1 तेहेलाम योने तिया मासाआ पोटाम रोत तियाआ देव यहोवाहा प्रार्थना कोइत कोयो;

2 "आंय तारासोम पोड़ल्युज यहोवा देवोहो प्रार्थना कोअयी,

आन तिये माआं प्रार्थना उनाइत लेदी;

पातालोम रोत मी ताहूं हाद कोअयू,

आन तुमे हुदाअलीज माआ प्रार्थना उनाइत लेदी.

3 तुमे माहूं दोऱ्याम आखाम रोत बुंद्ये लागाड़ी देदू;

तिहीं माआं शारी सोमकीर निस्तो पाईंन पाईं ओतो.

तुमे पोड़कावल्या उपाड़ा

आन सेलका मापोअ साल्या कोअताते.

4 ताहां मी कोयो, ‘आंय ताआ सामने रोत काडी देवाअयुहू;

ओमे कि कोइत ताआ सोका मंदिरोहो फाशुउ आंय पालित सेकहीं?’

5 माहूं पाअयें एतुहू टापित लेदू

के माआ जिव निहींतीज जाअहूं कोअतुतो;

आन माआ मुंडीपोअ दोऱ्याआ हेंवालो वेट्लात रोयोतो.

6 आंय डोगोअ थुड़ोम लागीत गोयुतो;

आंय पुयींमेहें रेटात गोयुतो;

तेबी माआ प्रभु यहोवा,

तुमे माआ जिव मोतोअ खायाराम रोत उसे काड्यू.

7 जाहां आंय माआ जिव निहीत जाअहूं कोअतुतो, तेहेलाम आंय देवोअ ओर कोअयी;

आन माआं प्रार्थना ताआ जागे,

ताआ सोका मंदिरोम पोतीत गोयी.

8 जें माहें बिगर कामोअ वस्तूपोअ मोन लागाड़तेहे,

तें तिया वोडी मेरमायावाला देवोहो सोड़ी देतेहे.

9 पोन आंय तोम जोरे आवाजोम ताआ धन्यवादोअ गित गावीत ताहूं गाराहा आपीहीं;

जे पालनी आंय तोअयीही ते पुरी कोअहीं.

तारण देवोज पोअ रोत जोड़ेहे!"

10 ताहां यहोवा देवे तिया जुदा वोडा मासाहा आदेश आप्यू, आन तो मासू तिया योनाहा दोऱ्याआ मेरे आवित ओगालीत टाक्यू.