1 ଇନେର୍‌ ପେସ୍‌ୱିତିସ୍‌ ପା ବାନ୍ୟା ହନ୍‌ନାନ୍‌; ମତର୍‌ ଦାର୍ମିର୍‌ ସିୟଁ ଲାକେ ସାସ୍‌ନିକାର୍‌ । 2 ଦେସ୍‌ନି ଅଦାର୍ମି କାଜିଂ ହେବେନି ଆଦିକାରିଂ ବେସି ଆନାର୍‌; ମତର୍‌ ବୁଦିନିକାର୍‌ ଆରି ଗିଆନି ମାନାୟାର୍‌ କାଜିଂ ହେବେନି ତିର୍‌ନିକା ବେସି ଦିନ୍‌ ଆନାତ୍‌ । 3 ଇମ୍‌ଣି ଅର୍‌କିତ୍‌ ଲକ୍‌ ହିଲ୍‌ୱାରିଂ ବାନ୍ୟା କିନାନ୍‌, ହେୱାନ୍‌ ତାସ୍‌ ନସ୍ଟ କିନି ବାର୍ହା ଲାକେ; ହେବେ କାଦି ଗାଟା ଆଉତ୍‌ । 4 ବିଦି ପିହ୍‌ନାକାର୍‌ ବାନ୍ୟାରିଂ ୱାରି କିନାର୍‌, ଆରି ବଲ୍‌ ମାନି କିନାକାର୍‌ ହେୱାର୍‌ ଲାହାଙ୍ଗ୍‌ ବିରୁଦ୍‌ କିନାର୍‌ । 5 ବାନ୍ୟା ମାନାୟାର୍‌ ନିୟାୟ୍‌ ବୁଜା ଆଉର୍‌, ମତର୍‌ ନିତ୍ରେମାପ୍ରୁଙ୍ଗ୍‌ ଡେକ୍‌ନାକାର୍‌ ସବୁ ବିସ୍ରେ ବୁଜାନାର୍‌ । 6 ରି ହାଜ଼ି ତାଙ୍ଗ୍‌ନି ଆକ୍ରିୟା ଲକ୍‌ ଦନି ଆତିସ୍‌ପା ହେଦାଂ ବାଟା ହୁଦାର୍‌ତାଂ ହାନାକାର୍‌ ଅର୍‌କିତ୍‌ ଲକ୍‌ ହାର୍‌ । 7 ଇନେନ୍‌ ବିଦି ମାନିକିନାନ୍‌, ହେୱାନ୍‌ ବୁଦିକାରିୟା ମାଜ଼ି; ଆରେ, ଇନେନ୍‌ ପେଟ୍‌ପସୁର୍‌ ଲାହାଙ୍ଗ୍‌ ସାଙ୍ଗ ଆନାନ୍‌, ହେୱାନ୍‌ ଜାର୍‌ ଆବାଙ୍ଗ୍‌ ଲାଜ୍‌ କୁଇକିନାନ୍‌ । 8 ଇମ୍‌ଣି ଲକ୍‌ ୱାଡି ଆରି ବୁଦି ହୁଦାଙ୍ଗ୍‌ ଜାର୍‌ ସମ୍ପତି ବାଡାୟ୍‌ କିନାନ୍‌, ହେୱାନ୍‌ ହିଲ୍‌ୱାକାର୍‌ କାଜିଂ ଦୟାକିନାକାନ୍‌ ଲାଗିଂ ହେଦାଂ ରୁଣ୍ଡାଇ କିନାନ୍‌ । 9 ଇମ୍‌ଣାକାର୍‌ ବିଦି ୱେନି କାଜିଂ ଜାର୍‌ କିତୁଲ୍‌ ହିଉନ୍‌, ତା ପାର୍ତାନା ନେ ଗିଣ୍‌ନି ବିସ୍ରେ ଆନାତ୍‌ । 10 ଇମ୍‌ଣି ଲକ୍‌ ହୁଦାର୍‌ ମାନାୟ୍‌ତିଂ ବାନ୍ୟା ହାଜ଼ିତିଂ ହାଞ୍ଜେଙ୍ଗ୍‌ ବୁଲାୟ୍‌କିନାନ୍‌, ହେୱାନ୍‌ ଡେଙ୍ଗା କ୍ଡଇଦ ନିଜେ ଆର୍‌ନାନ୍‌; ମତର୍‌ ହୁଦାର୍‌ ମାନାୟ୍‌ ହାର୍ଦାକା ଆଦିକାର୍‌ କିନାନ୍‌ । 