ମାପ୍ରୁହେବାକିନାକାନ୍ ଆରି ଲେବିୟ
1 ଇମ୍ଣି ମାପ୍ରୁହେବାକିନାକାର୍ ଆରି ଲେବିୟର୍ ସଲ୍ଟିୟେଲତି ମାଜ଼ି ଜିରୁବାବିଲ୍ ଆରି ଜେସୁୟ ଲାହାଂ ୱାଜ଼ିମାଚାର୍, ହେୱାର୍ ଇ, ଇଚିସ୍ ସରାୟ, ଜିରିମିୟ, ଏଜ୍ରା; 2 ଅମରିୟ, ମଲ୍ଲୁକ୍, ହଟୁସ୍, 3 ସକନିୟ, ରହୁମ, ମରେମତ୍; 4 ଇଦ, ଗିନ୍ନତେୟ, ଅବିୟ; 5 ମିୟାମିନ୍, ମୟଦିୟ, ବିଲଗା; 6 ସମୟିୟ ଆରି ଜୟାରିବ୍, ଜିଦୟିୟ; 7 ସଲ୍ଲୟ, ଆମକ, ହିଲ୍କିୟ, ଜିଦୟିୟ । ଇୱାର୍ ଜେସୁୟତି ସମୁତ ମାପ୍ରୁହେବାକିନାକାର୍ତି ଆରି ଜାର୍ ଜାର୍ ଟଣ୍ଡାର୍ ବିତ୍ରେ ମୁଡ଼୍ ମାଚାର୍ । 8 ଆରେ ଲେବିୟର୍, ଇଚିସ୍, ଜେସୁୟ, ବିନ୍ନୁୟି, କଦ୍ମିୟେଲ, ସେରେବିୟ, ଜିହୁଦା ଆରି ମତନିୟ, ଇ ମତନିୟ ଆରି ତା ଟଣ୍ଡାହିର୍ ଦନ୍ୟବାଦ୍-ହିନିତ ମୁଣିକା ମାଚାନ୍ । 9 ପା ହେୱାର୍ତି ଡକ୍ରି ବକ୍ବୁକିୟ ଆରି ଉନ୍ନି ହେୱାର୍ ମୁମ୍ଦ କାନିକାମାୟ୍ କିତାର୍ ।
ମୁଡ଼୍ ମାପ୍ରୁହେବାକିନାକାନ୍ ଜେସୁୟତି ଲାତ୍ରା
10 ଆରେ, ଜେସୁୟତି ମାଜ଼ି ଜୟାକିମ୍, ଜୟାକିମ୍ତି ମାଜ଼ି ଇଲିୟାସିବ୍ ଆରି ଇଲିୟାସିବ୍ତି ମାଜ଼ି ଜୟାଦ୍, 11 ଜୟାଦ୍ତି ମାଜ଼ି ଜନାତନ ଆରି ଜନାତନ୍ତି ମାଜ଼ି ଜଦୁୟ ।
ମୁଡ଼୍ ମାପ୍ରୁହେବାକିନାର୍ତି ତର୍
12 ଆରେ, ଜୟାକିମ୍ତି ସମୁତ ଇ ମାପ୍ରୁହେବାକିନାକାର୍ ଆବାର୍ଲାତ୍ରା-ମୁଡ଼୍ଦାକାର୍ ମାଚାର୍, ଇଚିସ୍ ସରାୟ୍-ଲାତ୍ରାନି ମରାୟ; 13 ଜିରିମିୟ-ଲାତ୍ରାନି ହନାନିୟ; ଏଜ୍ରା-ଲାତ୍ରାନି ମସୁଲ୍ଲମ୍; ଅମରିୟ-ଲାତ୍ରାନି ଜିହହାନନ୍; 14 ମଲ୍ଲୁକି ଲାତ୍ରାନି ଜନାତନ୍, ସବନିୟ-ଲାତ୍ରାନି ଜସେପ୍; 15 ହାରିମ-ଲାତ୍ରାନି ଅଦନ୍; ମରାୟତ-ଲାତ୍ରାନି ହିଲ୍କୟ; 16 ଇଦ-ଲାତ୍ରାନି