ଏଜ୍ରା 9

ମେହାସି ବିବାନାକା କାଜିଂ ପାର୍ତାନା

1 ଇସବୁ କାମାୟ୍‌ ୱିସ୍ତି ପାଚେ ଆଦିକାରିର୍‌ ମା ଲାଗାଂ ୱାଜ଼ି ଇଚାର୍‌, "ଇସ୍ରାଏଲ୍‌ ମାନାୟାର୍‌ ଆରି ମାପ୍ରୁହେବାକିନାକାର୍‌ ଆରି ଲେବିୟର୍‌ ବିନ୍‌ ଦେସ୍‌ନି କୁଟୁମ୍‌ତାଂ ଜାର୍‌ତିଂ ବିନେ କିୱାଦାଂ ହେୱାର୍‌ତି, ଇଚିସ୍‌, କିଣାନିୟ, ହିତିୟ, ପରିଜିୟ, ଜିବୁସିୟ, ଅମ୍ମେନିୟ, ମୟାବିୟ, ମିସରିୟା ଆରି ଇମରିୟର୍‌ତି ଗିଣ୍‌ କାମାୟ୍‌ ଇସାବ୍ରେ କିନାରା । 2 ଇନେକିଦେଂକି ହେୱାର୍‌ ଜାର୍‌ତି ମାଜ଼ିର୍‌ କାଜିଂ ହେୱାର୍‌ତି ଗାଚ୍‌କୁକାଂ ଇଡ଼୍‌ତାର୍ଣ୍ଣା; ଇ ଲାକେ ପୁଇପୁୟା ଲାତ୍ରା ବିନ୍‌ଦେସ୍‌ନି କୁଟୁମ୍‌ ଲାହାଂ ଜାର୍‌ତିଂ ମେହାୟ୍‌ କିତାର୍ଣ୍ଣା; ଆରେ, ଇ ଅପ୍‌ରାଦ୍‌ ଆଦିକାରିର୍‌ ଆରି ସାସନ୍‌କାରିୟାର୍‌ କେଇ ମୁଡ଼୍‌ ଆତାତ୍‌ନା ।" 3 ହେବେ ଆନ୍‌ କାତା ୱେଚିଲେ, ଜାର୍‌ ହେନ୍ଦ୍ରା ଆରି ଆଙ୍ଗି କେଚ୍‌ଚି ଜାର୍‌ କାପ୍‌ଡ଼ା ଆରି ଦାଡ଼ିନି ତେମୁଲ୍‌ ନାଟ୍‌ଚି କାବା ଆଜ଼ି କୁଚ୍‌ଚାଙ୍ଗ୍‌ । 4 ହେପାଦ୍‌ନା ବାଚିକିତି ମାନାୟାର୍‌ତି ଅପ୍‌ରାଦ୍‌ କାଜିଂ ଇସ୍ରାଏଲ୍‌ନି ପର୍‌ମେସ୍ୱର୍‌ତି ବଚନ୍‌ତ ପାଣ୍ଡ୍ରାଜ଼ି ୱିଜ଼ାର୍‌ ଲକୁ ନା ଲାଗାଂ ରୁଣ୍ଡା ଆତାର୍‌; ଆରେ, ଆନ୍‌ ମ୍ଡିକାହାରେସ୍‌ ପୁଜା ସମୁ ପାତେକ୍‌ କାବା ଆଜ଼ି କୁଚ୍‌ଚାଙ୍ଗ୍‌ । 5 ପାଚେ ମ୍ଡିକାହାରେସ୍‌ ପୁଜା ସମୁତ ଆନ୍‌ ଜାର୍‌ ଦୁକ୍‌ତାଂ ନିଙ୍ଗ୍‌ତାଙ୍ଗ୍‌, ନା ଗାଗାଡ଼୍‌ତ ନା କେନ୍‌ଚି ହେନ୍ଦ୍ରା ଆରି ଆଙ୍ଗି ମାଚାତ୍‌; ଆରେ, ଆନ୍‌ ଜାର୍‌ ମେଣ୍ଡାଙ୍ଗ୍‌ କୁନ୍ଦି କିଜ଼ି ନିତ୍ରେମାପ୍ରୁ ନା ପର୍‌ମେସ୍ୱର୍‌ତି ନିପ କେଇ ଲାମାୟ୍‌ କିଜ଼ି ଇଚାଙ୍ଗ୍‌, 6 "ଏ ନା ପର୍‌ମେସ୍ୱର୍‌, ଆନ୍‌ ଲାଜୁ ମାନାଙ୍ଗ୍‌, ଏ ନା ପର୍‌ମେସ୍ୱର୍‌, ଆନ୍‌ ନି ନିପ ମୁମ୍‌ ପେସ୍‌ଦେଂ ଲାଜୁ ଆନାଙ୍ଗା; ଇନେକିଦେଂକି ମା ପାପ୍‌ ମା କାପ୍‌ଡ଼ାନି ଜପି ହାର୍‌ତାତ୍‌ନା ଆରି ମା ଦସ୍‌ ବାଦାଡ଼୍‌ତ ଡୁତାତ୍‌ନା । 