2 Tessalonicenses 3

आमाआं काजे प्रार्थना कोअजा

1 आखरी पोअ, आमाअ पाव्हीइला, आमाआं काजेहे प्रार्थना कोअते रोजा के प्रभुउ वसन वेगो पसरुहूं जोवे आन महिमा जोड़ुहूं जोवे, जेहलोहो तुमा मेहें ओवोहो, 2 प्रार्थना कोअजा के आमू बाक्ता आन पापी माअहूं रोत वासाइत रोंव, काहाके आखा माअहूं मेहें विश्वास नाहां रोतु.

3 पोन प्रभु इमानदार होय; तो तुमुहूं ताकते वाईं मजबुत कोए आन तिया पापी रोत वासाड़े. 4 आन आमुहूं प्रभु मेहें तुमापोअ पुरु भरिवसू होय, के आमू जो आदेश तुमुहूं आपताहा, तियाहा तुमू मानतेहे, आन मानते बी रोहा.

5 देवोअ मेर आन ख्रिस्ताआ धिरोमेहें प्रभु तुमाअ मोनोहों वादार हाजी वाट देखाडे.

आलहायीइ बाप्तिम सेतावणी

6 आमाआं पाव्हीइला, आमू तुमुहूं आपाअ प्रभु ईसु ख्रिस्ताआ नावसे आदेश आपताहा के, तुमू एहेला हारेक विश्वासी माअहूं रोत अलग रोवा, जे आलहायीइ जिवन जिवतेहे आन जे आमू आपल्यी सुसनाआं पालन नाहां कोअते. 7 काहाके तुमू सोताहा वारुहूं जांअतेहे, के जेहें कोइत आमू सालताहा तेहें कोइत तुमू बी सालुहूं जोवे, काहाके आमू तुमाअ विसमेहें ओता तेहेलाम केदिहींज आलहाय नाहां कोअयी. 8 आन कोडाअ रोटू फुकट्यू नाहां खादू; पोन मेहेंनत आन काम रात दिही कोअताते, काहाके तुमामेहें कोडा पोअ वोजू ने ओवुहूं जोवे.

9 आमुहूं तुमापोअ मदत मागीइलोअ आधिकार कायनाहां एहेलोह नाहां, पोन एताआ कोअते के; जेहलोहो आमू तुमाआं कोअते नमुना बोण्या तेहलोहो तुमू बी कोअहूं जोवे. 10 काहाके जेहेलाम आमू तुमाआं जागेहे ओता, तेहेलाम बी आमू तुमुहूं ओ आदेश आपताते के, "जर कोडाहा काम ने कोइलो ओय ताहां तों रोटू बी ने खाअहूं जोवे."

11 आमू ओं एताआ काजे कोताहा काहाके आमू उनाअताहा के, थोड़ेक जोएं तुमाअ विसमेहें होय, जे आलहायीइ जिवन जिवतेहे, आन बिहीराअ कामों मेहें आडांगू टाकतेहे. 12 एहेला माहुंहूं आमू प्रभु ईसु ख्रिस्ताआ नावोमेहें आदेश आपताहा आन समजाड़ताहा, के ठावकेज काम कोइत जिव जिवोअ कामायीइ रोटू खाया कोअहूं जोवे.

13 पोन माआं पाव्हीइला, तुमू हाजो कोइला मेहें मा थाकहा. 14 जर एखू या पत्रामेहें लेखल्यो वसन ने माने, ताहां तिया पोअ नजर मेकजा, आन तियाहा लाज आवुहूं जोवे काजे तियाअरी सबंध मा मिकहा. 15 पोन तियाहा दुस्मोन मा समजाहा, पोन पाही जांइत समजाड़ी द्या.

आशिर्वाद

16 ओमे प्रभु जो होक आपनारु देव होय, तो सोताहाज तुमुहूं हादाफल आन आखी जातीइ होक आपे. प्रभु तुमा आखाअरी रोये.

17 आंय पौलुस, माआं सोताआ लेख्यामेहें ओं सलाम लेखोहो. आंय आखा पत्रा मेहें माआं सही कोअहो; माआं लेखीइलोअ पद्धत एज होय.

18 आपाअ प्रभु ईसु ख्रिस्ताआ मेरवानी तुमा आखापोअ ओवती रोय.