11 ଦନି ଲକ୍‌ ଜାର୍‌ କାଣ୍‌କୁତ ଗିଆନ୍‌ନିକାନ୍‌; ମତର୍‌ ବୁଦିନିକାନ୍‌ ହିଲ୍‌ୱାରିଂ ମାଜାନ୍‌ତି ଜାଣାଚିଣା ଅନାନ୍‌ । 12 ଦାର୍ମିର୍‌ ଜିଣାତିସ୍‌ ବେସି ଜାଜ୍‌ମାଲ୍‌ ଆନାତ୍‌; ମତର୍‌ ବାନ୍ୟାର୍‌ ଉନ୍‌ତି ଆତିସ୍‌ ଲକ୍‌ ଜାର୍‌ତି ଡ଼ୁକ୍‌ନାର୍‌ । 13 ଇନେନ୍‌ ଜାର୍‌ତି ପାପ୍‌ ଡାବାୟ୍‌ କିନାନ୍‌, ହେୱାନ୍‌ ହାର୍ଦାକା ପାୟା ଆଉନ୍‌; ମତର୍‌ ଇମ୍‌ଣି ଲକ୍‌ ହେଦାଂ ଇଟ୍‌ୱାଦାଂ ପିହ୍‌ନାନ୍‌, ହେୱାନ୍‌ ଦୟା ପାୟାନାନ୍‌ । 14 ଇମ୍‌ଣି ଲକ୍‌ ସବୁୱେଡ଼ାଙ୍ଗ୍‌ ପାଣ୍ଡ୍ରୁ ଆନାନ୍‌, ହେୱାନ୍‌ ଦନ୍ୟ; ମତର୍‌ ଇନେନ୍‌ ଜାର୍‌ ମାନ୍ତିଙ୍ଗ୍‌ ଆଟ୍‌ୱା କିନାନ୍‌, ହେୱାନ୍‌ ବିପଦ୍‌ତ ପଡ଼ାନାନ୍‌ । 15 ଇନେସ୍‌କି ଗାର୍ଜାନି ସିୟଁ ଆରି ବୁଲାନି ବାଲୁ; ହେଲାକେ ଅର୍‌କିତ୍‌ ରୱାନ୍‌ ମାନାୟ୍‌ ଜପି ବାନ୍ୟା ସାସନ୍‌ କାରିୟା ହେ ଲାକେ । 16 ଇମ୍‌ଣି ମୁଣିକା ବୁଦିହିଲାକାନ୍‌, ହେୱାନ୍‌ ପା ବେସି ବାନ୍ୟା ଆନାନ୍‌, ମତର୍‌ ଇନେନ୍‌ ଲବ୍‌ତିଂ ଗିଣ୍‌କିନାନ୍‌, ହେୱାନ୍‌ ଜାର୍‌ ଦିନ୍‌ ବାଡାୟ୍‌ କିନାନ୍‌ । 17 ଇମ୍‌ଣି ଲକ୍‌ ଇମ୍‌ଣି ମାନାୟ୍‌ତି ଅହ୍‌ନିତ ଦସି ଆନାନ୍‌, ହେୱାନ୍‌ ନାସ୍‌ଆନିତ ପାତେକ୍‌ ହନ୍‌ନାନ୍‌; ଇନେର୍‌ ତାଙ୍ଗେଙ୍ଗ୍‌ ଟେବାୟ୍‌ କିଉର୍‌ । 18 ଇମ୍‌ଣି ମାନାୟ୍‌ ହୁଦାର୍‌ ବାବ୍ରେ ଚାଲାନାନ୍‌, ହେୱାନ୍‌ ରାକ୍ୟା ପାୟାନାନ୍‌; ମାତର୍‌ ଜାର୍‌ ବାନ୍ୟା ହାଜ଼ିତ ତାଙ୍ଗ୍‌ନାନ୍‌ ହେୱାନ୍‌ ହାଚାଟ୍ରେ ଗୁର୍‌ନାନ୍‌ । 