1 मेर कोइलो ओ तुमाआं उद्देश जोवे, आन आत्मिक दानोअ इश्शा कोआ, खास कोइत भविश्यवाणी कोआ. 2 काहाके जों ओजाण्यी बाशामेहें गोठी कोअहे, तों माअहोंअरी नाहां, पोन देवोअरी गोठी कोअहे; काहाके तों कि गोठी कोअतोय तों कोडाहाज नाहां समजाअतो. तों आत्मामेहें पोआइत उंडे निकाअली गोठी गोगेहे. 3 पोन जों देवोअ संदेश कोहे, तों माअहोंअ काजे मदत, प्रोत्साहन आन होकेए गोठी कोत आपेहे. 4 जों ओजाण्यी बाशामेहें गोगेहे, तों सोताआ आत्माहां पान्गाड़ेहे; पोन जों भविश्यवाणी कोअहे, तों मंडड़ीही पान्गाड़ेहे.

5 तुमू आखे ओजाण्यी बाशामेहें गोगुहूं जोवे एहेलिही माआं इश्शा होय, पोन तिया रोत जाअखे तुमू भविश्यवाणी कोआ. काहाके ओजाण्यी बाशा गोगनारो जर मंडड़ी पान्गे तेहें काजे तियाआ अर्थ ने कोत आपे, ताहां भविश्यवाणी कोअनारो तिया रोत वोडो होय. 6 तियाहा काजे माआं पाव्हीइला, आंय जर तुमाआं जागेहे आवित ओजाण्यी बाशाम गोठी कोओ, आन तुमाआं फायदा काजे देवोअ दर्शनोअ गोठी, विद्या, देवोअ संदेश, नेत हिकवोणोअ गोठी ने कोत आपो, ताहां तुमाआं कि फायदू ओवे?

7 ए मोल्यी वस्तु बी जिहींमेहें जिव कायनाहां, मोन्ज्ये पावी, तंबिवरो यीं वस्तुम रोत बी आवाज ताहरुउ निहेंहे, पोन कोड्लू सालु वाजाड़्यू तों कि कोइत ओलखाय? 8 आन जर तुरीमेहें रोत आवाज साफ ने निहें, ताहां लड़ाय रोमीइलोअ कोअते कोडो तियार ओवे? 9 तेहेंज कोइत जर तुमू जिबी वाअहीं साफसुतरी गोठी ने कोअहा, ताहां जों तुमू गोगतेहे तों केहें कोइत समजाय? तुमू तोम हावाअरी गोठी कोअनाराआ होस ओत जाहा. 10 दुन्यामेहें केतीही जातीइ बाशा होय, पोन तियींमेहें रोत एक बी विण अर्थाआ बाशा कायनाहां. 11 तियाहा काजे जर माहूं एखी बाशाआ अर्थ ने समजाअयो, ताहां गोगनाराआ नजरेमेहें पारकु गोणाअहीं आन गोगनारो माआं नजरेमेहें पारको गोणाय. 12 तियाहा कोत तुमू जाहां बी आत्माआं दानोअ धुंदीम रोहा, ताहां ए कोशित बी कोआ के तुमाआं आत्माआं दान वादाड़ीइलो वाईं मंडड़ी पान्गुहूं जोवे.

13 तियाहा काजे जों ओजाण्यी बाशा गोगतोय, तियाहा तियाआ अर्थ बी कोता आवड़ुहूं जोवे कोत प्रार्थना कोअहूं जोवे. 14 तियाहा काजे जर आंय ओजाण्यी बाशामेहें प्रार्थना कोओ, ताहां माआं आत्मा प्रार्थना कोअहे, पोन माआं बुद्दी ठावकीज होय. 15 ताहां कि कोअहूं जोवे? आंय आत्मा वाअहीं बी प्रार्थना कोअहीं, आन बुद्दी वाअहीं बी प्रार्थना कोअहीं; आंय आत्मा वाअहीं गाविहीं आन बुद्दी वाअहीं बी गाविहीं. 16 नेत जर तु आत्मा वाअहीं एतुज धन्यवाद कोअही, ताहां ताआ धन्यवाद कोइलामेहें उनाअनारे माअहें कि कोइत "आमेन" कोय? काहाके तु कि कोहे तों उनाअनाराहा नाहां समजाअतो. 17 काहाके तु तोम वारुहूं धन्यवाद कोअहे, पोन बिहीराहा कीज आत्मिक लाभ नाहां जोड़तू.

18 आंय देवोअ आभार मानोहो के तुमा रोत वादार ओजाण्यी बाशामेहें गोगोहो. 19 पोन आंय मंडड़ीमेहें ओजाण्यी बाशाआ दोहो हाजार शब्दे गोगो, तेतुहू जी बिहीराहा सिकाड़ीइलोअ कोअते समजाय एहलेहे पासुज शब्दे गोगो, तों माहूं गोमे.