ଜିକରିୟ; ଗିନ୍ନତନ୍-ଲାତ୍ରାନି ମସୁଲ୍ଲମ୍; 17 ଅବିୟ-ଲାତ୍ରାନି ସିକ୍ରି; ମିନ୍ୟାମିନ୍-ଲାତ୍ରାନି, ମୟଦିୟ-ଲାତ୍ରାନି ପିଲ୍ଟେୟ; 18 ବିଲଗା-ଲାତ୍ରାନି ସମ୍ମୁୟ; ସମୟିୟ-ଲାତ୍ରାନି ଜିହନାତନ୍; 19 ଆରେ, ଜୟାରିବ୍-ଲାତ୍ରାନି ମତନୟ; ଜିଦୟିୟ-ଲାତ୍ରାନି ଉସି; 20 ସଲ୍ଲୟ-ଲାତ୍ରାନି କଲ୍ଲୟ; 21 ଆମକ ଲାତ୍ରାନି ଏବର୍; ହିଲ୍କିୟ-ଲାତ୍ରାନି ହସବିୟ; ଜିଦୟିୟ-ଲାତ୍ରାନି ନତନେଲ୍ ।
ମାପ୍ରୁହେବାକିନାକାର୍ତି ଲେବିୟର୍ତି କୁଟୁମ୍
22 ଇଲିୟାସିବ, ଜୟାଦ୍ ଆରି ଜହାନନ୍ ଆରି ଜଦୁୟ ସମୁତ ଲେବିୟର୍, ପା ପାରସିକ ଦାରିୟାବସତି ଆଦିକାର୍ ସମୁତ ମାପ୍ରୁହେବାକିନାକାର୍ ଆବାର୍ଲାତ୍ରା-ମୁଡ଼୍ ଲାକେ ଲାତ୍ରାତ ଲେକା ଆତାର୍ । 23 ଲେବି-ଲାତ୍ରାଉବ୍ଜାଣ୍ ଆବାଲାତ୍ରା ମୁଡ଼୍ଦାକାର୍ ତର୍ ଇଲିୟାସିବତି ମାଜ଼ି ଜହାନନ୍ତି ସମୁ ପାତେକ୍ ଲାତ୍ରା ପତିତ ଲେକା ଆତାତ୍ ।
ପାର୍ତାନା ଇଞ୍ଜ ବିନ୍ବିନ୍ କାମାୟ୍ ଦାଇତ୍
24 ଲେବିୟର୍ତି ମୁଡ଼୍ଦାକାର୍; ହସବିୟ, ସେରେବିୟ ଆରି କଦ୍ମିୟେଲତି ମାଜ଼ି ଜେସୁୟ ଆରି ହେୱାର୍ତି ମୁମ୍ଦ ଟଣ୍ଡାର୍ ପର୍ମେସ୍ୱର୍ତି ଲକୁ ଦାଉଦ୍ତି ବଲ୍ ଇସାବ୍ରେ କୁଦା କୁଦା ଆଜ଼ି କେର୍ଜି ଆରି ଦନ୍ୟବାଦ୍ ହିଦେଂ ବାଚି କିୟାତାର୍ । 25 ମତନିୟ ଆରି ବକ୍ବୁକିୟ, ଓବଦିୟ, ମସୁଲ୍ଲମ୍, ଟଲମନ୍, ଅକ୍କୁବ୍, ଦୁୱେର୍କାନାକାର୍ ଆଜ଼ି ଦୁୱେର୍ ଲାଗାଂ ଗୁଦାମ୍-ଇଲ୍ତ କାନିକାମାୟ୍ କିତାନ୍ । 26 ଇୱାର୍ ଜସାଦକନି ନାତି ଜେସୁୟତି ମାଜ଼ି ଜୟାକିମ୍ ସମୁତ, ଆରେ ସାସନ୍କାରିୟା ନିହିମିୟା ଆରି ଗୁରୁ ଏଜ୍ରା ମାପ୍ରୁହେବାକିନାକାନ୍ ସମୁତ ମାଚାନ୍ ।
ଡାଣ୍ଡ୍କାତି ନିହିମିୟାତି ରଚ୍ନାକା
