1 ବେସି ଦନ୍‌ ବାଟା ତର୍‌ ଇଟ୍‌ନାକା ବାଚିକିୟାନି ଜଗ୍, ଆରେ, ରୁପା ଆରି ହନା ବାଟା ଜିଉଚଚ୍‌ନି ଦୟା ହାର୍ଦାକା । 2 ମାଜାନ୍ ଆରି ହିଲ୍‌ୱାକାନ୍ ରବେ ମେହାନାର୍; ନିତ୍ରେମାପ୍ରୁ ହେ ୱିଜ଼଼ାରିଂ ଉବ୍‌ଜାୟ୍ କିତାନ୍ନା । 3 ଚାତୁର୍‌ ମାନାୟ୍ ସନି ହୁଡ଼ଜି ଜାର୍‌ତିଂ ଡ଼଼ୁକ୍‌ନାନ୍; ମତର୍ ବୁଦିହିଲ୍‌ୱି ମାନାୟାର୍ ଆଗେ ଆଜ଼଼ି ସାସ୍ତି ପାୟାନାର୍ । 4 ହୁଦାର୍ ଆରି ନିତ୍ରେମାପ୍ରୁତି ବିସ୍ରେନି ପାଣ୍ଡ୍ରୁନି ଇନାମ୍ ଦନ୍, ଗାଜା ପାଣ୍‌ ଆରି ଜିବୁନ୍ ଆନାତ୍ । 5 ଟାଡ୍ରି ମାନାୟାର୍‌ତି ହାଜ଼଼ିତ ୱାଡ଼ିଙ୍ଗ୍ ଆରି ଡ଼ୁକା ମାନାତ୍; ଇନେନ୍ ଜାର୍ ପାରାଣ୍ ରାକ୍ୟା କିନାନ୍ ହେୱାନ୍‌ ହେସବୁ ଦେହା ଇଟ୍‌ନାନ୍‌; 6 କାଡ଼୍‌ଦେ ସମାନ୍‌ ହାଜ଼଼ିତ ହେୱାନିଂ ସିକିତ୍ କିୟାଟ୍; ଲାଗିଂ ହେୱାନ୍ ବୁଡ଼୍‌ହି ଆତିସ୍ପା ହେବେତାଂ ବିନେ ହାଲୁନ୍ । 7 ମାଜାନ୍ ହିଲ୍‌ୱାକାନ୍ ଜପି ରାଜ୍ କିନାନ୍, ଆରେ, ରିଣ୍‌ ଅନି ମାନାୟ୍‌ ମାଜାନ୍‌ନିକାନ୍‌ ଆଡ଼ିଆ ଆନାନ୍ । 8 ଇନେନ୍ ବାନ୍ୟା ବିୟାନ୍ ୱିତ୍‌ନାନ୍, ହେୱାନ୍ ବିପଦ୍‌ବାର୍ତି ତାସ୍‌ ତ୍ରେସ୍‌ନାନ୍ ଆରି ହେୱାନ୍ତି ରିସାବାର୍ତି ବାଡ୍‌ଗା ୱିସ୍‌ନାତ୍‌ । 9 ଇନେର୍‌ତି ଦୟାନିକାନ୍ କାଣ୍‌କୁ, ହେୱାନ୍ ଆର୍ସିବାଦ୍‌ ପାୟାନାନ୍; ଇନେକିଦେଂକି ହେୱାନ୍ ଜାର୍ କାଦିତାଂ ହିଲ୍‌ୱାକାରିଂ ବାଟାକିନାନ୍ । 10 ନିନ୍ଦାକିନାକାରିଂ ହପ୍‌ଚି ତୁହିହିୟା, ହେବେ ଗଣ୍ଡ୍‌ଗଲ୍ ହସି ହାନାତ୍; ଆରେ, ବିରୁଦ୍ ଆରି ଅପ୍‌ମାନ୍ ବନ୍ଦ୍ ଆନାତ୍ । 