1 ଇମ୍‌ଣି ମାନାୟ୍‌ ଚାନେକ୍‌ତିଂ ଚାନେକ୍‌ କେତ୍‌ୟା ଆତିସ୍‌ ନେ ଜାର୍‌ ବାଦ୍‌ଲା ଆୱାଦାଂ ମାନ୍‌ ଆଟ୍‌ୱା କିନାନ୍‌, ହେୱାନ୍‌ ହାର୍‌ ଆୱାଦାଂ ତ୍ରିପ୍‌କୁ ନସ୍ଟ ଆନାନ୍‌ 2 ଦାର୍ମିର୍‌ ବାଡାତାର୍‌, ମାନାୟାର୍‌ ୱାରି କିନାର୍‌, ମତର୍‌ ଦୁସ୍ଟ ମାନାୟ୍‌ ଆଦିକାର୍‌ ପାୟାତାର୍‌, ମାନାୟାର୍‌ ଗାଜାକାଟ୍‌ ଦୁକ୍‌ତ ଆଡ଼୍‌ବାତାର୍‌ । 3 ଇମ୍‌ଣି ମାନାୟ୍‌ ଗିଆନ୍‌ତିଂ ମାନ୍‌ କିନାନ୍‌, ହେୱାନ୍‌ ଜାର୍‌ ଆବାଙ୍ଗ୍‌ ୱାରି କିନାନ୍‌; ମତର୍‌ ଇନେନ୍‌ ଦାରିତାକେ ହାନାକାର୍‌, ହେୱାନ୍‌ ଜାର୍‌ ଦନ୍‌ ଉପ୍‌ନାନ୍‌ । 4 ରାଜା ହାର୍‌ବିଚାର୍‌ ହୁଦାଂ ଦେସ୍‌ ହାର୍‌ତିର୍‌ କିନାନ୍‌; ମତର୍‌ ଇନେନ୍‌ ଇନାମ୍‌ୱାରିନିକାନ୍‌, ହେୱାନ୍‌ ହେଦାଂ ଡ୍ରିକ୍‌ନାନ୍‌ । 5 ଇମ୍‌ଣି ମାନାୟ୍‌ ଜାର୍‌ ପାଡ଼୍‌ହାଇଞ୍ଜାକାର୍‌ ଚିକ୍‌ଣାୟ୍‌ କିନାନ୍‌, ହେୱାନ୍‌ ତା ପାନା କାଜିଂ ଜାଲ୍‌ ଉଚ୍‌ନାନ୍‌ । 6 ବାନ୍ୟା ମାନାୟ୍‌ତି ଅଦାର୍ମିତ ଡ଼ୁକା ମାନାତ୍‌; ମତର୍‌ ଦାର୍ମି କେର୍‌ନାନ୍‌ ଆରି ୱାରି କିନାନ୍‌ । 7 ଦାର୍ମି ମାନାୟ୍‌ ହିଲ୍‌ୱାକାରିଂ ଗୱାରି ବିସ୍ରେ ପୁନାନ୍‌; ମତର୍‌ ହେଦାଂ ପୁନି କାଜିଂ ଦୁସ୍ଟ ମାନାୟ୍‌ତିଂ ବୁଦି ହିଲୁତ୍‌ । 8 ନିନ୍ଦାକିନାକାର୍‌ ଗାଡ଼୍‌ଦ ଟିଉଲାୟ୍‌ କିନାର୍‌; ମତର୍‌ ଗିଆନିର୍‌ ରିସା ବାଙ୍ଗାୟ୍‌ କିନାର୍‌ । 9 ଅଗିଆନି ଲାହାଂ ଗିଆନିତି ଗଣ୍ଡ୍‌ଗଲ୍‌ ଆତିସ୍‌, ହେୱାନ୍‌ ରିସା କିତିସ୍‌ କି ଗ୍ଡାଇତିସ୍‌, ଇନାକା ସୁସ୍ତା ଆକାୟ୍‌ । 10 ନାର୍‌ ଅହ୍‌ନି ମାନାୟାର୍‌ ହାର୍ଦି ମାନାୟ୍‌ତିଂ ଗିଣ୍‌ କିନାନ୍‌ ଆରେ, ହେୱାର୍‌ ହୁଦାର୍‌ ମାନାୟାର୍‌ତି ପାରାଣ୍‌ ଡେକ୍‌ନାର୍‌ । 11 ମୁର୍କିୟା ଜାର୍‌ତି ସବୁ ରିସା ହପ୍‌ନାନ୍‌; ମତର୍‌ ଗିଆନି ହେଦାଂ ଜାର୍‌ ରିସାତିଂ ସମାଲି ତିର୍‌ କିନାନ୍‌ । 12 ସାସନ୍‌କାରିୟା ଏଚେକାଡ଼୍‌ଦ ମିଚ୍‌ କାତାତ କିତୁଲ୍‌ ୱେନାନ୍‌, ଲାଗିଂ ତା ହେବାକାରିୟା ସବୁ ଦୁସ୍ଟ ଆନାର୍‌ । 13 ଅର୍କିତ୍‌ ଆରି ବାନ୍ୟାର୍‌ ରବେ ମେହାନାର୍‌, ନିତ୍ରେମାପ୍ରୁ ରିୟାର୍‌ତି କାଣ୍‌କୁ ଅଜଡ଼୍‌ କିନାନ୍‌ । 