1 ଆରେ, ୱିଜ଼ାର୍‌ ମାନାୟାର୍‌ ର ଉଦେସ୍‌ତ ଏଜ଼ୁଙ୍ଗ୍‌ ଦୁୱେର୍‌ ଲାଗାଂ ଚକ୍‌ତ ରୁଣ୍ଡା ଆତାର୍‌; ଆରେ, ନିତ୍ରେମାପ୍ରୁ ଇସ୍ରାଏଲ୍‌ତିଂ ମସାତି ଇମ୍‌ଣି ବିଦି-ପତି ବଲ୍‌ ହିଜ଼ି ମାଚାନ୍‌, ହେଦାଂ ତାତେଙ୍ଗ୍‌ କାଜିଂ ହେୱାର୍‌ ଏଜ୍ରା ମାସ୍ଟର୍‌ତିଂ ଇଚାନ୍‌ । 2 ପାଚେ ସାତ୍‌ ମାସ୍‌ନି ପର୍‌ତୁମ୍‌ ନାଜିଂ, ଏଜ୍ରା ମାପ୍ରୁହେବାକିନାକାନ୍‌ ଆଣ୍ଡ୍ରେନ୍‌ ଆରି କଗ୍‌ଲେକ୍‌ ଏଚେକ୍‌ ମାନାୟାର୍‌ ୱେନ୍‌ଜି ବୁଜାନାର୍‌, ହେ ୱିଜ଼ୁ ସମାଜ୍‌ ମେହାଣ୍‌ତ ହେ ବିଦି ପତି ତାଇୱାତାନ୍‌ । 3 ପାଚେ ହେୱାନ୍‌ ଏଜ଼ୁଙ୍ଗ୍‌ ଦୁୱେର୍‌ ଲାଗେନି ଚକ୍‌ତ, ଆଣ୍ଡ୍ରାଙ୍ଗ୍‌ ଆରି କଗ୍‌ଲେକ୍‌ ଏଚେକ୍‌ ଲକୁ ବୁଜାଆଦେଂ ଆଡ୍‌ନାର୍‌, ହେ ୱିଜ଼ାର୍‌ ମେହାଣ୍‌ତ ନାଣାଙ୍ଗେତାଂ ୱେଡ଼ାଲିଂ ପାତେକ୍‌ ହେ ପତିତାଂ ପଡ଼ି କିତାର୍‌; ଆରେ, ୱିଜ଼ାର୍‌ ମାନାୟାର୍‌ତି କିତୁଲ୍‌ ହେ ବିଦି ପତି କାଜିଂ ୱେନ୍‌ଞ୍ଜି ମାଚାର୍‌ ।

4 ଆରେ, ଏଜ୍ରା ସାସ୍ତର୍‌ ହେ ଗୁରୁ କାମାୟ୍‌ କାଜିଂ ରଚ୍‌ଚି ମାର୍‌ ପାଟାଙ୍ଗ୍‌ ଜପି ନିଲ୍‌ତାନ୍‌; ଆରେ, ତିନିବାଗାଙ୍ଗ୍‌ ତା ଲାଗାଂ ମତତିୟ, ସେମା, ଅନାୟ, ଉରିୟ, ହିଲ୍‌କିୟ ଆରି ମାସେୟ ନିଲ୍‌ତାର୍‌; ଆରେ, ତା ଡେବ୍ରିବାଗାଙ୍ଗ୍‌ ପଦାୟ, ମିସାୟେଲ୍‌, ମଲକିୟ, ହସୁମ୍‌, ହସ୍‌ବଦାନା, ଜିକରିୟ ଆରି ମସୁଲ୍ଲମ୍‌ ନିଲ୍‌ତାର୍‌ । 5 ଇଦାଂପାଚେ ଏଜ୍ରା ୱିଜ଼ାର୍‌ ମାନାୟାର୍‌ ହୁଡ଼୍‌ନିତ ହେ ପତି ରିକ୍‌ତାନ୍‌; ଇନେକିଦେଂକି ହେୱାନ୍‌ ୱିଜ଼ାର୍‌ ମାନାୟାର୍‌ ଜପି ନିଲ୍‌ଚି ମାଚାନ୍‌; ଆରେ, ହେୱାନ୍‌ ପତି ରିକ୍‌ତିଲେ, ୱିଜ଼ାର୍‌ ମାନାୟାର୍‌ ନିଲ୍‌ତାର୍‌ । 6 ପାଚେ ଏଜ୍ରା ଗାଜା ପର୍‌ମେସ୍ୱର୍‌ ନିତ୍ରେମାପ୍ରୁତି ଆର୍ସିବାଦ୍‌ କିତାନ୍‌ । ଆରେ, ୱିଜ଼ାର୍‌ ମାନାୟାର୍‌ ଜାର୍‌ ଜାର୍‌ କେଇ ନିକ୍‌ଚି "ଆମେନ୍‌, ଆମେନ୍‌!" ଇଞ୍ଜି ଉତର୍‌ କିତାର୍‌; ଆରେ, ହେୱାର୍‌ ଜାର୍‌ ଜାର୍‌ କାପ୍‌ଡ଼ା ତାରେନ୍‌ କିଜ଼ି ନିତ୍ରେମାପ୍ରୁଙ୍ଗ୍‌ ଡାଣ୍ଡାହାଣାମାଗ୍‌ଜି ଜୱାର୍‌ କିତାର୍‌ ।