11 ଇମ୍‌ଣି ମାନାୟ୍ ମାନ୍‌ନି ସକଟ୍‌ ୱାରିୟା ଆନାନ୍, ଇନେର୍‌ତି ୱେଇ ଦୟାମେହା, ରାଜା ହେୱାନିଂ ବନ୍ଦୁ ଆନାନ୍ । 12 ନିତ୍ରେମାପ୍ରୁତି କାଣ୍‌କୁ ଗିୟାନ୍‌ପାୟାତି ମାନାୟାରିଂ ରାକ୍ୟା କିନାତ୍; ମତର୍ ବିସ୍‌ହିନାକାର୍‌ କାତା ହେୱାନ୍ ଉଲ୍‌ଟାୟ୍ କିନାନ୍ । 13 ଆଡ଼୍‌ସାୟ୍ ମାନାୟ୍ ଇନାନ୍, ବାର୍ତ ସିୟଁ ମାନାତ୍; ଆନ୍ ହାଡ଼ାକ୍‌ତ ଅହ୍ୟା ଆନାଙ୍ଗ୍ । 14 ଦାରି କଗ୍‌ଲେତ ହାନାକା ଡେଙ୍ଗା କ୍ଡଇ ଲାକେ, ନିତ୍ରେମାପ୍ରୁଙ୍ଗ୍ ଗିଣ୍‌କିନି ମାନାୟ୍ ହେବେ ହେସ୍‌ନାର୍‌ । 15 କାଡ଼୍‌ଦେ ମାନ୍ତ ଅଗିୟାନି ବନ୍ଦ୍ ମାନ୍‌ଗାନାତ୍, ଆରେ, ସାସନ୍‌ବେଡ୍‌ଗା ହେଦାଂ ହପ୍‌ଚି ହେବେତାଂ ଦେହା କିନାତ୍ । 16 ଇମ୍‌ଣି ମାନାୟ୍ ଜାର୍ ଦନ୍ ବାଡାୟ୍‌କିନି କାଜିଂ ହିଲ୍‌ୱାକାର୍ କାଜିଂ ବାନ୍ୟା କିନାନ୍; ଆରେ, ଇନେନ୍ ମାଜାନ୍‌ତିଂ ଦାନ୍‌ କିନାନ୍, ହେୱାନିଂ କେବଲ୍‌ ଅବାବ୍‌ ଗିଟାଆନାତ୍ ।

17 ଏପେଙ୍ଗ୍ ଜାର୍ କିତୁଲ୍‌ ପାହାଟ୍ ଗିଆନିର୍ କାତା ୱେନାଟ୍; ଆରେ, ନା ବିଦ୍ୟାତ ଜାର୍ ମାନ୍ ଲାଗାୟ୍‌କିୟାଟ୍ । 18 ଇନେକିଦେଂକି ହେଦାଂ ୱାସ୍କିତ ଇଡ଼୍‌ତିସ୍ ଆରି ମି ୱେଇ ଲାହାଂ ହେଦାଂ ରବେ ମେହାତିସ୍, ୱାରିୟା ଆନାଦେର୍‌ । 19 ନିତ୍ରେମାପ୍ରୁତାକେ ଇନେସ୍ ମି ବାର୍ସି ମାନ୍‌ଗାନାତ୍, ଇଦାଂକାଜିଂ ଆନ୍ ନେଞ୍ଜେଙ୍ଗ୍‌ ମିଙ୍ଗେଙ୍ଗ୍, ବେସି ଲାକେ ମିଙ୍ଗେଙ୍ଗ୍ ଇସବୁ କାତା ୱେଚ୍‌ଚାତାଙ୍ଗ୍ । 