1 ईसु वल्हांडण तिवारोअ रोत सोव दिहोअ पेल बेथानीमेहें आवयू जिहीं लाजर ओतू, जियाहा ईसु मोल्याम रोत जिवाड़्युतो. 2 तिहीं ते तियाआ काजे रोटू तियार कोअयू; आन मार्था वाटु कोअयू, आन लाजर तियांमेहें रोत एक ओतू जो तियांअरी रोटू खाअलाअ काजे बोठुतो. 3 तेहेलाम मरिया जटामांसीइ आरदो लिटर जाअखीलोहो मोगो अत्तर लेत कोइत ईसुउ गुडापोअ हारीत कोइत तियीइ सिंग्या वाअहीं तियाआ गुडा नुश्‍या; आन अत्तरो वाअहीं आखो कोअ मोगो मोगो गोंदाओ वोल्यो. 4 पोन तियांअरी सेलामेर्‍युउ यहुदा इस्कार्योत नावोअ एक सेलू जो तियाहा तोइत आपनारु ओतू, तो कोनु वोल्यू, 5 "ओं अत्तर तिन होव सांदीइ रुप्यामेहें वेसीत कोइत गोरब्योहों काहा ने आप्यो?" संगमरमरोअ बासने

6 तिये ए गोठ याअकाजे नाहां कोयी के तियाहा गोरब्योंअ सिंता ओती, पोन याअकाजे के तो बांड ओतू, आन तियापोअ तियांआं पोशाआ खोत्ली रोतीते आन तियीमेहें जों किबी मिकाअलो रोतोतो, तों सोइत लेतुतो.

7 पोन ईसु कोयो, "यिही रोअहूं द्या. तियी ओं माहूं डाटीइलाअ दिहोअ काजे कोअयोहो. 8 काहाके गरीब ते सादा तुमाआं आरी रोतेहे, पोन आंय तुमाअरी सादाज नाहां रोनारु."

9 जेहेलाम यहुदीइ वोडी गर्दीही मुंदू पोड़्यु के तो बेथानिया मेहें होय, ताहां तें निस्ते ईसुउ काजे एतेज नाहां आये, पोन याअ काजे बी के लाजरोहो देखीत सेके, जियाहा तिये मोल्याम रोत जिवाड़्युतो. 10 ताहां मुख्य पुंजारां लाजरोहो बी माइत टाकीइलाअ कदर काड्यी. 11 काहाके याअ वाखरी वारुज यहुदी माहें तियांहां सोड़ीत ईसु पोअ विश्वास कोए वोल्येते.

12 बिहरे दिहे डाहटी गर्दीइ माअहें जें तिवारोमेहें आयेते ओं उनाअये के ईसु येरुसालेमोमेहें आवेहे. 13 तियाहा काजे तियां खारक्याअ डाली लेदी आन तियाहा मिलीइलाअ काजे निहींये, आन आअड़े वोल्ये, "होसान्ना! प्रभुउ नावसे आवनारु इस्राएलोअ राजा आशिर्वादीत होये!"

14 जेहेलाम ईसुहू एक गोदडीइ बासो मिल्यो; ताहां तो तिया पोअ बोहीत गोयू, जेहलोहो के वसनोमेहें लेख्योहो,

15 "ए सियोनोअ होयर, बिही मा;

देख, ताआ राजा गोदड़ीइ बासापोअ बोहीत आवेहे."

16 तियाआ सेला ए गोठी पेल ने समज्याते, पोन जेहेलाम ईसुउ महिमा देखाअयी, ताहां तियांहां ओर आयी के ए गोठी तियाआ बाप्तिमेहें वसनोमेहें लेखल्यी ओती, आन माअहें तियाअरी एहेंज कोइत वेवारो कोअयोतो.

