1 फरिसी टोलाआ एक माटी ओतू, जियाअ नाव निकुदेमुस ओतो. तो यहुदीइ एक पुडारी ओतू. 2 तिये राती ईसुउ जागे आवित कोइत तियाहा कोयो, "गुरु, आमुहूं मुंदू होय के तू देवोअहीं रोते गुरु बोणीत कोइत आयुहू, काहाके कोडोज यां समत्कारोहों जे तू देखाड़ेहे, जर देव तियाअरी ने ओय, ताहां ने देखाड़ीत सेकतो."

3 ईसु तियाहा उत्तर आप्यो, "आंय ताहूं खोरीज कोहो, जर नवीन जल्म ने लेय, ताहां देवोअ राज कोडोज बी नाहां देखीत सेकतो."

4 निकुदेमुसे तियाहा कोयो, "जाहां माहुंउं डायो ओत जाहे, ताहां तों कि कोइत फाशोअ जल्म लेत सेकेहे? केहें तों तियाआ आयहीइ पोटामेहें बिहरीवारी फोहीत कोइत जल्म लेत सेकेहे?"

5 ईसु उत्तर आप्यो, "आंय ताहूं खोरीज कोहो, जाअहूं जाआं एखू माहुंउं पाईं आन आत्मा वाअहीं ने जल्म लेय, ताअहूं जाआं तो देवोअ राजोमेहें फोहीत नाहां सेकतो. 6 काहाके जो डिलो वाअहीं जल्म्योहो, तो डिल होये; आन जो आत्मा वाअहीं जल्म्योहो, तो आत्मा होय. 7 बोगलाअही मा के आंय ताहूं एहें कोयो, ‘ताहूं नविल जल्म लेअलोअ गरज होये.’ 8 हावा जेहें पोटे तेहें सालेहे, आन तु तियीइ आवाज उनाअहे, पोन नाहां जांअतू के ते का रोत आवेहे आन का जाहे? आन आत्मामेहें उब्जीइल्यो तो माहुंउं बी एहेलोज होये."

9 उत्तरोमेहें निकुदेमुसे कोयो, "ओं की कोइत ओत सेकेहे?"

10 ईसु तियाहा उत्तर आप्यो, "तू इस्राएलोअ वोडू गुरु ओत बी केहें ओं नाहां जांअतू? 11 आंय ताहूं खोरो कोहो के, आमुहूं जो मुंदू होये तोज कोताहा, आन आमू जो देख्योहो तियाआ साक्शी आपताहा, पोन तुमू जो आमू कोताहा तियाहा स्विकार नाहां कोअता. 12 जेहेलाम आंय तुमुहूं धरतीइ गोठी कोयी ताहां तुमू विश्वास नाहां कोअता, आन जर आंय तुमुहूं होरगाआ गोठी कोवें, ताहराआ कि कोइत विश्वास कोअहा? 13 कोडोज होरगामेहें नाहां सोढ्यो, निस्तु तोज जो होरगाम रोत उतर्‍यू, मोन्ज्ये माहुंउं बेटुह्हू जो होरगाम होये."

14 आन जेहें कोइत मोशे रानोमेहें हापोहो उसे आखल्युतो, तेहेंज कोइत जरुरी होये के माहुंउं बेटाह्हाहा बी उसे आखलुहूं जोवे. 15 काहाके जो कोडो तियापोअ विश्वास मिके तियाहा हादाफल्योअ जिवन जोड़े. 16 काहाके देवे दुन्यापोअ एतीही मेर कोअयी के, तिये तियाआ एखलू बेटुह्हू आपी देदू, एताआ काजे के जो कोडो तियापोअ विश्वास मिके, तो ने आरवाअहूं जोवे, पोन तियाहा हादाजल्म्योंअ जिवन जोड़ुहू जोवे. 17 देवे तियाआ बेटाह्हाहा दुन्यामेहें याअ काजे नाहां मोकल्यू, के दुन्याआ न्याय निवाड़ू कोए, पोन तियाहा याअकाजे मोकल्यू के दुन्याआ तारण ओवुहूं जोवे.

