1 Sinamedung, mige kemau keheibe teila eh tui lucai, nnui rabe kilam ntip kelame nnui nciep eh pecu tei mmi dailu maisia. Nnuide mriak bamlu, iciu eh mdakkepie gade nnui kaudi melu kerane. 2 Hangge ge püt cuilu, iciude nnui Khrista zaibe teicang luzie. 3 Kedanemene keheibe de pa magede ma delwe pekatei pecu le mage lie cetla cai, pa pekatei pecu cwa dida. 4 Dede peu hangge gede pekatei pe bata de pie mcetlu* maisia, nah ciude pa hegielu kera kiebe pekatei pe ziemne kecu nah mi kedame ziemne kemak ngau luzie. 5 Kedanemene hangge ge kecu pekatei pe püt pung zie.

6 Dede Tinggwang sam ledeukelube de au ma keyi peciakne teu eh pe keledeube dage nzi kerabe. 7 Nnuide cwa diso. Tinggwang de henui tei daulak, mige pa mrok kegaide rum daizie. 8 Kedanemene pekatei pe pumteih gage mrok kegaibe, pe pumteih gade kengkap rum zie. Dede Rabe gage mrok kegaibe, Rabe gade kelungta kering rum luzie. 9 Nah anui makeyi ketei ga leudi kerabe ma, kedanemene anui pütdi mene bam lucai peting siakdau rum zielu. 10 Cine, anui peting keyi ngau keludau, anui mina pelane dage ma keyi teigai maisia, nah bam keraide kenlum kilungme dage.

11 Ih nnui dage laisiukau kedidung teu eh a ba le rau kegaide pie gailo. 12 Nnui kemei tei eh hegeurum kera ketang kelame au hegwazube mide teilia neula. Khrista Jisu cross ziemne penuide tei keherei melu kerane penui aide teila. 13 Kedanemene hegeurum kelame de hezaibe mzui lama, dede penui nnuide peu hegeurum neula, iciu eh penui nnui pumteihbe ziemne hegielu kerane. 14 Dede Ih au anui Rampaube Jisu Khrista cross de ziemne gwale hegielu kera gah, cide ziemne a dwade kideube de gwak dida, nah Ih kideube de ngngwa tsai dida. 15 Kedanemene hegeu kerumde nah hegeu rum kemakde au magede ma, dede mikatei mide tei heci kelu deda. 16 Aipau zai rehi ga lungh kela leune nah Tinggwang mina Israel reu peu lungciep nah ngaugia bam kelube tei lulo.

17 Cu gade migede de peu acu tei keherei ta dilu, kedanemene Ih a pumteih ga Jisu zamdung de pungla di delu.

18 Sinamedung, peu nnui rabe de anui Rampaube Jisu Khrista ngaugiabe de ngngwala kelube tei lulo. Amen.