ନିହିମିୟା ଜିରୁସାଲମ୍ତ ହାନାକା
1 ଅର୍ତକ୍ଷସ୍ତ ରାଜାତି ଆଦିକାର୍ନି କୁଡ଼େ ବାର୍ହୁତ ନିସନ୍2:1 ବାର୍ସେକ୍ତାଂ ପର୍ତୁମ୍ ମାସ୍ତିଂ ନିସନ୍ ମାସ୍ତ ଏଲେଙ୍ଗ୍ ଗିଟାତାତ୍ ଜେ, ରାଜାତି ମୁମ୍ଦ ଅଙ୍ଗୁର୍ରାସ୍ ମାନି ୱାଡ଼ାଙ୍ଗ୍ ଆନ୍ ହେ ଅଙ୍ଗୁର୍ରାସ୍ ଅଜ଼ି ରାଜାଙ୍ଗ୍ ହିତାଂ । ଇଦାଂ ଆଗେ ଆନ୍ ତା ମେହାଣ୍ତ ଇନେୱାଡ଼ାଙ୍ଗ୍ ପା ଦୁକ୍ ଆଜ଼ି ମାନ୍ୱାତାଙ୍ଗ୍ । 2 ଇବେ ରାଜା ନାଙ୍ଗ୍ ୱେନ୍ବାତ୍ତାନ୍, "ଏନେଙ୍ଗ୍ ତ ବେମାର୍ ଆୱାତାୟ୍ନା, ଇନେକିଦେଂ ନି ମୁମ୍ ୱାଚ୍ଚାତ୍ନା ? ଇଦାଂ ମାନ୍ନି ଦୁକ୍ ପିସ୍ତି ଆରେ ଇନାକା ଆକାୟ୍ ।" ହେବେ ଆନ୍ ବେସି ପାଣ୍ଡ୍ରା ଆତାଂ । 3 ଆରେ, ଆନ୍ ରାଜାଙ୍ଗ୍ ଇଚାଙ୍ଗ୍, "ମୁଡ଼୍ରାଜା ଜୁଗ୍ଜୁଗ୍ ଜିଏନ୍; ଇମ୍ଣି ଗାଡ଼୍ ନା ଆକର୍ଦାଦିର୍ତି ଦୁଗେର୍ ବାହା, ହେଦାଂ ଏଚେକାଡ଼୍ଦ ଡ୍ରିଙ୍ଗ୍ଜି ମାନାତା ଆରି ହେବେ ଦୁୱେର୍ ସବୁ ନାଣିତ କାଡ଼୍ତାତ୍ନ୍ନା, ହେପାଦ୍ନା ଇନେକିଦେଂ ନା ମୁମ୍ ୱାଚୁତ୍ ?" 4 ଇବେ ରାଜା ନାଙ୍ଗ୍ ଇଞ୍ଚାନ୍, "ଲାଗିଂ ଏନ୍ ଇନା ବିସ୍ରେ ଗୱାରି କିନାୟା ?" ପାଚେ ଆନ୍ ସାର୍ଗେନି ପର୍ମେସ୍ୱର୍ତି ଲାଗାଂ ପାର୍ତାନା କିତାଙ୍ଗ୍ । 5 ଆରେ, ଆନ୍ ରାଜାଙ୍ଗ୍ ଇଚାଙ୍ଗ୍, "ଏଚେକାଡ଼୍ଦ ମୁଡ଼୍ରାଜାତି ସାରି ଆତିସ୍ ଆରି ନି ଆଡ଼ିଏନ୍ ଏଚେକାଡ଼୍ଦ ନି କାଣ୍କୁକାଂ ଉପ୍କାର୍ ପାୟାଜ଼ି ମାଚିସ୍, ତେବେ ଜିହୁଦା ଦେସ୍ତିଂ, ନା ଆକର୍ଦାଦିର୍ତି ଦୁଗେର୍ ଗାଡ଼୍ତିଂ ନାଙ୍ଗ୍ ପକ୍ତିନି କାଜିଂ ବଲ୍ ହିଦା, ହେବେ ଆନ୍ ହେଦାଂ ରଚ୍ନାଙ୍ଗ୍ ।" 