1 माआं पाव्हीइला, जेहेलाम आंय देवोअ निकाअली सत्य गोठी तुमाआं जागे लेतायू, ताहां वोडे शब्दे नेताहां वोडी हिकवोण लेत नाहां आयू. 2 काहाके क्रुस खांबोपोअ टांगल्या ईसु ख्रिस्ताआ गोठी सोड़ीत माहूं बिहीरी कोड्लीज गोठ ने मुंदू जोवे एहेलोह आंय ठरव्योतो. 3 आंय तुमाआं जागे आयू, ताहां कमजोर, बितू बितू आन थुर थुर कापतुज आयू.✝ 4 आन माआं हिकवोण आन बाशणोमेहें मोनव्योअ ओकले वाईं हुशारीइ गोठी नाहां, पोन देवोअ आत्माआं सेक्तीइ पुरावू ओतू. 5 मोन्ज्ये तुमाआं विश्वास मोनव्योअ ओकले पोअ नाहां, पोन देवोअ सेक्ती पोअ रोअहूं जोवे.

6 तेबी जें आत्मामेहें मजबुत होय, तियांहां आमू जे ओकल देताहा. ते ओकल यी दुन्याआं, नेत दुन्याम आरवाअनारा आधिकार्‍योअ ओकल नाहां. 7 पोन देवोअ ते दोड़पाअली गोठ्यी आमू कोत आपताहा, जे गुप्त रोयी, आन जे देवे आपाआ महिमा काजे दुन्या बोणिइलोअ पेल ठरव्यीते. 8 ते देवोअ ओकल यी दुन्याआं कोड्लाज आधिकार्‍योहों ने मुंदू ओतू, जर तियांहां मुंदू जातू, ताहां ते महिमावाला प्रभुहू क्रुस खांबोपोअ ने टांगता. 9 पोन जेहलोहो वसनोम लेख्योहो,

"जे गोठी डोए ने देख्यी आन कानो ने उनाअयी

आन कोडाआ मोनोम ने आयी,

ते गोठ्यी देवोपोअ मेर कोअनाराआं वाटू तियार कोअयीही."

10 पोन देवे ते तियाआ आत्मा वाअहीं आपुहूं प्रगट कोअयी, काहाके ओ आत्मा आखी गोठ्यी, तेतोज नाहां, पोन देवोअ दोड़पाअली गोठी बी होदीत काडेहे. 11 फक्त आपामेहें रोनारी आत्माज आपाआ गोठी जाअहें, तेहलोज देवोअ आत्माज देवोअ गोठी जाअहें. 12 आपुहूं दुन्याआं आत्मा नाहां, पोन देवोअ आत्मा जोड़्युहू, याअ काजे आपुहूं देवे आपल्यी गोठी ओलखीत लेअहूं जोवे.

13 ताहां, आमू मोनव्योअ ओकले वाअहीं सिकाड़ल्‍या शब्दामेहें नाहां, पोन आत्मिक गोठ्यी आत्मा वाअहीं सिकाड़ल्या शब्दामेहें तियांहां कोत आपताहा. 14 सादो माहुंउं देवोअ आत्मिक गोठीहीं नाहां स्विकारतो, काहाके ते गोठी तियाआ नजरेमेहें फोगायीइ गोठी होये, ते तियाहा नाहां समजाअती, काहाके एहलीही गोठी आत्मा वाअहीं समजुहूं पोड़ेहे. 15 जियापोअ आत्मा होय तों माहुंउं आखी गोठी फारकेहे, पोन तियाहा बिहीरो कोडो नाहां फारकीत सेकतो. 16 काहाके वसन कोहे,

"प्रभुउ मोन कोडे ओलख्यो?

जो तियाहा सिकाड़ीत सेके?"

पोन आपामेहें तोम ख्रिस्ताआ मोन होय.