1 माआं पाव्हीइला, आंय तुमुहूं ओर कोइत आपोहो के, आपाआ पेल्लाआ आखा डायहां वाद्लाआ निसे ओता, आन आखे लाल दोर्‍याआ विसमेहें एकी मेरे होकेहे उनकीत गोये.✝10:1 निर्ग 13:21-22; 14:22-29 2 आन आखाज वाद्लामेहें आन दोर्‍याम, मोशेएरी बाप्तिस्मा लेदो. 3 आखाज एकुज आत्मिक रोटू खादू✝10:3 निर्ग 16:35 4 आन आखाज एकाज आत्मिक पाअयोंम रोत पिदो, काहाके तियां तिया आत्मिक खड़काम रोत जों तियांआं आरी-आरी सालतोतो, आन तों खड़को ख्रिस्त ओतू.✝10:4 निर्ग 17:6; गणती 20:11 5 पोन देवे तिहींम रोत वारुज जोओंअरी नाराज ओतू, तियाहा कोत तें जंगलोम फातारा पोड़्ये.✝10:5 गणती 14:29-30

6 ए गोठी आपाआ काजे उदाहरण ठर्‍यी, काहाके जेहें कोइत तियां लालस कोअयी, तेहें कोइत आपू खाराब वस्तुउ लालस ने कोअहूं जोवे. 7 आन जेहलेहे तियांमेर्‍येए थोड़ेक जोएं मुर्तीइ पुजा कोअनारे बोणीत गोये, तेहेलेहे तुमू मा बोणहा. जेहलोहो वसन कोहे के, "माअहें खानेन पिने बोठे आन साकल्ये ओत कोइत नासे वोल्‍ये."✝10:7 निर्ग 32:6 8 जेहें कोइत तियां मेर्‍येए वारुज जोएं सिनालाआ पाप कोअयुतो, तेहलोहो आपू ने कोअहूं जोवे. तियांआं फल एहेलोहो जोड़्यो के, एकाज दिहोम तेवीस हाजार माअहें मोइत गोये.✝10:8 गणती 25:1-18 9 आन तियां मेर्‍येए थोड़हे प्रभुहू पारजाणीत पाल्यू तेहलोहो आपू ने पालुहूं जोवे.✝10:9 गणती 25:5-6 आन तियांहां हापों टोसीत माइत टाक्ये. 10 आन तियांआं होस मा टुटणाहां, जेहें कोइत तियांमेर्‍येए केतेहे जोएं टुटण्ये आन जमरायाआ*10:10 मोतोअ दुत आथे मोइत गोये.✝10:10 गणती 16:41-49

11 पोन ए आखी गोठी जे तियांपोअ पोड़्यीते, ते दुन्याआ आखरीइ वेलेपोअ रोनारा आपुहूं सेतावणी आपिइलोअ कोअते लेखाअयीही.

12 तियाहा काजे जो कोडू विसार कोअहे के "आंय वातड़ू उबू रोयुहू," तो सांबालित रोअहूं जोवे, एहेलामेहें पोड़ीत ते ने जाय. 13 माहुंउं सहन ने कोइत सेके एहेली कोड्लीज परिक्शामेहें तुमू नाहांजी पोड़्ये. देव खोरु होय आन तुमाआं सेक्ती रोत जाअखी परिक्शाम ने पोड़ुहूं देये, पोन परिक्शाम रोत निहींइलोअ वाट बी मोकली कोइत आपे के तुमू सहन कोइत सेकहा.

14 तियाहा कोत माआं मेराला पाव्हीइला, मुर्तीइ पुजा रोत सेटे रोवा. 15 आंय तुमाअरी समजदार माअहें जाइंत गोठी कोअहो: आंय जो कोहो तों तुमू फारका. 16 जो "धन्यवाद कोइलोअ वाटकू" जिहीं पोअ आपू धन्यवाद कोअतेहे; तो ख्रिस्ताआ रक्ताआ भागिदार होय के नाहां? जो रोटू आपू मुड़तेहे, तो ख्रिस्ताआ डिलोअ भागिदार होय के नाहां? 17 एताआ कोअते के एकुज रोटू होय, ताहां आपू बी जें वादार जोएं होय तें एकाज डिलोअ भाग होय, काहाके आपू आखे तिया एकाज रोटामेहें भागिदार ओवतेहे.

