14 आन शब्द शरीर बोण्यो; आन मेरवानी आन सत्या वाअहीं पुरो ओवीत आमाआं विसमेहें वोहती कोअयी, आन आमू तियाआ एहेलिही महिमा देख्यी, जे आब्हाआ एखला बेटाह्हाअ महिमा ओये.
15 बाप्तिस्मा कोअनारे योहाने तियाआ बाप्तिमेहें साक्शी आप्यी, आन आअड़ी-आअड़ीइ कोयो के, "ओ तोज होये, जियाआ बाप्तिमेहें आंय कोताप्य के, जो माआं फासाड़ी आवेहे, तो मापरोत वादार होय, काहाके तो मारोत पेल ओतू."
16 तियाआ मेरवानीइं भारपुरी वाअहीं तो आपाअ काजे आशिर्वाद बोण्यु, आपू आखाहा तियाआ आशिर्वादोअ फासाड़ी आशिर्वाद जोड़्यू. 17 देवे मोशे वाअहीं नियम आप्यू, पोन मेरवानी आन सत्य ईसु ख्रिस्ता वाअहीं आयो.