1 माहें आमुहूं ख्रिस्ताआ सेवक आन देवोअ निकाड़ल्‍यी गोठीइ कारभारी कोत समजुहूं जोवे. 2 ताहां तिया कारभार्‍योमेहें ए गोठ देखाअहूं जोवे के तो इमानदार रोअहूं जोवे. 3 पोन माआं काजे ए हानी गोठ हासवाअहे के, एखू मोनवी न्यायाधिश माआं न्यायनिवाड़ु कोए, आंय सोताहा जाआं माआं न्यायनिवाड़ु नाहां कोअतू. 4 काहाके माआं मोन माहूं सुक ने देखाड़तोय, तेबी आंय निर्दुस नाहां ठरतू. काहाके माहूं फारकीइनारु प्रभुज होय. 5 तियाहा काजे जाअहूं जाआं प्रभु ने आवे ताअहूं जाआं कोडाआ न्यायनिवाड़ु मा कोअहा; तोज आंदारामेर्‍यीइ निकाअली गोठी उजालामेहें देखाड़े, आन मोनोअ गोठी उगाड़ीत काडे, तेहेलाम देवोअ तरफ से आखाआ तारीफ ओवे.

6 माआं पाव्हीइलां, आंय तुमाआं काजे माआं आन अपुल्लोसोअ उदाहरण वापरीत ए गोठी कोहो, यीं गोठीइ काजे तुमू आमापोअ रोत ओं सिकाइत सेकहा के जों लेखाअयोहो तिया रोत आगाड़ी कोडो ने जाअहूं जोवे, आन कोडाआ वोगेहे वोडाय ने कोअहूं जोवे आन कोडाआ विरुद्दाम वोडाय ने कोअहूं जोवे. 7 काहाके तामेहें आन बिहीरामेहें फरक पालेहे तो कोडू होय? आन तापोअ कि एहेलोह होय जों तुमे बिहीरापोअ रोत ने होद्यो? तु बिहीरापोअ रोत होदीत बी, ने होद्योय जेहें वोडाय काहा कोअहे के?

8 तुमापोअ आखी वस्तु होय ना? तुमू मालदार होय ना? आमू जाआं ने ओता तेहेंज तुमू राजा बोण्याहां ना? पोन हाजो होय, आमाआं इश्शा ओती के खोराखर तुमू राजा बोणुहूं जोवतोतो, मोन्ज्ये आमू बी तुमाअरी राज्य कोअता. 9 माहूं लागेहे के देवे आमुहूं मोतोअ डोंड होपल्‍या एहेलाहा आखरीइ प्रेशित बोणावयाहा, काहाके आमू दुन्याआं, देवदुतोओं आन माअहोंअ कोअते तमाशा जेहें ओत गोयाहा. 10 आमू ख्रिस्ताआ कोअते फोगा होय, पोन ख्रिस्तामेहें तुमू बुद्दीमान होय! आमू लुला होय, पोन तुमू वातड़े होय! आमुहूं अपमान जोड़ेहे! पोन तुमुहूं आदर जोड़ेहे. 11 यी घेड़ी जाआं आमू फुकल्या आन तोऱ्ह्या आन नागा होय, आन निर्‍ह्याज मार खाय खाय आन मोया मोया फिरताहा. 12 आन आमू मेहेंनत कोअताहा, सोताआ आथोवाईं काम कोअताहा, माअहें आमुहूं हारापतेहे, पोन आमू आशिर्वाद आपताहा, तें दोमतेहे, पोन आमू सहन कोअताहा. 13 तें आमाआं निंदा कोअतेहे, पोन आमू तियांअरी मेरेवाईं गोठी कोअताहा. ओमे जाआं दुन्याआं माअहें आमुहूं कोसरो समजीइतेहें.

14 आंय तुमुहूं लाजवाड़ीलोअ कोअते ए गोठी नाहां लेखतू, पोन माआं मेराला पोर्‍याआ होस हाजी गोठीइ ओर कोइत आपोहो. 15 काहाके ख्रिस्तामेहें दोहो हाजार पालक ओय, तेबी एकुज आब्हू होय, काहाके ख्रिस्त ईसुमेहें एकी होय तिहींवाईं तुमाआं जागे हाजी बातमी लेत आवित आंय तुमाआं आब्हू बोण्यु. 16 तियाहा काजे आंय तुमुहूं विनंती कोअहो के तुमू माआं होस साला. 17 एताआ काजे आंय तिमथ्याहा तुमाआं जागे मोकलोहो. प्रभुमेहें तो माआं मेरालू आन इमानदार बेटुह्हू होय. जेहें कोइत आंय मंडड़ीमेहें कोत आपोहो तेहेंज कोइत तो तुमुहूं ईसु ख्रिस्तामेहें माआं जिवन ओर कोइत आपे.

18 पोन तुमामेहें थोड़हे वोडाय कोइत फुगीत गोयेहे, तियांहां लागत्लो के आंय नाहां आवनारु. 19 तेबी जर प्रभुउ इश्शा ओय, ताहां आंय वेगुज आविहीं, आन जें वोडायी वाअहीं फुगेहे तियांआं गोठी नाहां, पोन तियांमेहें केतीही सेक्ती होय तों आंय पालित लेहीं. 20 काहाके देवोअ राज गोठीमेहें नाहां, पोन सेक्तीमेहें होय. 21 तुमुहूं कि जोवे? आंय डेंगार लेतुज आवो के, मेर आन हानाली आत्मा वाअहीं आवो?