6 ପାଚେ ରାଜା ନାଙ୍ଗେଙ୍ଗ୍ ୱେନ୍ବାତ୍ତାନ୍, "ରାଣି ପା ତା ଲାଗାଂ କୁଚ୍ଚି ମାଚାତ୍, ମିଦାଂ ହାଞ୍ଜେଙ୍ଗ୍ ଏଚେକ୍ ଦିନ୍ ଲାଗାନାତ୍ ? ଆରି ଏନେଙ୍ଗ୍ ଇନେୱାଡ଼ାଙ୍ଗ୍ ମାସ୍ଦି ୱାନାୟ୍ ?" ଇ ଲାକେ ଆନ୍ ତା ଲାଗାଂ ସମୁ ହପ୍ତି ପାଚେ ରାଜା ନାଙ୍ଗେଙ୍ଗ୍ ପକ୍ତିନି କାଜିଂ ସାରି ଆତାନ୍ ।
7 ଆରେ, ଆନ୍ ରାଜାଙ୍ଗ୍ ଇଚାଙ୍ଗ୍, "ଏଚେକାଡ଼୍ଦ ମୁଡ଼୍ରାଜାତି ସାରି ଆନାଙ୍ଗ୍, ତେବେ ନାଗୁଡ଼୍ ଆନ୍ଟିପାଡ଼୍କା ଦେସ୍ ଆଦିକାରିର୍ ଇନେସ୍ ଜିହୁଦା ଦେସ୍ତ ଏକିନି ପାତେକ୍ ହାନି କାଜିଂ ନାଙ୍ଗ୍ ପିସ୍ତି ହିଦ୍ନାନ୍, ଇଦାଂ କାଜିଂ ହେୱାର୍ ତାକେଣ୍ଡାଂ ନାଙ୍ଗ୍ ଚିଟି ହିଦା; 8 ଆରେ, ମନ୍ଦିର୍ ଜାଣାଚିନା ପାନ୍ତିମାଚା ଦୁୱେର୍ ଆରି ଗାଡ଼୍ନି-ଇଲ୍କୁ ଆରି ଆସପ ହଣି ଇଲ୍ କାଜିଂ ଦୁଲାମ୍ କିନି କାଜିଂ ନାଙ୍ଗ୍ ମାର୍ ହିଦ୍ଦେଂ ମୁଡ଼୍ରାଜାତି ରାନ୍ ରାକ୍ୟାକିନି ଆଦିକାରି ଲାଗାଂ ର ଆକି ହିୟାଏତ୍ ।" ହେବେ ନା କାଜିଂ ନା ପର୍ମେସ୍ୱର୍ତି ଉପ୍କାର୍ନି କେଇ ଇସାବ୍ରେ ରାଜା ହେଦାଂ ନାଙ୍ଗ୍ ହିତ୍ତାନ୍ ।
ଜିରୁସାଲମ୍ନି ରାଜା ହେଦାଂ ନାଙ୍ଗ୍ ହିତ୍ତାର୍ ।
9 ଇଦାଂ ପାଚେ ଆନ୍ ନାଗୁଡ଼୍ ଆଣ୍ଟିପାଡ଼୍କାନି ଦେସ୍ ଆଦିକାରିରିଂ ଲାଗାଂ ଏକିସ୍ ହେୱାରିଂ ରାଜାତି ଆକି ହିତାଂ । ଆରେ, ରାଜା ନା ଲାହାଂ ମୁଡ଼୍ ମେଲ୍ୟା ଆରି ଗଡ଼ାଦୁମ୍ନାକାରିଂ ପକ୍ଚିମାନ୍ଚାନ୍ । 10 ମତର୍ ଇସ୍ରାଏଲ୍ ମାଜ଼ିର୍ତି ମଙ୍ଗଲ୍ କିନି କାଜିଂ ରୱାନ୍ ମାନାୟ୍ ୱାତାନ୍ନା ଇଞ୍ଜି ୱେନ୍ଜି ହରଣିୟ ସନ୍ବଲ୍ଲଟ୍ ଆରି ଅମ୍ମେନିୟ ଆଡ଼ିଏନ୍ ଟବିୟ ବେସି ମାନ୍ବାଙ୍ଗା ଆତାନ୍ ।