27 ଇଦାଂପାଚେ ଜିରୁସାଲମ୍ନି ପ୍ଡାନି ସୁଗ୍ ସମୁତ ମାନାୟାର୍ ଚାପୁଡ଼ିଂ, ଗିନିଂ ଟଇଲା ଆରି ଡୁଡୁଙ୍ଗା ଇସ୍ତି ଦନ୍ୟବାଦ୍ ଆରି କେର୍ଜି ୱାରିତାଂ ସୁଗ୍-ପାର୍ବୁ ପାଲି କିନି କାଜିଂ ଲେବିୟରିଂ ଜିରୁସାଲମ୍ତ ତାନି କାଜିଂ ହେୱାର୍ତି ସବୁ ବାହାତ ହେୱାରିଂ ଡେକ୍ତାର୍ । 28 ଆରେ, କେର୍ନାକାର୍ତି ମାଜ଼ିର୍ ଜିରୁସାଲମ୍ନି ଚାର୍ବେଣ୍ତି ବାଟାବୁଇଁତାଂ ଆରି ନଟପାତିୟର୍ତି ବିନ୍ବିନ୍ ନାସ୍ତାଂ; 29 ପା ବୈତ୍ ଗିଲ୍ଗଲ୍ତାଂ, ଆରେ ଗେବା ଆରି ଅସ୍ମାବତ ବାହାତାଂ ରବେ ଆତାର୍; ଇନେକିଦେଂକି କେର୍ନାକାର୍ ଜିରୁସାଲମ୍ନି ଚାର୍ବେଣ୍ତାଂ ଜାର୍ କାଜିଂ ନାସ୍ କୁଚିକିଜ଼ି ମାଚାନ୍ । 30 ଆରେ, ମାପ୍ରୁହେବାକିନାକାର୍ ଆରି ଲେବିୟର୍ ଜାର୍ ଜାର୍ତିଂ ସକଟ୍ କିତାର୍; ଆରେ, ହେୱାର୍ ମାନାୟାରିଂ ଆରି ଦୁୱେର୍ସବୁ ଆରି କୁୱାଡ଼୍ ସକଟ୍ କିତାର୍ । 31 ଇଦାଂପାଚେ ଆନ୍ ଜିହୁଦାନି ଆଦିକାରିରିଂ କୁୱାଡ଼୍ ଜପି ତାଇୱାତାଂ, ଆରେ ଦନ୍ୟବାଦ୍ ଆରି କେର୍କଣ୍ କିନି କାଜିଂ ରି ଗାଜାକୁଦା ବାଚି କିତାଙ୍ଗ୍; ହେବେ ର କୁଦା ତିନିବାଗାଙ୍ଗ୍ କଚଣ୍ତ କୁୱାଡ଼୍ ଜପି ହିଜ଼ି କତ୍-ଦୁୱେର୍ ନିପ ହାଚାର୍; 32 ଆରେ, ହେୱାର୍ ପାଚେ ହସୟିୟ ଆରି ଜିହୁଦାନି ଆଦିକାରିର୍ ଆଦେକ୍, 33 ଆରେ ଅସରିୟ, ଏଜ୍ରା ଆରି ମସୁଲ୍ଲମ୍, 34 ଜିହୁଦା ଆରି ବିନ୍ୟାମିନ୍ ଆରି ସମୟିୟ ଆରି ଜିରିମିୟ 35 ଆରି କେତେକ୍ ମାପ୍ରୁହେବାକିନାକାର୍-ମାଜ଼ିର୍ ମରି ଅଜ଼ି ହାଚାର୍; ଆସପ-ଲାତ୍ରା ଉବ୍ଜାତି ସକ୍କୁରତି ନାତି ପୁତି, ମିକାୟତି ନାତି, ମତନିୟତି ନାତି, ସମୟିୟତି ମାଜ଼ି ଜେ ଜନାତନ୍, ତା ମାଜ଼ି ଜିକରିୟ 36 ଆରି ତା ଟଣ୍ଡାର୍ ସମୟିୟ ଆରି ଅସରେଲ, ମିଲଲୟ, ଗିଲଲୟ, ମାୟିୟ, ନତନେଲ୍ ଆରି ଜିହୁଦା, ହନାନି, ଇୱାର୍ ପର୍ମେସ୍ୱର୍ତି ଲକୁ ଦାଉଦ୍ତି ବାଚିକିତି ବିନ୍ବିନ୍ ବାଜା ଅଜ଼ି ହାଚାର୍; ଏଜ୍ରା ଗୁରୁ ହେୱାର୍ ଆଗେ ଆଗେ ହାଚାନ୍; 37 ଆରେ, ହେୱାର୍ ଜାରିୟାହୱିଦୁୱେର୍ ଲାଗାଂ ଆଜ଼ି ତା ମୁମ୍ଦ ସବୁ କାଲ୍କୁ ଦାଉଦ-ଗାଡ଼୍ଦ ପାଉଜ୍ ହୁଦାଂ କୁୱାଡ଼୍ନି ଗାଟିତ ନିଙ୍ଗ୍ଜି ଦାଉଦ୍ତି ଇଲ୍ ଜପି ହିଜ଼ି ୱେଡ଼ାହତ୍ନି ନିପ ଏଜ଼ୁଙ୍ଗ୍ଦୁୱେର୍ ପାତେକ୍ ହାଚାନ୍ । 38 ଆରେ, ହେୱାର୍ତି ବିନ୍ ଇମ୍ଣି କୁଦା ଦନ୍ୟବାଦ୍ କିଜ଼ି ୱାରି କିତିଲେ, ହେୱାର୍ ହେୱାରିଂ ମେହା ଆଦେଂ ହାଚାର୍, ଆରେ ଆପେଙ୍ଗ୍ ଆରି ମାନାୟାର୍ତି ଆଦେକ୍ ହେୱାର୍ ପାଚେ ପାଚେ କୁୱାଡ଼୍ ଜପି ହଲି ଦୁୱେର୍ତି ଅହାର୍ କୁୱାଡ଼୍ ପାତେକ୍ ହାଚାପ୍; 39 ଆରେ, ଇପ୍ରୟିମ୍ ଦୁୱେର୍ ଆରି ପ୍ଡାନି ଦୁୱେର୍ ଆରି ମିନ୍କୁଦୁୱେର୍ ଆରି ହନନେଲ୍ ମୁଣ୍ଡା ଆରି ହମିୟ କାନି ଦୁୱେର୍ ହିଜ଼ି ମେଣ୍ଡାଦୁୱେର୍ ପାତେକ୍ ହାଚାପ୍; ଆରେ, ହେୱାର୍ କାନି-ଦୁୱେର୍ତ ନିଲ୍ଚି ମାଚାର୍ । 40 ଇଲାକେ ପର୍ମେସ୍ୱର୍ତି ଇଞ୍ଜ ଦନ୍ୟବାଦ୍ ହିନାକାର୍ ହେ ରି କୁଦା ଆରି ଆପ୍, ଆରେ ମା ଲାହାଂ ମୁଣିକାର୍ ଆଦେକ୍; 41 ଆରେ ଇଲିୟାକିମ୍, ମାସେୟ, ମିନ୍ୟାମିନ୍, ମିକାୟ, ଇଲିୟ-ଏନୟ, ଜିକରିୟ, ହନାନିୟ, ମରିତୁବ୍ନାକାନ୍, ଇ ମାପ୍ରୁହେବାକିନାକାର୍; 42 ଆରେ, ମାସେୟ ଆରି ସମୟିୟ ଆରି ଇଲିୟାସର୍ତି ଆରି ଉସି ଆରି ଜିହହାନନ୍ ଆରି ମଲକିୟ ଆରି ଏଲମ ଆରି ଏସର, ଆରେ ଆପେଙ୍ଗ୍ ୱିଜ଼ାପ୍ ନିଲ୍ଚି ମାଚାପ୍ । ହେପାଦ୍ନା କେର୍ନାକାର୍ ଆରି ହେୱାର୍ତି ମୁଣିକାର୍ ଜିସ୍ରହିୟ ଗାଜା କାଟ୍ତାଂ କେର୍ତାର୍ ।