7 ମା ଆକର୍‌ଦାଦିର୍‌ ସମୁତାଂ ନେଞ୍ଜେଙ୍ଗ୍‌ ପାତେକ୍‌ ଆସେଙ୍ଗ୍‌ ବେସି ଦସି ଆତାପ୍‌ନା; ଜାର୍‌ତି ପାପ୍‌ କାଜିଂ ନେଞ୍ଜେନି ନିୟମ୍‌ ଆସେଙ୍ଗ୍‌, ମା ରାଜାର୍‌ ଆରି ମା ମାପ୍ରୁହେବାକିନାକାର୍‌ ବିନ୍‌ବିନ୍‌ ଦେସ୍‌ନି ରାଜାର୍‌ କେଇଦ, କାଣ୍ଡାତ, ବନ୍ଦିତ ଆରି ଚର୍‌ତ ଆରି ମୁମ୍‌ ଲାଜୁତ ହେଲାୟ୍‌ ଆତାପ୍‌ନା । 8 ଆରେ, ମା ପର୍‌ମେସ୍ୱର୍‌ ଇନେସ୍‌ ମା କାଣ୍‌କୁ ହାର୍‌ କିନାନ୍‌ ଆରି ମା ବନ୍ଦି ଆତିତ ମାଙ୍ଗେଙ୍ଗ୍‌ ଚିନ୍ତା ବୁଜାୟ୍‌ କିଦ୍‌ନାନ୍‌, ଇଦାଂ କାଜିଂ ରକ୍ୟାତ ମାଙ୍ଗେଙ୍ଗ୍‌ ବାକି ଇଡ଼୍‌ଦେଂ ଆରି ଜାର୍‌ ପୁଇପୁୟା ବାହାତ ମାଙ୍ଗେଙ୍ଗ୍‌ ର କୁଟି ହିଦେଂ ନଙ୍ଗ୍‌ ନିତ୍ରେମାପ୍ରୁ ମା ପର୍‌ମେସ୍ୱର୍‌ତାକେ ଅଲପ୍‌କାଡ଼୍‌ ଦୟା ହତାତ୍‌ନ୍ନା । 9 ଇନେକିଦେଂକି ଆସେଙ୍ଗ୍‌ ବନ୍ଦି ଲକୁକାସ୍‌ । ଆତିସ୍ପା ମା ବନ୍ଦି ଆତିତ ମା ପର୍‌ମେସ୍ୱର୍‌ ମାଙ୍ଗେଙ୍ଗ୍‌ ପିସ୍ତାୱାତାର୍ଣ୍ଣା, ମତର୍‌ ମାଙ୍ଗେଙ୍ଗ୍‌ ୱେଚ୍‌ନି କାଜିଂ ମା ପର୍‌ମେସ୍ୱର୍‌ତି ଇଲ୍‌ ରଚ୍‌ନି କାଜିଂ ଆରି ହେବେନି ଡ୍ରିଙ୍ଗ୍‌ତି ବାହା ଆରେରଗ ରଚ୍‌ଚେଙ୍ଗ୍‌, ଆରେ ଜିହୁଦା ଆରି ଜିରୁସାଲମ୍‌ତ ମାଙ୍ଗେଙ୍ଗ୍‌ ର କୁଡ଼ିଆ ହିନି କାଜିଂ ହେୱାନ୍‌ ପାରସ୍ୟ ରାଜାର୍‌ କାଣ୍‌କୁକାଂ ମା କାଜିଂ ଦୟା କିତ୍‌ତାର୍ଣ୍ଣା ।

10 ନଙ୍ଗ୍‌ ଏ ମା ପର୍‌ମେସ୍ୱର୍‌, ଇଦାଂପାଚେ ଆସେଙ୍ଗ୍‌ ଆରେ ଇନାକା ଇନାସ୍‌ ? 11 ଏପେଙ୍ଗ୍‌ ଜାର୍‌ ଆଡ଼ିୟା ବେଣ୍‌ବାକ୍‌ଣାୟ୍‌କିନାକାର୍‌ ହୁକେ ବଲ୍‌ ହିଜ଼ି ଇଞ୍ଜି ମାଚାଦେର୍‌, ‘ଏପେଙ୍ଗ୍‌ ଇମ୍‌ଣି ଦେସ୍‌ ଆଦିକାର୍‌ କିଦେଂ ହାନାଦେରା, ହେଦାଂ ବିନ୍‌ ଦେସ୍‌ନି କୁଟୁମ୍‌ତିଂ ବିଟାଡ଼୍‌ ହୁକେ ବିଟାଡ଼୍‌ ଦେସ୍‌ ଆନାତ୍‌, ହେୱାର୍‌ତି ଗିଣ୍‌ କାମାୟ୍‌ ଦେସ୍‌ତିଂ ର ହାନ୍ଦିତାଂ ବିନ୍‌ ହାନ୍ଦି ପାତେକ୍‌ ହେୱାର୍‌ତି ବିଟାଡ଼୍‌ତ ବାର୍ତି କିତାଙ୍ଗ୍‌ନା । 