7 ଆରେ, ଜେସୁୟ ଆରି ବାନି ଆରି ସେରେବିୟ, ଜାମିନ୍‌, ଅକ୍‌କୁବ୍‌, ସବତୟ, ହଦିୟ, ମାସେୟ, କଲିଟ୍‌, ଅସରିୟ, ଜସାବଦ୍‌, ହାନନ୍‌, ପଲାୟ ଆରି ଲେବିୟର୍‌ ମାନାୟାରିଂ ବିଦି ବୁଜାୟ୍‌କିତାର୍‌; ଆରେ, ମାନାୟାର୍‌ ଜାର୍‌ ଜାର୍‌ ବାହାତ ନିଲ୍‌ଚି ମାଚାର୍‌ । 8 ଆରେ, ହେୱାର୍‌ ହାର୍‌କିଜ଼ି ପର୍‌ମେସ୍ୱର୍‌ତି ବିଦି-ପତିତାଂ ପଡ଼ିକିତାର୍‌ ଆରି ହେୱାର୍‌ ହେବେନି ବାବ୍‌ନା ବୁଜାୟ୍‌କିତାର୍‌, ପାଚେ ମାନାୟାର୍‌ ପଡ଼ିକିନାକା ବୁଜାଆତାର୍‌ ।

9 ଆରେ, ସାସନ୍‌କାର୍‌ୟା ନିହିମିୟା ଆରି ମାସ୍ଟର୍‌ ଆରି ମାପ୍ରୁହେବାକିନାକାନ୍‌ ଏଜ୍ରା ଆରି ମାନାୟାର୍‌ ଗୁରୁ ଲେବିୟର୍‌ ୱିଜ଼ାର୍‌ ମାନାୟାରିଂ ଇଚାର୍‌, "ନେଜେଙ୍ଗ୍‌ନିଦିନ୍‌ ନିତ୍ରେମାପ୍ରୁ ମି ପର୍‌ମେସ୍ୱର୍‌ତି ଉଦେସ୍‌ତ ପୁଇପୁୟା ଆନାତ୍‌; ଦୁକ୍‌ କିମାଟ୍‌ କି ଆଡ଼୍‌ବାମାଡୁ ।" ଇନେକିଦେଂକି ବିଦିନି ବଚନ୍‌ ୱେଚିଲେ, ୱିଜ଼ାର୍‌ ମାନାୟାର୍‌ ଆଡ଼୍‌ବାତାର୍‌ । 10 ଆରେ, ନିହିମିୟା ହେୱାରିଂ ଇଚାନ୍‌, "ଜାର୍‌ ଜାର୍‌ ହାଜ଼ିତିଂ ହାଲାଟ୍‌, ହାର୍‌ଦି କାଦି ତିନାଟ୍‌ ଆରି ମିଟା ଜିନିସ୍‌ ଉଣାଟ୍‌ ଆରି ଇନାକା କାଜିଂ ଜାଲ୍‌ଦି କିୱାତାର୍ଣ୍ଣା, ତା ଲାଗାଂ ଇଚୁକ୍‌ ବାଗ୍‌ ପକାଟ୍‌; ଇନେକିଦେଂକି ନେଞ୍ଜେଙ୍ଗ୍‌ନିଦିନ୍‌ ମା ମାପ୍ରୁତି ଉଦେସ୍‌ତ ପୁଇପୁୟା ଆନାତ୍‌, ଏପେଙ୍ଗ୍‌ ଦୁକ୍‌ ଆମାଟ୍‌; ଲାଗିଂ ନିତ୍ରେମାପ୍ରୁ ବିସ୍ରେନିକା ୱାରି ମି ସାକ୍ତି ଆନାତ୍‌ ।"

11 ଇଲାକେ ଲେବିୟର୍‌ ୱିଜ଼ାର୍‌ ମାନାୟାରିଂ ଚୁପ୍‌ କିଜ଼ି ଇଚାନ୍‌, "ଚିମ୍‌ରା ଆଡ, ନେଜେଙ୍ଗ୍‌ ପୁଇପୁୟା ଦିନ୍‌; ଏପେଙ୍ଗ୍‌ ଦୁକ୍‌ କିମାଟ୍‌ ।" 12 ଇଦାଂପାଚେ ମାନାୟାର୍‌ ଜାର୍‌ ଲାଗାଂ ହତି ବଚନ୍‌ ସବୁ ବୁଜାଆତିଲେ ହେୱାର୍‌ ୱିଜ଼ାର୍‌ ତିନାଉଣା କିଦେଂ ଆରି ଇଚୁକ୍‌ ବାଗ୍‌ ପକ୍‌ତେଂ ଆରି ବେସି ୱାରି କିଦେଂ ଜାର୍‌ ଜାର୍‌ ହାଜ଼ିତ ହାଚାର୍‌ ।

