1 Pecai mmi kereiehmdai cai Ih Barnabas de ngngwa lwe Jerusalem ga hangdai, Titus de acu ngngwa la. 2 Cu keulia kegaide ziemne Ih cika mie, nah Ih Gentileme kakga samliakeyi paulia kelade penui dage ranglia, dede muiteume dage ngkim eh ranggai, maige Ih a ta tei kelade kemta teidi zielu. 3 Dede acu nzang kelabe Titus de Greekme ge liede, pe kemei tei eh pegeu rum ma. 4 Dede mina kangge kenlumme rehi teilwe anui kakga ngkim gwang bam. Penui anui Khrista Jisu de ngngwa kencüt gade ngaukelu suirangketei de pie kerane ngkim gwang bam iciu eh penui anuide hebaangme teilu kerane, 5 anui peting kecam nage ziemne de penui kangga nlüt dima, iciu eh samliakeyi kesangbe nnui ziemne kaizeu kerane. 6 Dede muiteume lie kelamedung (penui keheige teila liede cide a ziemne au magede ma, Tinggwang hegwazu luuma melu)—kedanemene muiteume lie kelamedung de a ziemne au mage dema.✝ 7 Meliene, Peter de hegeurum kelume dage samliakeyi de ledeu kera nlum kebeu nzwa acu hegeurum kemakme dage samliakeyi de ledeu kera nlumpwa kepeude penui ci luda. 8 Kedanemene Tinggwang, Peter de teu hegeu kerumme dage langkegaime ge tei eh peta keteibe, acude teu peta tei eh Gentileme dage langgai. 9 James, Cephas nah John, penuide hangkia kentipmebau lie bam kelame, acu pwa kepeu ngaugia de penui ci keludau, penui Barnabas anaide ngngwa kebazwa kelu gade ngngwa bateu, iciu eh anai Gentileme da mie, nah penui hegeukerumme da mie kerane. 10 Penui kekie au anuide peu kegahme de ngha kera nsung gailo kecude da, Ih de aide teineu lala.

11 Dede Cephas Antioch namdi ga gwang keludau, Ih pe dwagade pecu mmau kedanemene pa mau kecune.✝ 12 Kedanemene James dade mina kangge kegwang dwa, Cephas au Gentileme de ngngwa matyei bam. Dede mina aidungde gwang luge, hegeurum kerabe lie kelamedung de hing eh pa Gentileme dade mpet ntsamdi.✝ 13 Hezaiketei aide ga Jewme kenlumme kedame de pecai suidi, iciu eh Barnabas dede penui hezai ketei dene kemeu teudi. 14 Dede penui samliakeyi kesangbe nzui mene penui zaira teikedi Ih ngau luge, Ih Cephas de penui pelane dwagade ranggai, "Nang Jewme ge liede Jewme nzwa mene Gentileme ge nzwa lungh la liecai, dainzwa eh nang Gentileme de Jewme nzwa lungh lulo lulai no?" 15 Anui au mnakelu gade Jewme ge nah Gentileme kemaume ma; 16 ciciude hezaibe gade migede de tei masang lula kemak ci eh dede Jisu Khrista de nlumkelu gade kecu ci eh anuide Khrista Jisu de nlum lula, iciu eh hezaibe ta gade mene Khrista de kenlum gade anuide tei masanglu kerane. Kedanemene hezaibe ne pumteihbe gede tei masang gailak lu.✝ 17 Dede Khrista gade anui masanglu kera peei keladau, anui katei anuide kemaume lie kecu ngaulu lacai, ciciu cai Khrista kemau gwa tei lani? Aiciu mezing! 18 Kedanemene Ih hezai kehegwa teimsia kedidung de Ih retakdai lacai, Ih hezai gikah kedime lie acu keulia la dida. 19 Kedanemene Ih hezaibe gade hezaibe gage tsaigai dida, iciu eh Ih Tinggwang dage ring gailu kerane. Acu Khrista de ngngwa gwak dida, 20 nah ring kelade au Ih ma, dede Khrista a lungga ringla. Nah Ih cu pumteih gade ring kelade, Ih Tinggwang Nabe de kenlum gade ringla, pa acu kula nah a ziemne pe teilung kaibeu. 21 Ih Tinggwang ngaugia de keu hezia dima, kedanemene hezaibe gade mide tei masang lula liecai, Khrista tsit au kemta da!