11 ଇଲାକେ ଆନ୍ ଜିରୁସାଲମ୍ତ ଏକିସ୍ ହେବେ ତିନ୍ ଦିନ୍ ମାଚାଙ୍ଗ୍ । 12 ହେବେ ମ୍ଡିକାଲିଂ ଆନ୍ ଆରି ନା ଲାହାଂ କେତେକ୍ ମାନାୟ୍ ନିଙ୍ଗ୍ତାପ୍; ଆରେ, ନା ପର୍ମେସ୍ୱର୍ ଜିରୁସାଲମ୍ କାଜିଂ ଇନାକା କିଦେଂ ନା ମାନ୍ତ ବାବ୍ନା ହିଜ଼ିମାଞ୍ଚାନ୍, ହେଦାଂ ଆନ୍ ଇନେରିଂ ୱେଚ୍ୱାତାଂ; ଆରେ ଆନ୍ ଇମ୍ଣି ପସୁ ଜପି ଦୁମ୍ଜି ମାଚାଙ୍ଗ୍, ହେଦାଂ ପିସ୍ତି ବିନ୍ ପସୁ ନା ଲାହାଂ ମାନ୍ୱାତାତ୍ । 13 ଆରେ, ହାମ୍ଦୁର୍ ଆନ୍ ମ୍ଡିକାଲିଂ ହସି ଆଟାଡ଼୍-ଦୁୱେର୍ ହିଜ଼ି ନାଗକୁଇ ଆରି ଗାତ୍ ଦୁୱେର୍ ପାତେକ୍ ହାଚାଙ୍ଗ୍ ଆରି ଜିରୁସାଲମ୍ନି ଡ୍ରିଙ୍ଗ୍ତି କୁୱାଡ଼୍ ଆରି ହେବେନି ନାଣିତ କାଡ଼୍ଜିମାନି ଦୁୱେର୍ ସବୁ ହୁଡ଼୍ତାଂ । 14 ପାଚେ ଆନ୍ ଜାରାଣ୍ ଦୁୱେର୍ ଆରି ରାଜାର୍ତି ବାନ୍ଦ୍ ପାତେକ୍ ହାଚାଙ୍ଗ୍; ମତର୍ ହେବେ ନା କୁଚ୍ନି ପସୁତି ହାନି ବାହା ହିଲାତାତ୍ । 15 ଲାଗିଂ ଆନ୍ ମ୍ଡିକାଲିଂ ନାଗୁଡ଼୍ ଲାଗାଂ ହିଜ଼ି ଜପି ହାଲ୍ଜି କୁୱାଡ଼୍ ହୁଡ଼୍ତାଙ୍ଗ୍; ପାଚେ ଆନ୍ ବୁଲାଜ଼ି ଆଟାଡ଼୍ ଦୁୱେର୍ତିଂ ହଣ୍ଜି ମାସ୍ଦି ୱାତାଙ୍ଗ୍ ।
16 ମତର୍ ଆନ୍ ଇମେନିପ ହାଚାଙ୍ଗ୍ ଆରି ଇନାକା କିତାଙ୍ଗ୍, ଇଦାଂ ଆଦିକାରିର୍ ପୁନ୍ୱାତାର୍; ଆରେ, ହେପାତେକ୍ ଆନ୍ ଜିହୁଦିୟରିଂ କି ମାପ୍ରୁହେବାକିନାକାରିଂ କି କାମାୟ୍କିନାକାରିଂ କି ମୁଣିକାର୍ରିଂ କି ବିନ୍ କାମାୟ୍କିନାକାରିଂ ହେଦାଂ ୱେଚ୍ୱାଦାଂ ମାଚାଙ୍ଗ୍ । 