17 ताहां तियां गर्दीइ माअहूं साक्शी आप्यी, जें तेहेलामेहें तियाअरी ओते जेहेलाम तिये लाजरोहो माहणोम रोत गोगाड़ीत कोइत मोल्याम रोत जिवाड़्युतो. 18 तिये ओ समत्कार देखाड़्युहू कोत तियां माअहूं उनात लेदोन ताहरेए तें तियाहा मिले आयेते. 19 ताहां फरिसी तियां तियांआं एकानेकाहा कोयो, "इत्वात खोरा, के तुमुहूं किज नाहां कोइत सेकाअतो. पाला, आखी दुन्या तियाआ फासाड़ी जानी वोल्यीही."

20 जे माअहें तिया तिवारोमेहें येरुसालेमो मेहें आराधना कोए आयेते तियांमेर्‍येए थोड़ेक युनानी ओते. 21 तियां गालीलोअ बेथसैदावाला फिलीप्पअ जागे आवित कोइत तियाहा रावणी कोअयी, "साहीब, आमाआं ईसुहू मिलीइलोअ होये."

22 फिलीप्पे आवित कोइत आंद्रियाहा कोयो, ताहां आंद्रिया आन फिलीप्पे जात कोइत ईसुहू कोयो. 23 ईसु तियांहां कोयो, ते वेल आवित लागीही के माहुंउं बेटाह्हाअ महिमा ओवे. 24 आंय तुमुहूं खोरीज कोहो, के जाअहूं जाआं गोंवोंअ दाणू पुंयींमेहें पोड़ीत कोइत मोइत नाहां जातु, ताअहूं जाआं तो एखलुज रोहे; पोन जाहां मोइत जाहे, ताहां गणतीइ बाहर फल आपेहे. 25 जो सोताआ जिवोह मेर कोअहे, तो तियाहा आरवी देये; आन जो यी दुन्यामेहें सोताआ जिवोह मेर नाहां कोअतो, तो हादाजल्म्याआं जिवनोअ काजे तियाआ राखवाली कोए. 26 जर एखो माआं सेवा कोअनारो ओय, ताहां माआं फासाड़ी आवे; आन जिहीं आंय होय, तिहीं माआं सेवक बी रोय. जर एखु माआं सेवा कोअनारो ओय, ताहां आब्हू तियाआ मानपान कोए.

27 "ओमे माआं दिल दुखी होय, ओमे आंय कि कोंव? ‘ए बा, माहूं यी दुखोअ वेलेप रोत वासाड़?’ पोन आंय याआज काजे यी वेलेए जागे पोतुहू. 28 ए बा, ताआ नावोअ महिमा कोओ."

ताहां जुगोम रोत ओ आवाज आयू, "मी तियाआ महिमा कोअयिही, आन फाशुउ कोअहीं."

29 ताहां तिहीं ओती ते गर्दी कोनी वोल्यी, "वादलो गाज्यो," बिहीरा कोयो, "एखु देवदुत तियाअरी गोग्यू."

30 यापोअ ईसु कोयो, "ओ होरगाआ आवाज माआं काजे नाहां, पोन तुमाआं काजे आयुहू. 31 ओमे यी दुन्याअ न्याय निवाड़ू ओवेहे, ओमे यी दुन्याअ आधिकार्‍योहो काडी देये; 32 आन आंय जर धरतीपोअ रोत उसे सोढवाइत जाहीं, ताहां आखाहा माआं जागे खेसिहीं."

33 एहेलोह कोत कोइत तिये ओं देखाड़्यो के तो केहेलिही मोते वाअहीं मोए.

34 या वाअहीं गर्दीइ माअहें तियाहा कोयो, "आमू कायदाअ ए गोठ उनाअयेहे के ख्रिस्त सादा रोये, ताहरुउ तू काहा कोहे के माहुंउं बेटाह्हाहा उसे सोढ़वीइलोअ गरज होये? ओ माहुंउं बेटुह्हू कोडू होय?"

