21 एक वेल एहेलिही ओती के तुमू देवोअरी पारके जेहें ओते, आन तुमाअ खाराब कामोअ वाखरी मोनोवाअहीं तियाआ दुस्मोन जेहें ओते. 22 पोन ओमें, देवे तियाआ बेटाह्हाअ मोतोअ गाराहा वाअहीं तुमुहूं तियाआ दोस्ती बोणावयाहा, याअकाजे के तियाआ सामने पवित्र, सोका, आन निर्दुस जेहें मिकीत सेके. 23 पोन तुमू विश्वासोम मजबुत रोअहूं जोवे: आन तियी हाजी बातमीइ आशा जे तुमू उनाअयेहे ते मा सोड़हा. आन जे हाजी बातमी जुगोअ थुड़ते पुरी कोलीइ माअहुंहूं उनाइलोअ सान्सो जोड़्योहो, तियीइ आंय पौलुस सेवक बोण्‍युहूं.