1 आंय एहेलिही जाआं बातमी उनाअहो के तुमामेहें सिनालो ओवेहे, तेतोज नाहां, पोन बिगर यहुदी माहूंमेहें जाआं एहेलोहो सिनालाअ काम नाहां ओवतो के एक माटी तियाआ आब्हाआ बिहीरी लाडीही* राखत्लू.✝ 2 तेबी तुमुहूं वोडाय केहें? उलटो तुमुहूं दुख लागुहूं जोवतोतो, आन जिये कोडे ओं काम कोअयो तियाहा संगतीम रोत काडीत टाकुहूं जोवे. 3 आंय तोम डिलो वाअहीं तुमा रोत सेटे होय, पोन आत्मा वाअहीं तुमाआं जागे हजर होय. आंय तुमाआं जागे हजर होय जेहें जांइत जिये एं जुदे कामें कोअये तियाआ बाप्तिम न्यायनिवाड़ु कोइ देदुहू. 4 काहाके जेहेलाम तुमू आपाआ प्रभु ईसुउ नावोवाअहीं टोलू वोलहा तेहेलाम प्रभु ईसु ख्रिस्ताआ सेक्ती आन माआं आत्मा तुमाआं जागे हजर रोय. 5 तुमू एहेला माट्योहो डिलोम आरवात जाय तेहें काजेहे सैतानोहो होपी देअहूं जोवे, एताआ काजे तियाआ आत्मा प्रभु ईसुउ आविइलोअ दिहोमेहें वासाइत जाय.

6 तुमू जे वोडाय कोअताहा ओं नाहां हाजो, "जारकीज सोड़ू आखवा लोटोअ उंडाहा फुगाड़ी देहे," ए गोठ तुमुहूं नाहां मुंदू के? 7 तियाहा काजे तुमू तुमामेर्‍युउ जुनू खमीर काडीत सोताआ जिवोहो सोको कोआ, एताआ काजे के नोवा केलवीइल्‍या लोटोअ उंडू तुमू बोणीत सेकहा; मोन्ज्ये तुमू बिगर खमीरोअ बोणीत सेकहा. आपाआ बी वल्हांडण तिवारोअ गाराहा कोइलोअ काजे गिद्लू जो ख्रिस्त होय तिये जिव आप्यू. 8 तियाहा काजे आवा, आपू तिवार कोअहूं, जुना सोड़ा वाअहीं नाहां ,आन बाक्ताय आन खाराब कामोंअ सोड़ा वाअहीं नाहां, पोन खोरी आन सिदी गोठीइ बिगर खमीरोअ रोटा वाअहीं तिवार कोआ.

9 आंय तुमुहूं माआं पत्राम लेख्योहो के सिनालो कोअनारा माअहोंअरी सबंध मा मिकहा. 10 आंय एहें नाहां कोतू के सिनालो कोअनारे, लालसी, लुसड़ाय कोअनारे नेत मुर्तीइ पुजा कोअनारे एहेलां माअहोंअरी बिलकुल सबंध मा मिकहा; काहाके तेहलोहो ओय ताहां तुमुहूं यी दुन्यामेहें रोत निहींत जाअहूं पोड़नारो. 11 पोन माआं कोअलाअ अर्थ ओं होय के, जर एखू विश्वासी पाही ओय, आन तो सिनालो कोअनारु, लालसी नेत मुर्तीपुजा कोअनारु, निंदा कोअनारु, पिदाड़ आन बांड ओय, ताहां तियाअरी सबंध मा मिकहा; एहेलां माअहोंअरी रोटू बी मा बोहीत खाहा.

12 काहाके जें मंडड़ीइ बारथे होय, तियांआं न्यायनिवाड़ु कोइलोअ माआं काम नाहां; तेताआ वोतीइ जें मंडड़ीमेहें होय तियांआं न्याय तुमू काहा नाहां कोअता? 13 पोन देव बारथेवालाआं न्यायनिवाड़ु कोअत्लू काजे, जेहलोहो वसन कोहे, "तुमू तिया खाराब माहुंहूं तुमाम रोत बारथे काडा."