1 Ih rang gaila, mapwabe de hena bam kecu tane, pa au hebaangme swade tsam ma, pa hangdeu kedi ge mpaube ge liede. 2 Dede pe pei pe tingba riet kenzeu cang kemaktane pa hema keteume kangga lung nah mide peu pema pie bamla. 3 Cinzwa eh, anui hena kebamdau, anui kideube kengkieng keteume kangga la. 4 Dede petingbe cangsiak gwang luge, Tinggwang pe Na de langgai eh peu mipui ge dade nah hezaibe kang gade mna lu, 5 iciu eh hezaibe kangga kebammedung de rilu kerane, nah anui pe name teilu kerane. 6 Nah nnui pe name kecu ziemne, Tinggwang pe Na Rabe* langpwa anui mlung gage kaigai, Rabe cide ne, "Abba,* Apei," de qula. 7 Cine nnui au hebaangme meda, dede pena dida, nah pena dicai, Tinggwang mapwame ge dida.

8 Nnui Tinggwang de cilu kemakdau, ring kemak rabedung kangga kilabaangme teigwang.✝ 9 Dede cu nnui Tinggwang de ci kelucai, mede Tinggwang nnuide ci kelucai, nnui dainzwa kemnei nah pemi kegah rabedung da cailigwang dai eh nnui cidungde baang teidai neu lano? 10 Nnui tingbazie nah hekei zie nah peting pehi nah mmidung mnei la! 11 Ih nnui dage a ta tei kegaide kemta teidi kera Ih hing bamlie.

12 Sinamedung, Ih de nnui nzwa kelu nzwa nnuide Ih nzwa lulo Ih nnui dage kie gaila. Nnui a dage ma kemau gede teigai ma. 13 Ih nda nnui dage samlia keyibe rang ledeu kecu Ih yi mcang kemak ziemne kecu nnui cibam. 14 A pumteih kemnei ne nnuide kedakpie liede, nnui acu nneu dima mede gidi ma, dede nnui acu Tinggwang samgwame ge nzwa eh ngngwalu, Khrista Jisu de nzwa acu ngngwalu. 15 Iciucai nnui suikeyi de daiga bamno? Kedanemene, nnui teilu buicai, nnui miak de letlwe cidungde acu peu dilu kebui Ih nnui zierang tei lubui. 16 Iciu cai, Ih nnui dage kesangbe rang eh nnui ngauraume teidi deni?✝ 17 Penui nnuide luulu neula, dede keyibe ziemne ma, dede penui nnuide anui dade teuntsamdi neula, iciu eh nnui penui ziemne helung kailu kerane. 18 Dede kehei dau liede makeyibe ziemne helung kai kebamde au yi, Ih nnuide ngngwa bam kemakdau liede. 19 A namedung, nnui Khrista nzwa lunghlu kemaktane Ih au hena tetteei teeidai bam dida, 20 dede Ih cu nnuide ngngwa bam kera regui lei, iciu eh a samrang tsamlu kerane, kedanemene Ih nnui ziemne a lung keherei bamlie.

21 A dage ranglo, nnui hezaibe kangga la keneume, nnui hezaibe kingneila meni? 22 Kedanemene Abraham pena hangna bam lie kesanglaisiu ga raupwa la, hangge kilabaang pui dade nah kedabe kila tei kemakbe pui dade.✝ 23 Kilapui dade lungh kelube au pumteihbe zai gade, dede kila tei kemakbe pui dade lungh kelube au sampet gade. 24 Aide sam rang keda kegai ge nzwa ranggai, kedanemene mipui ai kenade samting samkakkelu kena. Hangge cai Sinai Deutu gade hebaang gage mna gai kelube; aide cai Hagar. 25 Cu Hagar au Arabia ga Sinai Deutu deda; nah pa cu kebam Jerusalem de rehi da, kedanemene pa pe name de ngngwa hebaang tei kebamne. 26 Dede Jerusalem nreube de au hebaang teima, nah pa au anui pui da. 27 Kedanemene kesanglaisiu ga ainzwa raupwa la,

"Nang nagahpui, n suiyi lu, hena mna gaikelakbe pui;

n suiyi eh sah gailu, nang hena tetteei teei kemakbe pui;

kedanemene gi kedibepui name au

pe nahpei kebamme swade pena kieeki lu."✝

28 Dede, sinamedung, nnui au Isaac nzwa, sampet kebeu namedung da. 29 Dede cipau tingdau pumteih zai gade lungh kelube ne Rabe zai gade lungh kelube de teikeherei kecu nzwa, cude cide nzwa da.✝ 30 Dede kesanglaisiu daipai rang gaino? "Kilabaang pui nah pe napei de langgi dilu. Kedanemene kilabaang pui na baang kemak pui na de ngngwa mabam nzi daulak lu."✝ 31 Ciziemne, sinamedung, anui au kilabaang pui namedung ma, dede baang kemak pui name lie.