18 इस्राएलवाला माअहोंहों पाला, जें गाराहा आपल्यी वस्तु खातेहे, तें देवान्याअरी मोन्ज्ये देवोअ सेवामेहें भागिदार नाहां बोणते के? 19 फाशोअ आंय कि कोहो? केहें मुर्तीइ पुंजल्यी वस्तु कि तेबी होय के, मुर्ती कि तेबी होय? 20 किज नाहां! जें माअहें मुर्तीही गाराहा आपतेहे; तें देवोअ काजे नाहां, पोन पुतोअ काजे गाराहा आपतेहे आन तुमू पुतोअरी भागिदार बोणुहूं जोवे एहलीही माआं इश्शा कायनाहां. 21 तुमू प्रभुउ वाटकामेहें आन पुतोअ वाटकामेहें, बेनुमेहें रोत नाहां पित सेकते. तुमू प्रभुउरी आन पुतोअरी, बेनुउरी भागिदारी नाहां कोइत सेकते. 22 केहें आपू देवोहो खोत लागाड़ुहूं होदतेहें के? केहें आपू तिया रोत सेक्तीमान होय के?

23 तुमू कोहा, "माहूं आखोज कोइलाआ परवानगी होय." खोरो होय, पोन आखोज कोइलोअ ठीक कायनाहां. "आखी वस्तू माआं काजे ठीक तोम होय," पोन आखी वस्तु कामोम आवेहे एहेलोहो नाहां.✝10:23 1 करिन्थ 6:12 24 कोडो बी सोताआ हाजाआ काजे एतोज नाहां, पोन बिहीराआ बी हाजो पालुहूं जोवे.

25 जों कि बी बाजारोमेहें वेसातो जोड़ेहे, तों मोनोम विण सौंसु कोअयेज खावा. 26 "काहाके धरती आन धरती पोअ जों बी होय तों आखो प्रभुउ होय."✝10:26 भजन 24:1

27 जर बिगर विश्वासी माअहूंमेहें रोत एखु तुमुहूं नेवतो आपे, आन तुमाआं जाअलाअ इश्शा ओय, ताहां जों किबी तुमाआं आगाड़ी वाटू कोए, तों खाताम मोनोम किज सौंसु मा कोअहा; 28 पोन एखु तुमुहूं कोय, "ओं कांय मुर्तीही पुंजल्यो होय," ताहां तिया कोनाराआ वाखरी मोनोम काविंहीं सौंसु ओय ताहां मा खाही. 29 माआं कोअलाआ अर्थ ताआ मोनोम काविहीं नाहां, पोन तिया बिहीराआ मोनोम काविहीं सौंसु ओय काजे कोहो. आंय मोकलू ताहरुउ होंव, पोन बिहीराआ विसारोवाअहीं आंय काहा फारकाअहूं जोवे? 30 जर आंय आभार मानित कोइत रोटू खाअलोम सामिल ओवतुय, ताहां जेहेलाम आंय आभार मानोहों तेहेलाम माआं बदनामी काहा ओवेहे?

31 तियाहा काजे तुमू खावा नेत पिवा, नेत जों किबी कोआ, आखो देवोअ महिमाआं काजे कोआ. 32 तुमू यहुदीइ, युनानीइ, आन देवोअ मंडड़ीही अड़सन टाकनारे मा बोणहां. 33 जेहें कोइत आंय बी आखी गोठीमेहें आखाहा खुस कोइलोअ कोशित कोअहो, आन माआं एतोज नाहां, पोन बिहीराआ हाजाआ काजे बी कोशित कोअहो जिया वाअहीं तियांआं तारण ओत सेके.