19 ଜାର୍‌ ବୁମିତ ଇନେନ୍‌ କାମାୟ୍ କିନାନ୍‌, ହେୱାନ୍‌ ଜତେସ୍ଟ କାଦି ପାୟାଆନାନ୍‌; ଆରେ, ଇନେନ୍‌ ବେକାର୍‌ ମାନାୟ୍‌ତି ପାଚେ ହାନାନ୍‌, ହେଦାଂ ବେସି ଅର୍‌କିତ୍‌ ଆନାନ୍‌ । 20 ପାର୍ତି କିନି ଲକ୍‌ ଆର୍ସିବାଦ୍‌ ବେସି ପାୟାନାନ୍‌; ମାତର୍‌ ଇନେନ୍‌ ମାଜାନ୍‌ ଆଦେଙ୍ଗ୍‌ ବେସି ସେସ୍ଟା କିନାନ୍‌, ହେୱାନ୍‌ ଦଣ୍ଡ୍‌ ପାୟାଆନାନ୍‌ । 21 ମୁକ୍‌ମେଟ୍‌ କିନାକା ହାର୍‌ ଆକାୟ୍‌ । କି ଇଚୁକ୍‌ ରୁଟି କାଜିଂ ଅଦାର୍ମି କିନାକା ହାର୍‌ ଆକାୟ୍‌ । 22 ଲବ୍ରା ମାନାୟ୍‌ ଦନ୍‌ ପାଚେ ହନ୍‌ନାନ୍‌, ମାତର୍‌ ତାଙ୍ଗେଙ୍ଗ୍‌ ଅବାବ୍‌ କିଦ୍‌ନାତ୍‌ ଇଞ୍ଜି ହେୱାନ୍‌ ପୁନୁନ୍‌ । 23 ୱେନ୍ଦୁଲ୍‌ତ ଚିକ୍‌ଣାୟ୍‌ କାତା ଇନି ଲକ୍‌ ବାଟା ମାନାୟ୍‌ତିଂ କେତ୍‌ନି ମାନାୟ୍‌ ହାରିହାରା ଆଦିକ୍‌ ଜାଜ୍‌ମାଲ୍‌ ପାୟାନାନ୍‌ । 24 ଇନେନ୍‌ ଜାର୍‌ ଆବା କି ଆୟାତି ଜିନିସ୍‌ ଜେଲ୍‌ଜି ଇନାନ୍‌, ଇବେ ଇନାକାପା ଅଦାର୍ମି ହିଲୁତ୍‌, ହେୱାନ୍‌ ବାନ୍ୟା ସାଙ୍ଗ । 25 ଲବ୍ରା ମାନାୟ୍‌ ପାରାଣ୍‌ ଗଣ୍ଡ୍‌ଗଲ୍‌ ହପ୍‌ନାନ୍‌, ମତର୍‌ ଇନେନ୍‌ ନିତ୍ରେମାପ୍ରୁତି ଜପି ବାର୍ସି କିନାନ୍‌, ହେୱାନ୍‌ ମାଜାନ୍‌ ଆନାନ୍‌ । 26 ଇନେନ୍‌ ଜାର୍‌ ୱାସ୍କିତ ବାର୍ସି ଇଟ୍‌ନାନ୍‌, ହେୱାନ୍‌ ମୁର୍କିୟା; ମତର୍‌ ଇନେନ୍‌ ଗିୟାନ୍‌ତ ଚାଲାନାନ୍‌, ହେୱାନ୍‌ ରାକ୍ୟା ପାୟାନାନ୍‌ । 27 ଇନେନ୍‌ ହିଲ୍‌ୱାକାରିଂ ଦାନ୍‌ କିନାନ୍‌, ହେୱାନ୍ତି ଅବାବ୍‌ ଆଉତ୍‌; ମତର୍‌ ଇନେନ୍‌ ଜାର୍‌ କାଣ୍‌କୁ ଜୁଚ୍‌ନାନ୍‌; ହେୱାନ୍‌ ବେସି ସାଇପ୍‌ ପାୟାନାନ୍‌ । 28 ବାନ୍ୟାର୍‌ ଉନତି ଆତିସ୍‌, ମାନାୟାର୍‌ ଜାର୍‌ତିଂ ଡ଼ୁକ୍‌ନାର୍‌; ମତର୍‌ ହେୱାର୍‌ ନାସ୍‌ ଆତାର୍‌, ଦାର୍ମିର୍‌ ବାଡାନାର୍‌।