1करिन्थ 9

प्रेशितोअ आधिकार आन काम

1 आंय सुटलू कायनाहां के? आंय प्रेशित कायनाहां के? आंय आपाआ प्रभु ईसु ख्रिस्ताहा नाहां देख्यू के? केहें तुमू प्रभुमेहें माआं बोणावल्ये नाहां के? 2 आंय बिहीराआ कोअते प्रेशित ने ओय, तेबी तुमाआं कोअते ते होय; काहाके तुमू प्रभुमेहें तुमू माआं प्रेशित पदोअ सिक्कु होय.

3 जें माहूं प्रश्न फुसतेहे, तियांआं कोअते ओंज माआं उत्तर होय: 4 खाअलोन पिइलोअ आधिकार आमुहूं कायनाहां के? 5 बिहीरा प्रेशित, प्रभुउ पाही आन केफा ए कोअताहा तेहलोहो आमुहूं एखु विश्वासी पोर्‍यीइरी वेहवाल कोइत आरी लेत फिरीइलोअ आधिकार कायनाहां के? 6 नेत माहूं आन बरनबासोहो एतुज कामाय सोड़ीइलाअ आधिकार कायनाहां के? 7 कोडू सोताआ पोशा खर्स कोइत सिपायड़ाआ काम कोअहे? कोडो दाराक्शाआ मोलु लागाड़ीत तियाआ दाराक्शे नाहां खातो? कोडो मेडाआं राखवाली कोइत तियांआं दुद नाहां पितो?

8 केहें आंय ए गोठी माहुंउं रितीइ पुरमाणे कोहो के? 9 काहाके मोशेए कायदामेहें बी लेख्योहो, "मोले तेहेलाम बोलदोअ सोबी मुंहके मा बांदहा." केहें देव बोलदोअ एतुज कालजी कोअहे के? 10 के खास मोन्ज्ये आपाआ काजे कोहे? होव! आपाआ काजेज लेखाअयोहो, काहाके खेड़नारो आशा मिकीत खेड़ुहूं जोवे आन मोलनारो विराआ आशा मिकीत मोलुहूं जोवे. 11 आमू तुमाआं काजे आत्मिक गोठी ओअयी, ताहां आमू तुमामेहें दुन्यादारीइ गोठी वाडहूं तिहींमेहें कि वोडी गोठ होय?

12 बिहीरे जाआं यी गोठीम भागिदार बोणतेहे, ताहां आमू तियां रोत जाअखा काहा ने बोणीत सेको?

पोन आमू ओ आधिकार नाहां वापरीइता; काहाके आमू ख्रिस्ताआ हाजी बातमीइ कोअते अड़सन ने बोणुहूं जोवे कोत आखोज सहन कोअताहा. 13 जे मंदिरोमेहें सेवा कोअताहा, ते मंदिरोमेर्‍योअ खाताहा; आन जे देवान्याअ सेवा कोअताहा ते देवान्याअरी गोवांद्या ओवताहा, ओं तुमुहूं नाहां मुंदू के? 14 तियाहा काजे प्रभु बी ठरव्योहो के, जे हाजी बातमीइ परसार कोअताहा, तियांआं जिवीइलोअ सोय हाजी बातमीज वाअहीं ओवुहूं जोवे.✝9:14 मत्तय 10:10; लुक 10:7

15 पोन इंहींमेहें रोत कोड्लीज गोठ मी नाहां वापर्‍यी, आन ए गोठी आंय एताआ काजे बी नाहां लेख्यी के, माआं कोअते एहेलोह कोअहूं जोवे, ओं माआं वोडाय कोइलोअ वाया जाय तेतोहो जी आंय मोइत जाहीं तो हाजो आवे. 16 जर आंय हाजी बातमीइ परसार कोअहो, ताहां यामेहें वोडाय कोअहूं सारकी कीज गोठ कायनाहां; काहाके ओं ते माआं काजे कोअयाआ भाग होय. जर आंय हाजी बातमीइं परसार ने कोओ ताहां मापोअ दुख आवुहूं जोवे! 17 जर आंय माआं मोर्जी वाअहीं ओं कोअयो ताहां माहूं मोजरी जोड़े, जर माआं मोर्जी वाअहीं ने बी कोओ तेबी ओं काम देवे माहूं होप्योहो. 18 ताहां माआं कि मोजरी होय? ओंज के आंय देवोअ हाजी बातमीइं परसार कोओ, ताहां ख्रिस्ताआ यी हाजी बातमीहीं आंय मुफ्त्यी कोइ देंव, तेतोज नाहां पोन हाजी बातमीइं जो बी माआं आधिकार होय तो एकसोट्युज ने वापरो.

19 काहाके आंय कोडाअरी बांदाअलू ने ओतू, तेबी आंय जाअखीलाहां माअहुंहूं खेसीत लेतावीलोअ कोअते सोताहाज आखाआ गुलाम बोणीत गोयुहू. 20 आंय यहुद्याहां खेसीत लेतावीलोअ कोअते यहुदी बोण्यू. जे मोशेए कायदाम बांदाअला होय, तियांआं वोतीइ आंय बांदाअलू कायने तेबी तियांहां खेसीत लेतावीलोअ कोअते, मोशेए कायदाम बांदाइत गोयू. 21 आंय देवोअ कायदाआ विरुद्दाम कायनाहां, पोन ख्रिस्ताआ कायदामेहें होय तिहीं वाअहीं, जे विणकायदाआ होय तियांहां खेसीत लेतावीलोअ कोअते आंय तियांआं वोतीइ विणकायदाआ माअहोंअ होस बोण्यू. 22 आंय लुलाहां खेसीत लेतावीलोअ कोअते लुलाआ होस बोण्यू. आंय आखाआ वोतीइ आखोज बोण्यू मोन्ज्ये केहेन केहें कोइत तियांहां वासाड़ीत सेको.

23 आंय ओं आखो बादो हाजी बातमी परसार कोइलोअ कोअते कोअहो, मोन्ज्ये बिहीराअरी गोवांद्यू बोणीत सेको.

विश्वासोमेहें गुगदीइलो

24 ओड़बीपोअ गुगदीइनारा आखाज गुगदीइताहा, पोन बक्शीस एकाज जोओंहों जोड़ेहे, ओं तुमुहूं कायनाहां मुंदू के? तुमू तेहेंज कोइत गुगदा मोन्ज्ये जिकीत सेकहा. 25 हारेक पेहेलवान आखी गोठी ताबाम मिकत्लू; तो तोम एका कोमाअनारा बक्शीसोअ काजे ओं आखो कोअत्लू, पोन आपू तोम केदीहींज ने कोमाअनारा बक्शीसोअ काजे कोअताहा. 26 तिहींज वाअहीं तोम आंय एहेंज कोइत गुगदोहो, पोन विणथापेज नाहां; आंय कुस्ती रोमनाराआ होस रोमोहों, पोन तियाआ होस वाराअरी कुस्ती नाहां रोमतु. 27 आंय माआं डिलोहो माआं ताबामेहें मिकोहो, एहेलोह ने ओवुहूं जोवे के आंयज बिहीराहा परसार कोइत सोताहा विणकाम्यु ठरो.