14 ଇମ୍‌ଣି ରାଜା ପାର୍ତି ଲାକେ ହିଲ୍‌ୱାକାରିଂ ବିଚାର୍‌ କିନାନ୍‌, ତାଦି ଗାଦି ନିତ୍ରେ ତିର୍‌ ଆନାତ୍‌ । 15 ବେଡ୍‌ଗା ଆରି କେତ୍‌ନାକା ଗିଆନ୍‌ ହିନାତ୍‌; ମତର୍‌ କାଡ଼୍‌ଦେଂ ତା ଇଚାତ ପିସ୍ତିସ୍‌, ହେୱାନ୍‌ ତା ତେହିଂ ଲାଜ୍‌ ହନାତ୍‌ । 16 ଦୁସ୍ଟ ମାନାୟାର୍‌ ବାଡା ଆତିସ୍‌, ପାପ୍‌ ବାଡାନାତ୍‌; ମତର୍‌ ଦାର୍ମିର୍‌ ହେୱାର୍‌ତି ନାସ୍‌ ହୁଡ଼୍‌ନାର୍‌ । 17 ଜାର୍‌ ମାଜ଼ିଙ୍ଗ୍‌ ସାସ୍ତି ହିତିସ୍‌, ହେୱାନ୍‌ ମିଙ୍ଗେଙ୍ଗ୍‌ ସୁସ୍ତା ହିଦ୍‌ନାନ୍‌; ଆରେ, ହେୱାନ୍‌ ମି ପାରାଣ୍‌ତିଂ ସୁକ୍‌ ହିନାନ୍‌ । 18 ଇମେନି ମାନାୟ୍‌ ଇସ୍ୱର୍‌ତି ସାସନ୍‌ ମାନ୍‌ଗୁତ୍‌ ହେବେନି ମାନାୟାର୍‌ ନସ୍ଟ ଆନାର୍‌; ମତର୍‌ ଇମ୍‌ଣି ମାନାୟ୍‌ ବିଦି ପାଲିକିନାନ୍‌, ହେୱାନ୍‌ ଦନ୍ୟ । 19 କାତାବାର୍ତାତ ଆଡ଼ିୟାତି ହୁଦାର୍‌ ଆଉତ୍‌; ଇନେସ୍‌କି ହେୱାନ୍‌ ବୁଜାତିସ୍‌ ପା ମାନ୍‌ଦ୍ୟାନ୍‌ କିଉନ୍‌ । 20 ଏପେଙ୍ଗ୍‌ ଇନା କାତାତ ଚଚଲ୍‌ ମାନାୟ୍‌ତିଂ ହୁଡ଼୍‌ନାଦେରା? ହେଦାଂ ବାଟା ମୁର୍କିୟା ବିସ୍ରେ ଆଦିକ୍‌ ବାର୍ସି ମାନାତ୍‌ । 21 ଇନେନ୍‌ ହିମ୍‌ଣାୱାଡ଼ାଙ୍ଗ୍‌ ଜାର୍‌ ଆଡ଼ିୟାଙ୍ଗ୍‌ ଲାଡ୍‌ କିଜ଼ି ପାଲି କିନାନ୍‌, ହାରିହାରା ହେ ଆଡ଼ିୟା ତା ଆଡ଼ିୟା ଆଜ଼ି ନିଙ୍ଗ୍‌ନାନ୍‌ । 22 ବେସି ରିସାନି ମାନାୟ୍‌ ଗଣ୍ଡ୍‌ଗଲ୍‌ ଉବ୍‌ଜାୟ୍‌ କିନାନ୍‌, ଆରେ, ବେସି ପାପି ମାନାୟ୍ ବାନ୍ୟା ହପ୍‌ନାନ୍‌ । 23 ମାନାୟ୍‌ତି ଆକାର୍‌ ତାଙ୍ଗ୍‌ ତାରେନ୍‌ କିନାତ୍‌; ମତର୍‌ ଇନେର୍‌ତି ଜିବୁନ୍‌ ଗୱାରି, ଗାଜା ମାନି ପାୟାନାନ୍‌ । 24 ଚର୍‌ତି ସାଙ୍ଗ ଜାର୍‌ ପାରାଣ୍‌ତିଂ ଗିଣ୍‌ କିନାନ୍‌, ହେୱାନ୍‌ ପାର୍ମାଣ୍‌ କିୟ୍‌କିନି କାତା ୱେନାନ୍‌, ମାତର୍‌ ଇନାକାପା ହପୁନ୍‌ । 25 ମାନାୟ୍‌ତି ପାଣ୍ଡ୍ରୁ ଡ଼ୁକାଲାକେ; ମତର୍‌ ନିତ୍ରେମାପ୍ରୁତାକେ ଇନେନ୍‌ ବାର୍ସି କିନାନ୍‌, ହେୱାନ୍‌ ଆହ୍‌ର ଆନାନ୍‌ । 26 ବେସି ସାସନ୍‌କାରିୟାର୍‌ ଦୟା ଇଚା କିନାର୍‌ ମତର୍‌ ମାନାୟ୍‌ତି ବିଚାର୍‌ ନିତ୍ରେମାପ୍ରୁତାଂ ଆନାତ୍‌ । 27 ଅଦର୍ମିର୍‌ କିନି ମାନାୟାର୍‌ ଦାର୍ମିନିକାରିଂ ଗିଣ୍‌ କିନାର୍‌, ଆରେ ହାର୍‌ଦି ହାଜ଼ିତ ହାନି ମାନାୟାର୍‌ ଦୁସ୍ଟ ମାନାୟ୍‌ତି ଗିଣ୍‌ ବିସ୍ରେ ଆନାତ୍‌ ।