35 ईसु तियांहां कोयो, "उजालो ओमे थोड़ीक वाआ जाआं होये, जाअहूं जाआं तो उजालो रोय ताअहूं जाआं साला, एहेलोह ने ओवुहूं जोवे के आंदारो तुमुहूं आवित केंडे; जो आंदारामेहें सालेहे तो नाहां जांअतो के कोड्ली वोग जाहे. 36 जाअहूं जाआं उजालो तुमाअरी होय, उजालापोअ विश्वास कोआ ताहां तुमू उजालाअ माअहें बोणीत सेकहा."

ए गोठी कोत कोइत ईसु जातु रोयू आन तियांआं नजरे रोत निकाइत गोयू.

37 तिये तियांआं सामने एता समत्कार देखाड़्या, तेबी तियां तिया पोअ विश्वास ने कोअयू; 38 काहाके यशया भविश्यवक्ताआ वसन पुरो ओवुहूं जोवे जों तिये कोयो:

"प्रभु, आमाआं संदेशोपोअ कोडे विश्वास कोअयुहू?

आन प्रभुउ वोडी ताकत कोडापोअ प्रगट ओवीही?"

39 तिहीं वाअहीं तें विश्वास ने कोइत सेके, काहाके यशया ओं बी कोयोतो:

40 "तिये तियांआं डोआ आंदला,

आन तियांआं मोन वातड़ो कोइ देदोहो;

एहेलोह ने ओवुहूं जोवे के ते डोआवाअहीं पाले,

आन मोनो वाअहीं समजे,

आन फिरे,

आन आंय तियांहां हुदारो."✝

41 यशया ए गोठी याअकाजे कोयी के तिये तियाआ महिमा देख्यी, आन तिये तियाआ बाप्तिमेहें गोठी कोअयी.

42 तेबी वारुज आधिकार्‍यों ईसु पोअ विश्वास कोअयू, पोन फरिसीइं धाके ते खुल्लाम खुल्ला ने मानताते, काहाके एहेलोह ने ओवुहूं जोवे के ते यहुदी आराधनालयोम रोत काडी देवाये: 43 काहाके तियांहां देवे आपल्‍या मानपानो रोत वादार माअहूं आपल्यू मानपान जाअखु गोमतुतो.

44 ईसु आअड़ीत कोइत कोयो, "जों मापोअ विश्वास कोअहे, तों मापोअ नाहां पोन माहूं मोकलीइनारा पोअ विश्वास कोअहे. 45 आन जों माहूं देखेहे, तों माहूं मोकलीइनाराहा देखेहे. 46 आंय दुन्यामेहें उजालाआ होस आयुहू, काहाके जों कोडो मापोअ विश्वास कोए, तों आंदारामेहें ने रोअहूं जोवे.

47 "जर एखु माआं गोठी उनाइत कोइत ने माने, ताहां आंय तियाहा दोशी नाहां ठरवीइतू; काहाके आंय दुन्याहा दोशी ठरवीइलोअ काजे नाहां, पोन दुन्याअ तारण कोइलाआ काजे आयुहू. 48 जो माहूं नाकारेहे आन माआं वसनोहो स्विकार नाहां कोअतो तियाआ न्यायनिवाड़ु कोअनारो तोम एक होय; तों मोन्ज्ये मी कोयोहो ओं वसन, तोंज आखरीइ दिहोमेहें तियाआ न्याय निवाड़ू कोए 49 ओं खोरो होय, काहाके आंय माआं वोगेहे रोत गोठी नाहां कोअयी; पोन आब्हू जिये माहूं मोकल्युहू तियेज माहूं की की कोअलोन की की गोगीइलो तो आदेश आप्युहू. 50 आन माहूं मुंदू होये के तियाआ आदेश हादाजल्म्योंअ जिवन होय. तिहींज वाअहीं आंय जों किबी गोगोहो, तों जेहलोहो आब्हे माहूं कोयोहो तेहेंज कोइत गोगोहो."