योहान 15

दाराक्शाआ वेलो आन डाली

1 "खोरो दाराक्शाआ वेलो आंय होय, आन माआं आब्हू जागल्यू होय. 2 जे डाली मामेहें होय आन नाहां फलती, तियी हारेक डालीही तो वाडीत टाकेहे; आन जे फलतीही, तियींहीं तो जाअखी फले तेहें काजे सिंदीत टाकेहे. 3 तुमू तोम मी कोयोहो तिया शिक्शणो वाअहीं पेलुज रोत सोके ओवेहे. 4 तुमू मामेहें रोवा, आन आंय तुमामेहें रोहीं. जेहें कोइत फाकड़ी जर दाराक्शाआ वेलामेहें ने रोये, ताहां ते नाहां फलीत सेकती. तेहेंज कोइत तुमू बी जर मामेहें ने रोहा ताहां नाहां फलीत सेकते.

5 "आंय दाराक्शाआ वेलो होय आन तुमू फाकड़ी होये. जो मामेहें रोहे आन आंय तियामेहें रोहो, तों जाअखीलोहो फल आपेहे, काहाके मापरोत आंगे ओत कोइत तुमू किज बी ने कोइत सेकत्ले. 6 जों मामेहें नाहां रोतो, तों उगाअली डालीइ होस होये; आन एहेली डालीही टोलू कोइत आगीमेहें टाकी देतेहे, आन ते पेटाइत जातिही. 7 जर तुमू मामेहें आन माआं शब्दे तुमामेहें रोय, ताहां जो जोवे मागा आन तो तुमाआं काजे ओत जाये. 8 माआं आब्हाअ महिमा याज वाअहीं ओवेहे, के तुमू जाअखीलोहो फल लेतावे, ताहांज तुमू माआं सेला बोणहा. 9 जेहलीही देव आब्हे मापोअ मेर कोअयी, तेहेलीज आंय तुमापोअ मेर कोअहो; माआं मेरेमेहें टिकीत रोवा. 10 जर तुमू माआं आदेशोहो मानहां, ताहां माआं मेरेमेहें रोहा; जेहलोहो आंय माआं आब्हाआ आदेश मान्युहूं, आन तियाआ मेरेमेहें टिकीत रोहो.

11 "आंय ए गोठी तुमुहूं याअकाजे कोयीही, के माआं खुसी तुमामेहें रोये, आन तुमाआं खुसी पुरी ओत जाय. 12 माआं आदेश ओ होय, के जेहेलीही आंय तुमापोअ मेर कोअयी, तेहेंज कोइत तुमू बी एकमेकापोअ मेर कोआ. 13 यापरोत वोडी मेर कोड्लीज कायनाहां के कोडो तियाआ दोस्तीइ कोअते जिव आपे. 14 जो आदेश आंय तुमुहूं आपोहो, जर तो मानहां ताहां तुमू माआं दोस्ती होय. 15 ओमे रोत आंय तुमुहूं साकर्‍या ने कोंव, काहाके साकर्‍याहा ने मुंदू के तियाआ मालिख की कोअहे; पोन आंय तुमुहूं दोस्ती कोहो, काहाके आंय जे गोठी माआं देव आब्हाप रोत उनाअयू. ते आखी तुमुहूं कोत देदी. 16 तुमू माहूं नाहां निवड़्यू पोन मी तुमुहूं निवड़्येहे आन तुमुहूं नेम्येहे, के तुमू जात कोइत वादार फल लेतावुहूं जोवे आन तुमाआं फल टिकीत रोअहूं जोवे, के तुमू माआं नावसे जो किबी देव आब्हापोअ मागहा, ताहां तो तुमुहूं आपे. 17 आंय तुमुहूं यीं गोठीइ आदेश आपोहो के तुमू एकमेकापोअ मेर कोअहूं जोवे.

सेलाहां दुन्या सीस कोअत्ली

18 "जर दुन्या तुमाअरी दुस्मोनी कोअहे, ताहां तुमू जांअतेहे के तिये तुमा रोत पेल माअरी दुस्मोनी कोअयी. 19 जर तुमू दुन्याअ माहें रोते, ताहां दुन्या तियाआ कोर्‍याअरी मेर कोअती; पोन याअ कोअते के तुमू दुन्याअ नाहां, पोन आंय तुमुहूं दुन्याम रोत निवड़ीत लेदेहे. याआज काजे दुन्या तुमाआं आरी दुस्मोनी कोअहे. 20 जे गोठ आंय तुमुहूं कोयीते, सेवक मालख्योअ रोत वोडू नाहां रोतू, तियाहा ओर मिका. जर तियां माहूं तारास कोआड़्यू. ताहां तुमुहूं बी तारास कोआड़े; जर तियां माआं हिकवोण मान्यी, ताहां तुमाआं बी माने. 21 पोन ओं आखो बादो ते माआं नावसे तुमाअरी कोए, काहाके ते माहूं मोकलीइनाराहा ने ओलखीइत्ले. 22 जर आंय ने आवतू आन तियांअरी गोठी ने कोअतू, ताहां ते पापोअ दोशी ने ठरते; पोन ओमे तियांहां तियांआं पापोअ काजे किज बाहानु कायने. 23 जो माअरी दुस्मोनी मिकेहे, तो माआं देव आब्हाअरी बी दुस्मोनी मिकेहे. 24 जर आंय तियांमेहें ते कामे ने कोअतू जे बिहरे कोडेज नाहां कोअये, ताहां ते पापी ने ठरते; पोन ओमे ते तियां माहूं आन माआं आब्हाहा बेनुहूं देख्या आन बेनुउं आरी दुस्मोनी कोअयी. 25 ओं याअकाजे ओवयो के तो वसन पुरो ओवे, जो तियांआं कायदामेहें लेख्योहो: ‘तियां माअरी वायाज दुस्मोनी कोअयी.’

26 "पोन जेहेलाम तो हेंगात्यु आवे. जियाहा आंय तुमाआं जागे आब्हाअहीं रोत मोकलिहीं, मोन्जे सत्याआ आत्मा जो आब्हाअहीं रोत निहेंहे, ताहां तो माआं साक्शी आपे; 27 आन तुमू बी माआं साक्शीदार होय, काहाके तुमू सुरवाती रोत माअरी रोयाहा.