43 ଆରେ, ହେ ନାଜିଂ ମାନାୟାର୍ ଗାଜା ପୁଜା କିଜ଼ି ୱାରି କିତାର୍; ଇନେକିଦେଂକି ପର୍ମେସ୍ୱର୍ ହେୱାରିଂ ବେସି ୱାରିତ ୱାରି କିଜ଼ି ମାଚାର୍; ଆରେ କଗ୍ଲେକ୍, ପା ଆରି କାଡ଼୍ଦେର୍ କାଡ଼୍ଚେକ୍ ୱାରି କିତାର୍; ହେବେ ଜିରୁସାଲମ୍ନି ୱାରିନିକାଟ୍ ବେସି ଦେହାତାଂ ପାତେକ୍ ୱେନ୍ୟା ଆତାତ୍ ।
ମନ୍ଦିର୍ତ ପୁଜା କାଜିଂ ଜାଗାୟ୍କିନାକା
44 ଆରେ, ହେ ନାଜିଂ ଦାନ୍ ପେସ୍ଦି ହିନାନ୍, ପର୍ତୁମ୍ ଉବ୍ଜାତି ପାଡ଼୍ ଆରି ଦସ୍ମାସ୍, ମାପ୍ରୁହେବାକିନାକାନ୍ ଆରି ଲେବିୟର୍ତି କାଜିଂ ବିନ୍ ବିନ୍ ଗାଡ଼୍ଦ ଜମି ଇସାବ୍ରେ ବିଦି ବାଚିକିତି ବାଗ୍ ରୁଣ୍ଡାୟ୍ କିନି କାଜିଂ ବାକ୍ରାସବୁତ ମାନାୟାର୍ ବାଚି କିୟାତାର୍; ଇନେକିଦେଂକି ଗାଣ୍ଜୁକିନାକାର୍ ମାପ୍ରୁହେବାକିନାକାନ୍ ଆରି ଲେବିୟର୍ତି କାଜିଂ ଜିହୁଦା ୱାରିୟାଜ଼ି ମାଚାନ୍ । 45 ଆରେ, ହେୱାର୍ ଦାଉଦ ଆରି ତା ମାଜ଼ି ସଲମନତି ବଲ୍ଇସାବ୍ରେ ଜାର୍ତି ପର୍ମେସ୍ୱର୍ ହେବା କିତାର୍ ଆରି ସକଟ୍ ଆତାର୍, ଆରେ କେର୍ନାକାର୍ ଆରି ଦୁୱେର୍କାନାକାର୍ ହେଲାକେ କିତାର୍ । 46 ଇନେକିଦେଂକି ଆଗେକାଡ଼୍ ଦାଉଦ୍ ଆରି ଆସପତି ସମୁତ କେର୍ନାକାର୍ତି ରୱାନ୍ ମୁଡ଼୍ଦାକାନ୍ ମାଚାନ୍ ଆରି ପର୍ମେସ୍ୱର୍ତି ଉଦେସ୍ତ ୱାରିନି ଆରି ଦନ୍ୟବାଦ୍ ବିନ୍ବିନ୍ କେର୍କଣ୍ ମାଚାତ୍ । 47 ଆରେ, ଜିରୁବାବିଲ୍ ଆରି ନିହିମିୟାତି ସମୁତ ପୁର୍ତିନି ଇସ୍ରାଏଲ୍ କାଜିଂ ଦିନ୍ନି ଲଡ଼ାଇସାବ୍ରେ କେର୍ନାକାର୍ତି ଆରି ଦୁୱେର୍କାନାକାର୍ ବାଗ୍ ହିତାର୍; ଆରେ ପୁଇପୁୟା ମାନାୟାର୍ ଲେବିୟର୍ କାଜିଂ ଜିନିସ୍ ସୁଗ୍ କିତାର୍ ଆରି ଲେବିୟର୍ ହାରଣ୍-ମାଜ଼ିର୍ କାଜିଂ ଜିନିସ୍ ସୁଗ୍ କିତାର୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)