12 ଇଦାଂ କାଜିଂ ଏପେଙ୍ଗ୍‌ ଜାର୍‌ତି ଗାଜ୍‌କୁକାଂ ହେୱାର୍‌ତି ମାଜ଼ିର୍‌ ଲାହାଂ ବିବା କିମାଟ୍‌, ନଲେ ମି ମାଜ଼ିର୍‌ କାଜିଂ ହେୱାର୍‌ତି ଗାଜ୍‌କୁକାଂ ଇଟ୍‌ମାଟ୍‌, ନଲେ ହେୱାର୍‌ତି ସୁସ୍ତା କି ଉନ୍ନତ୍‌ ଇନେୱାଡ଼ାଙ୍ଗ୍‌ ଚେସ୍ଟା କିମାଟ୍‌; ହେବେ ଏପେଙ୍ଗ୍‌ ବପୁ ଆନାଦେର୍‌ ଆରି ଦେସ୍‌ନି ହାର୍ଦି ଜିନିସ୍‌ ତିନାଦେର୍‌ ଆରି ସବୁୱାଡ଼ାଙ୍ଗ୍‌ ଜାର୍‌ ମାଜ଼ିର୍‌ତି ଆଦିକାର୍‌ କାଜିଂ ହେଦାଂ ଇଟ୍‌ନାଦେର୍‌ ।’ ମତର୍‌ ଆସେଙ୍ଗ୍‌ ମି ଇ ବଲ୍‌ସବୁ ପିସ୍ତାପ୍‌ନା । 13 ଲାଗିଂ ମା ପର୍‌ମେସ୍ୱର୍‌, ମା ବଲତ୍‌କାର୍‌ ଆରି ଗାଜା ଦସ୍‌ କାଜିଂ ମା କାଜିଂ ଇସବୁ ଗିଟାତିସ୍‌ ନେ ଏପେଙ୍ଗ୍‌ ଜେ ମା ପାପ୍‌ନି ସମାନ୍‌ ଦଣ୍ଡ୍‌ତାଂ ଉଣା ଦଣ୍ଡ୍‌ ମାଙ୍ଗେଙ୍ଗ୍‌ ହିତ୍‌ତାୟ୍‌ନା ଆରି ମାଦାଂ ଏଲେଙ୍ଗ୍‌ ବାକି ଲକୁ ଇଡ଼୍‌ତାଦେର୍ଣ୍ଣା, 14 ଇଦାଂ ହୁଡ଼୍‌ଜି ଆପେଙ୍ଗ୍‌ ଇନାକା ଆରେରଗ ମି ବଲ୍‌ ମାନି କିଉପ୍‌ ଆରି ଇ ଗିଣ୍‌ କାମାୟ୍‌କିତି ବିନ୍‌ କୁଟୁମ୍‌ନି ଲାହାଂ କୁଟୁମ୍‌ କିନାପ୍‌ ? କିତିସ୍‌ ଏପେଙ୍ଗ୍‌ ଇନାକା ମାଙ୍ଗେଙ୍ଗ୍‌ ମୁନା କିନି ପାତେକ୍‌ ରିସା ଆଉଦେର୍‌ ? ହେବେ ଇନେର୍‌ ପା ମାନୁର୍‌ । 15 ଏ ନିତ୍ରେମାପ୍ରୁ, ଇସ୍ରାଏଲ୍‌ନି ପର୍‌ମେସ୍ୱର୍‌, ଏନ୍‌ ଦାର୍ମିନିକାୟ୍‌ ଆତାୟ୍‌ନା; ଇନେକିଦେଂକି ଆପେଙ୍ଗ୍‌ ନେଞ୍ଜେଙ୍ଗ୍‌ ପାତେକ୍‌ ରକ୍ୟା ପାୟାଜ଼ି ବାକି ମାନାପ୍‌; ହୁଡ଼ାଟ୍‌, ଆସେଙ୍ଗ୍‌ ନିଙ୍ଗ୍‌ ବେଟ୍‌ଆଜ଼ି ଜାର୍‌ ଦସ୍‌ତ ଦସି ଆତାପ୍‌ନା; ଇନେକିଦେଂକି ହେଦାଂ କାଜିଂ ଇନେର୍‌ ନି ମୁମ୍‌ଦ ନିଲ୍‌ତେଂ ଆଡୁର୍‌ ।"