟ୍ ଆତାତ୍ । ଆରେ, ହେୱାର୍ ଇସ୍ରାଏଲ୍ନି ପର୍ମେସ୍ୱର୍ତି ବଲ୍ ଇସାବ୍ରେ ଆରି ପାରସ୍ୟ ରାଜା କରସ୍ ଆରି ଦାରିୟାବସ ଆରି ଅର୍ତକ୍ଷସ୍ତର ବଲ୍ ଇସାବ୍ରେ ରଚ୍ଚି ୱିସ୍ତାର୍ । 15 ଦାରିୟାବସ ରାଜାତି ଆଦିକାର୍ନି ଚଅ ବାର୍ହୁତ ଅଦର6:15 ଅଦର ମାଗ୍ ଆରି ପଗୁଣ୍ ଲେଞ୍ଜ୍ ଅଦର ଇନାର୍ ତର୍ନି ମାସ୍ନି ତିନ୍ ଦିନ୍ତାଂ ଇ ଇଲ୍ ୱିସ୍ତାତ୍ । 16 ଇଦାଂପାଚେ ଇସ୍ରାଏଲ୍ ମାଜ଼ିର୍, ମାପ୍ରୁହେବାକିନାକାର୍ ଆରି ଲେବିୟର୍ ଆରି ବନ୍ଦିଆତି ବାକି ମାଜ଼ିର୍ ୱାରିତାଂ ପର୍ମେସ୍ୱର୍ତି ଇ ଇଲ୍ନି ବାହାକିନାକା ପୁଜା ପାଲି କିନାର୍ । 17 ଆରେ, ପର୍ମେସ୍ୱର୍ତି ଇ ଇଲ୍ନି ବାହାକିନି ସମୁତ ହେୱାର୍ ଏକ୍ ସହ ମେଣ୍ଡାଂ, ଦୁଇସ ମେଣ୍ଡାଂ, ଚାରି ସହ ମେଣ୍ଡା ହିମ୍ଣାଂ ଆକାତ୍ ହିତାର୍; ଆରେ, ପୁର୍ତିନି ଇସ୍ରାଏଲ୍ ପାପ୍କିତି ପୁଜା କାଜିଂ ଇସ୍ରାଏଲ୍ କୁଟୁମ୍ନି ଲମର୍ ଇସାବ୍ରେ ବାରଗଟା ଅଡାଂ ଟୁଟାର୍ । 18 ଆରେ, ହେୱାର୍ ମସା ପତିନି ଲେକା ଇସାବ୍ରେ ଜିରୁସାଲମ୍ତ ପର୍ମେସ୍ୱର୍ତି ହେବାକିନି ମାପ୍ରୁହେବାକିନାକାରିଂ ହେୱାର୍ତି ବାଗ୍ବାଗ୍ ଇସାବ୍ରେ ଆରି ଲେବିୟରିଂ ହେୱାର୍ତି ପାଲି ଇସାବ୍ରେ ବାଚି କିତାର୍ ।
ନିସ୍ତାର୍ ପାର୍ବୁ ପାଲି କିତାର୍
19 ଇଦାଂପାଚେ ପର୍ତୁମ୍ ମାସ୍ତ ଚଉଦ ଦିନ୍ତାଂ ବାନ୍ଦିଆତି ମାଜ଼ିର୍ ନିସ୍ତାର୍ ପାର୍ବୁ ପାଲି କିତାର୍ । 20 ଇନେକିଦେଂକି ମାପ୍ରୁହେବାକିନାକାର୍ ଆରି ଲେବିୟର୍ ରବେ ଜାର୍ତିଂ ସକଟ୍ କିତାର୍; ହେୱିଜ଼ାର୍ ସକଟ୍ ଆଜ଼ି ମାଚାର୍; ଲାଗିଂ ହେୱାର୍ ବନ୍ଦିଆତି ପୁର୍ତିନି ମାଜ଼ିର୍ କାଜିଂ, ଜାର୍ ମାପ୍ରୁହେବାକିନାକାନ୍-ଟଣ୍ଡାର୍ କାଜିଂ ଆରି ଜାର୍ କାଜିଂ ନିସ୍ତାର୍ ପାର୍ବୁନି ପୁଜା କିତାର୍ । 21 ଆରେ, ବନ୍ଦିଆତି ଆରେରଗ ଇସ୍ରାଏଲ୍ ମାଜ଼ିର୍ ଆରି ଇମ୍ଣାକାର୍ କୁଟୁମ୍ ପାକ୍ୟା ଆଜ଼ି ଇସ୍ରାଏଲ୍ନି ପର୍ମେସ୍ୱର୍ ନିତ୍ରେମାପ୍ରୁତି ଦାହ୍ନି କାଜିଂ ଦେସ୍ନିକାର୍ ବିନ୍ ଦେସ୍ନିକାର୍ତି ବିଟାଡ଼୍ତାଂ ଜାର୍ତିଂ ବିନେ କିଜ଼ି ମାଚାର୍, ହେୱିଜ଼ାର୍ ଚିଚାର୍ । 22 ଆରେ, ସାତ୍ ଦିନ୍ ୱାରିତାଂ ହୱି ରୁଟିନି ପାର୍ବୁ ପାଲି କିତାର୍; ଇନେକିଦେଂକି ନିତ୍ରେମାପ୍ରୁ ହେୱାରିଂ ୱାରିକିଜ଼ି ମାଚାନ୍ ଆରି ଇସ୍ରାଏଲ୍ନି ପର୍ମେସ୍ୱର୍, ପର୍ମେସ୍ୱର୍ତି ଇଲ୍ କାମାୟ୍ତ ହେୱାର୍ତି କେଇ ବପୁ କିନି କାଜିଂ ହେୱାର୍ କାଜିଂ ଅସୁରିୟ ରାଜାତି ୱାସ୍କି ମାସ୍ତି ମାଚାନ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)