18 जो तियापोअ विश्वास कोअहे, तियापोअ डोंडोअ आदेश नाहां आवतू, पोन जो तियापोअ विश्वास नाहां कोअतो, तो दोशी ठरवात गोयोहो; याअकाजे के तिये देवोअ एखला बेटाह्हाअ नावोपोअ विश्वास ने कोअयू. 19 आन डोंडोअ आदेशोअ कारण ओं होये के उजालो दुन्यामेहें आयोहो, पोन माअहें उजाला रोत वादार आंदारापोअ मेर कोअयी, काहाके तियांआं कामे खाराब होये. 20 काहाके हारेक माहुंउं जो बाक्ते कामे कोअहे, तो उजालाआ आरी दुस्मोनी मिकेहे, आन उजालाआ आहने नाहां आवतो, काहाके एहेलोह ने ओवुहूं जोवे के तियाआ बाक्ते कामे मुंदू पोड़ीत जाये. 21 पोन जो सत्यापोअ सालेहे, तों उजालाआ आहने आवेहे, काहाके उजालामेहें ओं देखाइत सेके के तियाआ कामे देवोअ आदेशोअ पुरमाणे कोआयेहे.

22 याअ फासाड़ी ईसु तियाआ सेलांअरी यहुदीयाआ इलाखाम जातु रोयू; तो तिहीं थोड़ीक वेल रोत कोइत बाप्तिस्मा आपू वोल्यू. 23 तिहींज सलीम होयरोअ आहने एनोनोअ जागे योहान बी बाप्तिस्मा आप्या कोअतुतो, काहाके तिहीं खुब पाईं ओतो, आन माअहें आवित कोइत बाप्तिस्मा लेतेते. 24 योहान तेहेलाम जाआं जेलेम ने तोआयूतो.

25 तिहीं योहानोअ सेला एका यहुदीइरी* सोकायीइ बाप्तिमेहें सुलाअया. 26 आन तियां योहानोअ जागे आवित कोइत तियाहा कोयो, "गुरु, जो माहुंउं यारदेन खाडीइ तियी वोग ताअरी ओतो, आन जियाआ तुमे साक्शी आप्यीही; तो बाप्तिस्मा आपेहे, आन आखे माअहें तियाआ जागे जातेहे."

27 योहाने कोयो, "माहुंहूं होरगाम रोत ने आपे ताअहूं जाआं तियाहा कीज नाहां जोड़ीत सेकतो. 28 तुमू ताम सोताहाज माआं साक्शीदार होय के आंय कोयोतो, ‘आंय ख्रिस्त कायनाहां, पोन आंय ते तियाआ आगाड़ी मोकलाअयुहू.’ 29 वर तोज होय, जियाहा वोड़ली जोड़ेहे; पोन वोरोअ दोस्ती जो उबू रोत तियाआ उनाअहे, वोरोअ गोठी वाअहीं खुब खुस ओवेहे: ओमे माआं ए खुसी पुरी ओयीही. 30 गरजेए होय के तो वादे आन आंय कमी ओवो."

31 "जो उसे रोत आवेहे तो आखाम रोत वोडू होये; आन तो जो धरतीइ होय, तो धरतीइरी जुडाअलू होये, तियाहा काजे तो धरतीइज गोठी कोअहे: जो होरगाम रोत उतर्‍युहू, तो आखाम रोत उसे होये. 32 तिये जो किबी देख्योहो आन उनाअयुहू, तियाआ तो साक्शी आपेहे; पोन तियाआ साक्शी कोडोज नाहां स्विकारतो. 33 जिये तियाआ साक्शी स्विकार कोइत लेदी, तिये यी गोठीपोअ सिक्कु लागाड़ी देदू के देव खोरु होये. 34 काहाके जियाहा देवे मोकल्युहू तो देवोअ गोठी कोहे; काहाके देव तियाहा आत्मा मोजीत-मापीत आपेहे. 35 आब्हू बेटाह्हा पोअ मेर कोअहे, आन तिये आखी वस्तु तियाआ आथोम आपी देदीही.* 36 जो बेटाह्हा पोअ विश्वास कोअहे, हादाफल्योअ जिवन तियाआ होय; पोन जो बेटाह्हाआ नाहां मानतो, तो जिवनोहो ने देखे, पोन देवोअ खोत तियापोअ रोहे."