योहान 17

ईसुउ सोताआ काजे प्रार्थना

1 ईसु ए गोठी कोयी आन जुगोअहें पालित कोइत कोयो, "बा, ते वेल आवित लागीही; ताआ पोर्‍याअ महिमा कोओ के पोर्‍यू बी ताआ महिमा कोइत सेके, 2 काहाके तुमे तियाहा आखा मोनव्योंपोअ आधिकार आप्यू, काहाके जियांहां तुमे तियाहा आप्येहे तियां आखाहा तो कायम जिवन आपे. 3 आन कायम जिवन ओं होय के ते ताहूं एकनिस्ता खोरा देवोहो आन ईसु ख्रिस्ताहा, जियाहा तुमे मोकल्युहू, जाएं. 4 जो काम तुमे माहूं कोइलाआ काजे आप्योतो, तियाहा पुरो कोइत आंय धरतीपोअ ताआ महिमा कोअयिही. 5 बा! ओमे तू माआ महिमा जे दुन्या बोणाविलोअ पेल ताअरी ओती तियी महिमाअरी माहूं बी ताअरी महिमावालू कोअ.

सेलाआं काजे ईसुउ प्रार्थना

6 "आंय ताआ तियां माअहुंहूं देखाड़्योहो जियांहां तुमे दुन्यामेहें रोत माहूं आप्ये, ते ताआ ओते आन तुमे तियांहां माहूं आप्ये, आन तियां ताआ वसनोहो मानित लेदोहो. 7 ओमे तियां जाइंत लेदोहो के जो किबी तुमे माहूं आप्योहो तो आखो ताअहें रोत होय; 8 काहाके जे वसने तुमे माहूं आप्ये, आंय तियां वसनोहो तियांआं जागे पोताड़ी देदे; आन तें तियां वसनोहो स्विकार कोअये, आन खोराखर जाइंत लेदोहो के आंय ताआ जागे रोत आयुहू, आन विश्वास कोइत लेदुहू के तुमेज माहूं मोकलीइल्यू.

9 "आंय तियांआं काजे विनंती कोअहो; दुन्याअ काजे विनंती नाहां कोअतू, पोन तियांआंज काजे जियांहां तुमे माहूं आप्येहे, काहाके ते ताआ होय; 10 आन जो किबी माआं होय तो आखो ताआ होय, आन जो ताआ होय तो माआं होय, आन यांवाअहीं माआं महिमा देखाअयीही. 11 आंय ओमे फाशुउ वादार वेल दुन्यामेहें नाहां रोनारु, पोन एं दुन्यामेहें रोनारेहे, आन आंय ताआ जागे आवोहो. पवित्र बा, ताआ तिया नावोवाअहीं जो तुमे माहूं आप्योहो, तियांआं राखवाली कोओ के ते आपाअ होस एक रोअहूं जोवे. 12 जेहेलाम आंय तियांअरी ओतू, ताहां आंय ताआ तिया नावोअ ताकते वाअहीं, जो तुमे माहूं आप्योहो, तियांआं राखवाली कोअयी आन तिया आरवाअनारा बेटाह्हाहा सोड़ीत तियांमेर्‍योअ कोडोज ने आरवाअयो, याअकाजे के वसनोमेहें जों कोयोहो तों पुरो ओवुहूं जोवे.

13 "ओमे आंय ताआ जागे आवोहो, आन ए गोठी दुन्याम कोहो, के माआं खुसी तियांआं दिलोमेहें पुरी ओत जाअहूं जोवे. 14 आंय ताआ शब्द तियांआं जागे पोताड़ी देदोहो; आन दुन्या तियांअरी दुस्मोनी कोअयी, काहाके जेहेंकोइत आंय दुन्याअ नाहां तेहेंज कोइत ते बी यी दुन्याअ नाहां. 15 आंय ए रावणी नाहां कोअतू के तू तियांहां दुन्याम रोत विसीत ले; पोन ए रावणी कोअहो के तू तियांहां खाराबोप रोत वासाड़ीत मिक. 16 जेहेंकोइत आंय दुन्याअ नाहां, तेहेंज कोइत ते बी दुन्याअ नाहां. 17 सत्यावाअहीं ताआ काजे तियांहां सोके कोएए: ताआ वसन सत्य होये. 18 जेहेंकोइत तुमे माहूं दुन्याम मोकल्यू, तेहेंज कोइत आंय बी तियांहां दुन्याम मोकल्ये; 19 आन तियांआं काजे आंय सोताहा पवित्र ओवोहो, मोन्ज्ये तें बी सत्यावाअहीं पवित्र ओत सेके.

ईसुउ आखा विश्वास्याआं कोअते प्रार्थना

20 "आंय निस्तु तियांआंज काजे प्रार्थना नाहां कोअतू, पोन तियां काजे बी जे यांआं वसनोवाअहीं मापोअ विश्वास कोअनारे, 21 के ते आखे एक ओवुहूं जोवे; जेहेंकोइत तू ए बा मामेहें होय, आन आंय तामेहें होय, तेहेंज कोइत ते बी आपामेहें रोअहूं जोवे, जियावाअहीं दुन्या विश्वास कोए के तुमेज माहूं मोकल्युहू. 22 ते महिमा जे तुमे माहूं आप्यी आंय तियांहां आप्यीही, के ते तेहेंज कोइत एक रोअहूं जोवे जेहेंकोइत के आपू एक होय, 23 आंय तियांमेहें रोहीं आन तू मामेहें रोही जिया वाअहीं के ते पुरे ओत कोइत एक ओत जाय, आन दुन्या ओलखे के तुमेज माहूं मोकल्यू, आन जाईंत लेय के तुमे मापोअ मेर कोअयिही आन तेहेंज कोइत तियांपोअ बी मेर कोअल्यी.

24 "बा, माआं इश्शा होय के, जियांहां तुमे माहूं आप्येहे, तें बी जिहीं आंय होय, तिहीं माआं जागे रोअहूं जोवे, मोन्ज्ये जे महिमा तुमे माहूं आप्यीही, तियीही तेंबी देखीत सेके, काहाके तुमे दुन्या बोणिइलोअ पेल मापोअ मेर कोअयी. 25 ए धर्मी बा, दुन्या ताहूं ने ओलख्यु, पोन मी ताहूं ओलख्यु; आन माआं सेला बी जांअताहा के तुमेज माहूं मोकल्युहू. 26 आंय ताआ नाव तियांहां कोताप्यो आन कोतापतू रोहीं के जे मेर ताहूं मापोअ ओती ते तियांमेहें रोअहूं जोवे, आन आंय बी तियांमेहें रोअहूं जोवे."