20 माआं पाव्हीइला, तुमू समजीइलाम पोर्‍याआ होस मा बोणहां; तेताआ जी खाराब गोठीम पोर्‍ये बोणा, पोन समजीइलाम सिहांणे बोणा. 21 कायदामेहें लेख्योहो के, प्रभु कोहे:

"ओजाण्यी बाशा गोगनारा वाअहीं,

आन बिहीराआ जिबानी वाअहीं

आंय यां माअहोंअरी गोठी कोअहीं,

तेबी एं माआं गोठी ने उनाय."✝14:21 यश 28:11,12

22 तियाहा काजे ओजाण्यी बाशा विश्वास कोअनाराआ काजे नाहां, पोन बिगर विश्वासीइ कोअते निशाणी होय; आन भविश्यवाणी बिगर विश्वासीइ कोअते, नाहां पोन विश्वास कोअनाराआ काजे निशाणी होय.

23 जर मंडड़ी एकी जागे टोलू वोलीत रोय, आन आखेन आखे ओजाण्यी बाशामेहें गोगे, आन तिहीं बिगर विश्वासी मांयते आवे, ताहां तें तुमुहूं गांडवात गोयेहे एहें ने कोय के? 24 पोन जर आखेज भविश्यवाणी कोए वोले, आन एखु बिगर विश्वासी नेताहां बारथेवालो माय आवित लागे, आन तुमू आखे गोगतेहे तों उनाय, ताहां तियाआ गुनू तियाहा मुंदू पोड़ीत जाय, आन आखे तियाहा दोशी ठरवे आन फारकीत लेय. 25 आन तियाआ मोनोमेर्‍यीइ गोठी मुंदू पोड़ीत जाय, आन ताहां तों मांड्या पोड़ीत देवोहो वोंदे, आन मानित लेय के, "खोरीज देव तुमाआं विसमेहें होय."

26 तियाहा काजे माआं पाव्हीइला, कि कोअहूं जोवे? तुमू जेहेलाम मंडड़ीमेहें टोलू वोलहा, ताहां तुमामेर्‍याआ हारेक जोओंअ मोनोम भजन, शिक्शण, प्रगटीकरण, ओजाण्यी बाशा गोगीइलो नेत ओजाण्यी बाशाआ अर्थ कोत आपिइलोअ काजे तियार रोहे. आखो बादो मंडड़ीही पान्गाड़ीइलो काजे रोअहूं जोवे. 27 जर ओजाण्यी बाशाम गोगीइलो रोयो, ताहां बेन नेताहां जास्तीज जास्ती तीन जोओं गोगुहूं जोवे, एक वारीम एकुज जोओं गोगुहूं जोवे, आन एक जोओं तियाआ अर्थ कोत आपुहूं जोवे. 28 पोन जर अर्थ कोत आपनारो ने ओवो, ताहां अन्य बाशा गोगनारो मंडड़ीमेहें ठावको रोअहूं जोवे, आन जिवज्योअ मोनोमेहें आन देवोअरी गोठी कोअहूं जोवे.

29 भविश्यवक्तामेर्‍याआ बेन नेताहां तीन जोओं गोगुहूं जोवे, आन बाकी माअहें तियांआं गोगीइलो फारकुहूं जोवे. 30 पोन जर बोहनाराम रोत एखाहा देवोअ संदेश प्रगट ओवू, ताहां पेल्लोअ संदेश आपनारो ठावको रोअहूं जोवे. 31 काहाके तुमू आखे एक एक जोओं कोइत भविश्यवाणी कोइत सेकतेहे, मोन्ज्ये आखे सिकाय आन आखाहा होक जोड़े. 32 आन भविश्यवक्ताआ आत्मा भविश्यवक्ताआ ताबाम होय.

33 काहाके देवोहो गड़बड़ ने जोवे, पोन होक जोवे. जेहलोहो सोका माअहुंउं आखी मंडड़ीमेहें होये. 34 बोईं मंडड़ीमेहें ठावकी रोअहूं जोवे, काहाके तियींहीं मंडड़ीमेहें गोठी कोइलोअ परवानगी कायनाहां, तेहलोहो कायदाम*14:34 कायदाम यहुद्याआं कायदाम बी लेख्योहो. 35 जर तियींहीं काविंहीं सिकाइलोअ ओय, ताहां कोअ आवित सोताआ माट्योहो फुसुहूं जोवे, काहाके बोईंहीं मंडड़ीमेहें गोठी कोइलोअ बोराबर कायनाहां.

36 केहें देवोअ वसन तुमामेहें रोत निहींयोहो के? के तों तुमाआं जागे एतोज पोतोहो? 37 जर एखु सोताहा भविश्यवक्ता नेत आत्मिक माहुंउं समजीइतोय, ताहां तो जाइंत लेअहूं जोवे के, जे गोठी आंय तुमुहूं लेख्यीही, ते देवोअ आदेश होय. 38 पोन तों जर ने माने, ताहां तियाआ बी ने मानीइलो.

39 ताहां माआं पाव्हीइला, भविश्यवाणी कोइलोअ धुंदीमेहें रोवा आन ओजाण्यी बाशा गोगे तियांहां मा रुकहा. 40 पोन आखी गोठी वारुहूं आन हाजी हुतायी ओवुहूं जोवे.