1 Kemie Galatiamedung! Caune nnuide kemeudi deno? Nnui miak dwaga Jisu Khrista de gwakkedi ha mcigi bam. 2 Ma aide rünne Ih nnui dade ci neula: Nnui hezai bata gade Kemci Rabe ngaulu dimi, siu kelude nlumkelu gade no?✝ 3 Nnui miesüt di deni? Rabe gade teilung keheci ndeu kelucai, daitei cu pumteihbe gade nnui yicangsiaklu kera peei lano? 4 Nnui reisüt kegaide magede meni—cide magede kemak kesang de cai? 5 Cine, Rabe nnuide pwa kepeube nah nnui kakga miswakegah batadung keteibe de hezaibe kemzai gade cidungde tei ni, mi samliakeyi de siulwe nlumkelu gade no? 6 Cinzwa eh Abraham, "Tinggwang de nlumlu nah cine pecu masang lie luulu,"✝ 7 cine kenlummedung Abraham leuhmedung lie kecu ci lulo. 8 Nah kesanglaisiu, Tinggwang Gentileme de kenlum gade tei masanglu kera mrai ngau eh samliakeyi de mrai ledeu pwa Abraham dage ranggai, "N dade heleuh pelane de samlam beuzie."✝ 9 Cine nlumkelume de au Abraham nlumkelube de ngngwa samlam beu dida. 10 Hezaibe bata ga ngngei kelame pelane reset kangga la dida; kedanemene ainzwa raupwa la, "Hezai laisiukwak gage rauteu keladungde pelane mzai nah teila kemakme pelane de peu reset punglu."✝ 11 Cu migede Tinggwang dwagade hezaibe ne tei masang lula kemak ci mci luda, kedanemene, "Masang kelame kenlum gade ring luzie."✝ 12 Cu hezaibe au kenlum gade ma, dede, "Hezaibe tei kelabe cidungde gade ring luzie."✝ 13 Anui ziemne reset ge tei eh Khrista anuide hezaibe reset gade rilu da, kedanemene kesanglaisiu ga ainzwa raupwa kela, "Tsingbang reu gage gwak kedi leune reset pung dida"—✝ 14 iciu eh Khrista Jisu gade Abraham samlam de Gentileme da gwanglu kerane, nah anui kenlum gade sampet kebeu Rabe de ngaulu kerane.

15 Sinamedung, mina zai ria gade Ih rang gaila. Mina ne teikelu samkak de migede gileu mede cikage kaisi lula ma, piage hezaibe gade cide tei dicai. 16 Sampet de Abraham nah pe leuhbe dage ranggai beu. Pa cide, "heleuhme dage," de rang ma, pekie mina kekiee ge dage, dede, "n leuhbe dage," pekie hangge dage, cide au Khrista.✝ 17 Ih rang kerabe kie au aide: Hezaibe, mmi haimdai eh camrei caine kegwangde, Tinggwang ne pedwa samkak pwa kebamde gikah dima, iciu eh sampet de kemta teidi melu kerane.✝ 18 Kedanemene hezaibe de kemzai gade mapwa de ngaulu lacai, cide au sampet kebeu gade meda. Dede Tinggwang Abraham de cide sampet gade peu. 19 Ciciu cai, hezaibe dai ziemne no? Cide hezai gikah kecu ziemne sampet kebeube gwang kemaktane peu la zielie kaisi beu. Hezaibe au tinggimgwame ne hekak tetkebambe dage balie gaibeu. 20 Cu hekak ketetbe au mi hangge rünne ziemne ma, dede Tinggwang au ket lie. 21 Cine hezaibe Tinggwang sampet dungde renia lani? Ciciu mezing! Kedanemene kering peulu kebui hezaibe kaibeu liecai, iciu cai hezaibe kemzai gade mide tei masangkelu ngau lubui. 22 Dede Kesanglaisiu rang kecu ma pelane kemau baang teidi delie zeu, iciu eh nlumkelu leune de Jisu Khrista de nlumkelu dene anuide kelilu zielie sampet kebeude peulu kerane.

23 Cu kenlum anuida kegwang dwa, hezaibe kang gage anuide hebaangme tei eh baangdi, kenlum de liagai kemaktane. 24 Cine Khrista gwang kemaktane hezaibe ne anuide gum pungla, ciciu eh kenlum gade anuide tei masanglu kerane. 25 Dede cu kenlum gwang kelu gade anui hezaibe kangga bamsi meda.

26 Kedanemene Khrista Jisu de kenlum gade nnui pelane Tinggwang namedung di delu. 27 Kedanemene nnui Khrista gage duipum teigai kelu leune Khrista de teu bah luda. 28 Cika Jewme mede Greekme de tsam swa ma, hebaang keteime mede tei kemakme de tsam swa ma, mipei mede mipui tsam swa ma kedanemene nnui pelane Khrista Jisu gade ketdi delu. 29 Cu nnui Khrista gu liecai, ciucai nnui au Abraham leuhme da, nah sampet rehi gade mapwamedung da.