13 ଆରେ, ଆରେର ଦିନା ପୁର୍ତିନି ମାନାୟାରିଂ ଆକର୍‌ଲାତ୍ରା ଆଦିକାରି, ମାପ୍ରୁହେବାକିନାକାର୍‌ ଆରି ଲେବିୟର୍‌ ବିଦିନି ବଚନ୍‌ ବାବି କିନି କାଜିଂ ମାସ୍ଟର୍‌ ଏଜ୍ରା ଲାଗାଂ ରୁଣ୍ଡା ଆତାର୍‌ । 14 ହେୱାର୍‌ ମସା ହୁଦାଂ ହିତି ନିତ୍ରେମାପ୍ରୁତି ଇ ବଲ୍‌ ବିଦିତ ଲେକା ମାଚାକା ହୁଡ଼୍‌ତାନ୍‌ ଜେ, ସାତ୍‌ ମାସ୍‌ନି ପାର୍ବୁ ସମୁତ ଇସ୍ରାଏଲ୍‌-ମାଜ଼ିର୍‌ ଆକିଂକୁଡ଼ିଆତ ଇନେସ୍ ବାହା କିନାର୍‌; 15 ଆରେ, ହେୱାର୍‌ ଜାର୍‌ତି ୱିଜ଼ାର୍‌ ଗାଡ଼୍‌ଦ ଆରି ଜିରୁସାଲମ୍‌ତ ଇ କାତା ସୁଣାୟ୍‌କିନାକା ଆରି ପର୍‌ଚାର୍‌ କିନାଦେର୍‌, ଇଚିସ୍‌ "ଏପେଙ୍ଗ୍‌ ଲେକିକିତି ଇସାବ୍ରେ ଆକିଂକୁଡ଼ିଆ ରଚ୍‌ନି କାଜିଂ ମାଡ଼ିତ ହାଲ୍‌ଜି ଜିତ୍‌କେନ୍ଦା ଆରି ରାନ୍ତି ଜିତ୍‌କେନ୍ଦା ବେତ୍‌ଲାମାର୍‌ ଆରି କାଜ୍ରି ମାର୍‌ କେନ୍ଦା ଆରି ବୱାଡ଼୍‌ ମାର୍‌କୁନି କେନ୍ଦାଂ ତାଡ ।"

16 ହେବେ ମାନାୟାର୍‌ ବାର୍ତ ହାଲ୍‌ଜି ହେଦାଂ ସବୁ ତାସି ଜାର୍‌ କାଜିଂ ଆକିଂକୁଡ଼ିଆ ରଚ୍‌ଚାର୍‌, ୱିଜ଼ାର୍‌ ଜାର୍‌ ଜାର୍‌ ଇଲ୍‌ନି ଗାଦ୍ରି ଜପି ଆରି ହାକ୍‌ଡ଼ିତ ଆରି ପର୍‌ମେସ୍ୱର୍‌ତି ଇଲ୍‌ନି ସବୁ ଦୁୱେର୍‌ତ ଆରି ଏଜ଼ୁଙ୍ଗ୍‌ଦୁୱେର୍‌ନି ଚକ୍‌ତ ଆରି ଇପ୍ରୟିମ୍‌ ଦୁୱେର୍‌ନି ଚକ୍‌ତ ରଚ୍‌ଚାର୍‌ । 17 ଆରେ, ବନ୍ଦିତାଂ ମାସ୍‌ଦି ୱାଜ଼ିମାନି ମାନାୟାର୍‌ ସବୁ ସମାଜ୍‌ ଆକିଂକୁଡ଼ିଆ ରଚ୍‌ଚି ହେ ବିତ୍ରେ ବାହା କିତାର୍‌; ନୁନନ୍‌ତି ମାଜ଼଼ି ଜେସୁୟତି ସମୁତାଂ ହେ ଦିନ୍‌ ପାତେକ୍‌ ଇସ୍ରାଏଲ୍‌-ମାଜ଼ିର୍‌ ହେଲାକେ ୱାରି କିୱାଦାଂ ମାଚାର୍‌ । ଲାଗିଂ ବେସି ଗାଜା ୱାରି ଆତାତ୍‌ । 18 ଆରେ, ଏଜ୍ରା ପର୍‌ତୁମ୍‌ ଦିନ୍‌ତାଂ ହାରିହାରା ଦିନ୍‌ ପାତେକ୍‌ ସବୁ ନାଜିଂ ପର୍‌ମେସ୍ୱର୍‌ତି ବିଦି ପତିତାଂ ପଡ଼ି କିତାନ୍‌ । ଆରେ, ମାନାୟାର୍‌ ସାତ୍‌ ଦିନ୍‌ ପାତେକ୍‌ ପାର୍ବୁ ପାଲି କିତାର୍‌; ଆରେ, ବିଦିଇସାବ୍ରେ ଆଟ୍‌ ଦିନ୍‌ତ ଗାଜା ସବା ଆତାତ୍‌ ।