20 ଆନ୍‌ ମି କାଜିଂ ତିରିସ୍‌ ଗଟା ଗିଆନ୍‌ କାତା ଲେକି କିତାଂନା, ଇବେ ହାର୍‌ଦି ବୁଦି ଆରେ ଗିଆନ୍‌ ବାର୍ତି ମାନାତ୍‌, 21 ଏପେଙ୍ଗ୍ ଇନେସ୍ ହେୱାରିଂ ହାତ୍‌ପା ଉତର୍ ହିଦେଂ ଆଡ୍‌ନାଦେର୍‌, ଇଦାଂକାଜିଂ ଆନ୍ ଇନାକା ମି କାଜିଂ ଜିକାଟାଣାତ ଆରି ବିଦ୍ୟାତ ସମାନ୍‌ ବଚନ୍ ଲେକି କିୱାତାଂନା? 22 ହିଲ୍‌ୱାକାରିଂ ହିଲ୍‌ୱାକା ପୁନ୍‌ଜି ତା ଜିନିସ୍ ଚରି କିମାଟ୍, ଆରେ, ଗାଡ଼୍‌ଦୁୱେର୍‌ତ ଦୁକ୍ କାଜିଂ ବାନ୍ୟା କିମାଟ୍ । 23 ଇନେକିଦେଂକି ନିତ୍ରେମାପ୍ରୁ ହେୱାର୍‌ତି ପାକ୍ୟାତ ଆପତି କିନାନ୍‌, ଆରେ, ଇମ୍‌ଣାକାର୍‌ ହେୱାର୍‌ତି ଜିନିସ୍ ଜେଲ୍‌ଜି ଅନାର୍, ହେୱାନ୍ ହେୱାର୍‌ତି ପାରାଣ୍ ଜେଲ୍‌ଜି ଅନାନ୍‌ । 24 ରିସା ମାନାୟ୍ ଲାହାଙ୍ଗ୍‌ ରଚେ ସଙ୍ଗାତ୍ କିମାଟ୍, ଆରେ, ରିସା ମାନାୟ୍ ଲାହାଂ ତାଙ୍ଗ୍‌ମାଟ୍ । 25 ହେଲାକେ କିତିସ୍, ଏପେଙ୍ଗ୍ କି ତା ହାଜ଼଼ି ହିକ୍ୟା କିଜ଼଼ି ଜାର୍ ପାରାଣ୍ କାଜିଂ ଡ଼ୁକା ଜାଗ୍ରତ୍ କିନାନ୍ । 26 ଇମ୍‌ଣାକାର୍‌ କେଇଦ ବାଦ୍‌ ହିନାର୍ କି ରୁଣ୍ ଲାଗା ଆନାର୍, ହେୱାର୍ ବିତ୍ରେ ଏପେଙ୍ଗ୍ ରୱାଦେର୍ ଆମାଟ୍ । 27 ଏଚେକାଡ଼୍‌ଦ ହୁଜାଆଦେଂ ମିଦାଂ ଇନାକା ମାନ୍‌ଗୁତ୍, ଲାଗିଂ ହେୱାନ୍ ଇନେକିଦେଂ ମି ତାରେନ୍‌ତାଂ ମିଦାଂ ପାସ୍‌ପା ଅନାନ୍? 28 ମି ଆକର୍ ଇମ୍‌ଣି ପ୍ଡାନି ହାନ୍ଦି ରଚ୍‌ଚାର୍ଣ୍ଣା, ହେଦାଂ ଗୁଚାୟ୍ କିମାଟ୍ । 29 ଏପେଙ୍ଗ୍ କି ଇମ୍‌ଣି ମାନାୟ୍‌ତିଂ ଜାର୍ ବେପାର୍‌ତ ବିଲ୍‌କି ହୁଡ଼୍‌ନାନା? ହେୱାନ୍ ରାଜାର୍‌ତି ମୁମ୍‌ଦ ନିଲ୍‌ନାନ୍ । ହେୱାନ୍ ତାରେନ୍ ମାନାୟାର୍ ଆଗେ ନିଲୁନ୍ ।