17 ଇଦାଂପାଚେ ଆନ୍ ହେୱାରିଂ ଇଚାଙ୍ଗ୍, "ଆସେଙ୍ଗ୍ ଇନାବାନି ବାନ୍ୟା ଅବସ୍ତାତ ମାନାସ୍, ଜିରୁସାଲମ୍ ଇନେସ୍ ଡ୍ରିଙ୍ଗ୍ଜି ମାନାତ୍ ଆରି ହେବେନି ଦୁୱେରିଂ ନାଣିତ କାଡ଼୍ତିକ୍ନା, ଇଦାଂ ଏପେଙ୍ଗ୍ ହୁଡ଼୍ନାଦେରା; ୱାଡ, ଆସେଙ୍ଗ୍ ଇନେସ୍ ଆରେ ନିନ୍ଦାନିକାସ୍ ଆଉସ୍, ଇଦାଂ କାଜିଂ ଜିରୁସାଲମ୍ନି କୁୱାଡ଼୍ ରଚ୍ନାସ୍ ।" 18 ପାଚେ ନା କାଜିଂ ନା ପର୍ମେସ୍ୱର୍ତି ମଙ୍ଗଲ୍ କେଇ ବିସ୍ରେ, ପା ନା କାଜିଂ ହେ ରାଜାତି କାତା ବିସ୍ରେ ଆନ୍ ହେୱାରିଂ ୱେଚ୍ଚାଙ୍ଗ୍ । ପାଚେ ହେୱାର୍ ଇଚାର୍, "ୱାଡ, ଆସେଙ୍ଗ୍ ନିଙ୍ଗ୍ଜି ରଚ୍ନାସ୍ ।" ଇଲାକେ ହେୱାର୍ ହେ ହାର୍ଦି କାମାୟ୍ କାଜିଂ ଜାର୍ତି କେଇ ବାଡ଼୍କାସ୍ କିତାର୍ । 19 ମତର୍ ହରଣିୟ ସନ୍ବଲ୍ଲଟ୍ ଆରି ଅମ୍ମେନିୟ ଆଡ଼ିଏନ୍ ଟବିୟ ଆରି ଆରବିୟ ଗେସମ୍ ଇଦାଂ ୱେନ୍ଜି ମାଙ୍ଗେଙ୍ଗ୍ ଗ୍ଡାଇଜି ଆରି ବେକାର୍ ଇଞ୍ଜି ଇଞ୍ଚାନ୍, "ଏପେଙ୍ଗ୍ ଇଦାଂ ଇନା କାମାୟ୍ କିନାଦେରା ? ଏପେଙ୍ଗ୍ ଇନାକା ରାଜା ବିରୁଦ୍ତ ନିଙ୍ଗ୍ନାଦେର୍ ?" 20 ଲାଗିଂ ଆନ୍ ଉତର୍ କିଜ଼ି ହେୱାରିଂ ଇଚାଙ୍ଗ୍, "ଇନେନ୍ ସାର୍ଗେନି ପର୍ମେସ୍ୱର୍ତି, ହେୱାନ୍ ମାଙ୍ଗେଙ୍ଗ୍ କାମାୟ୍ ବାର୍ତି କିଦ୍ନାନ୍; ଆସେଙ୍ଗ୍ ତା ଆଡ଼ିୟାର୍ ଇଦାଂ କାଜିଂ ନିଙ୍ଗ୍ଜି ରଚ୍ନାପ୍; ମତର୍ ଜିରୁସାଲମ୍ତ ମିଦାଂ ଇମ୍ଣି ବାଗ୍ କି ଆଦିକାର୍ କି ଏତୁକିନି ଚିନ୍ ହିଲୁତ୍ ।"
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)