डिल देवोअ महिमाअ काजे
12 एखु कोय, "आखी गोठी माआं काजे ठिकुज होय," पोन ते आखी गोठी लाभोअ कायनाहां; आखी गोठी माआं काजे नियमोअ पुरमाणे ते होय, पोन आंय काअलीज गोठीइ गुलाम नाहां बोणनारु. 13 एखु कोय, "रोटू पोटाआ काजे, आन पोटू रोटाआ काजे होय." ओं खोरो होय, पोन देव यां बेनुहूं आरवी देय. डिल सिनालो कोइलो कोअते नाहां, पोन प्रभुउ सेवा कोइलो काजे होय; आन प्रभु डिलोअ गरज पुरी कोअहे. 14 देवे तियाआ सेक्ती वाअहीं प्रभुहू मोल्याम रोत जिवाड़्यू, आन तो आमुहूं बी जिवाड़े.
15 केहें तुमुहूं नाहां मुंदू के तुमाआं डिल ख्रिस्ताआ डिलोअ भाग होय? ताहां केहें आंय ख्रिस्ताआ डिलोअ भाग लेत कोइत रांडीइ डिल बोणावो के? बिलकुल नाहां! 16 केहें तुमुहूं नाहां मुंदू के जों कोडो रांडीइरी हेंगात कोअहे, तों तियीइरी एक मोन ओत जाहे? काहाके लेख्योहो, "तें बेनू एक डिल ओवे."6:16 मार्क 10:8 17 आन जो प्रभुउ संगतीम रोहे, तो तियाअरी आत्मामेहें एक ओत जाहे.
18 सिनालो कोइलो रोत वासाइत रोवा. जे बिहीरा पाप माहुंउं कोअहे ते डिलोअ बारथेए होय, पोन सिनालो कोअनारु सोताआ डिलोअ विरुद्धामेहें पाप कोअहे. 19 केहें तुमुहूं नाहां मुंदू के तुमाआं डिल तुमामेहें रोनारा पवित्र आत्माआं मंदिर होये, आन तों देवोअहीं रोत तुमुहूं जोड़्योहो? आन तुमू सोताआ काजे कायनाहां, पोन देवोअ काजे होये. 20 काहाके तिये तुमुहूं किंमत आपित कोइत वेसाते लेदेहे, तियाहा काजे तुमू सोताआ डिलो वाअहीं देवोअ महिमा कोआ.